Sabaha ümidimizi artıranlar

Hər il tələbə qəbulu müsabiqəsində xüsusilə fərqlənərək, ən yüksək nəticə əldə edənlər gəncliyimizin intellektual elitasını təmsil edirlər. Onların təcrübəsi həm cəmiyyətdə, həm də məktəblərdə güclü təsirə malik örnək, nümunə rolunu oynayır. Bilik öncüllərinə qayğı göstərmək, onları həvəsləndirmək, inkişaflarına və potensial imkanlarının gerçəkləşməsinə kömək etmək, şərait yaratmaq dövlət tərəfindən daim diqqət mərkəzində saxlanılır.

Prezident İlham Əliyevin Sərəncamı ilə hər il Azərbaycanın ali məktəblərinə daxil olaraq yüksək bal toplayan tələbələrə Prezident təqaüdü verilir. Azərbaycan gəncliyinin intellektual elitasına göstərilən bu diqqət maddi stimuldan çox, güclü mənəvi dəstək, ruhlandırıcı amil rolunu oynayır, təhsildə sağlam yarış mühitinin yaranmasına təsir göstərir.

Bu il Prezident təqaüdünə layiq görülən şəxslər ölkənin 28 müxtəlif şəhər və rayonlarını təmsil edirlər. Təqaüdçülər arasında isə 59 nəfər regionlarda fəaliyyət göstərən məktəblərdən (o cümlədən, 16 nəfər kənd məktəbinin məzunlarıdır), 9 nəfər keçmiş işğal altında olan rayonlara aid məktəblərdən, 1 nəfər valideyni əlil olan ailədən, 3 nəfər bir valideyni olmayan ailədən, eləcə də müəllim, hərbçi, həkim, sürücü, mühəndis, satıcı, fəhlə, təqaüdçü və s. ailələrindən olan məzunlar var. Siyahıda olan 22 nəfərin valideynlərindən ən az biri müəllimlik fəaliyyəti ilə məşğul olur.

Təqaüdçülərdən 43 nəfər Bakıda yerləşən məktəblərin məzunlarıdır. Daha sonra Sumqayıtda yerləşən məktəblərin məzunlarından 15, Gəncədə yerləşən məktəblərin məzunlarından 5, Abşeron, Kəlbəcər, Naxçıvan və Şəmkirdə yerləşən məktəblərin məzunlarından 3 nəfəri bilik öncülləri siyahısında görmək olar.

Prezident təqaüdçülərindən 33 nəfər Bakı Ali Neft Məktəbinə, 25 nəfər Azərbaycan Tibb Universitetinə, 15 nəfər Bakı Dövlət Universitetinə, 12 nəfər ADA Universitetinə, 8 nəfər Azərbaycan Dövlət İqtisad Universitetinə, 4 nəfər Dövlət İdarəçilik Akademiyasına, 2 nəfər Birgə Azərbaycan-Fransız Universitetinə (UFAZ), 2 nəfər xüsusi təyinatlı ali təhsil müəssisəsinə, 1 nəfər isə Azərbaycan Dövlət Neft və Sənaye Universitetinə qəbul olunub. Prezident təqaüdünə layiq görülən tələbələrdən biri də Anar Abdullayevdir. A.Abdullayev 2003-cü ildə Gəncə şəhərində anadan olub. Orta təhsilini Sumqayıt şəhər Texniki və təbiət elmləri liseyində alıb. Qəbul imtahanlarında 682,7 bal toplayaraq Bakı Ali Neft Məktəbinin (BANM) İnformasiya təhlükəsizliyi ixtisasına qəbul olunub. Azərbaycan Prezidenti İlham Əliyevin Sərəncamına əsasən, ölkə üzrə Prezident təqaüdünə layiq görülən 102 tələbədən biridir.

A.Abdullayev deyir ki, qəbul imtahanlarında 682,7 bal toplayıb: "İmtahanların nəticələri elan edildikdən sonra Prezident təqaüdçüsü olacağımı təxmin edirdim. Bununla belə, Azərbaycan Prezidentinin Sərəncamında adımı görəndə çox sevindim, böyük qürur hissi yaşadım. Dostlarımın, yaxınlarımın, qohumlarımın zəng edərək təbrik etməsi məni fərəhləndirdi. Həmişə imtahanlardan yüksək nəticə toplamağı, yüksəkballı ixtisasa qəbul olmağı qarşıma məqsəd qoymuşdum. Abituriyent jurnalında ən yüksək bal Bakı Ali Neft Məktəbinin İnformasiya təhlükəsizliyi ixtisasının keçid balı olub. Mən də qarşıma hədəf qoydum ki, bu balı toplamalıyam. 682 bal topladım və Prezident təqaüdçüsü oldum. Həm də ölkə üzrə ən yüksək keçid balı olan ixtisasa qəbul olundum. Beləliklə, bu hədəfimə də çatdım".

Onun sözlərinə görə, orta məktəbi həmişə çox yaxşı oxuyub: "Dərslərimə yüksək səviyyədə hazırlaşmışam. Əsas müəllimlərin verdiyi tapşırıqları yerinə yetirsinlər. Müəllimdən çox şey asılıdır. Şagirdin vəzifəsi müəllimlərin dediklərinə düzgün riayət etmək, tapşırıqları tam yerinə yetirməkdir. Artıq tapşırıq yerinə yetirmək lazım deyil, müəllimlər nəyi məsləhət görürlərsə, onları etmək kifayətdir. Önəmli məqamlardan biri də öyrəndiklərini vaxtaşırı təkrar etməkdir. Bu cür olarsa, yüksək bal toplamaq mümkündür. Abituriyentlərə məsləhətim odur ki, buraxılış imtahanına ciddi şəkildə hazırlaşsınlar. Çalışmaq lazımdır ki, ilk imtahandan toplanılan bal yüksək olsun. Buraxılış imtahanından toplanılan bal yüksək olanda 2-ci imtahan üçün motivasiya yaranır. Abituriyentlərə xüsusilə məsləhətim odur ki, imtahan zamanı gərgin olmasınlar, həyəcanlanmasınlar".

Prezident təqaüdünə layiq görülən tələbələrdən Cəmilə Yusifova 2004-cü ildə Şirvan şəhərində anadan olub. Şirvan şəhər 1 nömrəli tam orta məktəbin məzunudur. İmtahanlarda 685,3 bal toplayaraq Bakı Ali Neft Məktəbinin (BANM) İnformasiya təhlükəsizliyi ixtisasına qəbul olunub. Azərbaycan Prezidenti İlham Əliyevin Sərəncamına əsasən, ölkə üzrə Prezident təqaüdünə layiq görülən 102, BANM üzrə 33 tələbədən biridir. Onun dediyinə görə, Bakı Ali Neft Məktəbində təhsil almaq ən böyük arzusu olub. Məncə, Bakı Ali Neft Məktəbi Azərbaycanda ən prestijli ali məktəbdir. Bu Ali Məktəb tələbələrə çox fürsətlər, imkanlar yaradır: "Mənim qardaşım - Yusifov Əli də 4 il əvvəl, 2017-ci ildə BANM-ə qəbul edilib. O, burada Proseslərin avtomatlaşdırılması ixtisasında təhsil alıb. Daha sonra BANM-in dəstəyi və yaratdığı imkan sayəsində təqaüdlə Malayziyanın Petronas Texniki Universitetinə daxil olub. Hazırda orada Neft-qaz sahəsi üzrə təhsil alır".

C.Yusifova qeyd edib ki, informasiya təhlükəsizliyi sahəsinə hər zaman çox böyük həvəsi olub: "Abituriyent olduğum müddətdə informasiya təhlükəsizliyi ilə çox maraqlanırdım. Bu marağım o qədər böyük idi ki, hətta internetdən Python proqramlaşdırma dili öyrənirdim. Qardaşım da mənim BANM-də təhsil almaq arzumu bilirdi. İxtisas seçimində də hər zaman mənə dəstək olub".

Prezident təqaüdçüsünün dediyinə görə, qəbul imtahanlarına çox ciddi şəkildə hazırlaşıb. İmtahanlarda yüksək nəticə göstərməyi qarşısına hədəf qoyub: "Günümün 90 faizini test tapşırıqları etməklə keçirirdim, təkrarlar edirdim. Düşünürəm ki, hazırlıq dövründə öyrəndiklərinin yadda qalması üçün ən vacibi mütəmadi təkrar etməkdir. İmtahana hazırlaşana qədər çox həyəcanlı deyildim. Bu həyəcan imtahan zamanı yarandı, lakin suallarla tanış olduqdan sonra artıq həyəcan keçdi. Sualların asan olduğunu gördüm, ona görə də suallara daha rahat cavab yazdım".

Gələcək planlarından, hədəflərindən söz açan C.Yusifova vurğulayıb ki, Bakı Ali Neft Məktəbində təhsilini başa vurduqdan sonra xaricdə təhsilini davam etdirmək niyyətindədir: "Bakı Ali Neft Məktəbində mühit, müəllimlər, dərs keyfiyyəti yüksək səviyyədədir: "Dərslərdən, müəllimlərimdən çox razıyam. Hər gün deyirəm ki, yaxşı ki, Bakı Ali Neft Məktəbinə qəbul olmuşam, yaxşı ki, buranı seçmişəm. BANM-də yüksək keyfiyyətli və beynəlxalq səviyyədə təhsilimi başa vurduqdan sonra xaricdə təhsil almaq və Vətənimiz üçün peşəkar kadr olmaq istəyirəm. Hazırda gələcəklə bağlı hədəfim budur. Peşəkar kadr olaraq Azərbaycana qayıdıb, burada öz işimi qurub ölkəmə xeyir vermək niyyətindəyəm".

Qəbul imtahanlarında göstərdiyi yüksək nəticəyə görə Prezident təqaüdünə layiq görülən tələbələr sırasında Bakı Ali Neft Məktəbini seçən Röya Qasımovanın da adı var. O, C.Həşimov adına Mərdanlı kənd tam orta məktəbin məzunu kimi ali məktəblərə qəbul imtahanlarında Qubadlı rayonu üzrə ən yüksək nəticəni qazanıb. Röya buraxılış və II ixtisas qrupu üzrə qəbul imtahanlarından ümumilikdə 683,2 bal toplayaraq Bakı Ali Neft Məktəbinin (BANM) Biznesin idarəedilməsi ixtisasına qəbul olunub.

R.Qasımova bildirib ki, Prezident təqaüdçüsü olduğunu eşidəndə çox sevinib. Bu xəbəri ilk olaraq ailəsi ilə bölüşüb, valideynləri də çox fərəhləniblər: "Qəbul imtahanından yüksək bal toplayacağımı gözləyirdim, amma Prezident təqaüdçüsü ola biləcəyimə inanmırdım. Prezident təqaüdünə layiq olan, yüksək bal toplayan 102 şagirddən biriyəm. Qürurlu və sevincliyəm ki, Prezidentimiz məni də bu mükafata layiq görüb. İlk olaraq dövlət başçımıza həm özüm, həm də ailəmiz adından minnətdarlığımı bildirirəm. Prezident təqaüdçüsü adını qazanmaq mənim üçün çox qürurvericidir. Dövlət başçımızın xüsusi diqqətinə layiq olmaq, ali etimadını doğrultmaq üçün bundan sonra da var gücümlə çalışacağam. Gələcəyin ixtisaslı kadrları, peşəkarları sırasında yer alacağam".

Onun sözlərinə görə, pandemiya səbəbindən müəyyən çətinlik olsa da, ailəsi və müəllimləri ilə birgə bu çətinliyə sinə gərməyi bacarıb. Onun əsas motivasiyası isə İkinci Qarabağ müharibəsində qazandığımız şanlı Qələbə olub: "Mən məcburi köçkün idim. 25 oktyabr 2020-ci il tarixində Qubadlının işğaldan azad olunması ilə bu ad mənəvi anlamda üstümüzdən götürüldü. Şükürlər olsun ki, artıq biz qaçqın, məcburi köçkün deyilik. Qubadlımız da, Qarabağımız da artıq azaddır".

S.QARAYEVA

525-ci qəzet.- 2021.- 14 oktyabr.- S.8.