Sabaha ümidimizi artıranlar

Bu il tələbə adı ilə birlikdə prezident təqaüdü də qazanan abituriyentləri tanıyaq

(3-cü yazı)

Ali təhsil müəssisələrinə tələbə qəbulu müsabiqəsində ən yüksək nəticə əldə edənlər gəncliyimizin qızıl fondunu təşkil edirlər. Onların təcrübəsi həm cəmiyyətdə, həm də məktəblərdə güclü təsirə malik nümunə rolunu oynayır. Yüksək nəticələr əldə edən tələbələrə qayğı göstərmək, onların təhsil alması üçün daha əlverişli şərait yaradılmasını təmin etmək və təhsilə olan həvəslərini artırmaq dövlət tərəfindən daim diqqət mərkəzində saxlanılır.

Prezident İlham Əliyevin Sərəncamı ilə 2021-2022-ci tədris ilində də Azərbaycanın ali məktəblərinə daxil olaraq yüksək bal toplayan tələbələrə Prezident təqaüdü verilir. Azərbaycan gəncliyinin intellektual elitasına göstərilən bu diqqət maddi stimuldan çox güclü mənəvi dəstək, ruhlandırıcı amil rolunu oynayır, təhsildə sağlam yarış mühitinin yaranmasına təsir göstərir.

Bu il də Prezidentin müvafiq sərəncamı ilə 102 tələbəyə Prezident təqaüdü verilib. 2021-2022-ci tədris ilinin Prezident təqaüdçüləri ölkənin 28 müxtəlif şəhər və rayonlarını təmsil edirlər.

Prezident təqaüdçülərindən 33 nəfər Bakı Ali Neft Məktəbinə, 25 nəfər Azərbaycan Tibb Universitetinə, 15 nəfər Bakı Dövlət Universitetinə, 12 nəfər ADA Universitetinə, 8 nəfər Azərbaycan Dövlət İqtisad Universitetinə, 4 nəfər Dövlət İdarəçilik Akademiyasına, 2 nəfər Birgə Azərbaycan-Fransız Universitetinə (UFAZ), 2 nəfər xüsusi təyinatlı ali təhsil müəssisəsinə, 1 nəfər isə Azərbaycan Dövlət Neft və Sənaye Universitetinə qəbul olunub.

Prezident təqaüdünə layiq görülən tələbələrdən biri İsmayıl Əsədov Gəncə şəhər 27 nömrəli tam orta məktəb-liseyin məzunudur. O, 674 bal toplayaraq Azərbaycan Dövlət İqtisad Universitetinin (UNEC) maliyyə ixtisasına qəbul olub. İ.Əsədov deyir ki, qəbul imtahanına hazırlaşdığı müddətdə tək hədəfi qəbul imtahanında ən yüksək nəticə göstərmək olub: "Düşünürdüm ki, balım nə qədər yüksək olsa, o qədər yaxşıdır. Doğrusu, məndən çox müəllimlərim bu təqaüdə düşəcəyimə inanırdılar və bunu gözləyirdilər. Yəni mən işin sadəcə çalışmaq hissəsinə diqqətimi cəmləmişdim, gözlənti hissəsi isə müəllimlərdə idi. Onlar buna inanırdılar". İ.Əsədovun sözlərinə görə, o, məktəbin ən yaxşı oxuyan şagirdlərindən biri olub: "Fənlər arasında elə də fərq qoymurdum. Amma Tarix, Coğrafiya, Riyaziyyat kimi fənləri daha çox sevirdim. Elə bu fənlərə olan sevgim II qrupu seçməyimə səbəb oldu. Mənim hazırlıq müddətində ən çox məşğul olduğum şey araşdırmaq idi. Müxtəlif mənbələri, uğur qazanan insanları araşdırır, onların metodların sınayırdım. Bu metodların mənə təsiri, onların aldığı effekti mənim də ala bilməyim maraqlı gəlirdi. Nəticə olaraq öz çalışma planlarımı daha ağıllı və sistemli şəkildə qurmağa çalışırdım. Bu tip araşdırmalar apararaq öz fəaliyyətlərinə diqqətlərini daha yaxşı istiqamətləndirə bilərlər".

Prezident təqaüdçüsü Gülcan Məmmədova II ixtisas qrupu üzrə 675 bal toplayaraq Bakı Ali Neft Məktəbinə daxil olub. Bakıdakı 163 nömrəli tam orta məktəbin məzunu artıq ingilis dilində "Biznesin idarə edilməsi" ixtisası üzrə təhsil alır: "Aşağı siniflərdən daim öyrənməyə, araşdırmağa meyilli olmuşam. Dərslərim hər zaman mənim üçün hər şeydən öndəydi. Oxumağa o qədər maraqlıydım ki, tətillərdə, istirahət günlərində də başımı kitabdan qaldırmırdım. Məktəbə çox bağlı bir şagird olmuşam. Ən çox riyaziyyatı sevirdim. Saatlarla oturub məsələlər, misallar üzərində çalışırdım. Müəllimlərimin mənimlə bağlı gözləntiləri həmişə böyük olub, müxtəlif layihələrə, olimpiada və müsabiqələrə cəlb ediblər. Etimadlarını doğrultmaq üçün əlimdən gələni eləmişəm. Dəfələrlə informatika və riyaziyyatdan məktəbdaxili və şəhərlərarası yarışlara qatılmışam. İştirak etdiyim müsabiqələr də mənim inkişafımda mühüm rol oynayıb. VI-IX siniflərdə ildə 2-3 dəfə Beynəlxalq Aptis İmtahanlarına qatılır, özümü sınayırdım. Bunun sayəsində ingilis dilinə münasibətim dəyişdi, dil biliyimi necə inkişaf etdirəcəyimi öyrəndim".

G.Məmmədovanın sözlərinə əsasən, qəbul olunduğu ixtisasa son illərdə qərar verib və nəticədə ixtisas qrupunu dəyişib: "Əvvəllər texniki fənləri daha çox sevirdim. Amma IX-X sinifdə oxuduğum bəzi kitablar, məqalələr maliyyə, biznes, iqtisadiyyat kimi sahələrə marağımı artırdı. Bu da o demək idi ki, II ixtisas qrupunu seçəcəkdim. Universitetə hazırlıq çox böyük məsuliyyət tələb edir və son anda verdiyim bu qərardan peşman olmamaq üçün yaxşı hazırlaşmalıydım. X-XI siniflərdə mənə doğru yolu göstərəcək, düzgün istiqamətləndirəcək dəstəyi aldım. Müəllimimin verdiyi istiqamətdə məsuliyyətlə hazırlaşdım. Bir neçə aydan sonra coğrafiyaya nəinki marağım artdı, hətta respublika fənn olimpiadalarına qatılaraq final mərhələsinədək yüksəldim. İyun ayında Avropa Coğrafiya Olimpiadasında ölkəmizi təmsil edən əsas komandada çıxış etmək şansı belə qazandım. Qəbul imtahanlarında isə bu fənn üzrə 100 faiz nəticə göstərdim".

Prezident təqaüdünə layiq görülən tələbələrdən biri 70 nömrəli məktəb-liseyin məzunu Məhəmməd Qurbanzadədir. O, 2021-2022-ci tədris ili üçün ali təhsil müəssisələrinə qəbul imtahanlarında 679 bal toplayaraq Bakı Ali Neft Məktəbində dövlət sifarişi əsasında təhsil almaq şansı qazanıb. İngilis dilində təhsil alan M.Qurbanzadə proseslərin avtomatlaşdırılması mühəndisliyi ixtisasına yiyələnəcək.

Orta məktəbdə təhsil alan zaman güclü yaddaşı ilə şagird yoldaşlarından fərqlənib: "Göz yaddaşım çox güclü idi. Hələ məktəbə getmir, oxumağı-yazmağı bacarmırdım, amma gördüyüm rəqəmlərin, hərflərin şəklini kibrit çöpləri ilə çəkirdim. Məktəbə gedəndə isə artıq oxuduqlarım və eşitdiklərim də yaddaşıma həkk olunurdu. Çox asan qavrayır, yaxşı mənimsəyirdim. Riyaziyyat, fizika, biologiya fənlərinə qarşı hələ uşaqlıqdan çox böyük marağım vardı. Bu fənləri maraqla oxuyurdum".

O deyir ki, oxumaq onun düşüncələrini məşğul edən hər fikirdən önə çıxıb, hətta oxuya-oxuya işləmək istəyindən belə: "Oxuya-oxuya işləməyi də düşündüm. Amma sonra qərarımı dəyişdim. Çünki anladım ki, oxuya-oxuya işləsəm, keyfiyyətli təhsil ala bilmərəm. Çox yaxşı təhsil almaq istəyirəm".

Zeybə Zeynallı 679 balla Azərbaycan Tibb Universitetinə qəbul olunub. İndi tibb ixtisası üzrə ingilis dilində təhsil alır.

Z.Zeynallı bildirib ki, təhsil aldığı məktəbin əlaçı şagirdlərindən olun: "Mən orta məktəbdə bütün fənləri böyük həvəslə oxuyurdum. Olimpiadalara qatılır, müsabiqələrdə iştirak edirdim".

Fəal şagird olan Zeybə üçün münasibət qurmaq çətin olmayıb. Həm yoldaşlarını, həm də müəllimlərini sevib. Ən çox isə Azərbaycan dili müəllimini: "Azərbaycan dili müəllimimi çox sevdiyim üçün şeir və inşa müsabiqələrinə qatılırdım".

Z.Zeynallının dediyinə görə, qəbul imtahanlarına hazırlaşan zaman ailəsi ona böyük dəstək göstərib: "İmkanlarımızdan asılı olmayaraq, mənə oxumaq üçün nə lazım olsa, alınıb. Təhsilimlə bağlı bütün qərarlarımı özüm vermişəm, ailəm də məni dəstəkləyib".

Z.Zeynallı vurğulayıb ki, Tibb ixtisası üzrə ingiliscə təhsil almaq elə də asan deyil: "Bilirdim asan olmayacağını. Tibb özü də çətindir. Üstəlik, onu ingiliscə oxumaq çətinliyimi artıracaq. Amma bu çətinliyin öhdəsindən gəlməyə çalışıram. Nə qədər çətin də olsa, onların öhdəsindən gəlirəm. Axı beynəlxalq səviyyədə həkim olmağa qarşıma məqsəd qoymuşam. Universitetdə tədris ingilis dilində aparılır. Bu mənə beynəlxalq səviyyədə həkim olmağa imkan verəcək. Tibbin Almaniyada inkişaf etdiyini nəzərə alaraq, qarşıdakı illərdə rezidentura səviyyəsində orada oxumaq istəyirəm. Ancaq düzü, Amerika da pis olmazdı, deyə düşünürəm".

Nərgiz Cəfərova 666 balla Prezident yanında Dövlət İdarəçilik Akademiyasının tələbəsi statusunu qazanıb. Burada dövlət sifarişi əsasında hüquqşünaslıq ixtisası üzrə təhsil alır: "Oxumağı çox sevmişəm. Potensialım vardı, axtarır, yeni mənbələr tapırdım. Ən çox Azərbaycan dili və ingilis dilini sevirdim. Hər ikisindən imtahanlarda 100 faizli nəticə ortaya qoyurdum".

N.Cəfərova uğura gedən yolda valideynlərinin, xüsusən anasının əməyini xüsusi olaraq vurğulayır: "Ailəmizin maddi imkanı yaxşı olmayıb. Anam çörəkçidi. Mənim ehtiyaclarımı ödəməyə çalışıblar. Ailədə çətinliyi hiss etmişəm. Ona görə daha çox oxumuşam. Mənimçün oxumaq vəziyyətdən çıxış yolu olub. Təhsil mənim üçün daha yaxşı həyata açar sayılıb. Artıq indidən oxumağımın bəhrəsini alıram. Həm dövlət sifarişli yerdə təhsil alacağam, həm də təqaüd. İnsanın zəhmətinin bəhrəsi çox şirin olur. Sumqayıt Şəhər İcra Hakimiyyətinə dəvət edərək imtahanlarda qazandığım uğuruma görə mənə noutbuk verdilər. Həmin noutbukla işləməyi çox sevirəm. Çünki öz zəhmətimlə əldə etmişəm".

N.Cəfərova yüksək hüquq təhsili almağı qarşısına məqsəd qoyub. O, təhsilini xaricdə davam etdirmək niyyətindədir. Ancaq hara getsə, yaşadığı, işlədiyi yer Azərbaycan olacaq: "Təhsilimi İtaliyada davam etdirmək istəyirəm. Xaricdə təhsil, sadəcə hüquq sahəsində ən yaxşılardan biri olmaq üçün lazımdır mənə. Həyatımı ailəmin yanında qurmaq istəyirəm".

Sevinc QARAYEVA

525-ci qəzet.- 2021.- 27 oktyabr.- S.22.