Mətbuatda peşəkarlıq və fədakarlıq örnəyi - "Şərq" qəzeti - 25

Şərqə bir vaxtlar günəş doğdu. İnsanlar mazutlu, qabarlı əlləri ilə gözlərini ovxalayıb uzaqdan gələn günəş şəfəqlərinə tamaşa elədilər. O şəfəqlər insanların üzünü nurlandırdıqca üzərində məskən saldığımız bu torpaqda boy atan fidanlar zəhərli sarmaşıqlardan arınmağa başladılar. Nicat yolumuzu heç də asanlıqla tapmadıq, fərd-fərd paklandıq, çamurun içində çıxa bildik.

Həsən bəy Zərdabi "Əkinçi" qəzetini yaratmaqla Şərqin neft qoxan məskəninə - bir vaxtlar tarixin ən şanlı səhifələrinə həkk olub dünya sivilizasiyasına töhfələr verən, amma sonralar cəhalət burulğanında tarac olan Azərbaycana günəş istiliyi əta elədi. Həsən bəy dövrünün insanlarını maarifləndirmək üçün böyük mücadiləyə başladı - Azərbaycan mətbuatının əsasını qoydu, ilk Azərbaycan qəzetinin çapına nail oldu.

Uzun tarixi inkişaf yolu keçən qəzetçilik ənənələri ildən-ilə püxtələşdi, zamanın tempinə uyğunlaşdı və ən əsası, cəmiyyətin maraqlarını təmin edərək ictimai fikrə istiqamət verdi.

Zərdabi "Əkinçi"sinin layiqli xələflərindən biri olan, daim ənənələrə sadiq qalaraq zamanın tələbinə də uyğunlaşan, qərəzsiz və peşəkar şəkildə xalqa xidmət edən "Şərq" qəzetinin 25 yaşı tamam olur.

1996-cı il noyabrın 1-dən kiçik formatda, həftədə bir dəfə işıq üzü görən "Şərq" qəzeti 2002-ci ildən başlayaraq gündəlik nəşrini bu gün də rəngli formatda davam etdirir. Qəzetin eyniadlı saytı və "Şərq TV" yutub kanalı da fəaliyyət göstərir. Bugünədək "Şərq"in 5500 sayı çap olunub.

Əməkdar jurnalist Akif Aşırlının təsis etdiyi və baş redaktoru olduğu "Şərq" qəzeti Azərbaycanın müstəqillik tarixində özünəməxsus yer tutur. "Şərq" bu müddətdə dövrün bütün sınaqlarından alnı açıq, üzü ağ çıxıb. Xalqın məlumata ac vaxtlarında insanları informasiya ilə təmin eləmək çox zəruri məsələlərdən idi. "Şərq" bu yolda mübarizəyə qoşularaq qısa zamanda populyarlaşdı, brendə çevrildi. Dövrün ziyalılarının xatirələrində, cəmiyyətin orta-yaşlı nəslinin söhbətlərində qeyd etdiyim məqamlar öz əksini tapır.

Akif Aşırlı deyir ki, "Şərq" qəzetini müstəqilliyin bərpasının 30 illiyinin 25 illik salnaməsi də adlandırmaq olar.

Ötən illərə nisbətən, indi qəzet oxuyanların sayı azalıb, elektron media bir addım irəli keçib. Texnologiyanın sürətlə inkişaf elədiyi dövrdə bu, təbii haldır. Lakin "Şərq" qəzetinin çap prosesi ilə paralel elektron versiyası da peşəkar səviyyədə ortaya qoyulur.

Sözsüz ki, statistik göstəricilərə nəzər yetirdikdə "Şərq" qəzetinin çap versiyasına da tələbatın normal səviyyədə olduğunu görərik.

Qəzet çap edənlər bu prosesin həm maddi, həm də mənəvi cəhətdən necə ağır olduğunu yaxşı bilirlər. Bugünədək Akif Aşırlı məhdud imkanlar çərçivəsində "Şərq" qəzetini ayaqda saxlayıbsa, buna görə ona minnətdar olmalıyıq. Ötən günlərin birində Akif Aşırlı ilə müsahibəmdə qeyd etdiyi bir cümlə mənə çox təsir elədi və bu mübarizliyə heyran qaldım. Akif Aşırlı müsahibə zamanı dedi: "Nə qədər ki mən sağam, çalışacağam ki, "Şərq" çap olunsun".

"Şərq" qəzetini bu 25 ildə oxunaqlı edən, ayaqda saxlayan ən böyük səbəb də elə bu idi: inam, əzm, mübarizlik...

Klassik ənənələrə sadiq olsa da, "Şərq" daim yeniliyə can atıb. "Şərq"in əməkdaşlarının sırasında hər zaman gənc kadrlar görmək mümkündür. Bu, həm də Azərbaycan jurnalistikasına böyük xidmətdir. Yeni peşəkar kadr hazırlamaq "Şərq"in əsas prioritetlərindən biridir.

Yubiley ərəfəsində bir sıra ziyalılarımızın "Şərq" qəzeti haqqında fikirlərini və təbriklərini oxucularla bölüşmək istədik.

Filologiya elmləri doktoru, professor, Bakı Dövlət Universitetinin Jurnalistikanın nəzəriyyəsi və təcrübəsi kafedrasının müdiri Cahangir Məmmədli "Şərq" qəzetini qərəzdən, qeyri-peşəkarlıqdan uzaq mətbuat orqanı kimi təqdir edir:

"Şərq" qəzeti Azərbaycanda müstəqil qəzet tipologiyasının əsasını qoyan qəzetlərdən biridir. "525-ci qəzet", "Ədalət" qəzeti və "Şərq" qəzeti bir yolun yolçularıdır. Müstəqil qəzet olub jurnalistikanın prinsiplərinə əməl edərək ictimai maraqlara xidmət edən qəzetlərin sayı çox azdır. "Şərq" məhz belə qəzetlərdəndir. Məsələn, bəzən "Şərq" qəzetində dərc olunan bəzi yazılarda, xəbərlərdə sensasiya elementləri olur. Amma hamısının arxasında dəqiq informasiya var, qərəzdən uzaqdır. "Şərq" qəzeti həmişə oxucu kütləsini cəlb eləməyi bacarıb. Ona görə ki, qəzetin təsisçisi və baş redaktoru Akif Aşırlı və kollektivi jurnalistika ixtisasına yaxşı bələddirlər. Akif Aşırlı vaxtilə Tarix fakültəsini bitirsə də, jurnalistika fakültəsində magistr təhsili alıb və bizim fakültəylə ciddi əlaqələri var, Jurnalistika fakültəsinin imtahan komissiyasının sədridir. Jurnalistika fakültəsinin müəllimlərinin, tələbələrinin öz qəzeti hesab elədiyi iki qəzet var: "525-ci qəzet" və "Şərq" qəzeti. Bu qəzetlər bizim laboratoriyamızdır. "Şərq" qəzeti beynəlxalq jurnalistikanın yaradıcılıq prinsiplərini özündə ehtiva edən qəzetdir: dəqiq, qərəzsiz, vicdanlı, balanslı və sair. "Şərq" qəzetini yubiley münasibətilə təbrik edir, yaradıcılıq uğurları arzu edirəm!"

Əməkdar jurnalist, Azərbaycan Mətbuat Şurasının Sədri Əflatun Amaşov "Şərq" qəzetinin çoxşaxəli fəaliyyətini yüksək qiymətləndirir:

"Şərq" qəzeti müasir Azərbaycan müstəqil mətbuatının ən önəmli təmsilçilərindən biridir. Deyərdim ki, birincilər sırasındadır. Bu yüksək statusun əldə edilməsi illərin zəhmətinin bəhrəsidir. "Şərq"in öncüllüyü ilk növbədə peşəkarlıqla bağlıdır. Qəzet peşəkarlığı xalq və dövlət mənafeləri naminə səfərbər etməyin nümunəsidir. Buna görə də geniş oxucu auditoriyasına malikdir. "Şərq" həm də ideyalarla silahlanmış kütləvi informasiya vasitəsidir. Nəşrin irəli sürdüyü ideyalarda romantika da var, reallıq da var, yaşantı da. Həyatımızda elə bir düşündürücü mövzu yoxdur ki, yubilyar nəşr ora hansısa formada nüfuz etməsin. Bu isə, həm də təəssübkeşliyin qəzet üçün nə dərəcə müstəsna meyar olduğunu təsdiqləyir. Əlbəttə, "Şərq"in təəssübkeşliyi ilk növbədə milli ruhludur, türkçülük soy-kökünə əsaslanır. "Şərq" jurnalistika məktəbidir. 25 illik zaman kəsiyi onu məktəbə çevirib. Bu məktəbin müdavimləri ölkənin ictimai-siyasi həyatında aktiv iştirakı ilə seçilən şəxslərdir. Əminəm ki, bu məktəb öz fəaliyyətini bundan sonra da uğurla davam etdirəcəkdir. Başda Akif Aşırlı olmaqla, "Şərq" qəzetinin əməksevər, peşə prinsiplərinə sadiq kollektivini ürəkdən təbrik edirəm!"

"Ayna" - "Zerkalo" qəzetlərinin təsisçisi və baş redaktoru, Azərbaycan Jurnalistlər Birliyinin sədri Elçin Şıxlı "Şərq" qəzetinin hələ də çap olunmasından sevinc duyduğunu bildirir:

"Akif Aşırlıya böyük təşəkkür düşür ki, ilk gündən bütün çətinliklərə, problemlərə baxmayaraq, "Şərq" qəzetini ayaqda saxlayır. O, hər dəfə yeni nəsə edəndə eyni həyəcanla sevinir. Buna görə də mən çox şadam ki, hələ də "Şərq" qəzeti mövcuddur. Biz nə qədər yeni texnologiyalardan istifadə eləsək də, qəzetin bir başqa ləzzəti var. Qəzet toxuna bildiyimiz, duya bildiyimiz, mətbəə qoxusunu hiss etdiyimiz mətbuat orqanıdır. Akif Aşırlı başda olmaq, "Şərq" qəzetinin kollektivini səmimi qəlbdən təbrik edirəm və arzum budur ki, yeni-yeni 25 illikləri geridə qoysunlar!"

Əminik ki, Azərbaycan jurnalistikasının inkişafını ürəkdən arzulayan hər kəs "Şərq" qəzetinin uğurlarına sevinir və onların da ürəyində qəzetin 25 yaşına ünvanlanan təbriklər, arzular aşıb-daşır.

"525-ci qəzet"in baş redaktoru, Azərbaycan Yazıçılar Birliyinin sədr müavini Rəşad Məcid və bütün kollektivimiz "Şərq" qəzetinin 25 yaşı münasibətilə dəyərli həmkarlarımızı ürəkdən təbrik edir, qəzetin baş redaktoru Akif Aşırlıya və zəhmətkeş kollektivinə yeni-yeni yaradıcılıq uğurları arzulayır! Qoy "Şərq"in şəfəqləri daim insanların əqlinə, ziyasına nur ələsin!

Nadir YALÇIN

525-ci qəzet.- 2021.- 30 oktyabr.- S.8.