Əbədiyyətdəki əziz ünvanlarımız - Şəhidlər ölməz, Vətən bölünməz!

Həyat nə qədər şirin olsa da, ölüm heç bir insan övladının qaça bilməyəcəyi tale yazısıdır. Amma Allah qatında seçilmiş elə insanlar var ki, onlar ölmür, cismən bu dünyanı tərk edib, ruhən Yaradana - əbədiyyətə qovuşurlar. Ölümlərin ən şərəflisi də deyirlər buna. Bu, müqəddəs şəhidlik zirvəsidir ki, hər kəsə qismət olmaz.

Ali Baş Komandan cənab İlham Əliyevin rəhbərliyi ilə sentyabr ayında başlanan və 44 gün davam edən Vətən müharibəmiz 30 ilə yaxın erməni işğalında olan torpaqlarımızın, Qarabağın azadlığıyla nəticələndi.

Müharibə varsa, şəhid də var, qazi də, itkin də... Nə yazıq ki, bu müharibəmiz də qurbanlarsız ötüşmədi. Azərbaycanın üç minə yaxın qəhrəmanı torpaqlarımızın azadlığı uğrunda şəhidlik zirvəsinə ucaldı, minlərlə igid qazi adını qazandı. "525-ci qəzet" olaraq bu layihəmizdə mütəmadi şəkildə hissə-hissə həmin igidlərimizi oxucularımıza tanıtdıracağıq. Hər biri bir qəhrəmanlıq dastanı olan bu həyatlarla qürur duyur, onları unutmayacağımıza, unutdurmayacağımıza söz veririk! Allah hər birinə rəhmət eləsin!

P.S. Bu layihəmizə dəstək olmaq üçün ətrafınızda tanıdığınız, bildiyiniz şəhidlər varsa, həyat yoluna güzgü tutmaq məramı ilə müəllifin göstərilmiş e-mail ünvanıyla əlaqə saxlaya bilərsiniz!

shahane.mushfiq@gmail.com

***

Barat Nizami oğlu Quliyev 22 dekabr 1991-ci ildə Bakı şəhərində anadan olub. 1995-ci ildə ailə vəziyyətilə əlaqədər Beyləqan rayonuna köçüblər. 1999-cu ildə Beyləqan rayonu 3 saylı tam orta məktəbin 1-ci sinfinə qəbul olub. 2010-cu ildə həmin məktəbin 11-ci sinfini bitirib.

2010-cu il 12 oktyabr həqiqi hərbi xidmətə çağrılıb. Suraxanıda yerləşən hərbi hissədə xidmət edib. 2012-ci ildə xidməti başa vurub. 2014-cü ildə Azərbaycan Respublikası Silahlı Qüvvələrinə daxil olub. Beyləqan rayonu N saylı hərbi hissədə Müddətdən Artıq Hərbi Qulluqçu manqa komandiri kimi xidmətə başlayıb. 2015-ci il 30 dekabrda hərbi hissənin 2-ci taborunun 6-cı bölüyün 2-ci taqımın 1-ci manqasında Zirehli PM 3 maşının sürücüsü vəzifəsində xidmət edib.

2016-cı il Aprel döyüşlərində fəal iştirak edib və göstərdiyi şücaətə görə fəxri fərmanla təltif olunub, həmçinin, ona qiymətli qol saatı hədiyyə olunub.

2020-ci il sentyabr ayının 27-də başlanan Vətən müharibəsində Füzulinin Alxanlı kəndindən başlamaqla döyüşlərdə şücaətlə iştirak edib. 28 sentyabrda ekipaj üzvləriylə birgə mühasirəyə düşüblər. Zirehli döyüş maşını düşmənin açdığı atəş nəticəsində vurularaq sıradan çıxır. Döyüş yoldaşlarının köməkliylə mühasirədən çıxırlar. 29 sentyabrda artıq piyada döyüşlərə davam ediblər.

Əmrə əsasən neytral ərazidə qalan şəhid olmuş döyüş yoldaşlarının nəşini gətirmək üçün yaradılmış əməliyyat qrupuna öndə öz komandirinin yanında döyüşə giriblər. Yarım saat ərzində ermənilərin üç postunu yarıb keçib, düşmənin saysız döyüşçüsünü məhv ediblər. Şəhid yoldaşlarının nəşlərinə çatmağa az qalmış Barat Quliyev düşmənin açdığı snayper atəşilə 29 sentyabrda Füzulinin Qaraxanbəyli kəndində şəhidlik zirvəsinə ucalıb.

Barat Quliyev şəhadətindən sonra "Vətən uğrunda" və "Füzulinin azad olunmasına görə" medalları ilə təltif edilib.

***

İsmayıl Kamal oğlu Süleymanov 19 aprel 1997-ci ildə Neftçala rayonunun İkinci Qaralı kəndinə anadan olub. İlk təhsilini 2003-cü ildə Neftçala rayon İkinci Qaralı kənd məktəbində alıb. Daha sonra təhsilini Neftçala rayon peşə məktəbində davam etdirib.

Məktəbi bitirdikdən sonra Goranboy rayon N saylı hərbi hissədə xidmətə başlayıb. 2016-cı ildə başlanan Aprel döyüşlərinin iştirakçısı olub. Goranboy rayonu istiqamətində gedən döyüşlərdə xüsusi qəhrəmanlıq göstərdiyinə görə komandanlıq tərəfindən fəxri fərmanla təltif edilib.

Hərbi xidmətini başa vurduqdan sonra Bakıda mühərrik ustası olaraq işləyirdi. Subay idi və ailəsi ilə birlikdə yaşayırdı.

2020-ci il sentyabr ayının 29-u könüllü olaraq Vətən müharibəsinə yollanıb. Sonuncu dəfə qardaşı ilə oktyabr ayının 7-si danışaraq hər şeyin yaxşı olduğunu deyib və anasından muğayat olmağını tapşırıb.

Cəbrayıl rayonu uğrunda gedən döyüşlər zamanı xüsusi qəhrəmanlıq göstərib. Döyüş zamanı qəlpə yarası alaraq şəhadətə yüksəlib.

Şəhidimiz oktyabr ayının 10-da doğulduğu Neftçala rayon İkinci Qaralı kəndinə son mənzilə yola salınıb.

İsmayıl Süleymanov şəhadətindən sonra "Vətən uğrunda" medalı ilə təltif olunub.

***

İsmayıl Rəhman oğlu Salmanov 17 may 1997-ci ildə Füzuli rayon Alıxanlı kəndində anadan olub. 2003-2014-cü illərdə orta təhsil alıb.

5 iyul 2016-cı ildə hərbi xidmətə yollanıb və hərbi xidmətdə olduğu müddətdə özünü nizam-intizamlı bir hərbi qulluqçu kimi göstərib, məşqlərdə həmişə yaxından işdirak edib, kollektiv arasında hörmət qazanıb. 6 yanvar 2018-ci ildə hərbi xidməti başa vuraraq qayıdıb.

13 avqust 2020-ci ildə könüllü olaraq müddətdən artıq hərbi qulluqçu kimi xidmətə başlayıb.

27 sentyabr 2020-ci ildə başlanan Vətən müharibəsində Cəbrayıl, Hadrut, Ərgünəş yüksəkliyi, Xocavənd və Füzuli rayonlarının azad olunması uğrunda qəhrəmanlıqla döyüşüb. O, 24 oktyabr 2020-ci ildə İlanlı dağ uğrunda gedən döyüşlər zamanı qəhrəmancasına şəhidlik zirvəsinə ucalıb.

İsmayıl Salmanov şəhadətindən sonra "Vətən uğrunda", "Cəbrayılın azad olunmasına görə", "Füzulinin azad olunmasına görə" medalları ilə təltif edilib.

***

Sahil Vüqar oğlu Salmanov 2002-ci il martın 11-də Tovuz rayonunun Düz Qırıqlı kəndində anadan olub. 2008-2019-cu illərdə Düz Qırıqlı kənd tam orta məktəbində təhsil alıb.

2020-ci ildən Azərbaycan Silahlı Qüvvələrinin sıralarında müddətli həqiqi hərbi xidmətdə idi.

Azərbaycan Silahlı Qüvvələrinin əsgəri olan Sahil Salmanov 2020-ci il sentyabrın 27-də başlanan Vətən müharibəsi zamanı Füzulinin azadlığı uğrunda gedən döyüşlərdə savaşıb və oktyabrın 20-də Füzuli döyüşləri zamanı Dördçinar kəndi istiqamətində qəhrəmancasına şəhid olub. Tovuz rayonunun Düz Qırıqlı kəndində dəfn olunub.

Sahil Salmanov şəhadətindən sonra "Vətən uğrunda" və "Füzulinin azad olunmasına görə" medalları ilə təltif edilib.

***

Adəm İkram oğlu Heydərov 2000-ci il martın 26-da Qəbələ rayonunun Bum qəsəbəsində anadan olub. 2006-2017-ci illərdə Bum qəsəbəsində T.Yaqubov adına qəsəbə tam orta məktəbində təhsil alıb.

Azərbaycan Ordusunun əsgəri olan Adəm Heydərov 2020-ci il sentyabrın 27-də başlanan Vətən müharibəsi zamanı Ağdərə istiqamətində gedən döyüşlərdə savaşıb və oktyabrın 13-də Ağdərə istiqamətində şəhid olub. Qəbələ rayonunun Bum qəsəbəsində dəfn olunub.

Adəm Heydərov şəhadətindən sonra "Vətən uğrunda" medalı ilə təltif edilib.

***

Atəş Yusif oğlu Aslanov 1993-cü il aprelin 1-də Tovuz rayonunun Məşədivəllər kəndində anadan olub. 2000-2004-cü illərdə Məşədivəlilər kənd tam orta məktəbində, 2004-2011-ci illərdə İ.Bayramov adına Aşağı Quşçu kənd tam orta məktəbində təhsil alıb.

2012-2014-cü illərdə Azərbaycan Silahlı Qüvvələrinin sıralarında müddətli həqiqi hərbi xidmətdə olub.

Azərbaycan Silahlı Qüvvələrinin əsgəri olan Atəş Aslanov 2020-ci il sentyabrın başlanan Vətən müharibəsi zamanı könüllü olaraq Füzulinin azadlığı uğrunda gedən döyüşlərdə savaşıb. O, oktyabrın 25-də Füzuli döyüşləri zamanı şəhid olub. Tovuz rayonunun Aşağı Quşçu kəndində dəfn olunub.

Ailəli olan şəhidimizin bir qızı yadigar qalıb.

Atəş Aslanov şəhadətindən sonra "Vətən uğrunda", "Döyüşdə fərqlənməyə görə" və "Füzulinin azad olunmasına görə" medalları ilə təltif edilib.

***

Davud Taryel oğlu Qurbanov 1996-cı il fevralın 15-də Bakı şəhərində anadan olub.

2002-2013-cü illərdə R.Pirnəzərov adına 299 saylı Biləcəri qəsəbə məktəb-liseyində, 2013-2017-ci illərdə Azərbaycan Dövlət Neft və Sənaye Universitetinin (ADNSU) "İstehsalat proseslərinin avtomatlaşdırılması" fakültəsində təhsil alıb. 2017-2019-cu illərdə həmin fakültənin magistratura pilləsində təhsilini davam etdirib.

Subay idi. Müxtəlif telekanallarda montajçı vəzifəsində çalışmışdı.

Davud Qurbanov 2019-cu ildə müddətli həqiqi hərbi xidmətə çağırılıb. Vətən müharibəsinə qədər Azərbaycan Silahlı Qüvvələrinin N saylı hərbi hissəsində xidmət edib.

2020-ci il sentyabrın 27-də başlanan Vətən müharibəsi zamanı Suqovuşanın azadlığı uğrunda gedən döyüşlərdə iştirak edib. Oktyabrın 3-də Suqovuşan döyüşləri zamanı şəhid olub. Qazax rayonunun Birinci Şıxlı kəndində torpağa tapşırılıb.

Davud Qurbanov şəhadətindən sonra "Vətən uğrunda" və "Suqovuşanın azad olunmasına görə" medalları ilə təltif edilib.

***

Elbrus Şəmsi oğlu Yusifov 1985-ci il mayın 12-də Tovuz rayonunun Ağdam kəndində anadan olub. 1991-2002-ci illərdə N.Yusifov adına Ağdam kənd tam orta məktəbində təhsil alıb.

2003-2005-ci illərdə Azərbaycan Silahlı Qüvvələrinin sıralarında müddətli həqiqi hərbi xidmətdə olub. Daha sonra isə müddətdən artıq həqiqi hərbi xidmət qulluqçusu olaraq xidmətini davam etdirib. 2020-ci ilin 12-15 iyulunda baş verən Tovuz döyüşlərində savaşıb.

Azərbaycan Ordusunun kiçik çavuşu olan Elbrus Yusifov 2020-ci il sentyabrın 27-də başlanan Vətən müharibəsi zamanı Murovdağ istiqamətində gedən döyüşlərdə savaşıb. Oktyabrın 1-də Murovdağ döyüşləri zamanı şəhid olub. Nəşi uzun müddət tapıla bilməyib. 21 dekabr 2020-ci il tarixində Tovuz rayonunun Ağdam kəndində dəfn olunub.

Ailəli olan şəhidimizin 2 oğlu yadigar qaldı. Onun xalası oğlu baş əsgər Elşad Məmmədov isə 2020-ci ilin Tovuz döyüşləri zamanı şəhid olub.

***

Elton Baba oğlu Qənbərli 1997-ci il fevralın 1-də Şərur rayonunun Ələkli kəndində anadan olub. 2003-2011-ci illərdə Ələkli kənd tam orta məktəbində, 2011-2014-cü illərdə isə Heydər Əliyev adına Hərbi Liseydə təhsil alıb. 2014-2018-ci illərdə Heydər Əliyev adına Azərbaycan Ali Hərbi Məktəbində (AAHM) ali hərbi təhsil alıb.

2018-ci ildən Azərbaycan Silahlı Qüvvələrinin sıralarında xidmət edirdi.

Azərbaycan Ordusunun leytenantı olan Elton Qənbərli 2020-ci il sentyabrın 27-də başlanan Vətən müharibəsi zamanı Cəbrayılın, Füzulinin, Zəngilanın və Qubadlının azadlığı uğrunda gedən döyüşlərdə savaşıb. Oktyabrın 20-də Qubadlı döyüşləri zamanı qəhrəmancasına şəhidlik məqamına yüksəlib. Şərur şəhərinin Şəhidlər xiyabanında dəfn olunub.

Elton Qənbərli şəhadətindən sonra "Vətən uğrunda", "Döyüşdə fərqlənməyə görə" və "Cəbrayılın azad olunmasına görə" medalları ilə təltif edilib.

***

Xalid Qabil oğlu Nəciyev 1992-ci il iyulun 3-də Saatlı şəhərində anadan olub. 1998-2009-cu illərdə Saatlı şəhərində Səməd Vurğun adına 1 nömrəli tam orta məktəbdə təhsil alıb.

2009-2013-cü illərdə isə Gəncə Dövlət Universitetində (GDU) tarix-coğrafiya ixtisası üzrə ali təhsil alıb. 2017-2018-ci illərdə tarix və coğrafiya müəllimi olaraq çalışıb. 2017-ci ildən isə Təhsil Nazirliyinin Saatlı və Sabirabad üzrə ictimaiyyətlə əlaqələr şöbəsində çalışırdı.

O, 2013-2014-cü illərdə Azərbaycan Silahlı Qüvvələrinin sıralarında müddətli həqiqi hərbi xidmətdə olub.

Azərbaycan Ordusunun leytenantı olan Xalid Nəciyev 2020-ci il sentyabrın 27-də başlanan Vətən müharibəsi zamanı Laçının azadlığı uğrunda gedən döyüşlərdə savaşıb və noyabrın 5-də Laçın döyüşləri zamanı Səfiyan istiqamətində şəhidlik zirvəsinə yüksəlib. Saatlı şəhərində dəfn olunub.

Xalid Nəciyev şəhadətindən sonra "Vətən uğrunda", "Döyüşdə fərqlənməyə görə" və "Laçının azad olunmasına görə" medalları ilə təltif edilib.

***

İlkin İslam oğlu Abıyev 1995-ci il yanvarın 18-də Biləsuvar rayonunun Əsgərabad kəndində anadan olub. 2002-2013-cü illərdə Əsgərabad kənd tam orta məktəbində təhsil alıb.

2013-2015-ci illərdə Azərbaycan Silahlı Qüvvələrinin sıralarında müddətli həqiqi hərbi xidmətdə olub. 2017-ci ildən isə müddətdən artıq həqiqi hərbi xidmətdə olub.

Azərbaycan Ordusunun kiçik çavuşu olan İlkin Abıyev 2020-ci il sentyabrın 27-də başlanan Vətən müharibəsi zamanı Murovdağ istiqamətində gedən döyüşlərdə savaşıb. İlkin Abıyev sentyabrın 27-də Murovdağ döyüşləri zamanı şəhid olub. Biləsuvar rayonunun Əsgərabad kəndində dəfn olunub.

İlkin Abıyev şəhadətindən sonra "Vətən uğrunda", "İgidliyə görə" və "Kəlbəcərin azad olunmasına görə" medalları ilə təltif edilib.

***

İsmayıl Məhəmməd oğlu Səmədov 1990-cı il avqustun 9-da Zaqatala rayonunun Lahıc kəndində anadan olub. 1996-2005-ci illərdə Q.Qocayev adına Lahıc kənd tam orta məktəbində, 2005-2007-ci illərdə isə Kimya-Biologiya Təmayüllü Liseydə təhsil alıb. 2007-2011-ci illərdə Heydər Əliyev adına Azərbaycan Ali Hərbi Məktəbində (AAHM) ali hərbi təhsil alıb.

2011-ci ildən Azərbaycan Silahlı Qüvvələrinin Mingəçevir şəhərində yerləşən N saylı hərbi hissəsində xidmət edirdi. Həmin ildə XTQ kursuna yazılıb və kursu birinciliklə bitirib. 2011-ci ilin yay aylarından Xızıda N saylı hissədə fəaliyyətə başlayıb.

İsmayıl Səmədov müxtəlif illərdə nümunəvi xidmətinə görə III dərəcəli "Hərbi xidmətdə fərqlənməyə görə" medalı, "Azərbaycan Silahlı Qüvvələrinin 95 illiyi" yubiley medalı, "Azərbaycan Ordusunun 100 illiyi" yubiley medalı, III dərəcəli "Qüsursuz xidmətə görə" medalı və xeyli sayda təşəkkürnamələrlə təltif olunub.

Azərbaycan Ordusunun kapitanı olan İsmayıl Səmədov 2020-ci il sentyabrın 27-də başlanan Vətən müharibəsi zamanı Füzulinin azadlığı uğrunda gedən döyüşlərdə savaşıb və oktyabrın 11-də Füzuli döyüşləri zamanı qəhrəmancasına şəhidlik məqamına ucalıb. Zaqatala rayonunun Lahıc kəndində torpağa tapşırılıb.

Ailəli olan şəhidimizin 2 övladı vətənə əmanət qaldı.

İsmayıl Səmədova şəhadətindən sonra "Vətən Müharibəsi Qəhrəmanı" adı verilib, həmçinin, o, "Vətən uğrunda" və "Cəbrayılın azad olunmasına görə" medalları ilə təltif edilib.

***

Xəyal Ağabəy oğlu Məmmədov 1986-cı il noyabrın 18-də Şəki şəhərində anadan olub. 1993-2001-ci illərdə Şəki şəhərində 5 nömrəli tam orta məktəbdə, 2001-2004-cü illərdə isə Cəmşid Naxçıvanski adına Hərbi Liseydə təhsil alıb. 2004-2008-ci illərdə Heydər Əliyev adına Azərbaycan Ali Hərbi Məktəbində (AAHM) ali hərbi təhsil alıb. Hərbi təhsilini aldığı müddətdə bir sıra dövlətlərdə təlimlərdə olub.

Xidməti dövründə "Azərbaycan Silahlı Qüvvələrinin 95 illiyi" yubiley medalı, "Qüsursuz xidmətə görə" 3-cü dərəcəli medalı, "Azərbaycan Ordusunun 100 illiyi" yubiley medalı ilə təltif edilib.

Azərbaycan Ordusunun mayoru olan Xəyal Məmmədov 2020-ci il sentyabrın 27-də başlanan Vətən müharibəsi zamanı Cəbrayılın, Hadrut qəsəbəsinin, Füzulinin, Zəngilanın və Qubadlının azadlığı uğrunda gedən döyüşlərdə savaşıb, həmçinin, döyüşlər zamanı yaralı hərbçiləri döyüş meydanından çıxararaq fərqlənib. Oktyabrın 7-də döyüşdən əvvəl ailəsinə yazdığı son məktubunda bunları qeyd etmişdi: "Mən gedirəm vətəni qorumağa. Müqəddəs vəzifəmin icrasına. Ailəm və övladlarım Allaha əmanət olsun. Hər həs haqqını halal etsin. Vətən sağ olsun". Xəyal Məmmədov oktyabrın 20-də Qubadlı döyüşləri zamanı snayper gülləsi nəticəsində şəhidlik məqamına yüksəlib. Şəki şəhərində dəfn olunub.

Ailəli olan şəhidimizin iki qızı yadigar qaldı.

Xəyal Məmmədov şəhadətindən sonra 3-cü dərəcəli "Vətənə xidmətə görə" ordeni, "Vətən uğrunda", "Cəbrayılın azad olunmasına görə" və "Qubadlının azad olunmasına görə" medalları ilə təltif edilib.

***

Kənan Faiq oğlu İsrafilov 8 noyabr 1990-cı ildə Şəki rayonunun Şirinbulaq kəndində doğulub.

Cəmşid Naxçıvanski adına hərbi liseydən məzun olan Kənan 2008-2012-ci illərdə Heydər Əliyev adına Azərbaycan Ali Hərbi Məktəbində təhsilini davam etdirib. 2013-2018-ci illərdə Murovdağda komandir vəzifəsini icra edib. Sonra isə 2018-ci ildən qərargah rəisi kimi xidmətini davam etdirib.

2018-ci ildə Müdafiə Nazirliyinin Hərbi Akademiyasında təhsilini davam etdirən Kənan 2020-ci ilin iyun ayından Goranboy rayonunun Aşağı Ağcakənd qəsəbəsində tabor komandiri kimi xidmət edib. O, müxtəlif zamanlarda nümunəvi xidmətinə görə "Azərbaycan Silahlı Qüvvələrinin 95 illiyi" yubiley medalı, "Azərbaycan Ordusunun 100 illiyi" yubiley medalı və bir sıra təşəkkürnamələrlə təltif olunub.

27 sentyabr 2020-ci ildən başlayan Vətən müharibəsində kapitan Kənan İsrafilov tabor komandiri olaraq iştirak edib. Füzulinin, Cəbrayılın və Suqovuşanın azad edilməsi uğrunda gedən döyüşlərdə döyüş tapşırığını yerinə yetirən kapitan Kənan İsrafilov 5 oktyabr 2020-ci ildə Suqovuşan istiqamətində gedən döyüşlərdə qəhrəmancasına şəhidlik məqamına yüksəlib.

Kənan İsrafilov şəhadətindən sonra "Vətən uğrunda" və "Suqovuşanın azad olunmasına görə" medalları ilə təltif edilib.

***

Rəhim Qədir oğlu Hüseynov 1984-cü il iyulun 1-də Zərdab rayonunda anadan olub. 1998-2001-ci illərdə Cəmşid Naxçıvanski adına hərbi liseydə təhsil alıb. 2001-2005-ci illərdə Heydər Əliyev adına Azərbaycan Ali Hərbi Məktəbində ali hərbi təhsil alıb. 2005-2006-cı illərdə Silahlı qüvvələrin təlim və tədris mərkəzində təhsilini artırıb.

İngilis, rus, erməni dillərini öyrənib.

Mayor Rəhim Hüseynov Azərbaycan Silahlı Qüvvələrinin tərkibində NATO-ya bəyan edilmiş və dəfələrlə götürdüyü öhdəliyi müvəffəqiyyətlə yerinə yetirmiş Əməliyyat İmkanları Konsepsiyası (OCC Bn) taborunun komandiri idi.

O, 2020-ci ildə NATO-nun Əfqanıstan İslam Respublikasında Qətiyyətli Dəstək - qeyri-döyüş missiyasında Azərbaycan sülhməramlı kontingentinin və eyni zamanda, Həmid Karzai Beynəlxalq Hava Limanının (HKIA) Qüvvə Qorunması taborunun komandiri vəzifəsində NATO Meritorious Service Medalı (NATO-nun ləyaqətli xidmət medalı) ilə təltif olunan ilk və tək azərbaycanlı zabitdir.

Xidmət müddəti ərzində NATO təlimləri və kursları çərçivəsində dünyanın müxtəlif ölkələrində Azərbaycan Silahlı Qüvvələrini layiqli şəkildə təmsil edərək Azərbaycan bayrağını şərəflə daşıyıb.

O, müxtəlif illərdə nümunəvi xidmətinə görə III dərəcəli "Qüsursuz xidmətə görə" medalı, "Azərbaycan Silahlı Qüvvələrinin 90 illiyi" yubiley medalı, "Azərbaycan Silahlı Qüvvələrinin 95 illiyi" yubiley medalı, "Azərbaycan Ordusunun 100 illiyi" yubiley medalı, "Əfqanıstanda sülhməramlı missiyaya görə" medalına layiq görülüb.

Azərbaycan Ordusunun mayoru olan Rəhim Hüseynov 2020-ci il sentyabrın 27-də başlanan Vətən müharibəsi zamanı Füzuli, Cəbrayıl və Qubadlı rayonunun azadlığı uğrunda gedən döyüşlərdə iştirak edib və oktyabrın 20-də Qubadlı döyüşləri zamanı qəhrəmancasına şəhidlik zirvəsinə yüksəlib. II Fəxri xiyabanda dəfn olunub.

Ailəli olan şəhidimizin Vətənə və xalqa əmanət üç övladı qalıb.

Rəhim Hüseynov şəhadətindən sonra "Qarabağ" ordeni, "Vətən uğrunda", "Cəbrayılın azad olunmasına görə" və "Qubadlının azad olunmasına görə" medalları ilə təltif edilib.

Şahanə MÜŞFİQ

525-ci qəzet.- 2021.- 16 sentyabr.- S.14-15.