Hərbçi peşəsini şərəfləndirən peşəkar zabitimiz

Azərbaycanın hərb tarixində xüsusi yeri olan Zaqatalamızın adlı-sanlı, yüksək nüfuza malik hərbçiləri çox olub. Azərbaycanlı kimi general-leytenant rütbəsinə yüksələn ilk hərbçi də məhz rayonumuzun Tala kəndindən olan Balakişi Ərəblinskidir. Görünür, onun qazandığı yüksək nüfuz və hörmət sonradan tanınmış hərbçilərin yetişməsində bir örnək rolunu oynayıb. İkinci Qarabağ müharibəsinin tarixi zəfərlə başa çatmasında generalın yolunun layiqli davamçıları olan, Taladan çıxan hərbçilərin xidmətləri az olmayıb. Onların arasında Vətən Müharibəsi Qəhrəmanları adına layiq görülüb, "Qarabağ" ordeni, çoxlu sayda medallarla təltif olunmuş talalılarla hamımız fəxr edirik. Bu igid hərbçilərimiz sırasında bir nəfər var ki, onun haqqında ayrıca danışmağa böyük ehtiyac var.

Şəxsən mən onu tanıyandan sonra ordumuzda belə yüksək vətənpərvərlik hisslərinə malik, seçkin, ləyaqəti və təvazökarlığı ilə diqqəti cəlb edən zabitimizin olması ilə fəxr və qürur hissi keçirdim. Azərbaycan Ordusunun yüksək peşəkarlığa malik zabiti, Xüsusi Təyinatlı Qüvvələrin polkovnik-leytenantı Səfər Qurbanov haqqında uzun müddət yazmaq istəmişik, lakin o, buna razılıq verməyib. İndi bu yazıya başlayarkən mənə tam aydın olur ki, Səfər haqlıymış. Bir şərəfli və ləyaqətli zabit kimi o, məhz bu tarixi Qələbəmizi, torpaqlarımızın düşmən işğalından azad olunmasını gözləyirdi. Bu tarixi missiyanın yerinə yetirilməsində onun da komandir kimi xidmətləri az olmadı.

Bəzən öz peşəsini ideal dərəcədə yerinə yetirən, onu bütün varlığı ilə yaşayan birisini görəndə deyirik ki, az-az da olsa belə insanlar anadangəlmə bu cür doğulurlar. Azərbaycan Ordusunun say-seçmə zabiti Səfər Qurbanov onlardan biridir. Burada bir neçə fərqli cəhət var. Əvvəla Səfər hərbçi ailəsində doğulub. Atası Qurban Qurbanov Sovet ordusunda uzun müddət xidmət edib, polkovnik rütbəsinədək yüksəlib, hərbi hissə komandiri olub. Səfərin uşaqlığı demək olar ki, əsasən hərbi hissələrdə keçib, əsgərlərlə və zabitlərlə daima ünsiyyətdə olub, hərbi həyatın nə olduğunu uşaq ikən hiss edib. Və uşaq ikən bu peşəni nə qədər qəribə səslənsə də, sevib, həyatını sevə-sevə hərbçi peşəsinə həsr edib. Minlərlə hərbçimiz kimi Səfər Qurbanovun da hərb sahəsinə gəlişi Qarabağda gedən qanlı savaşlar dövrünə təsadüf edib. 1992-ci ilin sentyabr ayında Cəmşid Naxçıvanski adına hərbi liseyə daxil olanda onun 14 yaşı tamam olmuşdu. Səfər liseydə çox az bir vaxtda hamının diqqətini özünə cəlb edə bildi. Liseyin rəhbərliyi bu gəncdə olan qabiliyyət və bacarığı, hərbçiyə məxsus keyfiyyətləri qiymətləndirərək onu təhsilini davam etdirmək üçün Türkiyə Respublikasının İzmir şəhərindəki hərbi liseyə göndərdi. Səfər müstəqillik illərində qardaş ölkədə hərbi təhsil alan ilk yeniyetmələrimizdən biri idi. Dörd il ərzində liseydə təhsil alan Səfər burada da hamı tərəfindən sevilən bir öyrənci idi. Ailəcanlığı uşaqlıqdan onun ruhuna hakim kəsilmişdi. Atası söhbətlərimizin birində demişdi ki, o, aldığı təqaüd hesabına məzuniyyətə gələndə ona gödəkçə alıb gətiribmiş.

Qardaş Türkiyədə ilk hərbi təhsilini başa vurduqdan sonra Səfər Qurbanov ali hərbi təhsil almaq üçün 1997-ci ilin avqust ayında bu ölkənin Kara Harb Okuluna daxil olur və 2001-ci ildə həmin məktəbi motoatıcı ixtisası üzrə böyük müvəffəqiyyətlə bitirir. Məlum olduğu kimi, Türkiyə Ordusu NATO-nun ən güclülərindən biri hesab olunur. Azərbaycandan hərbi təhsil almağa gələnlər müasir hərbi peşənin sirlərinə, dünya standartları səviyyəsində biliklərə yiyələnərək ordumuzun sıralarına qayıdırdılar. Bu iti zəkalı, vətənsevər gənc zabitlərin gəlişi ilə ordumuzda gedən yenilənmə proseslərinə sanki bir yeni nəfəs gəlirdi. Səfər Qurbanovun bir zabit kimi bilik və bacarığı, müasir döyüş taktikasına yiyələnməsi, mətinliyi gələcəkdə ordu komandanlığının perspektiv planlarının icrasında lazım gələ bilərdi. Bunu nəzərə alaraq onu 2001-ci ilin sentyabr ayında Türkiyə Respublikasının İstanbul şəhərindəki Təlim Tədris Mərkəzinə dinləyici kimi yollayırlar. Burada təhsilini tamamladıqdan sonra Səfər Qurbanov ordumuzun ən elitar və güclü növü olan Xüsusi Təyinatlı Qüvvələrdə xidmətə başlayır.

Səfər Amerika Birləşmiş Ştatlarında 1 il 6 ay Texas ştatında San Antoniya şəhərində xarici dillər universitetində təhsil alıb. O, Corciya ştatının Kolumbus şəhərində Xüsusi Təyinatlı Kursunu (Ranger), yüksək hazırlıqlı kursu bitirən ilk zabitlərimizdəndir. Yüksək hazırlıqlı zabit kimi Səfər Qurbanov türk, ingilis, rus dillərində sərbəst danışmağı bacarır.

Ordumuzun ən hazırlıqlı və döyüşkən qüvvəsi olan Xüsusi Təyinatlı Qüvvələrimiz düşmənin vaxtaşırı təxribatlarının qarşısının alınmasında, müxtəlif xüsusi tapşırıqların yerinə yetirilməsində daima şücaət göstəriblər. Hamımız 2016-cı ilin Aprel döyüşlərini yaxşı xatırlayırıq. Azğın düşmən təxribat törədərək Lələtəpə istiqamətindən ordumuzun mövqelərinə hücuma keçmişdi. Dörd gün davam edən döyüşlərdə xüsusi təyinatlılarımız böyük qəhrəmanlıq göstərərək erməni qüvvələrini darmadağın etdilər, çox vacib sayılan Lələtəpə yüksəkliyini azad etdilər. Döyüşlərdə fərqlənənlərdən biri də Səfər Qurbanov idi. Aprel döyüşlərində o, uzun illər bir yerdə xidmət keçən çox dəyərli dostlarını itirdi. Xüsusilə Azərbaycanın Milli Qəhrəmanı, polkovnik Murad Mirzəyevin şəhid olması onu çox sarsıtdı. Axı, onlar Türkiyədə bir yerdə hərbi təhsil almışdılar, çox saylı xarici ölkələrdəki təlimlərdə birgə iştirak etmişdilər. Onlar ən yaxın dost, həm də sirdaş idilər.

2020-ci ilin sentyabrın 27-də düşmənin növbəti təxribatının qarşısının alınmasıyla başlayan İkinci Qarabağ müharibəsi Azərbaycan Ordusunun, əsgər və zabitlərimizin qəhrəmanlığını bütün dünyaya sübut etdi. Bu müharibə dünya hərb tarixində ilk dəfə yeni texnologiyaların, taktikaların tətbiqi ilə yaddaşlarda qaldı. Müzəffər Ali Baş Komandan İlham Əliyevin sərkərdəlik məharəti, ordumuzdakı sonsuz ruh yüksəkliyi, döyüşçülərimizin hamını heyrətə gətirən qorxmazlığı və cəsarəti 44 gün ərzində Ermənistan ordusunun tamamilə darmadağın olunmasını, işğalçıların torpaqlarımızdan qovulmasını, Qarabağın işğaldan azad olunmasını təmin etdi. Tarixi Zəfərin qazanılmasında Xüsusi Təyinatlı Qüvvələrimiz müstəsna xidmətlər göstərdilər. Ən çətin, bəzən mümkünsüz görünən tapşırıqları böyük müvəffəqiyyətlərlə yerinə yetirən xüsusi təyinatlılar adətən döyüşlərin ön sıralarında yer alırdılar, mənfur düşmənin əsl kabusuna çevrilirdilər.

Torpaqlarımızın erməni işğalından azad olunması əməliyyatlarının idarə olunması özü-özlüyündə dünya hərb tarixində yeni bir hadisə idi. Məlum məsələdir ki, İkinci Qarabağ savaşında döyüş əməliyyatlarına müasir hərbi biliklərə yiyələnmiş, zəngin təcrübəli zabitlərimiz rəhbərlik edirdilər. Belə yüksək peşəkar zabitlərdən biri polkovnik-leytenant Səfər Qurbanov idi. Əfsanəfi komandir, general Hikmət Mirzəyev ona yüksək etimad göstərirdi. Söhbətlərimizin birində Şuşa əməliyyatından qısaca danışdıq. Səfər Qurbanov bildirdi: "Bu gün bütün dünya bu əməliyyatın unikallığından geniş bəhs edir. Fəxr edirəm ki, komandirim, general Hikmət Mirzəyevlə birlikdə bu əməliyyatın hazırlamasında, uğurla icrasında iştirak etmək mənə də nəsib olub. Biz Qarabağı demək olar ki, 30 ilə yaxın bir müddətdə işğalda saxlayan, möhkəm istehkamlar quran, hər yerdə əlverişli mövqelərdə qərarlaşan düşməndən şücaətimizlə, Vətənimizə olan sonsuz sevgimizlə, qanımız və canımız bahasına azad etdik. İnanın ki, 18-20 yaşındakı gənc əsgərlərimizin elə qəhrəmanlıqlarının şahidi olmuşam ki, bunu sadəcə sözlə ifadə etməyə çətinlik çəkirəm. Bir zabit kimi Vətən müharibəsindəki gördüklərim məndə tam bir əminlik yaratdı ki, Azərbaycan Ordusunun döyüş qüdrəti və inanılmaz dərəcədə artan peşəkarlığı qarşısında heç bir düşmən tab gətirə bilməz. Biz qalib ordunun yenilməz əsgər və zabitləriyik".

Hərbidə komandirin sədaqətliliyi ən vacib keyfiyyətlərdən sayılır. Bu baxımdan Səfər Qurbanov çoxlarına nümunə ola bilər. Müharibə başa çatandan sonra qısa müddətə valideynlərinə baş çəkməyə gələn Səfər Qurbanov keçmiş döyüşçülərinin, xüsusi təyinatlıların şəhidlərinin ailələrinə baş çəkməyi özünə borc bildi. Həmin vaxt söhbətimiz zamanı ürək yanğısı ilə bildirdi ki, rayonumuzdan olan Vətən Müharibəsi Qəhrəmanları, şəhidlər - mayor Şıxəmir Qurbanov, kapitan İsmayıl Səmədov və baş leytenant Valeh Bədəlov ordumuzun ən seçilmiş zabitləri, gələcəkləri parlaq olan hərbçilərimiz idi. Onların ikisi - İsmayıl Səmədov və Valeh Bədəlov Səfər Qurbanovun yetişdirdiyi, bir dost və qardaş qədər yaxın bildiyi zabitlərimiz olmuşlar.

Fəxrimiz, polkovnik-leytenant Səfər Qurbanovun Vətən müharibəsindəki qəhrəmanlığı və döyüşləri məharətlə idarə etmək bacarığı Ali Baş Komandan İlham Əliyev tərəfindən yüksək qiymətləndirilmişdir. Azərbaycan Respublikası ərazilərinin işğaldan azad olunması və ərazi bütövlüyünün bərpa olunması zamanı döyüş əməliyyatlarına yüksək peşəkarlıqla rəhbərlik etmiş, hərbi qulluq vəzifəsini yerinə yetirərkən igidlik və mərdlik nümunəsi göstərmiş Qurbanov Səfər Qurban oğlu "Qarabağ" ordeni ilə təltif olunmuşdur. Bundan əlavə, onun sinəsini "Füzulinin azad olunmasına görə", "Cəbrayılın azad olunmasına görə", "Şuşanın azad olunmasına görə" və s. medallar bəzəyir.

Hərbçi peşəsini keçdiyi nümunəvi xidmətlə şərəfləndirən, zabit kimi ləyaqəti və şəxsiyyəti ilə ürəklərimizdə sevgi ünvanı quran əzizimiz Səfər Qurbanov Vətən qarşısında xidmətini bu gün yenə əzmlə və sevgi ilə davam etdirir. Həyatda və döyüşlərdə çox zirvələri fəth edən zabitimizə Allahın qismətiylə general rütbəsinə yüksəlməyi arzulayırıq.

İbrahim BƏXTİYAROĞLU,

"Zaqatala" qəzetinin redaktoru

525-ci qəzet.- 2021.- 23 sentyabr.- S.13.