Göyərçinin qartal övladı

Professor Misir Mərdanovun 75 illiyinə

İnsanlarla qanadlılar arasında bir bənzərlik var. Bəziləri sərçə kimidir - yalnız doğulduğu yerin sınırları içində dolaşar, dünyadan xəbəri olmaz və çox vaxt cikkiltisi ilə zəhlə tökər. Bəziləri sanki qaranquşdur - bütün dünyanı dolaşar, həmişə insanlara yaxın olmağa çalışar, varlığı ilə onlara yalnız sevinc gətirər, hamının məhəbbətini qazanar. Bəziləri üzdəniraq yapalağa bənzər - təkcə öz mənafeyini güdər, bir küncdə gizlənərək səs çıxarmadan pusquya yatar, ovunu qəflətən tutub parçalayar, namərdliyi ilə tanınar. Ancaq elələri də var ki, öz gücü, iradəsi ilə qanadlanıb qartal kimi ünyetməz zirvələrə ucalar, ucsuz-bucaqsız səmalarda buraların ağasıymışcasına məğrur-məğrur süzər, əlçatmaz göylərdən iti gözləri ilə aşağıdakı hər şeyi, ən xırda incəlikləri də seyr edər, gərəkli anda ən doğru qərarı verər.

Bu yazım o cür bir qartal haqqındadır - qədim Qazax torpağının Qaraqoyunlu dərəsinin Karvansaray (indiki İcevan) bölgəsinin Göyərçin kəndində dünyaya göz açmış professor Misir Mərdanov haqqında! O da doğma yuvası Göyərçindən qartal kimi qanad gərərək pərvazlanıb, yalnız öz gücü, ağlı, əməyi və bacarığı ilə zirvələr fəth edib, ölkələr gəzərək dünyanın gəliş-gedişini süzgəcdən keçirib, 75 yaşında ikən dönüb arxaya boylananda öyünə biləcəyi bir ömür yolu görüb.

Mən yalnız dərin sayğı bəslədiyim, inandığım insanlar haqqında düşüncələrimi qələmə alıram. Bu yazım da həmin insanlardan biri haqqında ürəkdən gələn səmimi sözlərimdir.

Göyərçindən Bakıya

Misir Mərdanov 3 oktyabr 1946-cı ildə dünyaya göz açıb. Kolxoz sədri olan atası Cumayıl kişi bölgənin sayılıb-seçilən el ağsaqqallarındandır. Ancaq Misir hələ uşaqlığından həyatını ata hesabına deyil, öz gücünə qurmağı qərarlaşdırmışdı. Bu üzdən də birinci sinfə getdiyi 1954-cü ildən üzübəri yaxşı oxuyub, şəkli daim məktəbin şərəf lövhəsini bəzəyib.

Kiçik yaşlarından oxumağa böyük həvəs göstərib. Qalın-qalın romanları qısa müddətdə başa çıxıb. Kənd kitabxanasında oxumadığı kitab qoymayıb. Mütaliəyə həvəsi eyni coşqunluqla indiyədək qalmaqdadır.

Karvansaray bölgəsi məktəblərində 1964-cü ilədək oxusa da, onu Bakı özünə çəkib və elə həmin il paytaxta gələrək orta təhsilini burada bitirib.

Tələbəlikdən professorluğa

Orta məktəbi başa vurunca sənədlərini o zaman ölkənin yeganə universiteti və ən hörmətli ali məktəbi olan Azərbaycan Dövlət Universitetinin (ADU-nun) riyaziyyat fakültəsinə verib. Qəbul imtahanlarından yüksək bal toplayaraq tezliklə adını tələbələr siyahısında oxuyub. Elə başlanğıcdan seçilən tələbələrdən olub. Yalnız yaxşı oxumaqla qalmayıb, aşağı kurslardan elmə həvəs göstərərək həm fakültə, həm də universitet tələbə elmi cəmiyyətlərində fəallıq göstərib, onlarda və respublika konfranslarında müxtəlif maraqlı məruzələrlə çıxış edib, orta məktəbdə "papağını günə yandırmadığını" sübut edib. Beş ildə bütün imtahanlarını yalnız "beş"lə verərək ADU-nu 1969-cu ildə fərqlənmə diplomu ilə bitirib. 1970-ci ilin yanvarından bütün elmi və pedaqoji fəaliyyəti ilə ölkəmizin ali məktəblərinin şahı olan ADU-ya, sonrakı Məhəmməd Əmin Rəsulzadə adına Bakı Dövlət Universitetinə bağlanıb. O, 1972-ci ilin sonunadək aspiranturada oxumaqla yanaşı, bəzən aşağı kurs tələbələrinə dərs də deyib.

Aspiranturanı uğurla başa vurunca 1973-cü ildə namizədlik dissertasiyası müdafiə edərək fizika-riyaziyyat elmləri namizədi adı alıb, doğma riyaziyyat fakültəsinin müxtəlif kafedralarında 1984-1987-ci illər arasında dosent kimi baş müəllim, dekan müavini işləyib, universitet qəbul komissiyası məsul katibinin müavini və məsul katibi olub. 1989-cu ildə isə doktorluq dissertasiyası müdafiə edərək fizika-riyaziyyat elmləri doktoru alimlik rütbəsi qazanıb. 1991-ci ildə professor olub.

Universitetdə təşkilatçılıq bacarığını göstərə bilmiş elmlər doktoru Misir Mərdanova 1989-cu ildə yüksək bir vəzifə - Xalq Təhsili Nazirliyində Ali Təhsil İdarəsinin rəisliyi etibar edilib. Bu zaman onun 43 yaşı vardı və həyatının ən enerjili dönəmlərindən birini yaşayırdı. Burada ali təhsillə bağlı qabaqcıl düşüncələri, yeni təşəbbüsləri və onlarla bağlı gördüyü işlər çox keçmədən onun daha yüksək vəzifəyə irəli çəkilməsinə yol açdı - 1991-ci ildə professor M.Mərdanov artıq xalq təhsili nazirinin müavini idi.

1992-ci ildə iqtidara gələn yeni hakimiyyət, təbii ki, nazirliyə öz kadrlarını təyin edəcək, o sıradan Misir müəllim də əvəzlənəcəkdi və əvəzləndi də. Ancaq ali təhsil sahəsindəki böyük təcrübəsi və bacarığı nəzərə alınaraq, o, M.Ə.Rəsulzadə adına Bakı Dövlət Universitetinə birinci prorektor göndərildi. Firidun Səməndərovun və Murtuz Ələsgərovun rektorluqları dönəmində - 1992-1996-cı illərdə M.Mərdanov M.Ə.Rəsulzadə adına BDU-nun I prorektoru vəzifəsində çalışdı. 1996-cı ildə M.Ələsgərov rektorluqdan gedərkən onun kürsüsü bir il boş qaldı və vəzifəsinin icrası, təbii ki, ondan sonrakı ikinci şəxsə tapşırıldı.

Bir ildə universitetə rəhbərlik etməyə layiq olduğunu sübut edən Misir müəllim artıq 1997-ci ilin fevralından bu ali məktəbin rektoru idi. Ancaq bu vəzifəsi də uzun sürmədi, çünki 25 mart 1998-ci ildə ona artıq ölkə miqyaslı dövlət qurumu - Azərbaycanın Təhsil Nazirliyi etibar edildi.

Təhsil naziri

Bu vaxt mən artıq 5 il idi ki, indiki Bakı Avrasiya Universitetində müəllimlik edirdim. Doğrudur, nazirlə heç bir şəxsi əlaqəm yoxdu, ancaq bir təhsil işçisi kimi fəaliyyətini izləyirdim. Bu gün bizim istəyib-istəməməyimizdən, bəyənib-bəyənməməyimizdən asılı olmayaraq Misir Mərdanovun adı Azərbaycanın təhsil tarixinə daim yeniliyə can atan islahatçı nazir kimi həkk olunub və onun, 15 illik nazirlik fəaliyyəti ilə öyünməyə haqq qazandığını düşünürəm. Gerçəkləşdirməyə çalışdığı islahatların nə dərəcədə uğurlu alınıb-alınmaması isə ayrıca araşdırma gərəkdirən ciddi bir mövzudur.

M.Mərdanov nazir kimi işə başladığı günədək bütün müəllimlik, alimlik və idarəçilik fəaliyyəti dönəmində təhsilin müxtəlif səviyyələrinə səmərəli innovasiyalar tətbiq etmək, ölkə təhsilində məzmunca dönüş yaradan islahatlar apararaq təhsil sistemini yeniləşdirmək, milli və ümumbəşəri dəyərlərə söykənməklə təhsilimizi Avropa və dünya təhsil sisteminə uğurla uyğunlaşdırmaq üzərində xeyli düşünüb və çalışdığı vəzifələrdə bu düşüncələrini gerçəkləşdirmək üçün bütün güc və bacarığını sərf edib. İndi isə - ölkənin bütün təhsil sisteminin taleyinin ona tapşırıldığı məsul bir dönəmdə bu arzularını həyata keçirməyə onun qarşısında geniş imkanlar yaranıb. Bu imkanlardan maksimum yararlanmaq üçün o, ilk növbədə içində bulunduğu mövcud sistemin qanun və tələblərinə, ictimai-siyasi şəraitə tam uyğun şəkildə ləngimədən gerçək islahatlara can atıb. Nazirliyə gəlişindən 5 gün sonra Prezidentin sərəncamı ilə Azərbaycanda Təhsil Sahəsində İslahatlar üzrə Dövlət Komissiyasının sədri də təyin edilib və islahatlara başlayıb.

Xatırlatmalıyam ki, onun rəhbərliyi altında təhsilin inkişafına hədəflənmiş 16 dövlət proqramı təhsilin müxtəlif sahələrinin inkişafındakı gerçək durumun təhlili əsasında işlənərək hazırlanıb və gerçəkləşdirilib. Həmin proqramların həyata keçirilməsi nəticəsində Azərbaycanın təhsil sistemi çağdaş tələblərə uyğun qurulub və məzmunca yenilənib, "Azərbaycan Respublikasında ümumi təhsilin Konsepsiyası (Milli Kurikulumu)" hazırlanıb, dərsliklərlə bağlı yeni siyasət gerçəkləşdirilib, şagirdlərin biliyinin qiymətləndirilməsinin yeni model və mexanizmləri tətbiq edilib, kadr hazırlığı və təminatı əmək bazarının tələblərinə uyğun şəkildə təkmilləşdirilib, təhsil ocaqları informasiya-kommunikasiya texnologiyaları ilə təchiz olunub, təhsil sisteminin bilgisayarlaşdırılması, məktəbəqədər, texniki-peşə, ali təhsil, əcnəbi ölkələrdə təhsil, vergili uşaqların inkişafı, özəl qayğıya möhtac uşaqların oxumasının təşkili və başqa bir çox sahələrdə gözgörəsi uğurlar qazanılıb.

Azərbaycanın təhsil sisteminə "kurikulum" yeni bir anlayış kimi daxil olub.

İslahat çərçivəsində özündə təhsilalanlar üçün zəruri səriştələri, məzmun və qiymətləndirmə standartlarını, mövcud tədris planı və proqramlarını, şagirdə və onun hazırlıq səviyyəsinə verilən tələbləri, hər dərsin konkret inkişafetdirici məqsədlərini, metodik təminatını, dəyərləndirmə modelini, texniki təchizatını və s. təsvir edən, müəllimin və məktəbin qarşısında duran vəzifələri və onların konkret həlli yollarını göstərən bir konseptual sənəd hazırlanıb. "Azərbaycan Respublikasında ümumi təhsilin Konsepsiyası (Milli Kurikulumu)" adlı həmin sənəd 2006-cı ildə ortaya qoyulub, onu Azərbaycan Respublikası Nazirlər Kabineti təsdiqləyib və o, 2010-cu ildə "Ümumi təhsil pilləsinin dövlət standartı və proqramları (kurikulumları)" adı altında təkmilləşdirilib. Ümumi təhsilin fənn kurikulumları təhsil nazirinin əmri ilə təsdiqləndikdən sonra pedaqoji ictimaiyyətin istifadəsinə verilib.

1992-1993-cü illərdə bizim rəhbərliyimiz altında müstəqil Azərbaycanın milli ideologiyaya əsaslanan, kommunist düşüncələrdən təmizlənmiş ilk orta məktəb dərslikləri ən qısa vaxtda hazırlanaraq ortaya qoyulmuş, sonrakı illərdə təkmilləşdirilmişdi. M.Mərdanovun nazirliyi dönəmində isə həmin dərsliklər məzmunca kurikulumun tələblərinə uyğunlaşdırıldı. Boynuma almalıyam ki, bu dərsliklər poliqrafik baxımdan özlərindən qabaqkılara nisbətən qat-qat üstündür.

Nazir M.Mərdanovun gördüyü işləri sadalamaq elə də çətinlik yaratmır, çünki bu işlərin statistikası genişdir. Burada ən önəmlilərini sadalayaq.

Onun dönəmində yeni tədris-tərbiyə müəssisələrinin dövlət xəzinəsi hesabına tikintisi və əsaslı təmiri kəskin şəkildə artıb.

Onun birbaşa rəhbərliyi altında "2007-2015-ci illərdə Azərbaycan gənclərinin xaricdə təhsili üzrə Dövlət proqramı" işlənib hazırlanaraq gerçəkləşdirilməyə başlanıb.

Onun vaxtında Azərbaycan müəllimlərinin qurultayları hər 5 ildən bir müntəzəm keçirilib. 1998-ci ildəki 11-ci, 2003-cü ildəki 12-ci və 2008-ci ildəki 13-cü qurultayların təşkili və təntənəli keçirilməsi M.Mərdanovun nazirlik dönəminin uğurlarındandır.

Onun təşəbbüsü ilə keçirilən "50 ən yaxşı məktəb", "100 ən yaxşı müəllim" müsabiqələri təhsil müəssisələri kollektivlərinin və müəllimlərin həvəsləndirilməsində önəmli rol oynayıb.

Təhsil sahəsindəki səmərəli fəaliyyəti nəzərə alınmaqla nazir 2006-cı ildə "Şöhrət" ordeni ilə təltif edilib.

Nazir M.Mərdanov müəllimlərin əmək haqqının artırılmasını vacib sayıb və buna cəhd edib. Təsadüfi deyil ki, vəzifəyə başladığının elə 3-cü günü keçirdiyi ilk iclasda məktəb sənədlərinin nəşri ilə yanaşı, bəzi bölgələrdə müəllimlərə maaşın verilməsinin ləngidilməsi və işləməyən məcburi köçkün müəllimlərə maaş verilməsi məsələləri müzakirə edilmişdi. Müəllimlərin əmək haqqının 200 manatdan 2 min manata qaldırılması arzusu isə nə o zaman, nə də sonralar gerçəkləşdi...

Əlbəttə, nəzərdə tutulmuş islahat zəncirindəki geniş işləri yalnız dövlət büdcəsi hesabına görmək çox çətin idi. Buna görə də ölkə rəhbərliyinin tövsiyəsinə əsasən Təhsil Nazirliyi Ümumdünya Bankı ilə sıx əməkdaşlıqda bulunub və önəmli layihələrin çoxu məhz bu əməkdaşlıq sayəsində həyata keçirilib.

Sonda qeyd edim ki, M.Mərdanov 2007-2013-cü illərdə "Təhsil yenilikləri", 2008-2013-cü illərdə "Kurikulum", 2012-2013-cü illərdə isə "Ali təhsil və cəmiyyət" jurnallarına baş redaktorluq edib. Haqqını verərək qeyd etməliyik ki, bu nəşrlərin yaradılmasının təşəbbüsçüsü və onlara həyat verən də elə nazirin özü olub.

Misir müəllim 2011-2014-cü illərdə Türk Dünyası Riyaziyyat Qurumuna başqanlıq (prezidentlik) edib.

Nazirlik dönəmi əməkdaşlığımız

2012-ci ilin yanvarında günlərdən bir gün idi. Telefonum zəng çaldı. Açdım. Təhsil naziri Misir Mərdanovun səsini eşidəndə təəccübləndim, çünki 20 ildi ki, heç bir əlaqəmiz yox idi. Mənimlə görüşmək istədiyini bildirdi. Yanına getdim. Görüşdük. Tarixçi Nərmin xanım Tahirzadənin Çar dönəmi ziyalılarımız haqqında rusca nəşr edilmiş "Azərbaycan ziyalılarının tarixindən" adlı kitabını çox bəyəndiyini, onu ana dilimizə çevirtmək istədiyini bildirdi (7 yanvar 2012-ci ildə Nərmin xanım Haqq dünyasına qovuşdu. Misir müəllimin yas mərasiminə nazirliyin iki əməkdaşını göndərərək başsağlığı verdiyi yadımdadır).

Tərcüməni oğlum Oğuztoğrulla birgə edirdik. İş ağır idi. Mən bircə səbəbini deyəcəyəm: əsərdə geniş istifadə olunmuş özəlliklə Çar dönəminə aid sənədlərdə elə terminlər işlədilmişdi ki, dilimizdə onların qarşılığı yoxdu. Başqa ciddi səbəblər də vardı, ancaq biz işin öhdəsindən gələ bildik.

Əsər 2015-ci ildə Misir müəllimin layihəsi olaraq "Azərbaycan təhsil tarixi oçerkləri və ilk ali təhsillilərimiz" adı altında işıq üzü gördü. Onun kitabdakı "Layihə rəhbərindən" adlı giriş sözü həm ümumən Nərmin xanımın elmi fəaliyyətini, həm rusca kitabını, həm də bu yeni nəşrin özünü dəyərləndirmək baxımından çox qiymətlidir.

Dördcildlik sanballı "Azərbaycan təhsil tarixi" kitabında Çar dönəmində azərbaycanlıların ali təhsil almasına geniş yer ayırmış Misir müəllim ilk görüşümüzdəcə belə fikir yürütdü ki, 1920-ci ilədək ali məktəblərdə oxumuş bütün soydaşlarımızın adlarını müəyyənləşdirmək, onların dünya arxivlərində qorunub saxlanan sənədlərini əldə edib Azərbaycana gətirmək gərəkdir; sovetləşməyədək olan gerçək ali təhsil tariximizi yalnız bundan sonra köklü şəkildə öyrənə bilərik.

Açığı, təşəbbüs qulağa xoş gəlsə də, gerçəkləşdirilməsi olduqca müşkül idi, çünki bu arzunu həyata keçirmək üçün: 1) Çar dönəmində ali məktəb(lər)i olmuş bütün şəhərlərə ezamiyyətə getmək, onların arxivlərində şəxsən çalışmaq gərəkdi, axı arxivlərdə "sifarişlə həcc" əsla qəbul olunmur, olsa da hədsiz baha başa gəlir; 2) arxivlərdən toplanaraq gətirilmiş bəlgələri son nəticədə kitaba çevirmək lazımdı, onların yazılması və nəşri də altına girilməsi çətin, oğul çiyni istəyən ciddi problemdi. Bu işin maddi-texniki-psixoloji baxımdan çətinliyini hələ bir qırağa qoyuram. Bu üzdən də deyilən fikrə öncə inamsız yanaşdım, ancaq nazir "dediyimi gerçəkləşdirməkdən ötrü hər cür imkan və şərait yaratmağa hazıram" bildirincə inamsızlığım öz-özünə yox oldu.

Misir müəllimin 15 illik nazirlik görəvi 19 aprel 2013-cü ildə başa çatdı. Ancaq bu, nəinki əməkdaşlığımızın sonu oldu, əksinə, ortaq layihəmiz yekun gerçəkləşmə mərhələsinə girdi.

AMEA Riyaziyyat və Mexanika İnstitutunun direktoru

M.Mərdanov 1 may 2013-cü ildən AMEA Riyaziyyat və Mexanika İnstitutunun direktorudur. Bu müddətdə institut elmi araşdırmalarda və beynəlxalq əməkdaşlıq sahəsində önəmli uğurlar qazanıb. Bu elm ocağının 60 illik yubileyi 2019-cu ilin oktyabrında dünyanın 20-dən artıq ölkəsindən gəlmiş ən görkəmli alimlərin qatıldığı möhtəşəm beynəlxalq konfransla qeyd edilib.

Onun direktorluğu dönəmində Riyaziyyat və Mexanika İnstitutunda çıxan 4 ingiliscə jurnaldan 3-ü artıq beynəlxalq arenaya çıxıb: "Azerbaijan Journal of Mathematics", "Proceedings of the Institute of Mathematics and Mechanics" (2015-ci ildən bu jurnalın baş redaktorudur) və "Transactions of ANAS (Matematiçeskaə seriə)" məşhur Scopus elmmetrik bazasında impakt-faktor alıb. İlk iki jurnal eləcə də Clarivate Analytics şirkətinin dünyada ən məşhur Web of Science elmmetrik bazasınin ilkin siyahısına daxil edilib. Bunun nə qədər dəyərli bir amil olduğunu elm adamları bilir.

O, "Azerbaijan journal of Mathematics", "TWMS Journal of Pure and Applied Mathematics" və "Çebışevskiy sbornik" jurnalları redaksiya heyətlərinin üzvüdür.

Alim və müəllim

Professor Qoşqar Əhmədovun tələbəsi olan Misir Mərdanov Azərbaycanda optimal idarəetmənin riyazi üsulları sahəsində ən öndə gedən alimlərdəndir. O, hələ aspiranturada oxuduğu vaxtdan - 1972-ci ildən beynəlxalq konfranslarda bu mövzuda məruzələrlə çıxış edib.

Misir müəllim Azərbaycanda riyaziyyat elminin və riyaziyyatçıların təbliği üçün önəmli işlər görüb.

"Azərbaycanın çağdaş riyaziyyatının sələfləri" (prof. Ramiz Aslanovla birgə; Moskva, 2016), "Müəllimim Qoşqar Əhmədov" (2017), "Azərbaycan riyaziyyatçıları" (2019), "Azərbaycan Milli Elmlər Akademiyası Riyaziyyat və Mexanika İnstitutu - 60" (2019), "Bakı Dövlət Universiteti" (2021) kimi dəyərli əsərlərində o, milli riyaziyyatçılarımızın bir çoxu haqqında elm tariximizdə ilk dəfə söz açıb və onların yaradıcılığını dəyərləndirib.

Ümumtəhsil məktəblərimiz üçün bir sıra dərsliklərin də müəllifinin M.Mərdanov olması təbiidir. 6-cı sinif üçün "Riyaziyyat", 7, 8, 9, 10, 11-ci siniflər üçün "Həndəsə", 7, 8, 9-cu siniflər üçün "Cəbr", 10, 11-ci siniflər üçün "Cəbr və analizin başlanğıcı" kimi dərsliklər onun qələminin məhsuludur. Ali məktəblər üçün "Ali riyaziyyat" kitabı da onun rəhbərliyi və müəllifliyi ilə hazırlanaraq 2020-ci ildə nəşr edilib.

Misir müəllim yaradıcılığının son dönəmlərində əsas elmi istiqaməti ilə yanaşı, təhsilin məzmunu, təhsil tarixi, milli-mənəvi dəyərlər... kimi mövzular üzrə də ciddi araşdırmalar aparır. "Azərbaycanın təhsil nazirləri", 4 cildlik "Azərbaycanın təhsil tarixi" əsərləri, mənimlə birgə hazırladığı "1920-ci ilədək ali məktəblərdə oxumuş azərbaycanlılar. (Ensiklopedik soraq kitabı)" çoxcildliyi həmin araşdırmaların məhsuludur.

Dost sözü

Bu gün Misir müəllim Göyərçindən pərvazlanarkən bəlkə də ağlına belə gətirə bilməyəcəyi zirvələrə yüksəlib, ən uca adlara, rütbələrə yiyələnib. Rektor işləyib, nazir olub, institut direktorudur, AMEA-nın müxbir üzvü, fizika-riyaziyyat elmləri doktoru, professor, Əməkdar elm xadimi, neçə-neçə sanballı kitabın müəllifidir və s. Bəzi insanlar bu məqama yetişəndə tarazlığını saxlaya bilmir, büdrəyir. 2012-ci ildən bəri ortaq işimizlə bağlı tanıdığım Misir Mərdanov isə ilk gündə necə görmüşdümsə bu gün də elə qalıb: özünü dartmağı sevməyən, işdə həm özünə, həm də əməkdaşlarına qarşı tələbkar və ciddi, eyni zamanda qayğıkeş, dostbazlıqla arası olmayan, ümumən adamlarla münasibətdə məsafə saxlamağa çalışan, ancaq bəyəndiyi insanlarla yaxınlığa can atan, ürəyindəkiləri onlarla paylaşmağı xoşlayan, verdiyi sözü hökmən yerinə yetirən, ikiüzlülük və yalana nifrət edən, yazmaqdan və oxumaqdan əsla yorulmayan bir insan!

...Əlbəttə, hər bir şəxs kimi Misir müəllimi də sevənlər də var, onu qəbul etməyənlər də. Heç biri ilə işim yoxdur. Ancaq şəxsən mən arzu edirəm ki, bütün ətrafımızda yalnız onun kimi insanlar olsun.

Bu yaxınlarda Misir müəllim həyatının 75-ci ilini yola salacaq. Bu əlamətdar günündə onu təbrik edir, təbii ki, ona hər şeydən öncə uzun və sağlam ömür, çoxlu-çoxlu yaradıcılıq uğurları diləyirəm! Ürəyimdəki ən böyük diləyim budur: əziz Misir müəllim, Sizin haqqınızda eşitdiyim yaxşı və pis heç bir sözə indiyədək əsla diqqət vermədim, necə insan olduğunuzu özüm kəşf etdim. Kəşf etdiyim isə başqalarına örnək bir insan oldu. Lütfən ömrünüzün sonunadək elə indiki örnək Misir müəllim olaraq qalın!

Ədalət TAHİRZADƏ

Bakı Avrasiya Universitetinin professoru

525-ci qəzet.- 2021.- 29 sentyabr.- S.16-17.