Ustad

(Xalq şairi Zəlimxan Yaqubun xatirəsinə)

Ürəyinə su səpilsin, ey ustad,

Yanan qəlbin sakitləşsin, soyusun.

Qarabağın qışı gedib, ey ustad,

Məğrur ruhun artıq rahat uyusun.

Borçalıdan haray çəkdin bu yana,

Nər oğullar dayanmayın, amandı.

Tapdatmayın bu torpağı düşmana,

Şuşam yanır od içində , zamandı.

Sən yatmazdın Şuşa boyda dərd ilə,

Ölüm belə məzarında uyutmaz,

Oyan , ustad qələmini al ələ.

Oyan şair, qılınc qələmsiz olmaz.

Mərdin işi gərək düşə mərd ilə,

Dövran bizi namərdlərlə sınadı.

Əsir düşmüş el obançün say, hələ

Neçə dəfə şair könlün qanadı?

Vətən bizə Vətən boyda dərd ilə

Nalə çəkdi qız gəlinin dilindən.

Ürəyini dəlib keçən dərd ilə,

Haray çəkdin körpələrin dilindən.

Utanırdın neçə vaxtdı Kəlbəcərsiz, Şuşasız,

Soyuqlarda pərən düşüb elin, yurdsuz yuvasız.

Düşmən qəddar, düşmən cəllad , amansız -

Qəlbin yandı, od püsgürdün bu dövrana, ey ustad.

İndi qalxsın şair könlün, məzardan, Zəlimxan,

Seyr eləsin qürur ilə Cəbrayıldan , Laçından ...

Vaxtı gəldi badə götür axan Tərtər , Xaçından

Sərin su tək səp ruhuna, ruhun dinsin, ey ustad.

Görürsənm , Kəlbəcərin dağı-daşı sevinir,

Bilirsənmi Zəngilanın axar yaşı sevinir,

Nəzər eylə, Qubadlıda bulaq başı sevinir

Qarabağa qədəm qoyan əsgərinlə, ey ustad.

Agah ol ki, xar oldular Şuşa mənim deyənlər.

Şükür olsun geri döndü Şuşasına ərənlər,

Ürəyində Şuşa boyda Şuşa dərdi gedənlər

Zəlimxantək ruhlarınız şad olsun,

Bu ərməğan xalqımıza yar olsun!

Aygün XƏLİLQIZI

Bakı Dövlət Universitetinin müəllimi.

fəlsəfə üzrə fəlsəfə doktoru

525-ci qəzet.- 2021.- 22 yanvar.- S.15.