Yol davam edir

Bu yol düz 20 il əvvəl başlandı.

2001-ci ilin rəmzi bir günündə, yanvarın 19-dan 20-nə keçən gecədə Strasburqa, Avropa Şurasına yola düşəcək ilk nümayəndə heyətimizi gündüz unudulmaz ümummilli liderimiz Heydər Əliyev qəbul etdi.

Bu təşkilatın Azərbaycan üçün gərəkliliyindən, amma işimizin heç də asan olmayacağından danışdı, məsləhətlərini verdi, tövsiyyələrini etdi, görməli olduğumuz işlərin başlıca istiqamətlərini nişan verdi, bu platformadan həqiqətlərimizi dünyaya çatdırmaq üçün lazımınca yararlanmağın vacibliyini diqqətə çatdırdı.

Bir neçə gün sonra onunla yenidən görüşdük. Bu dəfə Ulu Öndəri artıq Strasburq hava limanında qarşılayırdıq.

2001-ci il yanvarın 25-də Azərbaycan dövlətinin başçısı Heydər Əliyev Avropa Şurasının qarşısında burada daimi dalğalanmaqçün bayrağımızı qaldırdı, az sonra Avropa Şurası kürsüsündən geniş çıxış etdi, Avropa Şurası ailəsinə gəlməyimizlə nələr umduğumuzu söylədi.

İlk nümayəndə heyətimizin rəhbəri bu gün Azərbaycan dövlətinə uğurla rəhbərlik edən, Heydər Əliyev yolunu ləyaqətlə irəlilədən İlham Əliyev idi.

Yolun başlanğıcı çətin idi, mübarizəli idi və qətiyyən demək olmaz ki, yolun sonrakı illəri asan oldu.

Mübarizə ilk gündən necə başlamışdısa bugünədək davam edir və o iş ritmi ki, onu nümayəndə heyətimizin ilk (və daimi!) rəhbəri İlham Əliyev müəyyən etmişdi, indiyədək sabit qalmaqdadır.

Yolun başlanğıcının əsas çətinliyi bundan ibarət idi ki, hələ bizi yaxşı tanımırdılar, hələ ayrı-ayrı ölkələrdən olan deputatlarla münasibətlərimiz yox idi və Azərbaycanın (o cümlədən bizim) qarşımızda duran ilk vəzifə hər şeydən öncə Avropada, bütövlükdə dünyada ölkəmizlə əlaqədar informasiya blokadasını yarmaq üçün durmaqdan çalışmaq idi.

Azərbaycan Avropa Şurasına ərazisinin 20 faizi işğal altında, 1 milyona yaxın qaçqını və məcburi köçkünü olan ölkə kimi gəlmişdi və bu düyünün çözülməsinə töhfələrimizi vermək, Avropa Şurasından xalqımızın, dövlətimizin sözünü, məramını dünyaya çatdırmaq başlıca məramımız idi.

Və arxada qalan 20 ildə bu istiqamətdə uğurlarımız az olmadı.

Bu 20 il boyunca nümayəndə heyətimizin tərkibi mütəmadi olaraq dəyişib, yenilənib, amma balaca dəstəmizdəki sağlam ovqat əvvəldən, yolumuzu başlayandan necə olubsa, elə o səviyyədə qalıb.

2021-ci ilin 25 yanvarından – Avropa Şurasının həqiqi üzvü kimi böyük yola çıxdığımız gündən heyətdə daimi olan ikimizik – Səməd Seyidov və mən.

Xoşbəxtik ki, düz 20 il sonra, 2021-ci ilin elə yolu başladığımız həmin günündə – yanvarın 25-də Avropa Şurasınının binasına qaliblər kimi vüqarla daxil olmaq məsudluğu da qismətimizdə imiş.

Yol davam edir!..

Rafael HÜSEYNOV

Akademik

525-ci qəzet.- 2021.- 29 yanvar.- S.5.