Rəvan Mahmudzadə :"Tennisin inkişafında hamılıqla maraqlı olmalıyıq"

Həmsöhbətimiz gənc yaşına rəğmən öz sahəsində uğur qazanmış, adını idman mətbuatında tanıtdırmağı bacarmış jurnalist Rəvan Mahmudzadədir. Bu gün ad gününü qeyd edən müsahibimizlə həm yaradıcılığı, həm idmanımızın inkişafı, həm də yeni yaşından gözləntiləri haqqında maraqlı söhbətimiz oldu. Müsahibəni oxucularımıza təqdim edirik.

***

- Rəvan, necə oldu ki, idman jurnalistikasını seçdiniz?

- Əslində şablon olacaq, amma bunu deməliyəm ki, bir çoxları kimi mənim də idmana həvəsim uşaqlıqdan yaranıb. Atam və dayımla baxdığım futbol oyunları zamanla ümumi idmana sevgim olduğunu hiss etdirib mənə. Tam olaraq ağlımda jurnalist olmağım yox idi. Yəni uşaqlıqdan jurnalist sənətinə meylim var desəm, yalan olar. Lakin televiziya sahəsinə sevgim ilə idmana sevgimin birləşməsi hazırda idman jurnalisti kimi fəaliyyət göstərməyimə gətirib çıxarıb. Qeyd edim ki, bu sahəyə gəlməzdən öncə bir müddət onlayn televiziya və radioların birində səs rejissoru kimi fəaliyyət göstərmişəm. Jurnalistikayla tanışlığım əsasən ordan başlayır.

İdman sahəsini kənardan bilmək tamam başqadır. Amma bu işin içində olmaq sanki buranın pərdəarxası məqamlarını öyrənmək kimi bir şeydir, əslində. Sırf bunun üçün bu sahəni seçdim. Yəni idmanı sevirəm bəli, lakin sevdiyim sahənin dərinlikləri nələrdir bunu bilmək istəyirdim. Həm də idman jurnalistikasını seçməkdə əsas səbəbim idmanın sadəcə futboldan ibarət olmadığını, bu sahənin içində olaraq öyrənmək niyyətimdir. Hər kəs kimi mən də futbolu sevirəm, izləməkdən zövq alıram, lakin digər idman növləri də var axı. Onları daha yaxından tanımaq həvəsi, bunu professional qaydada bilmək istəyi, əslində, mənim bu sənəti seçməyimdə əsas rol oynayıb.

- Bəs necə oldu ki, idmana həvəsiniz yarandı?

- Az öncə də vurğuladığım kimi idmana marağım lap uşaqlıqdan yaranıb. Bu maraq ilk olaraq futbolla başladı. 2000-ci ilin əvvəllərində Türkiyə klubu "Qalatasaray"ın Avropa kuboklarında oynadığı oyunlar, qazandığı kuboklar mənim həm futbola, həm də bu komandaya olan həvəsimi artırdı. Daha sonra isə həvəsim marağa çevrildi. Təbii ki, vaxt irəlilədikcə ölkəmizdə məşhur olan idman növlərindən, voleybol, cüdo, güləş kimi növlərə də marağım yaranırdı. Məsələn, bir zamanlar voleybolda "Azarreyl" klubunu izləyirdim, onların qazandığı uğurlar marağımı daha da artırırdı. Eləcə də, "Olimpiya oyunları"nda cüdo, güləş kimi idman növlərini də izləməyi çox sevirdim.

- CBC Sportla yolunuz nə vaxt və necə kəsişdi?

- Çox sevdiyim və 5 ildir əməkdaşı olduğum CBC Sport kanalını yarandığı ilk gündən izləyirəm. İdman həvəskarı kimi ölkəmizdə də bu sahə üzrə ixtisaslaşmış televiziya kanalının yaradılması məni çox sevindirirdi. Həmçinin, burada işləmək arzuma çevrilmişdi. İş elə gətirdi ki, çox böyük dəyər verdiyim, hörmət bəslədiyim tanınmış idman jurnalistimizdən birinin dəstəyi və inamıyla bu kanala işə düzəldim. Deyim ki, düz 4 ay kanalda təcrübəçi kimi könüllü fəaliyyət göstərmişəm. Çünki hələlik uyğun vakansiya yox idi. Hətta müəyyən zaman sonra vakansiya olmadığı üçün mənə daha gəlməməyi, özümə başqa iş axtarmağı tövsiyə etdilər (gülür). Lakin mən həm kanalı, həm işimi, həm də kollektivimi o qədər çox sevirdim ki, burdan ayrılmağı düşünmürdüm. Nə qədər lazım olsaydı, o qədər də məvacibsiz davam edəcəkdim. Çünki əsas olan pul deyildi, bura mənimçün bir məktəbə çevrilmişdi. Şükürlər olsun ki, həm rəhbərliyimiz, həm hörmətli redaktorlarım, həm də dəyərli iş yoldaşlarımın dəstəyi, inamı, qayğısı sayəsində bu işi öyrəndim və 4 ay sonra bir zamanlar xəyal etdiyim CBC Sportun artıq rəsmi işçisi idim. Burada olduğumçün özümü şanslı hesab edirəm.

- İdman deyəndə daha çox futbol yada düşür. Xüsusən, bizim ölkəmizdə. Siz isə tennis kimi çox da diqqətdə olmayan sahəyə yönlənmisiz. Tennis niyə diqqətinizi cəlb etdi?

- Bəli, tək bizdə yox, bütün dünyada ən sevilən, baxılan, maraq göstərilən idman növü futboldur. Elə mənim də əsas maraq dairəmi məhz bu idman növü cəlb edirdi. Lakin təxminən 5 il əvvəl (CBC Sportda çalışmağa başladığım vaxt) tennisə maraq göstərməyə başladım. Çalışdığım kanalda təbii ki, hərkəs təcrübəli, yalnız futbolla maraqlanan deyil, ümumi idman növlərini bilən şəxslər idilər. İş yerimizdə ümumi söhbət də yalnız idmanla bağlı idi. Hər hansı mübahisələr, fikir ayrılıqları yalnız və yalnız idmanla əlaqəli ola bilərdi. Məsələn, həmkarlarımın tennislə bağlı maraqlı söhbətləri, müzakirələri məndə bu idman növünə marağı artırdı. Zamanla oyunları izləməyə başladım. Vaxt keçdikcə bu, bir vərdiş halını alırdı. Tennisçilərin hər birini artıq tanıyır, onların zəif, güclü tərəflərini bilirdim. Ümumilikdə bu idman növünə bacardığım qədər hakim olmağa başladım. Tennisdə ən sevdiyim məqam, əslində, bir qədər nəzakətli idman növü olmasıdır. Məsələn, hər hansı bir oyunçu baxımlı xal qazandıqda rəqib onu alqışlamağı bacarır. Bunu digər idman növlərində görməyiniz çətindir. Yaxud planlaşdırılmış kimi xal qazanılmırsa və ya haqsız xal qazandığını düşündüyün anda rəqibdən üzr istənilir. Yəni bu kimi amillər məndə tennisə maraq oyatdı.

- Sizcə, Azərbaycanda niyə tennis inkişaf etməyib?

- Ölkəmizdə bu idman növünə marağın az olduğunu düşünmürəm. Burada günahı sadəcə valideynlərdə görürəm. Bu idman növünə maraq var, amma uşaqları bura yönləndirməyə çəkinirlər. Tennisin "bahalı idman növü" olması onlarda bu çəkingənliyi yaratdığını fikirləşirəm. Lakin yoxlamaq lazımdır. Bəlkə həmin uşaqlarda elə bir istedad var ki, gələcəyin "Böyük Dəbilqə" çempionu, ATP çempionu məhz elə o uşaq olacaq?! Yəni maraq var, amma bu idman növünə çox hakim olmadığından bu çəkingənlik yaranır.

Tennisin inkişafında, məncə, federasiya, televiziya kanalları olaraq hamılıqla maraqlı olmalıyıq. Tennisçilərimizin müəyyən yarışlara qatılmasına maddi vəsait ayrılmalıdır. Əslində, inkişaf etdirmək olar, bunun üçün bir çox məsələlər həll edilməlidir ki, bu da zaman alacaq bir nüansdır.

- Bu istiqamətdə hazırladığınız verilişlərə reaksiyalar necədir? Sizcə, nəyisə dəyişməyə nail olacaqsınız?

- CBC Sport telekanalında artıq 2 ilə yaxın bir müddətdə tennisə həsr olunmuş "Tay-Breyk" verilişi efirdədir. Dəyərli həmkarım Aida Əliyeva ilə hər həftə maraqlı sujetlər hazırlayıb, turnirlərlə bağlı düşüncələrimizi bölüşürük. Əslində tennislə bağlı bir layihə mən və Aida Əliyeva tərəfindən uzun müddət idi ki, düşünülürdü. Hər ikimizin bu mövzuya olan marağı və hakimiyyəti, məncə, maraqlı bir verilişin ərsəyə gəlməsində əsas rol oynayan amil idi. Təbii ki, bu layihənin təsdiqlənib, efirə buraxılmasında başda kanal rəhbəri Volkan Üst olmaqla, Şəmsəddin Abbasov və Rüstəm Əfsərliyə öz dərin minnətdarığımı bildirməyi bir borc bilirəm. Qeyd edim ki, "Tay-Breyk" kanalımızın ən reytinqli verilişlərindən biridir. Bu, sevindirici bir haldır. Yəni zamanla izləyicilərimizə həm tennisi daha yaxından tanıtmış, həm də sevdirməyi bacarmışıq. Əvvəlcə bunu öz ətrafımızdakı insanların reaksiyalarından bilmişik. Tennisə marağı olmayan şəxslər belə bizim verilişi izləyirlər. Bu qürurverici məqamdır təbii ki. Bizim əsas vəzifəmiz bu idman növünü izləyicilərə tanıtmaqdırsa, məncə, artıq hansısa dəyişiklikdən söhbət gedə bilər. "Tay-breyk" komandası olaraq ölkə tennisimizdə olan problemləri araşdırır, birbaşa bu problemin mənbəyinə enib həll yolları axtarırıq. Əslində, izləyicilərimiz bunu daha yaxşı müşahidə edə bilərlər. Ümid edirəm ki, bizim bu istəyimiz, zəhmətimiz bir nəticə verər. Mən şəxsən çox, çox istərdim ki, nüfuzlu yarışlarda öz həmyerlilərimizi izləmək şansı qazanaq. Ən azından bu, bizim arzumuzdur.

- İdman müxbiri kimi uşaq komandalarının da fəaliyyətini izləyirsiniz. İdmanımızın gələcəyiylə bağlı nə düşünürsünüz? Hansı sahə daha ümidvericidir?

- Əslində, gələcəklə bağlı heç də nagüman deyiləm. Ölkəmizdə idmana maraq çoxdur. Son illərdə bütün sahələr kimi bu sahədə də müəyyən irəliləyişlər var. Fikrimcə, bu, başlanğıcdır. Əlbəttə, hər şey birdən-birə qurulmur. İdmanımızın çox inkişaf etmiş, hətta dünyada səs salmış növləri də var. Bu da bizim uğurumuzdur. Nisbətən "axsayan", indilik zəif nəzərə çarpan sahələr isə inanıram ki, zamanla öz inkişaf yollarına qədəm qoyacaqlar. Bunu deməyə elə sizin vurğuladığınız uşaq komandalarıyla bağlı müşahidələrim də rəvac verir. Əsas odur ki, hər birimiz öz üzərimizə düşən məsuliyyəti dərk edək və işimizə vicdanla yanaşaq.

- Bilirik ki, ADMİU-nun rejissorluq ixtisasını bitirmisiniz. İxtisasınızı niyə davam etdirmədiniz?

- Bəli, rejissorluq fakültəsini bitirmişəm. Amma həyatın insana nələr gətirəcəyini bilmərik. Həm də bizim ölkədə rejissorluq sənətini istənilən səviyyədə davam etdirmək bir az qəliz məsələdir. Əgər hər hansı bir işi yüksək səviyyədə görə bilmirsənsə, o işə ümumiyyətlə başlamamaq tərəfdarıyam.

- Bu gün ad gününüzdür. Bu münasibətlə sizi təbrik edirik. Yeni yaşınızdan nələr gözləyirsiniz?

- Təşəkkür edirəm. Həmçinin, bu gün mənə və fəaliyyətimə göstərdiyiniz diqqətə görə, başda Rəşad Məcid müəllim olmaqla, sizə və bütün "525-ci qəzet"in əməkdaşlarına minnətdarlığımı bildirirəm. Yeni yaşımdan ancaq və ancaq yeni uğurlar gözləyirəm. Bu, öz sahəmdə də ola bilər, hansısa başqa sahədə də. Əsas isə təbii ki, can sağlığıdır, daha sonra nailiyyətlər.

Şahanə MÜŞFİQ

525-ci qəzet.- 2022.- 5 aprel.- S.16.