Yeni nəslin bədii zövqünün inkişafına mühüm töhfə

I Uşaq Kitab festivalı böyük maraq və rəğbətlə qarşılandı

"Azərbaycan Nəşriyyatları Assosiasiyası" İctimai Birliyinin təşkilatçılığı ilə ANAİB I Uşaq Kitab Festivalı keçirildi. #Kitablaböyüyək həştəqi altında aprelin 2 və 3-də baş tutan sərgidə müxtəlif nəşriyyatlar, kitab evləri, eləcə də fərdi şəxslər iştirak edərək uşaq kitablarını oxucular üçün daha əlçatan etdilər.

Azyaşlılarda oxu həvəsinin yaradılması, onların mütaliəyə yararlı nəşrlərlə tanış olması baxımından I Uşaq Kitab Festivalının əhəmiyyəti olduqca böyük idi. 2 gün ərzində günboyu müşahidə olunan insan axını, əslində, cəmiyyətin də bu kimi mütaliəyə səsləyən layihələrə maraq göstərməsinin bariz nümunəsi idi. Xüsusən, uşaq yaşlarında təfəkkürün və dünyagörüşünün inkişafı üçün bədii ədəbiyyatın və digər məlumatlandırıcı xarakter daşıyan kitabların təbliği baxımından festivalı təqdirəlayiq hesab etmək olar.

Festivalda valideyn və uşaqlarla həmsöhbət olub sevinclərinə şahidlik elədik.

Qızlarını sərgiyə gətirən ata: "Uşaqlar çox sevinirlər. Elə biz də sevinirik. Bəzən onların oxu vərdişlərinin artırılmasına çox vaxt ayıra bilmirik. Bu gün, demək olar ki, 3-4 aylıq kitab planımızı doldurduq. Festival əla təşkil olunub. Hər kəsə minnətdarıq".

Nəvələri ilə sərgiyə gələn nənə: "Sizə bir söz deyim, bəzən nəvələrimin oxuduğu kitabları mən də vərəqləyirəm, mənim üçün də maraqlı olur (gülür). Həqiqətən, təəccüblənirəm, bu qədər sıxlıq olacağını gözləmirdim. Uşaqlar sanki bayrama gəliblər. Lazımlı iş görüblər, əhsən!"

Bu cür fikirlər hər kəsin pıçıltısında, təbəssümündə gəzişirdi. Həqiqətən, bayram ab-havası var idi.

Festivalda müxtəlif panellər, nağıl, tamaşa saatları təşkil olundu, tanınmış uşaq yazıçıları, eləcə də incəsənətin müxtəlif sahələrini təmsil edən mütəxəssislərlə görüş keçirildi. O cümlədən, aktyor və yazıçı Bəhram Bağırzadə, yazıçılar Şəmil Sadiq, Zahid Xəlil, Vüqar Haqverdiyev, Həmid Piriyev, Elgüsel, Xülya Cəfərova, Reyhan Yusifqızı, Amin Sükut və başqalarının təqdimat və imza günləri baş tutdu.

Eyni zamanda, Təhsil Nazirliyinin təşkil etdiyi "Düşünən oxucu" müsabiqəsinin mükafatlandırma mərasimi də sərgi çərçivəsində baş tutdu. Mərasimə təhsil nazirinin müavini Firudin Qurbanov da qatıldı.

Festivalda Türkiyədən dəvət olunmuş məşhur uşaq yazıçısı Suat Turqutun da imza mərasimi təşkil edildi. Suat Turqutun uşaqlar üçün mahnı oxuması isə kitab bayramına bir az da rəng qatdı.

Sosial şəbəkələrdə bir sıra ziyalılar I Uşaq Kitab Festivalı barədə fikirlərini bölüşüblər.

Əməkdar jurnalist, professor Qulu Məhərrəmli: "Nəşriyyatlar birliyinin (ANAİB) təşkil etdiyi Birinci Uşaq kitab festivalı uşaqlar üçün həqiqi mənada bayrama çevrildi. Bundan sonra planşetlərin yanında kitab da olacağına ümidlər artdı...

Biz kitabı fərqli formalarda təbliğ etdikcə, kitab alanların və oxuyanların da sayı artacaq. Təşkilatçılara böyük sayğılar!"

Ailə, Qadın və Uşaq Problemləri üzrə Dövlət Komitəsinin sədri Bahar Muradova: "Bu gün respublikamızda ilk dəfə keçirilən l Uşaq Kitab Festivalının açılışına qatıldım.Təşkilatçılığı ANAİB-in sədri, Hədəf liseyinin yaradıcısı çox hörmətli Səmil Sadıq tərəfindən reallaşdırılan bu kitab bayramının iştirakçıları ilə, xüsusilə, bütün yaş qruplarından olan uşaqlar, onların müəllimləri və valideynləri, o cümlədən, tanınmış naşir və yazarlarla bir arada olmaq çox xoş oldu.

İştirakçılara xitab etmək, kitabın hər birimizin, o cümlədən, hələ lap erkən yaşlı uşaqların həyatındakı yeri, belə satış - sərgi və festivalların davamlı keçirilməsi üçün bütün imkanları birləşdirməyin vacibliyi barədə fikir mübadiləsi aparmaq imkanına görə təşkilatçılara dərin təşəkkürümü bildirir, festivalın işinə uğurlar arzu edirəm! Valideynlərə isə tövsiyə edirəm ki, mütləq övladları ilə birgə bu məkanı ziyarət etsinlər".

Milli Məclisin Mədəniyyət Komitəsinin eksperti, şair-nasir Əkbər Qoşalı: "2-3 aprel tarixində "Azərbaycan Nəşriyyatları Assosiasiyası" İctimai Birliyinin təşkilatçılığı ilə "I Uşaq Kitab Festivalı"nın uğurla keçdiyinə görə təşkilatçıları, kitab dostlarını, yazarları, oxuyanları və oxudanları ürəkdən qutlayır, alqışlayıram!"

Ümid edirik ki, bu tip festivalların təşkili geniş vüsət alacaq. I Uşaq Kitab Festivalının təşkilatçılarına minnətdarlığımızı bildirir, işlərində müvəffəqiyyətlər arzu edirik!

Nadir YALÇIN

525-ci qəzet.- 2022.- 5 aprel.- S.8.