Azərbaycan aliminin mühüm uğuru

Tanınmış hüquqşünas alim, hüquq elmləri doktoru, professor, AMEA-nın Azad Həmkarlar İttifaqının sədri Habil Qurbanovun "Müqayisəli hüquqşünaslıq" dərs vəsaiti bu günlərdə ABŞ-ın Vaşinqton ştatının Maryland şəhərində ingilis dilində çap olunub. Bu əsərin nəşri Azərbaycan hüquqşünaslığı və ümumən elmimiz üçün mühüm hadisədir. "Rockville" nəşriyyatında işıq üzü görən dərs vəsaiti hüquqi komparativistikanın tərkib hissələrindən biri olan müqayisəli hüquqşünaslığa həsr edilib. Kitabda müqayisəli hüquqşünaslığın inkişaf tarixinə, onun təkamül proseslərinə, müqayisəli hüquqşünaslığın ümumi xarakteristikasına diqqət yetirilir, onun ümumnəzəri hüquq elmi sistemində tutduğu yerdən və oynadığı elmi roldan bəhs olunur.

Hüquq fakültələrinin tələbələri, doktorantlar, müəllimlər və müqayisəli hüquqşünaslıqla maraqlananlar üçün nəzərdə tutulmuş dərs vəsaitində müqayisəli təhlillər əsasında dünyanın müxtəlif dövlətlərinin hüquq sistemlərinin ümumi və spesifik cəhətlərindən, onların oxşar və fərqli xüsusiyyətlərindən danışılmaqla yanaşı, ayrı-ayrı ölkələrin, dövlətlərdaxili qurumların və dövlətlərarası birləşmələrinin hüquq sistemlərinin səciyyəvi xüsusiyyətləri və müsbət cəhətləri nəzərdən keçirilir.

Qeyd edək ki, kitabın müəllifi Habil Surxay oğlu Qurbanov 14 mart 1955-ci ildə Ağdam şəhərində doğulub. 1971-ci ildə Ağdam 1 saylı orta məktəbini bitirib. 1971-1975-ci illərdə Azərbaycan Pedaqoji İnstitutunin Coğrafiya fakültəsini fərqlənmə diplomu ilə başa vurub. AMEA-da kiçik elmi işçi kimi fəaliyyətə başlayan Habil Qurbanov hərbi xidmətdən sonra 1976-1980-ci illərdə Bakı şəhəri Nəsimi rayon Komsomol Komitəsində işləyib. 1980-cı ildə SSRİ Daxili İşlər Nazirliyinin Bakı orta xüsusi milis məktəbində tədris hissəsinin müfəttişi vəzifəsində çalışıb. 1982-1985-ci illərdə Volqoqrad Ali İstintaq Məktəbini qiyabi yolla müvəffəqiyyətlə bitirib.

H.Qurbanov Bakı Milis Məktəbində qiyabi bölmənin rəisi, daha sonra məktəbin rəis müavini vəzifələrində çalışıb. O, 1990-cı ildə prokurorluq orqanlarına işə qəbul edilib, müxtəlif illərdə Bakı Şəhər Prokurorluğunun ümumi nəzarət şöbəsində prokuror, böyük prokuror, Qaradağ rayon prokurorunun müavini, prokuror əvəzi, Dəvəçi (Şabran) rayon prokuroru, respublika prokurorluğunda cəza yerlərində qanunların icrasına nəzarət idarəsinin rəisi vəzifələrində işləyib.

H.Qurbanov 1988-ci ildə Moskvada SSRİ DİN-nin Akademiyasının dissertantı kimi, "Cinayət hüququ" sahəsində dissertasiya işini müdafiə edərək, hüquq elmləri namizədi alimlik dərəcəsi alıb. 1997-ci ildə Moskvada Rusiya Federasiyası Baş Prokurorluğunun İnstitutunda doktorluq dissertasiyasını müdafiə edib, RF-nın hüquq elmləri doktoru diplomunu alıb. 1998-ci ildə Azərbaycan Respublikası Prezidenti yanında Ali Attestasiya Komissiyası ona hüquq elmləri doktoru, 2010-cu ildə isə professor elmi adı diplomlarını verib.

Alim 270 elmi məqalənin, 13 monoqrafiyanın, 5 dərs vəsaitinin müəllifidir. Onlardan 4 monoqrafiya və 60 elmi məqalə xarici ölkələrdə dərc olunub. Onun "Azərbaycan Respublikasının yeni cinayət qanunvericiliyinin nəzəri əsasları" monoqrafiyası 1997-ci ildə Moskvada çap edilib. O, hüquq elmləri doktoru, professor A.V.Naumovun "Cinayət hüququ" dərsliyini Azərbaycan dilinə çevirərək redaktoru olub.

Uzun illər hüquq elmləri üzrə Müdafiə Şuralarının üzvü, Birdəfəlik hüquq elmləri doktorluğu üzrə Dissertasiya Surasının sədri, Azərbaycan Respublikası Prezidenti Yanında Ali Attestasiya Komissiyasının hüquq elmləri üzrə Ekspert Şurasının üzvü olub. Avropa Təbiət Elmlər Akademiyasının və Türk Dünyası Araşdırmaları Uluslararası Elmlər Akademiyasının akademiki, Rusiya Professorlar Cəmiyyətinin və Beynəlxalq Narkotizmlə Mübarizə Cəmiyyətinin üzvüdür.

H.Qurbanov respublikada yeni qanunlarının yaradılmasında yaxından iştirak edib, Azərbaycanda ilk dəfə olaraq 1996-cı ildə yeni Cinayət Məcəlləsinin (ümumi hissə) layihəsini hazırlayıb ictimaiyyətin müzakirəsinə verib. Həmin layihədə irəli sürülən təkliflərin bir çoxu 1999-cu ildə qəbul edilən Cinayət Məcəlləsində öz təsdiqini tapıb.

2018-ci ildə "Avropa Nəşr Mətbuat Evi" mükafat komissiyasının qərarı ilə hüquqi sosial normalar sistemində baxış, hüquqi münaqişələr, multikulturalizmin konstitusiya əsasları, qanunvericilik aktlarının iqtisadi təhlükəsizlik məsələləri sahəsində apardığı uğurlu elmi tədqiqatlarına, müstəqil Azərbaycanın dövlət idarəçilik sisteminin banisi Heydər Əliyev ideyalarının sədaqətlə yerinə yetirilməsində və ölkədə hüquq elminin inkişafında göstərdiyi xidmətlərinə görə nəşr olunan "Cəmiyyət və sosio-hüquqi problemlər" adlı monoqrafiyası "Ən yaxşı tədqiqat əsəri Qızıl medalı" ilə təltif olunub.

Görkəmli hüquqşünas alimimizi bu münasibətlə ürəkdən təbrik edir, ona möhkəm can sağlığı, fəaliyyətində yeni uğurlar arzulayıram.

Taryel EYVAZOV

Tibb elmləri namizədi, dosent, Əməkdar həkim

525-ci qəzet.- 2022.- 6 aprel.- S.16.