Emin Sabitoğlunun 85 illik yubileyi Humanitar Kollecdə qeyd edilib

Azərbaycan Dövlət Mədəniyyət və İncəsənət Universitetinin (ADMİU) nəzdində Humanitar Kollecdə bəstəkar, XX əsr Azərbaycan musiqisi tarixində iz qoyan Emin Sabitoğlunun 85 illik yubileyinə həsr olunmuş "Keçdiyin bütün yollar..." adlı konsert keçirilib.

Konsertdə görkəmli bəstəkarın yadigarı, ADMİU-nun rektoru, professor Ceyran Mahmudova, Humanitar Kollecin direktoru, dosent Nərmin Qaralova, ADMİU-nun müəllimləri və tələbələri, sənət adamları, kollecin müəllim və tələbə kollektivi iştirak ediblər.

Əvvəlcə qonaqlar kollecin foyesində müəssisənin kitabxana fondunda olan Emin Sabitoğlunun yaradıcılığından bəhs edən kitablar, eləcə də kollecin Dekorativ tətbiqi sənət və Bədii xalça ixtisasları tələbələrinin əl işləri ilə tanış olublar.

Sonra konsert proqramında Emin Sabitoğlunun bəstələdiyi bir sıra musiqi nömrələri səsləndirilib. Kollecin müəllim və tələbə heyətindən təşkil olunmuş xalq çalğı ansamblının ifasında bəstəkarın "Dağlar", "Sən uzaq yaşıl ada", "Bizim Cəbiş müəllim" kinofilmindən vals, "Sənsən, yoxsa mən", "Gözümdə Leylisən", "Şeyda bülbülümsən", "Bağışla" (“Gün keçdi” filmindən), "Payız gəldi uçdu getdi quşlar", "Sevgi nəğməsi", "Təkcə ümid qalsın", "Dərələr", "Şirin dil" - Kərkük bayatıları, "Aşığın arzuları" səsləndirilib. Konsert proqramında Emin Sabitoğlunun keçdiyi bütün yollara proyeksiya vasitəsilə səyahət edilib. "Hicran" tamaşasından kiçik səhnəni canlandıran kollecin "Bədii yaradıcılıq" ixtisasının III kurs tələbələri Kərimli Hidayət, Qurbanlı Pərviz, Səfərəliyev Tunay, Qarayeva Aysu qonaqlara nostalji hisslər yaşadıblar.

Sonda bəstəkarın qızı Ceyran Mahmudova çıxış edərək kollecin direktoru, dosent Nərmin Qaralova başda olmaqla, kollecin kollektivinə, konsertdə iştirak edən və əməyi olan hər kəsə öz təşəkkürünü bildirib, tələbələrin zövqünü belə gözəl musiqiylə yetişdirməyin və formalaşdırmağın ən öndər işlərdən olduğunu vurğulayıb.

ŞAHANƏ

525-ci qəzet.- 2022.- 15 dekabr.- S.16.