"Şuşada kitabxana və mətbuat"ın təqdimatı keçirilib

AMEA Mərkəzi Elmi Kitabxanasının (MEK) icraçı direktoru, filologiya üzrə fəlsəfə doktoru, dosent Şəhla Tahirqızının "Şuşada kitabxana və mətbuat" adlı məlumat kitabının təqdimatı olub.

Öncə MEK-in baş direktoru, professor Məmməd Əliyev çıxış edərək Azərbaycan Respublikasında 2022-ci il "Şuşa İli"nə Mərkəzi Elmi Kitabxananın töhfələrindən danışıb. Bildirilib ki, bu ilin çərçivəsində Şuşa şəhərinin tarixinin və mədəniyyətinin tədqiqi və təbliğinə kömək məqsədilə MEK-də "Şuşa İli - Zəfər salnaməsi" adlı metodik vəsait, "Şuşa-270" adlı biblioqrafik göstərici çap olunub, eləcə də kitabxana əməkdaşları beynəlxalq konfranslarda öz məqalələri ilə çıxış ediblər.

"Son olaraq icraçı direktor Şəhla Tahirqızı öz imzasını ataraq çox dəyərli bir kitab ərsəyə gətirib. Tarixi-mədəni əhəmiyyəti və Azərbaycan xalqı üçün müstəsna dəyərə malik Şuşa şəhərinin tarixinin, mədəni əhəmiyyətinin öyrənilməsi zəruridir. Bu baxımdan təqdim olunan kitab tarixçilər, geniş oxucu kütləsi üçün əhəmiyyətli mənbəyə çevriləcək", - deyə baş direktor vurğulayıb.

AMEA-nın müxbir üzvü Misir Mərdanov, öz növbəsində, bütün qonaqları salamlayaraq qarşıdan gələn bayramlar münasibətilə hər kəsi təbrik edib və MEK-in rəhbərliyinə və kollektivinə uğurlar arzulayıb. Alim bu cür dəyərli kitabı yazmağın böyük zəhmətin bəhrəsi olduğunu bildirib, təqdim edilən mənbələri bir araya toplamağı bir qəhrəmanlıq adlandırıb. M.Mərdanov müəllifin bu kitabla "Şuşa İli" çərçivəsində öz şəxsi töhfəsini verdiyini də qeyd edib və bu münasibətlə Şəhla Tahirqızını bir daha təbrik edərək ona gələcək yaradıcılığında uğurlar arzulayıb.

Daha sonra professor İmaməddin Zəkiyev, "Şuşa" qəzetinin baş redaktoru Vasif Quliyev, Tarix İnstitutunun şöbə müdiri Hacı Həsənov, "Elm" nəşriyyatının baş direktoru Səbuhi Qəhrəmanov, jurnalist Bahəddin Həzi və digərləri çıxış edərək kitabı əhəmiyyətli mənbə adlandırıblar. Qeyd olunub ki, Şuşada kitabxana işi və mətbuat tarixinin hər biri ayrılıqda geniş tədqiqat tələb edən mövzulardır.

Həmçinin, təqdimat zamanı Azərbaycan Qarabağ Müharibəsi Əlilləri, Veteranları və Şəhid Ailələri İB-nin sədri Mehdi Mehdiyevin adından ölkə kitabxana sistemində ilk olan Qarabağ müharibəsi qəhrəmanları fondunun yaradılmasına görə MEK-in baş direktoru, professor Məmməd Əliyev və "Zəfər tarixinin qəhrəmanları" layihəsi çərçivəsində icraçı direktor, dosent Şəhla Tahirqızı Fəxri Diplomla təltif ediliblər.

Sonda kitabın müəllifi, dosent Şəhla Tahirqızı çıxış edərək səslənən hər bir fikri yüksək dəyərləndirdiyini diqqətə çatdırıb və gələn qonaqlara öz minnətdarlığını bildirib.

525-ci qəzet.- 2022.- 23 dekabr.- S.16.