Böyük alim, böyük insan

Kimya elmləri doktoru, professor, Azərbaycan Milli Elmlər Akademiyasının (AMEA) həqiqi üzvü, neft-kimya sahəsində görkəmli alim, ictimai xadim, akademik Yusif Məmmədəliyev adına Neft-Kimya Prosesləri İnstitutunun (NKPİ) baş direktoru Vaqif Məhərrəm oğlu Abbasov AMEA-nın flaqmanı, qocaman, nüfuzlu elm ocağı olan NKPİ-nin uzun illər rəhbərləri olmuş dünya şöhrətli alimlərin, demək olar ki, II Dünya müharibəsində nəhəng SSRİ dövlətinə qələbə qazandıran kimya elminin korifeyi akademik Yusif Məmmədəliyevin, habelə akademiklər Murtuza Nağıyevin, Vahab Əliyevin, Musa Rüstəmovun davamçısı olaraq, on ildən çoxdur ki, bu instituta uğurla rəhbərlik edir. 100 illiyinə doğru irəliləyən bu elm məbədinə ömrünün 50 ilə yaxın hissəsini həsr edən (onun 10 ildən çoxunu direktor vəzifəsində) akademik Vaqif Abbasov respublikamızın təbii sərvətlərinin emalı, dövlətimizin maraqlarına, xalqımızın ehtiyaclarının ödənilməsinə yönəlmiş korroziya, duz və parafinçökmə inhibitorlarının, antistatik aşqarların sintezi və öyrənilməsi, unikal Azərbaycan neftlərinin tədqiqi, neft turşularının sintezi, konservasiya mayelərinin alınması sahəsində elmi tədqiqatlarının nəticələri, ixtiraları, patentləri ilə həm milli elmimizin xəzinəsinə dəyərli töhfələr verir, həm də ölkəmizin hüdudlarından çox-çox uzaqlarda, müxtəlif ölkələrin aparıcı elm və təhsil ocaqlarının elm xadimləri tərəfındən görkəmli alim kimi tanınır və yüksək dəyərləndirilir.

Vaqif Abbasov Tərtər rayonunun Cəmilli kəndində müəllim ailəsində anadan olub. O, atası Məhərrəm müəllimin davamçısı kimi müəllim sənətini seçir və təhsilini davam etdirmək məqsədi ilə Bakıya gəlir, onu cəlb edən sehirli kimya elmini seçərək, 1969-cu ildə Azərbaycan Dövlət Pedaqoji Universitetinə daxil olur.

1973-cü ildə fərqlənmə diplomu ilə təhsilini bitirir və qısa müddət ərzində öz kəndində, oxuduğu məktəbdə müəllimlik etdikdən sonra, gələcəkdə direktoru vəzifəsində çalışacağı NKPİ-nin aspiranturasına qəbul olunur.

Burada təhsil aldığı illər ağır şəraitdə keçir, anası, həyat yoldaşı, dünyaya gəlmiş üç övladı ilə darısqal şəraitdə, ailə qayğıları ilə, maddi və məişət çətinlikləri ilə Elmlər Akademiyasının yataqxanasında yaşamağına baxmayaraq, möhkəm iradəsi, gərgin çalışmağı nəticəsində, təbiətin ona bəxş etdiyi istedadını, bacarığını, qətiyyətini səfərbər edərək, qarşısına qoyduğu məqsədinə, arzusuna nail olur və 1978-ci ildə "Sintetik neft turşuları əsasında antistatik aşqarların sintezi və sınaqları" mövzusunda dissertasiyasını müdafiə edir, kimya ixtisası üzrə elmlər namizədi (fəlsəfə doktoru) alimlik dərəcəsi alır və elmin çətin yolları ilə inamla irəliləyir.

1991-ci ildə o, öz karyerasında daha bir pillə ucalmağa nail olur, "Olefinlər və bəzi turşular əsasında amin və xrom kompleksləri korroziya inhibitorları və karbohidrogen mayelərə antistatik aşqarlar kimi" mövzusunda doktorluq dissertasiyasını müdafiə edir, elmlər doktoru alimlik dərəcəsi alır, 1992-ci ildə isə professor adına layiq görülür.

Bu illərdə o, uğurlu elmi məktəb, həm də şərəfli həyat məktəbi keçərək, artıq yiyələndiyi təcrübə nəticəsində, yaxın və daha uzaq gələcək üçün qarşısına qoyduğu problemləri müəyyən etmək, bunların həll olunmasının ardıcıllığını, sıralanmasını, o cümlədən, ailə üzvlərinin, övladlarının təhsili, uğurlu gələcəyi baxımından düzgün hesablanmış, həyatın əhəmiyyətli addımlarını, vaxtı vaxtında, ara vermədən, taleyüklü tədbirlərin həyata keçirilməsi bacarıqlarını daha da təkmilləşdirir.

Bu dövrün ən mühüm nəticələrindən biri onun bir alim kimi inkişaf etməsi, professionallığının yüksəlməsi olmuşdur.

Vaqif müəllimin elmi axtarışlarının hədəfı Azərbaycan neftləri, təbiətin xalqımıza bəxş etdiyi təbii sərvətlərindən olan, bu misilsiz nemətin insanların müxtəlif ehtiyaclarının təmin olunmasına yönəlmiş dəyərli praktiki əhəmiyyətli məhsullara çevrilməsini təmin edən, geniş çeşidli, müxtəlif təyinatlı yanacaq növləri, texniki sürtkü yağları və başqa materialların alınması olmuşdur.

Neft kimyası sahəsində seçdiyi və inkişaf etdirdiyi perspektiv istiqamətlərdə apardığı ardıcıl, sistemli tədqiqatlar nəticəsində Vaqif müəllim neft mənşəli xammal əsasında yeni nəsil, geniş spektrli, dəyərli praktiki əhəmiyyətli xassələrə malik reagentlərin alınmasına nail olmuş, onların tərkibi, xassələrini müasir üsullarla öyrənmiş, müxtəlif sahələrdə geniş sınaqlardan keçirilmiş və tətbiq olunması üçün əsaslı tövsiyələr verilmişdir.

Bunlardan bəziləri, həm ölkəmizin müəssisələrində, həm də xarici ölkələrdə yüksək iqtisadi səmərə ilə sənaye miqyasında istehsal və tətbiq olunmuşdur.

Görkəmli alim, akademik Vaqif Abbasovun 70 illik yubileyi haqqında Azərbaycan Milli Elmlər Akademiyasının Rəyasət Heyətinin 5 sentyabr 2022-ci il tarixli Qərarında onun xidmətləri geniş göstərilmiş və yüksək dəyərləndirilmişdir, yeni maddələrin, həmçinin, məlum olanların yeni alınma üsulları və istehsalı üçün yeni texnoloji prosesləri, sanki bir yol xəritəsi olmuş və ən azı, neftin emalı ilə insanların ehtiyaclarını ödəyən məhsulların alınması üçün geniş imkanlar, üfüqlər açmışdır.

Akademik Vaqif Abbasov korroziya, duz və parafinçökmə inhibitorlarının, inhibitor-bakterisidlərin, antistatik aşqarların sintezi və öyrənilməsi, unikal Azərbaycan neftlərinin tədqiqi, sintetik neft turşularının sintezi, konservasiya mayelərinin alınması sahələrində tanınmış alimdir.

Akademik Vaqif Abbasovun elmi fəaliyyətinin əsas istiqaməti Azərbaycanın unikal neftlərinin yeni emal proseslərinin işlənilməsi, yeni nitrobirləşmələrin metal komplekslərinin, yüksək molekullu aminlərin, amin komplekslərinin və çoxfunksiyalı antistatik aşqarların, inhibitorların, inhibitor-bakterisidlərin, konservasiya mayelərinin və sürtkülərinin yaradılması və onların təsir mexanizminin tədqiqi kimi problemlərin həllinə həsr olunmuşdur. O, ilk dəfə olaraq üzvi nitrobirləşmələrin metal kompleksləri əsasında antistatik aşqarların sintezinin elmi əsaslarını işləyib hazırlamışdır.

Akademik Vaqif Abbasov tərəfindən işlənib hazırlanmış AP-L34-1 antistatik aşqar sənayedə öz tətbiqini tapmışdır. Korroziya inhibitolarının yaradılması və onların tətbiqi sahələrində geniş tədqiqat işləri aparılmış, onun rəhbərliyi ilə "VFİKS-82", "Azəri", "Kaspi-2" və başqa çoxfunksiyalı korroziya inhibitorlarının istehsalı təşkil olunmuşdur. "Azəri" inhibitorunun istehsal texnologiyasına Rusiya Federasiyasının lisenziyası alınmış, Meleoz (Başqırdıstan) şəhərində illik gücü 20 min ton olan qurğu tikilmişdir. Bu inhibitorlar Qərbi Sibir neft yataqlarında Rusiya, Belçika və İngiltərədə istehsal olunan SNPX-601 İB, İKB-4V, "Korreksit" inhibitorları əvəzinə işlədilmiş, "VFİKS-82" və "Azəri" inhibitorları isə Azərbaycan, Qazaxıstan, Türkmənistan, Rusiya və Ukraynanın neft yataqlarında müvəffəqiyyətlə istifadə olunmuşdur. V.M.Abbasovun rəhbərliyi ilə yaradılmış "Kaspi-2" və "Kaspi-X" inhibitorları Heydər Əliyev adına Bakı Neft Emalı Zavodunda yüksək effektli inhibitorlar kimi tətbiqini tapmışdır. Hazırda "Kaspi-X", "Kaspi X (M)", "Kaspi" inhibitorlarının, "Bakı" ərp həlledicisinin, "Xəzər" deemulqatorunun istehsalı və tətbiqi davam edir.

Onun neft kimyası sahəsində apardığı tədqiqat işlərindən biri, dünyada analoqu olmayan müalicəvi Naftalan neftinin struktur-qrup tərkibinin öyrənilməsi və onun yeni təmizlənmə texnologiyasının yaradılmasıdır. İlk dəfə olaraq, bu texnologiya əsasında "Ağ Naftalan" mazının istehsalı üçün texniki standartlar Azərbaycan Respublikasının Səhiyyə Nazirliyi tərəfindən 2001-ci ildə təsdiq edilmiş və "Ağ Naftalan yağı" 2014-cü ildə Azərbaycan Respublikasının Səhiyyə Nazirliyi tərəfındən dərman preparatı kimi qeydiyyata alınmışdır. 2019-cu ildə Ağ naftalan yağı ilə bitki efir yağlarının kompozisiyaları əsasında 9 müxtəlif kosmetik vasitələr yaradılmış, onlara texniki şərtlər hazırlanaraq, Dövlət Qeydiyyatından keçirilmişdir. 2020-ci ildə isə bitki efir yağları kompozisiyaları əsasında 8 ədəd kosmetik dezodorantlar alınmış, onlara texniki şərtlər hazırlanaraq, Dövlət Qeydiyyatından keçirilmişdir. Onun rəhbərliyi ilə hazırlanmış bitum üçün V-2 adgeziya aşqarı 2015-ci ildən respublikamızın yol tikintisində uğurla istifadə olunur, "Azofos" və "Azofos-K" gübrələri isə sahə sınaqlarından müvəffəqiyyətlə çıxmış və 2017-ci ildən tətbiq edilir.

Vaqif Abbasovun ideya və rəhbərliyi ilə yaradılmış məhsullar neftayırma zavodunun bu reagentlərə görə xaricdən asılılığını tamamilə aradan qaldırılmasnı təmin etmişdir. Bu məhsullar 2022-ci ildə Bakı şəhərində "Texnofest Azərbaycan" Avrasiya, Kosmos və Texnologiya festivalında elm və texnika sahəsində nailiyyətləri nümayiş etdirən sərgidə, AMEA-nm pavilyonunda nümayiş etdirilmişdir.

Sərgidə nümayiş etdirilən çay, göl, dəniz sularında işləyə bilən yanğınsöndürmə üçün reagentlərin işlənməsı ilə bağlı videogörüntülər nümayiş etdirilmişdir. Sərgidə, həmçinin, unikal Naftalan nefti əsasında və ölkəmizin dərman bitkilərindən ayırmaqla alınmış yağlardan istifadə etməklə, bir neçə dərman preparatlarının istehsal texnologiyası göstərilmişdir. Tərkibində xərçəng xəstəliyi törətməsi baxımından təhlükəli komponentlər olmayan 11 növ təbii tərkibli yeni növ dezodorantlar da böyük maraqla qarşılanmışdır.

Ölkəmiz üçün böyük əhəmiyyət kəsb edən qeyri-neft mənşəli, üç komponentli yeni növ "Qarabağ" adlı gübrələr isə kənd təsərrüfatı bitkilərinin məhsuldarlığını, otlaq sahələrində yeni ehtiyatlarının artırılmasını təmin edir. Bu gübrələr bitkilərin, habelə dekorativ və meyvə ağaclarının tinglərinin sürətli yetişdirilməsini, məhv olmuş meşələrin sürətli bərpasını təmin edir, dənli bitkilərin, pambığın məhsuldarlığını kəskin artırır.

Bildiyimiz kimi, müstəqil Azərbaycan Respublikasının erməni barbarları tərəfindən 30 ilədək işğalda saxlandığı müddətdə 54 min hektar meşə zolaqları məhv edilmişdir. 44 günlük Vətən müharibəsində müdrik Ali Baş Komandan, qüdrətli sərkərdə, güclü diplomat İlham Əliyevin rəhbərliyi ilə rəşadətli ordumuzun möhtəşəm zəfər çalması nəticəsində azad olunmuş torpaqlarımızda aparılacaq geniş bərpa-quruculuq işləri proqramlarında ekoloji genosidə məruz qalmış, viran qoyulmuş ərazilərdə bitki örtüyünün, meşələrin bərpası nəzərdə tutulmuşdur. Bu proseslərin sürətləndirilməsi üçün akademik Vaqif Abbasovun ideyaları və əməkdaşları ilə geniş araşdırmaları nəticəsində yaratdıqları və Qarabağ torpaqlarında da geniş uğurlu sınaqlardan keçirilmiş bitkilərin böyüməsinin sürətləndirilməsini təmin edən yeni maddələrin bitki boy stimullaşdırıcıların tətbiqi daha bir prioritet milli problemin həllinə xidmət etmiş olardı.

Vaqif Abbasovun elmi fəaliyyətinin nəticələri kimi tətbiq olunmuş proseslər, həm ölkəmizdə, həm də ölkə sərhədlərindən çox uzaqlarda, başqa ölkələrdə müxtəlif sahələrdə tətbiq olunmuş məhsulları, müəllifı olduğu çoxsaylı publikasiyaları, 80-dən çox patentləri, ixtiraları onu istedadlı, məhsuldar alim kimi tanıtmışdır.

O, 1550 əsərin, o cümlədən, 82 patent, müəlliflik şəhadətnaməsi və 14 ixtiraya iddia sənədinin, 631 elmi məqalənin, 635 tezisin, 83 publisistik məqalənin, 8 monoqrafiyanın, 22 dərslik, 23 dərs vəsaitinin müəllifi, 20 kitabın redaktorudur.

2009-2022-ci illər ərzində alimin elmi əsərlərinə müxtəlif ölkələrdən olan kimyaçı alimlər maraq göstərib və öz yazılarında 1520 istinad veriblər.

Vaqif Abbasovun alim kimi xüsusiyyətləri, onun yarım əsrə yaxın dövrdə apardığı tədqiqatlarını bir çoxlarından fərqləndirən cəhəti qarşıya düzgün məqsəd qoymaq, bu məqsədlərə aparan yolları araşdırmaq və məqsədə nail olmaqla həmin sahədə, elmə məlum olmayan yeni nəticələr, yeniliklər əldə etməkdən ibarətdir.

Kimya elmi çoxşaxəli olduğundan, həm də bir çox sahələrlə - fizika, riyaziyyat, biologiya, tibb və başqa həmsərhəd elm sahələri ilə sıx bağlı olan elmdir.

Vaqif Abbasovun, neft kimyası elmi sahəsində söz sahibi olaraq, çoxşaxəli nəticələrinin səbəbi onun geniş intellektə, biliklərə və elmin müxtəlif sahələrində yaxşı məlumatlılığa, yüksək professionallığa malik olmasının nəticəsidir.

Böyük bir elmi məktəbin davamçısı olan Vaqif müəllim öz uğurlu elmi məktəbini yaratmış və bu məktəb respublikamızın hüdudlarından uzaqlarda tanınmış, nüfuz qazanmışdır.

V.M.Abbasov ixtisaslı kadrların hazırlanması sahəsində böyük iş aparır. Onun rəhbərliyi ilə 41 fəlsəfə doktoru və 13 elmlər doktoru müdafıə etmişdir. Bunlardan bəziləri ölkəmizdə elmi-tədqiqat, təhsil institutlarında, sənaye obyektlərində aparıcı vəzifələrdə çalışır, bəziləri isə xarici ölkələrdə fəaliyyət göstərir və Azərbaycan elmini tanıdır, şərəfləndirirlər. O, böyük elmi-təşkilati və ictimai iş aparır, elmlər doktoru və təlsəfə doktoru dissertasiyalarınm müdafiəsi üzrə ED l.17 Dissertasiya Şurasınm sədri, ED l.16 Dissertasiya Şurasının sədr müavinidir.

Müdrik şərq atalar sözündə deyilir ki, "Elmi məhsulu olmayan alim, yağışsız buluda bənzər". Bu yanaşmadan Vaqif müəllimin elmi nəticələrini leysana bənzətmək olar.

Müəllim ailəsində boy atıb, böyümüş Vaqif müəllimin (bəlkə bunun da təsiri olub) həyatı hər zaman təhsilin müxtəlif formaları ilə sıx bağlı olub. O, çoxsaylı dəyərli dərsliklərin, dərs vəsaitlərinin müəllifıdir, həm də hər zaman gənc, yeni nəsil alimlərin taleyinə çox həssaslıqla, diqqətlə yanaşır.

2016-cı ildən NKPİ nəzdində təhsil şöbəsi yaradılıb. Burada doktorantura və magistratura üzrə doktorantlar və magistrlər təhsil alır, elmi-tədqiqat işləri aparırlar. Magistrlərin bəziləri dərslərdən sonra həm də yarımştatla NKPİ-də işləyir, magistraturanı bitirdikdən sonra doktoranturaya qəbul olunur və elmi-tədqiqat işlərini davam etdirirlər. Magistrlərin elmə həvəsi Vaqif müəllimin onlara göstərdiyi qayğıdan qaynaqlanır.

Vaqif müəllim xarici və beynəlxalq Universitetlərlə də sıx əməkdaşlıq edir. O, 2022-ci ildə öz yubiley ilində də geniş auditoriyalarda dəfələrlə, neft kimya elmi və sənayesi sahəsində cari vəziyyət, öz uğurları və gələcək perspektivləri ilə bağlı mövzularda maraqlı məruzələr oxumuşdur və hazırda da müntəzəm əməkdaşlığını davam etdirir.

2022-ci ildə akademik V.M.Abbasov Kazan Milli Tədqiqat Texnoloji Universitetinin Fəxri doktoru, Başqırdıstanın Ufa şəhərində Dövlət Texniki Universitetinin Fəxri professoru seçilmişdir.

V.M.Abbasov bir sıra xarici təşkilatlar tərəfındən mükafatlara, ordenlərə və adlara layiq görülmüşdür. O, 2009-cu ildə Avropa Biznes Assambleyasının mükafatını almış, 2013-cü ildə "Elmdə ad" Sokrat mükafatına və ordeninə layiq görülmüş, elə həmin ildə Türk Dünyası Araşdırmaları Uluslararası İlimlər Akademiyasının akademiki seçilmiş və "Uluslararası Altın Yıldız Madalyası" ilə (Ankara) təltif olunmuşdur, eləcə də Təbiətşünaslıq elmləri üzrə Avropa Akademiyasının həqiqi üzvü seçilmiş, Kuratorluq və Elmi Şuranın qərarı ilə elmi tədqiqatlarda xüsusi xidmətlərinə görə "Əsas Qızıl Cəngavər ulduzu"na layiq görülmüş, Rusiya Federasiyası Təbiət Elmləri Akademiyasına "Neft və Qaz" bölməsi üzrə xarici üzv seçilmişdir.

Vaqif müəllim geniş maarifləndirmə işləri aparır ki, əslində, bu, hər bir alimin vəzifəsidir. O, qeyri-formal təhsilə hər zaman böyük diqqət yetirir, həm təhsil müəssisələrində, həm də ictimai təşkilatlarda uşaqlar, qadınlar, ahıllar və başqaları üçün, televiziya kanallarında, hər dinləyici auditoriyası üçün maraqlarına uyğun olan, "öz dilində", aktual, elmi və mühüm ictimai əhəmiyyətli məruzələrində tarixi faktlara istinadlarla, elmimizi, azərbaycançlılıq, həm də dərin bilicisi olan türk dünyasının tarixi, elmi nailiyyətlərini dinləyicilərə, xüsusən Vətənimiz Azərbaycanı, xalqımızı, dünyaya tanıdır. Hazırkı geosiyasi vəziyyətdə bunun xüsusilə böyük siyasi əhəmiyyəti vardır.

Tanrı Vaqif müəllimə istedadlar çələngi bağışlamış, ona yazıçılıq, poeziya aləminə də yol açmışdır. Onun qələmindən 90 kitab, yüzlərlə şeirlər çıxmışdır. Gələcək nəsillərə ünvanlanmış kitab adlandırılmış "Dahilərin, müdriklərin və fatehlərin həyat dərsləri" adlı beş cildlik unikal ensiklopedik əsəri yazıb yaratdıqca, özü də sanki haqqında yazdığı bənzərsiz insanların dahiliyindən, müdrikliyindən pay alıb, böyük yaradıcılıq enerjisi ilə yeni ideyalara, onların gerçəkləşdirilməsi yollarına yiyələnib. Vaqif Abbasovun bu kitabı çox sevilən, oxunan kitablardandır. Onun yazdığı "Heydər Əliyevin liderlik fəlsəfəsi" kitabı isə bir çoxlarının, ictimai təşkilatların stolüstü kitabına çevrilmişdir, hətta dərslik kimi istifadə olunur.

Deyirlər ki, hər bir insan unudulmayana qədər yaşayır, odur ki, həmin dahilərin, fatehlərin, rəmzi mənada ömrünü uzadandır Vaqif müəllim. Bu əsərdə Ulu öndər Heydər Əliyev, müzəffər prezidentimiz İlham Əliyev, I vitse-prezident Mehriban xanım Əliyeva haqqında geniş məlumatlar xüsusi yer tutur.

Özü dediyi kimi, şair olmaq iddiası olmasa da, lakin yazdığı qafıyəli, çox mənalı, xalqımızın taleyüklü məsələlərinə, müstəqil vətənimizə, Zəfər tarixinə, uşaq və gənclərin liderliyi məsələlərinə, habelə şəhidlərin, ahılların xidmətləri kimi aktual problemlərinə həsr olunan şeirləri maraqla oxunur.

Belə yaradıcılıq istedadı, yeri gəlmişkən, bəzi görkəmli kimyaçı alimlərimizin fəaliyyətində də mövcud olub. Dahi kimyaçımız akademik Yusif Məmmədəliyev qızı Sevda xanıma xaricdən şeirlə yazdığı məktubda, hətta kimyəvi elementlərin adlarına and içir.

Vaqif müəllim vətənpərvər, xalqına xidmət edən alimdir. O, ehtiyacı olan insanların dərdini, kədərini ürək ağrısı ilə bölüşür, həm də Ali Baş Komandan, cənab İlham Əliyevə hər bir azərbaycanlının ürəyində yaşayan sonsuz məhəbbət, etibar, inam hisslərini tərənnüm edir. Şair qəlbli Vaqif müəllim öz ülvi hisslərini, sözlə, qələmlə məharətlə ifadə etməyi bacarır, yüzlərlə yazdığı, yuxusuz gecələrin məhsulu olan şeirləri ilə də bunu təsdiqləyir.

Vaqif müəllim əcdadlarından qan yaddaşına köçmüş, vətənə, dövlətə sədaqət, seçdiyi sənətə, möcüzələr aləmi kimya elminə sədaqət, ailəyə sədaqət, saflıq kimi xalqımıza xas olan milli mənəvi dəyərləri ömrü boyu, öz yüksək enerjili yaradıcılığı ilə sanki xalqına qaytarır.

Müharibə hər bir dövlət üçün, hər bir əsl vətəndaş üçün ağır bir imtahandır. 44 günlük Vətən müharibəsində, onun öz xalqı ilə həm kədərini, həm də zəfər sevincini, uğurlarını səmimi qəlbdən bölüşmək, paylaşmaq bacarığı, bu tarixi günlərimizdə də özünü büruzə verdi. Sərhədyanı rayonlarda, o cümlədən, Tərtər, Füzuli, Naftalan və başqa rayonlarda əsl el oğlu kimi əhali ilə, yaralılarla hərbi hospitallarda səmimi görüşlər keçirir, yardımlar göstərir, ürək ağrılarını şəhid ailələri, yaralı qazilərlə ürəkdən bölüşür. O, erməni barbarlarının amansız hücumlarından zərər çəkmiş, dağıntılara, itkilərə məruz qalmış soydaşlarına dəstəyi, xeyriyyəçilik fəaliyyətini davam etdirir. Gülləbaran altında Füzuli rayonunun hərbi hospitalında, Tərtər İcra başçısının sığınacağında, müxtəlif döyüş bölgələrində əhali ilə, döyüşçülərlə müntəzəm olaraq görüşlər keçirir, onlara dəstək olur.

Vaqif müəllim, ona ehticayı olan soydaşına əl uzatmağı, şəhid anasını bağrına basıb, dərdini bölüşmək, şəhid balasının başına sığal çəkmək üçün, uzaq məsafələri dəf etməyi bacarandır. Mən Tərtərdə şəhid ailələri üçün keçirilən tədbirlərdə soydaşlarımızın ona minnətdarlığının, məhəbbətinin şahidi olmuşam. Özgənin dərdinə laqeyd qalmamağı bacarmaq özü də xoşbəxtlikdir.

Əcdadlarının qeyrətindən aldığı payı səxavətlə soydaşları ilə, varisləri ilə paylaşan, halalı haramla, özününkünü özgəninki ilə səhv salmayan, xalqına andına, dininə, imanına, valideynlərinin ruhuna sadiq, ömür-gün yoldaşı nurani Zemfira xanıma, zəhmətsevər, istedadlı övladlarına, nəvələrinə sadiq, həm onların qayğısına qalan, həm də onlarla fəxr edən insandır Vaqif müəllim.

Müdriklər demişlər, dahi o kəsdir ki, ürəyi başqaları üçün də çırpınır. Vaqif Abbasov da məhz ürəyi başqaları üçün çırpınan insandır və bunun bəhrəsini insanların hörməti, etibarı, sədaqətində görür.

Vaqif müəllim dəfələrlə müxtəlif beynəlxalq tədbirlərdə, simpozium və konfranslarda ölkəmizi, xalqımızı, elmimizi layiqincə təmsil etmişdir. O, müxtəlif illərdə Təhsil Nazirliyinin Kimya Olimpiadalarının Respublika məktəblilərinin turunu keçirən münsiflər heyətinin sədri, Tələbə Qəbulu üzrə Dövlət Komissiyası nəzdində Kimya üzrə Ekspert Şurası və Seminarın sədri olmuş, Təhsil Problemləri İnstitutu ilə birlikdə "Kimya məktəbdə" elmi-metodiki jurnalı təsis etmiş, bu jurnalın və "Neft Kimyası və Neft Emalı Prosesləri" jurnalının baş redaktorudur. Azərbaycan məktəblilərinin Dünya olimpiadalarında və Beynəlxalq Mendeleyev Kimya olimpiadalarında iştirak edən komandaların rəhbəri olmuşdur.

Akademik Vaqif Abbasov 1987-ci ildə SSRİ Xalq Təsərrüfatı Nailiyyətləri Sərgisinin gümüş medalı və "SSRİ-nin qabaqcıl İxtiraçısı" döş nişanı ilə təltif olunmuşdur. Elm və təhsilin inkişafı sahəsində səmərəli fəaliyyətinə görə 2004-cü ildə Azərbaycan Respublikasının Təhsil Nazirliyinin "Qabaqcıl təhsil işçisi" döş nişanına, 2005-ci ildə "Azərbaycan Respublikasının Əməkdar Müəllimi" fəxri adına layiq görülmüş və "Şöhrət" ordeni ilə təltif olunmuşdur. Azərbaycanda neft-kimya elminin inkişafında uzun müddətli səmərəli fəaliyyətinə görə akademik Vaqif Abbasov 2019-cu ildə "Azərbaycan Respublikası Prezidentinin Fəxri Diplomuna layiq görülmüşdür.

Azərbaycan Milli Elmlər Akademiyasının Rəyasət Heyətinin 5 sentyabr 2022- ci il tarixli Qərarı ilə akademik Vaqif Abbasov 70 illik yubileyi ilə əlaqədar kimya sahəsi üzrə akademik Yusif Məmmədəliyev adına Xatirə nişanı ilə təltif edilmişdir.

AMEA Akademik Yusif Məmmədəliyev adına Neft-Kimya Prosesləri İnstitutunun Elmi Şurasında akademik Vaqif Abbasovun anadan olmasının 70 illiyinə həsr olunmuş iclasın keçirilməsi, AMEA Rəyasət Heyəti aparatının İnformasiya şöbəsinə akademik Vaqif Abbasovun həyat və yaradıcılığına həsr olunmuş materialların kütləvi informasiya vasitələrində işıqlandırılmasının təmin edilməsi, habelə AMEA-nın Mərkəzi Elmi Kitabxanasına və AMEA-nın "Elm" Nəşriyyatına, onun biblioqrafiyasının hazırlanması və nəşrinin təmin edilməsi tapşırılmışdır. Bu yaxınlarda həmin dəyərli kitabın geniş təqdimatında iştirak edəcəyik.

Elmə, alimə yüksək qiymət verən Ulu öndər, müdrik Heydər Əliyev demişdir: "Xalq həmişə öz ziyalıları, öz mədəniyyəti, öz elmi ilə tanınır. Hər bir alim qiymətlidir. Ancaq nəzəriyyəni təcrübə ilə birləşdirən, fıkirlərini tətbiq edə bilən və onlardan əməli nəticə götürə bilən, cəmiyyətə, ölkəyə, xalqa konkret fayda gətirən insanlar alimlərin sırasmda xüsusi yer tutur". Vaqif Abbasov da məhz belə alimlərdəndir.

Əzizimiz Vaqif müəllim, ailəniz ilə birlikdə, Sizə uzun, sağlam ömür, daha böyük uğurlar arzulayırıq! Çox yaşa, çox yarat, böyük alim, böyük insan.

Elmira Süleymanova

Azərbaycan Ağsaqqallar Şurasının sədr müavini, professor

525-ci qəzet.- 2022.- 28 dekabr.- S.12-13.