Səxavət Məmmədov: "Tarımızın zirvədəki yerini qorumağa çalışıram"

Müsahibimiz gənc tarzən, pedaqoq, Azərbaycan Dövlət Mədəniyyət və İncəsənət Universitetinin (ADMİU) müəllimi Səxavət Məmmədovdur.

- Səxavət bəy, son günlərini yaşadığımız 2022-ci il sizinçün necə keçdi? Yaradıcılığınızda hansı yeniliklər baş verdi?

- Bu il mənim yaradıcılığım üçün çoxşaxəli oldu. Həm ölkədaxili, həm də ölkə xaricində bir sıra uğurlar qazandım. Bu ilin aprel ayında Türkiyənin "Altın Zirvə Ödülləri 2022" mükafatına layiq görüldüm. Mükafat öz sahəsində uğurlu gənclərə təqdim edilir. Tar sahəsində də məni layiq bildikləri üçün bir daha təşəkkür edirəm. Həmçinin, bu il iki klipim işıq üzü gördü. Ennio Marrikonenin "Sevgi üçün ölə bilərəm" və Karlos Qardelin məşhur "Tanqo" əsəri tarda demək olar ki, heç ifa olunmayıb. Çalışdıq ki, heyətimizlə birgə bu əsərlərə müraciət edək. Həm tarımızın inkişafı üçün, həm də bu cür əsərlərin də tarda səslənmə imkanlarını göstərmək üçün gözəl kliplər də çəkdirib rəsmi yutub kanalımızda və televiziya efirlərində yayımladıq. İnşallah, bu cür layihələrimiz davamlı olacaq.

Bu il görkəmli tarzən Əhmədxan Bakıxanovun 130 illik yubileyi dövlət səviyyəsində silsilə tədbirlər şəklində Muğam Mərkəzində, Muzey Mərkəzində, Filarmoniyada keçirildi. Mən Ə.Bakıxanovun 120 illiyinə həsr olunmuş müsabiqədə birinci yerə layiq görüldüyüm üçün bu il silsilə yubiley tədbirlərinə qonaq qismində dəvət aldım, instrumental və solo şəklində bir neçə çıxışlarımız oldu. Bu da mənimçün çox böyük uğurdur, sevindirici haldır.

Məşhur "Cartier Event"in təşkilatçılığı ilə uşaqlar üçün "Sevimli nəğmə" tamaşası səhnələşdirildi. Baş dirijor Əməkdar İncəsənət Xadimi Fəxrəddin Atayevin dirijorluğu ilə çox uğurlu premyeramız baş tutdu.

Həmçinin, ölməz bəstəkarımız Vasif Adıgözəlovun "Şuşam laylay" əsərini ilk dəfə Azərbaycan Dövlət Mədəniyyət və İncəsənət Universitetinin orkestri ilə birgə tarda ifa etdik. Dirijor Mustafa Aşurovun rəhbərliyi, konsertmeyster Aygün Səfərzadənin pianoda müşayiəti ilə Filarmoniyada böyük bir tədbirdə çox uğurlu çıxışımız oldu.

Eləcə də aprel ayında Beynəlxalq Muğam Mərkəzində ADMİU-nun "Xalq çalğı alətləri ifaçılığı" kafedrasının müəllimlərinin böyük bir konserti oldu. "Dünən, bu gün, sabah" adlı həmin silsilə konsertlərdə qədim muğamlarımız, bugünkü klassik Avropa əsərləri və daha müasir musiqi nömrələri səsləndi. Biz də tar üçün az işlənmiş xarici əsərləri ifa etdik. Fikrimcə, bu da çox uğurlu alındı və hazırda həmin əsərlər üzərində işlər gedir. İnşallah, yaxın zamanda klipimiz yayımlanacaq.

Görkəmli tarzən, Xalq artisti, professor Ramiz Quliyevin təşəbbüsü ilə Azərbaycan Televiziyası tərəfindən "Rast" filmi çəkildi. Noyabrın 28-də Beynəlxalq Muğam Mərkəzində filmin təqdimat mərasimi keçirildi. Bir gənc olaraq mənim də bu möhtəşəm layihədə çıxış etdiyimə görə çox sevinirəm və hörmətli professorumuz Ramiz Quliyevə öz təşəkkürümü bildirirəm.

Bu günlərdə Azərbaycan Dövlət Akademik Filarmoniyasında "Şuşa İli - Şuşa Zəfəri" adlı inklüziv ədəbi-musiqili tədbir keçirildi. Bizim də Xalq artistimiz Mələkxanım Əyyubova ilə birgə çox gözəl çıxışımız oldu. Hələ də bu konsertin təəssüratları danışılır. İnşallah, davamlı olar.

- Tarın ölkəmizdə və dünyada tanıdılması, unudulmaması üçün çox işlər görürsünüz. Məqsədinizə nə dərəcədə nail ola bilirsiniz?

- Bir ifaçı olaraq ən birinci məqsədimiz tar alətini qorumaq, ustadlardan qalan ənənəni qoruyub-saxlamaq və daha da inkişaf etdirməkdir. Bunun üçün hər gün, hər saniyə çalışırıq. Bu il də çox uğurlu xarici səfərlərimiz oldu. Mart ayında İstanbulda Türkiyənin tanınmış musiqiçiləriylə birgə ifalarımız oldu. Bu uğurlu layihədən sonra iyul ayında yenidən Türkiyəyə səfər etdik. Qarşıda layihənin 3-cü hissəsi də gözlənir. Çox sevinir və həm özümün, həm də tarımızın uğuru sayıram ki, bir neçə alətin ifası zamanı tara da xüsusi yer verilir. May ayında həm müstəqilliyimizin ildönümü, həm də Bakı ilə İzmirin qardaşlığının 37-ci ili ilə bağlı İzmirə səfərimiz oldu. Oradakı çıxışımıza görə diplomlarla təltif olunduq. Avqust ayında Özbəkistanın Daşkənd və Səmərqənd şəhərlərinə səfərlərim oldu. Özbəkistanın Dövlət Televiziyasında tarımızın tanıdılması ilə bağlı çıxış etdik. Onlar tarımızın quruluşuna, səsinə heyran olduqlarını dedilər. Orada mədəniyyət paytaxtımız Şuşa ilə bağlı da bir sıra qeydlərim, çıxışlarım oldu. Çox sevindirici haldır ki, dünyanın hər yerində tarımıza diqqət var. Mən də, bir gənc olaraq, tarımızın zirvədəki yerini qorumağa çalışıram. Bütün bu prosesləri müşahidə edərkən, aldığımız müsbət reaksiyalar əsasında deyə bilərəm ki, məqsədimizə doğru iri və inamlı addımlarla irəliləyirik. İnşallah, daha çox uğurlara nail olacağıq.

- Əgər tar olmasaydı, hansı alətə üz tutardınız?

- Düzü, əvvəllər də ağlımda başqa heç bir alət yox idi. Atamın məsləhəti ilə tara yönlənmişdim. Ancaq illər keçdikcə uda, bas-gitaraya, udarnikə də marağım yaranır. Hərdən dostlarımızla söhbət əsnasında məni maraqlandıran sualları verirəm, çalışıram ki, bu alətlərdə də ifa etməyi öyrənim. Təbii ki, tar simli olduğu üçün digər simli alətlərdə də ifa edə bilərik. Amma bu da o qədər asan deyil. Çünki hər birinin özünə uyğun ifa tərzi var. Daha yumşaq səsləri olduğu üçün fikrimcə, tar olmasaydı, bu alətlərə üz tutardım.

- Sizcə, sizi digər tar ifaçılarından fərqləndirən hansı xüsusiyyətlərinizdir?

- Bunu müəllimlərim və dinləyicilərim desə, daha yaxşı olardı. Özüm özümü fərqləndirməyə çətinlik çəkirəm. Ancaq fikrimcə, hər zaman çox az ifa olunan dünya əsərlərinə müraciət etməyim ola bilər. Daim araşdırmadayam. Musiqi nə qədər gözəl olsa da, onu dərhal ifa etmək olmur. Bir sıra proseslərdən keçməli, tara uyğunlaşdırılmalıdır. Ona görə də bu baxımdan il ərzində çox az əsər tapa bilirik. Bu da aylarla zaman alır. Amma məncə, nəticədə maraqlı nömrələr tapılır və gözəl alınır.

- Qarşıdan gələn 2023-cü il üçün yaradıcılıq planlarınız, gözləntiləriniz nələrdir?

- Bu il çatdıra bilmədiyimiz bir sıra layihələrimiz var ki, İnşallah, onları 2023-cü ildə tamamlayacağıq. Həmçinin, bir sıra studiya işlərimiz, kliplərimiz, tədbirlərimiz və səfərlərimiz də gözlənilir. Eləcə də gözəl xanəndəmiz Ayşən Mehdiyeva ilə bir neçə maraqlı layihələrimiz var ki, onların da konsert versiyası gözlənilir. Ona da hazırlıqlarımız davam edir. İnşallah, hər birinin vaxtı çatdıqca dinləyicilərimizlə bölüşəcəyik.

Şahanə MÜŞFİQ

525-ci qəzet.- 2022.- 28 dekabr.- S.9.