Yol bir nəfəs

"Öz dibinə kölgə salmaz şam ağacı",

Dərd gözünü zilləyər,

Sevinc baxar qıyğacı.

Ömür yolun ölçər zaman -

Həyat adlı.

Bir gün gəlib keçmək bilmir,

İllər isə yel qanadlı.

Uzaq gəlir, hər şey uzaq,

Ümid əsir, arzu əbəs.

Bu dünyadan o dünyaya

Uzaq deyil, yol bir nəfəs.

Təbiətin bəstəsi

Budağıyla vidalaşan

Xəzəllərin xışıltısı

Təbiətin bəstəsidi.

Aynabəndi döyəcləyən

Sərçələrin civiltisi

Payız zümzüməsidi.

Noyabrın bir qucaqlıq darıxmağı

Gəlib qoynuna sığınar.

Anlayarsan,

Hamı hər kəsin heç kəsidi.

Gəl, sahib çıx ömrümə...

Saat yenə səni gözlədiyim vaxtdadır,

Əqrəblərdi zamanın başına dolanan...

Qürub çağı... şəfəq vaxtı..,

Günlər növbələşir yalandan.

Fəsillər tez dəyişir zamanından,

Hər fəsil bir az payız qəribliyində...

Ömrün bir küncünə sığışdırılmış kimiyəm,

Sevmədiyim mahnılar belə dilimdə dolaşır.

Mürvətsiz arzuların ürəkdə duracağı yox,

Gəl, sahib çıx ömrümə...

Bu eşqin

Qəlbindən başqa sığınacağı yox...

lll

Hilalın əksi düşür dənizə

Zülmətin yarıb gecənin.

Sanki almış şəhəri qoynuna

layla çalır.

Göy üzü yaxın gəlir,

yerə ulduz səpilir,

Bir baxışdan min baxışa

özgə bir nəzər salır.

Sığal çəkir dalğalar

xəfifdən narın qumlara

Dəniz coşub daşdığı sahilin

könlün alır.

lll

Bütün olmaz nə var cəm olmuş məndə,

Bütün olmazlara oldu deyən mən.

Baxdım ki, ortada bir mən qalmamış,

Bütün olmazlara oldu deyəndən.

Qırılmış ruhumun qolu-qanadı,

Məndə mənə aid arzu, dilək yox.

Əlimi qoydum sinəm üstünə,

Duyğuyla yaşayan həzin ürək yox.

Hanı dünyanı qurtaran o qız,

Xəyalı göylərdə pənbə buludlu.

Kim aldı qəlbimdən o qəhrəmanı

Bu qız o saf qızı harda unutdu?

Aysel NƏSİRZADƏ

525-ci qəzet.- 2022.- 29 dekabr.- S.15.