Vətən etibarlı əllərdədir

Qədim tarixi, müqəddəs adət-ənənələri, zəngin mədəniyyəti, qəhrəmanlıqlarla dolu keçmişi olan Azərbaycan xalqı hər zaman olduğu kimi bu gün də vətənini yad ellərdən qorumaq əzmindədir. Müdriklərimiz demişkən: "Gələcəyə ümidlə baxan xalq heç vaxt yenilməz". Hər kəs bilməlidir ki, bizim gücümüz birliyimizdədir. Tarixin bütün sınaqlarından başıuca, üzüağ çıxan, Türk dünyasının sağlam budaqlarından biri olan Azərbaycan xalqı 2020-ci ildə yeni və şərəfli bir tarixi uğura imza atdı. Bu parlaq uğurun müəllifi Azərbaycan Respublikasının Prezidenti, müzəffər Ali Baş Komandanımız cənab İlham Əliyev və qalib Azərbaycan ordusudur. Dünyanın məkrli qüvvələri qarşısında, həmişə olduğu kimi, prinsipiallıq nümayiş etdirən Azərbaycan dövləti və xalqı ulularının yolunu seçərək sentyabrın 27-də işğal olunmuş torpaqlarımız uğrunda mübarizəyə başladı.

Azərbaycan xalqı illərdir ki, ümidlə yaşayırdı. Elə bilirdik ki, Avropa Şurası, BMT, Minsk Qrupu və başqa qurumların iştirakı sayəsində Qarabağ məsələsi sülh yolu ilə həll olunacaq. Ermənistanın təcavüzkar siyasətinə cavab olaraq, 44 gün davam edən savaşda Prezidentimizin müdrikliyi, ordumuzun qəhrəmanlığı sayəsində Qarabağ işğaldan azad olundu. Müharibənin gedişatı parlaq qələbədən xəbər verirdi. Nəhayət, Ali Baş Komandan cənab İlham Əliyev noyabrın 10-da Qələbə xəbəri ilə xalqımızı sevindirdi. Bu qələbə İlham Əliyev nüfuzunun, müdrikliyinin və uzaqgörənliyinin məntiqi nəticəsidir.

Ali Baş Komandan İlham Əliyevin gecə-gündüz bilmədən savaşa birbaşa rəhbərlik etməsi, Azərbaycan əsgər və zabitlərinə qüdrətli dayaq olması Vətən oğullarına tükənməz güc verdi. Müzəffər ordumuzun döyüşçüləri Ali Baş Komandanın "Qarabağ Azərbaycandır!" şüarından ruhlanaraq daha da əzmlə mübarizə apardılar.

Gənclərimiz bilməlidirlər ki, işğal olunmuş torpaqlarımızdakı qədim tarixi abidələrimizin dağıdılması, xarabalığa çevrilməsi ermənilərinin barbarlığından irəli gələn, tarixi cəhətdən nifrətlə qarşılanan bir hadisədir. Təəssüf ki, real həyatda ermənilər tərəfindən törədilmiş eybəcərliklər, heç bir qanuna söykənməyən hadisələrin əsl səbəbi çox zaman qəsdən təhrif olunur...

Biz yaxşı bilirik ki, tarix bizi sınağa çəkir. Biz tarixi keçmişimizlə fəxr edən bir xalq kimi bu sınaqdan da üzüağ çıxacağıq.

Prezident İlham Əliyevin bu savaşda ordumuza dahiyanə rəhbərliyi, heç bir təhlükəyə məhəl qoymadan Azərbaycan torpaqlarını azad etməsi, bayrağımızı o yerlərdə şəxsən özünün ucaltması xalqın yaddaşından heç vaxt silinməyəcək.

Hörmətli Prezidentimiz qazanılan qələbənin tarixi əhəmiyyətini bütün dünyaya belə bəyan etdi: "Dağlıq Qarabağ münaqişəsi keçmişdə qaldı, Azərbaycan öz ərazi bütövlüyünü bərpa etdi və BMT Təhlükəsizlik Şurasının qətnamələrini yerinə yetirdi".

Düşmən tərəf unutmasın ki, "Dağlıq Qarabağ" adının və statusunun üstündən elə bir xətt çəkilmişdi ki, onu heç bir yağı qüvvəsi silə bilməz! Qoy xalqımız əmin olsun ki müqəddəs vətən etibarlı əllərdədir!

Azərbaycan xalqı çox xoşbəxt xalqdır ki, onun Türkiyə dövləti kimi, qüdrətli Prezident Rəcəb Tayyib Ərdoğan kimi dostu, qardaşı var. Türkiyə Respublikasının Prezidenti, zati-aliləri Rəcəb Tayyub Ərdoğanın hələ 2007-ci ildə baş nazir kimi Bakıda səfərdə olarkən Qarabağ münaqişəsini "Türk millətinin qanayan yarası" adlandırması heç də təsadüfi deyildi. Ermənistan dövlətinə edilən çağırış vaxtında qiymətləndirilməli idi. Təəssüflər olsun ki, belə çağırışlara məhəl qoymayan qarşı tərəf öz hikkəli hərəkətləri ilə vəziyyəti daha da gərginləşdirmişdi. Nəticədə, bu gərginlik düşmənin öz başında çatladı.

Azərbaycanın Zəfəri bir daha dünyaya sübut etdi ki, biz vətənə, torpağa, onun müqəddəsliyinə necə qəlbən sədaqətliyik, lazım gələrsə, canımızı vətən yolunda qurban verməyə hər an hazırıq.

Mən bir ziyalı kimi məsləhət görərdim ki, bəzi naşı siyasətçilər İlham Əliyevin yüksək beynəlxalq mərasimlərin tribunalarından verdiyi bəyanatları diqqətlə dinləsinlər, onun zəkasına, qüdrətinə, əzmlə söylədiyi müdrik kəlamlarına, diplomatik məharətinə sonsuz ehtiramla yanaşıb onun bu təcrübəsindən bəhrələnsinlər.

Hər bir Azərbaycan alim və ziyalısı yaxşı dərk etməlidir ki, torpaq ağrısı, sərvətlərimizin qorunmasının zəruriliyi gələcək nəsillərə elmi cəhətdən də güclü şəkildə aşılanmalıdır. Gərək onlar bu yolda cəsarətlə addımlasınlar. Çalışdığım Bakı Dövlət Universitetinin rəhbərliyi və professor-müəllim heyəti də bu istiqamətdə inamla fəaliyyət göstərir.

Rüfət RÜSTƏMOV

525-ci qəzet.- 2022.- 15 fevral.- S.13.