Yeni bir səhər

Faiq Xudanlı

Fəlsəfə üzrə fəlsəfə doktoru

Regionda yaşayan və fəaliyyət göstərən yaradıcı gənclərin inkişafı, onların tanıdılması, əsərlərinin nəşrinə dəstək Kürdəmir Regional Mədəniyyət İdarəsinin əsas fəaliyyət istiqamətlərindəndir. 2021-ci ildə regionun gənc qələm adamlarının üzə çıxarılması və dəstək göstərilməsi məqsədi ilə Azərbaycan Yazıçılar Birliyi ilə birlikdə "Kür" ədəbi məclisi yaradıldı. "Kür" ədəbi məclisi vasitəsi ilə Regional İdarənin əhatə etdiyi beş rayonda (Kürdəmir, İmişli, Beyləqan, Füzuli və Xocavənd) yaşayan ədəbiyyat adamlarını bir araya gətirməyə çalışdıq. "Kür" ədəbi məclisinin üzvlərinin mədəniyyət-ədəbiyyat sahəsinin ustad imzaları ilə görüşlərini təşkil etmək, gənc yazarların ədəbi nümunələrinin ölkənin nüfuzlu qəzet və jurnallarında nəşr olunmasını dəstəkləmək istiqamətində bir neçə uğurlu işlər həyata keçirildi. Belə ki, ölkəmizin tanınmış yazarları, nüfuzlu qələm adamları ilə görüşlər ədəbi mühitin canlanmasında öz rolunu oynadı. Ədəbi məclisin istedadlı üzvlərinin şeir, esse və hekayələrinin respublikanın nüfuzlu mətbuat orqanlarında çapı regionda ədəbi mühitin formalaşmasına nəzərəçarpacaq təsirini göstərmiş oldu. Regionun ədəbi mühitində yaranan bu canlanma, fəaliyyətimizə yeni stimul qazandırdı. Qərara gəldik ki, "Kür" ədəbi məclisinin üzvlərindən birinin kitabının nəşri istedadlı gənclərin üzə çıxarılması, tanıdılması və yaradıcılıqlarının dəstəklənməsi baxımından faydalı olar. 2021-ci il ərzində axtarışlarımız nəticə verdi.

"Kür" ədəbi məclisinin aktiv üzvü, Beyləqan rayon Niyazi adına Uşaq Musiqi Məktəbinin müəllimi Aygün Bayramlının şeirləri özünəməxsus koloriti, saflığı ilə diqqətimizi cəlb etmişdi. Regionda ilk olaraq 2021-ci il "Nizami Gəncəvi İli" çərçivəsində nəşr olunan Ramil Əhmədin "Nizami Gəncəvinin poetik portreti" və Fərid Hüseynin tərtibçisi olduğu "Nizami Gəncəvinin əsərlərinin el variantları" kitabları Regional İdarənin dəstəyi ilə çap edilməsi təcrübəsi artıq var idi. Bu səbəbdən Aygün Bayramlının müxtəlif mövzulu şeirlərinin daha geniş auditoriyaya çatdırılması gəncliyə, ədəbi mühitə və "Şuşa İli"nə töhfə olacağını nəzərə alaraq kitabın nəşrinə qərar verdik.

Bildiyimiz kimi, Azərbaycan Respublikasının Prezidenti cənab İlham Əliyevin Sərəncamı ilə 2022-ci il "Şuşa İli" elan olunub. İl ərzində Mədəniyyət Nazirliyi Sərəncamın icrası ilə əlaqədar "Şuşa İli"nin zəngin plan və proqramlarına uyğun olaraq çoxsaylı layihələrin təşkilatçısı olub, Şuşanın mədəni irsinin geniş təbliği məqsədini daşıyan bir sıra tədbirlər həyata keçirib. Mədəniyyət naziri cənab Anar Kərimov bu istiqamətdə proqram xarakterli fikir və mülahizələrini bildirib, konkret iş və hədəfləri müəyyən edən tapşırıqlar verib. Qarşıya qoyulan hədəflərə çatmaq üçün Regional İdarənin dəstəyi ilə çap olunan "Yeni bir səhər" kitabının "Şuşa İli"nə kiçik töhfə kimi qəbul olunacağına inanırıq.

"Yeni bir səhər" kitabında şeirlər "Zəfər yolu", "Səni gözləyirəm" və "Bu gün yeni bir səhər" başlıqları altında toplanıb. "Zəfər yolu" bölməsində müəllifin vətənpərvərlik mövzusunda qələmə aldığı şeirlər, "Səni gözləyirəm" də sevgidən, həsrətdən yaranan lirik şeirlər, "Bu gün yeni bir səhər"də isə müxtəlif məzmunlu şeirləri yer almaqdadır. Aygünün ixtisasca musiqiçi olması onun şeirlərində hiss olunur. Onun bir çox şeirindəki intonasiya, ahəng fərqli bir ab-hava yaratmaqdadır. Elə bunun nəticəsidir ki, şeirlərinə müxtəlif mahnılar yazılıb. Aygün Bayramlının şeirlərində bəzən heca bölünmələrində, misra quruluşunda, söz seçimində nəzəri olaraq nöqsanlı görülə biləcək hissələr yox deyil. Lakin bütün bunların arxasında təmiz bir niyyət, xoş bir məramdan doğan incə mətləblər var. Əminəm ki, kitabda yer alan şeirləri oxuyan hər kəs ədəbiyyatımıza yeni bir nəfəsin, maraqlı bir imzanın gəldiyini duyacaq. "Yeni bir səhər" Aygün Bayramlının ilk kitabıdır. Yaradıcı bir gəncin həyatında ilk dəfə geniş oxucu kütləsinin qarşısına kitab vasitəsi ilə çıxması və bunun gətirdiyi həyəcanı anlayıram. Düşünürəm ki, bu onun həyatında ədəbiyyat sahəsində qazanacağı uğurun ilk addımıdır və bir gənc qələm adamı olaraq onun bioqrafiyasının unudulmaz anlarındadır. Bu kitabın nəşri onu yazmağa, yaratmağa daha da həvəsləndirəcəyinə və yaradıcılığında stimul olacağına inanır, müəllifə uğurlar arzulayıram.

525-ci qəzet .- 2022.- 1 iyul.- S.14.