Şuşada Vaqif Poeziya Günləri başlayıb

İyulun 14-də Şuşada Vaqif Poeziya Günlərinin açılışı olub. Dahi Azərbaycan şairinin muzey-məqbərə kompleksinin önündə keçirilən tədbirdə Vaqif Poeziya Günlərinin tarixini əks etdirən videoçarx nümayiş olunub.

525.az xəbər verir ki,Azərbaycan Yazıçılar Birliyinin sədri, Xalq yazıçısı Anar açılış nitqi ilə çıxış edərək qonaqları salamlayıb. Qeyd edib ki, 30 il ərzində əsarət altına qalan Şuşa artıq azaddır.

O, Şuşa azad ediləndən bəri bu şəhərdə keçirilən tədbirlər barədə danışıb. Həmçinin Xalq yazıçısı Molla Pənah Vaqifin həyat və yaradıcılığına nəzər salıb. Azərbaycan Yazıçılar Birliyinin sədri dahi şair Vaqifin şeirlərini səsləndirib və xatirələrini bölüşüb.

Xalq yazıçı deyib: “Müzəffər Azərbaycan Ordusuna, ata vəsiyyətini layiqincə yerinə yetirən Prezident İlham Əliyevə, Şuşaya, xalqımıza eşq olsun!”.

Sonra çıxış edən Xalq yazıçısı Çingiz Abdullayev uşaqlığının Şuşada keçdiyini bildirib. Deyib ki, bütün Azərbaycan xalqı uzun illər idi bu günü səbirsizliklə gözləyirdi.

“44 günlük Vətən müharibəsində şəhid olanların çoxu Qarabağı görməmişdi. Onlar Azərbaycan Prezidentinə, dövlətimizə inanaraq bu yolda can qoydular. Məhz onların sayəsində biz bu gün çox böyük bayrama toplaşmışıq",- deyə Çingiz Abdullayev vurğulayıb.

Daha sonra tamaşaçılar Azərbaycan muğamlarını dinləyiblər.

“İgidlərin sözü” kompozisiyası zamanı Vətən müharibəsi iştirakçısı olmuş şairlərin muğamın müşayiəti ilə çıxışları olub.

Sonda görkəmli şairlərin “Odlar yurdum Azərbaycan” - vətənpərvərlik və qəhrəmanlıq mövzusunda şeirləri səsləndirilib.

Hazırda isə Cıdır düzündə konsert-tamaşa təqdim edilir. “Əsrlərin sədası” adlı konsert-tamaşada Füzuli, Xəqani, Xurşidbanu Natəvan, İmadəddin Nəsimi, Məhsəti Gəncəvi, Mir Möhsün Nəvvab, Molla Pənah Vaqif, Molla Vəli Vidadi, Nizami Gəncəvi, Şah İsmayıl Xətai kimi böyük şairlərimizin obrazları canlandırılıb.

xxx

İyulun 14-də Şuşada Heydər Əliyev Fondu, Azərbaycan Respublikası Mədəniyyət Nazirliyi və Azərbaycan Yazıçılar Birliyinin təşkilatçılığı ilə Vaqif Poeziya Günləri başlayıb.

525.az xəbər verir ki, tədbirin açılışını AYB sədri, Xalq yazıçısı Anar edib. Ardınca, AYB-nin birinci katibi, Xalq yazıçısı Çingiz Abdullayev ürək sözlərini tədbir iştirakçıları ilə bölüşüb.

Tədbir “İgidlərin sözü” layihəsi ilə başlayıb. Bu layihədə II Qarabağ Müharibəsində iştirak etmiş qazi şairlərimiz öz şeirlərini səsləndirib. Vaqif Poeziya Günləri musiqili proqramla davam edəcək.

15 iyul - tədbirin ikinci günündə poeziya festivalı musiqili proqramla davam edəcək və gənc şairlər öz şeirlərini səsləndirəcək.

Qeyd edək ki, musiqi proqramları Cıdır düzündə təqdim olunacaq.

525-ci qəzet 2022.- 16 iyul.- S.12.