"Şuşa İli" ilə bağlı Göyçayda geniş tədbir keçirilib

Mayın 27-də Göyçayda - Xalq şairi Rəsul Rzanın ev muzeyində "Şuşa İli" ilə əlaqədar tədbir təşkil edilib. Tədbiri giriş sözü ilə muzeyin direktoru Solmaz Həsənova açaraq ölkəmizin hər yerində, təhsil və mədəniyyət müəssisələrində Şuşanın Azərbaycanın mədəniyyət paytaxtı və 2022-ci ilin "Şuşa İli" elan edilməsi ilə bağlı tədbirlərin keçirildiyini bildirib. Azərbaycanın ərazi bütövlüyü, Qarabağın azad olunması uğrunda gedən döyüşlərdə canını qurban verən şəhidlərin xatirəsi bir dəqiqəlik sükutla yad edilib.

Sonra dahi Bülbülün ifasında Asəf Zeynallının "Ölkəm" romansının lent yazısı səsləndirilib. Tədbirin aparıçısı Şuşa şəhərinin tarixindən danışaraq mənfur düşmənlərin Şuşanı, ümumiyyətlə, Qarabağın dağlıq hissəsini ələ keçirmək üçün illər boyu gizli və aşkar mübarizə apardığını, məkirli niyyətlərini həyata keçirmək üçün hər cür vəhşiliyə yol verdiklərini vurğulayıb. Düşmənlərin mənfur planlarının həyata keçməsinə imkan verməyən ləyaqətli Azərbaycan övladlarından - dövlət, ədəbiyyat, mədəniyyət və elm xadimlərindən danışan aparıcı daha sonra Xalq şairi Rəsul Rzanın Qarabağa, Şuşaya həsr etdiyi əsərlərdən söhbət açıb, yaradıcılığından nümunələr səsləndirilib.

Şuşam mənim,

Gözəlliklə qoşam mənim.

Gözəllikdə hansı şəhər

Söylə, sənə tay olarmı?

Vətəndən də püşk olarmı?

Pay olarmı?

Qarabağ xanlığını yaradan, Pənahabad (Şuşa) şəhərinin əsasını qoyan Pənahəli xandan bəhs edən kiçik bir tamaşa nümayiş etdirilib. Xan Şuşinskinin ifasında "Şuşanın dağları" mahnısının lent yazısı səsləndirilib.

Məktəblilərin ifasında sonuncu Qarabağ xanı Mehdiqulu xanın qızı məşhur şair və rəssam Xurşidbanu Natəvanın həyatından bəhs edən pyesdən bir parça təqdim olunub. Tamaşadan sonra Göyçay Musiqi Məktəbinin direktoru, istedadlı tarzən Rövşən Zamanov "Qərənfil" romansını ifa edib.

Aparıcı daha sonra, İbrahim xanın hakimiyyəti dövründə Qarabağ xanlığının apardığı xarici siyasətdən danışıb və məktəblilərin ifasında "Vaqif" pyesindən 8-ci şəklin tamaşası göstərilib. Tamaşadan sonra Göyçay Musiqi Məktəbinin Xor kollektivi "Durnalar" mahnısını ifa edib.

Aparıcı Qarabağda, Şuşada yetişən, fəaliyyət göstərən görkəmli ədəbiyyat və mədəniyyət xadimləri Mir Möhsün Nəvvab, Xurşidbanu Natəvan, Hacı Hüsü, Məşədi İsi, Sadıqcan, Nəcəf bəy Vəzirov, Əbdürrəhim bəy Haqverdiyev, Cabbar Qaryağdı oğlu, Üzeyir bəy Hacıbəyov, Ceyhun bəy Hacıbəyli, Bülbül, Seyid Şuşinski, Xan Şuşinski, Məcid Behbudalı oğlu, Rəşid Behbudov və başqaları haqqında söhbətlər açıb. Musiqi məktəbinin Xor kollektivinin ifasında "Arazım" mahnısı tamaşaçılar tərəfindən alqışlarla qarşılanıb.

Aparıcı təcavüzkar ermənilərin Qarabağın dağlıq hissəsini, Şuşanı ələ keçirmək cəhdlərindən, Moskvanın dəstəyi ilə yaradılan Dağlıq Qarabağ Vilaqətindən və digər şəhər və kəndlərindən danışıb.

Qarabağın azadlığı uğrunda Azərbaycanın apardığı ölüm-dirim savaşından, 2022-ci ildə 44 günlük müharibədə Azərbaycanın qazandığı tarixi qələbədən, Şuşanın və işğal altında olan digər ərazilərimizin düşmən tapdağından azad edilməsindən söhbət açılıb və 44 günlük müharibənin veteranı, muzeyin əməkdaşı Qəhrəmanov Əliəkbərə "Qubadlının azad olunması uğrunda" medalı təqdim olunub . Azərbaycan Respublikasının Prezidenti, Müzəffər Ali Baş Komandan İlham Əliyevin tarixi nitqinin - "Əziz Şuşa, sən azadsan!" nidalı çıxışının lent yazısı səsləndirilir.

Sonra aparıcı Şuşanın Azərbaycanın Mədəniyyət paytaxtı elan edilməsindən, Şuşada "Xarı Bülbül" festivalının keçirilməsindən, Azərbaycanla qardaş Türkiyə arasında Şuşa bəyannaməsinin imzalanmasından, dünya azərbaycanlılarının növbəti qurultayının Şuşada keçirilməsindən danışıb. Tədbirin sonunda musiqi məktəbinin müəllimi Elşad Abbasovun ifasında Qarabağ mahnısı və "Qarabağ şikəstəsi" alqışlarla qarşılanıb

525-ci qəzet.- 2022.- 1 iyun.- S.12.