ADMİU-da İtaliyaya həsr olunmuş tədbir keçirilib

Mayın 31-də Azərbaycan Dövlət Mədəniyyət və İncəsənət Universitetində (ADMİU) Azərbaycan və İtaliya arasında diplomatik əlaqələrinin qurulmasının 30 illiyinə həsr olunmuş "Mia İtalia" adlı tədbir təşkil edilib.

"Paralel dünyalar" layihəsi çərçivəsində baş tutan tədbirə İtaliyanın Azərbaycandakı səfiri və səfirlik nümayəndələri, universitet rəhbərliyi, professor-müəllim heyəti, tanınmış mədəniyyət və incəsənət nümayəndələri və jurnalistlər qatılıblar.

Tədbiri giriş sözüylə açan ADMİU-nun rektoru, professor Ceyran Mahmudova bildirib ki, ölkənin aparıcı və qocaman bədii ali təhsil müəssisəsi olan Azərbaycan Dövlət Mədəniyyət və İncəsənət Universitetinin 100 illiyinin (2023) qeyd olunması kontekstində, "99+1" proqramı çərçivəsində "Paralel dünyalar" layihəsinin növbəti mərhələsi təqdim olunur. Layihə çərçivəsində artıq Macarıstan və Yunanıstana tədbirlər həsr edildiyini və ADMİU-nun müəllimləri, tələbələri tərəfindən hazırlanan tədbirdə hər iki ölkə səfirliyinin də uğurla təmsil olunduğunu bildirən rektor deyib ki, layihənin məqsədi xarici ölkələrin səfirlikləri ilə ortaq tədbirlərin keçirilməsidir. Bildirilib ki, İtaliyaya həsr olunan bu tədbir sözügedən layihənin 3-cü tədbiridir.

Qeyd olunub ki, Azərbaycanın dünyaya inteqrasiyasını, dünya ölkələri ilə olan qarşılıqlı tarixi-mədəni münasibətlərinin bədii interpretasiyasını, mövcud vizual stereotipləri açıqlayan layihə Universitetin təhsil və bədii yaradıcılıq müstəvisində mübadiləni gücləndirməyə yönəlib. Hazırkı tarixi məqamda, 2022-ci ildə Azərbaycan bir sıra ölkələrlə diplomatik münasibətlərin qurulmasının 30 illik ildönümlərini qeyd edir. Bu layihədə də məqsəd ölkəmizdə fəaliyyətdə olan səfirliklərin və ADMİU-nun tələbələrinin ortaq tədbirləri vasitəsilə hər iki yubileyi qeyd etmək, davamlı və dayanıqlı əməkdaşlıq formalaşdırmaqdır. "Paralel dünyalar"ın növbəti tədbirinin Azərbaycan-İtaliya diplomatik əlaqələrinin 30 illiyinə həsr edildiyini deyən rektor, iki ölkə arasında münasibətlərin böyük keçmişi olduğunu və gündən-günə inkişaf etdiyini də vurğulayıb.

İtaliyanın Azərbaycandakı fövqəladə və səlahiyyətli səfiri Klaudio Taffuri çıxışında belə bir tədbirin əhəmiyyətindən danışıb və əməyi keçənlərə təşəkkürünü bildirib. O qeyd edib ki, müasir mərhələdə Azərbaycan və İtaliya arasında mövcud olan strateji əməkdaşlıq dərin tarixi köklərə və mədəni mübadiləyə əsaslanır. Qədim Roma dövründən başlayaraq, Orta əsrlərdə xüsusi əhəmiyyətə malik olan siyasi, iqtisadi və ticari əlaqələr, Azərbaycanın müstəqilliyini bərpa etməsi ilə yeni formatlarda davam edir. Münasibətlərin gələcəkdə də inkişaf edəcəyinə və mədəniyyət sahəsində daha geniş vüsət alacağına inandığını deyən səfir bu işdə hər iki tərəfin eyni dərəcədə maraqlı olacağını vurğulayıb.

Layihənin rəhbəri, ADMİU-nun rektor müşaviri, sənətşünaslıq üzrə fəlsəfə doktoru Sevil Kərimova bildirib ki, ADMİU-nun təhsil proqramlarında İtaliya incəsənətinin nailiyyətlərinin əks olunması, akademik rəngkarlıq, musiqi, teatr ənənələrinin tətbiqi, dizayn sahəsində təsirləri layihəni ilhamlandıran amillərdir.

Daha sonra qonaqlar Rəssamlıq fakültəsinin tələbələri tərəfindən (bədii rəhbər: Əməkdar rəssam Rəşad Cabarov) təqdim olunan və İtaliyanın tanınan motivlərini, mənzərə və obrazlarını özünəməxsus tərzdə və fərqli texnikalarda əks olunduğu "Mia İtalia/Mənim İtaliyam" sərgisi ilə tanış olublar.

İkinci hissədə Musiqi fakültəsinin illər boyu dillərdə olan İtaliya musiqisinin incilərindən ibarət "Amore mio/Sevdam" konsert proqramı (bədii rəhbər: Məryəm Babayeva) təqdim olunub. Burada fakültənin tələbələri tərəfindən Neapol mahnıları, əfsanəvi San Remo festivalının seçmələri səsləndirilib.

Proqramın davamında təqdim olunan "Rinascimento. Amore eterna/İntibah.Əbədi eşq" adlı geyim kolleksiyası müvafiq ixtisas üzrə təhsil alan tələbələr tərəfindən hazırlanıb (bədii rəhbər: Aysel Əzizova). Son illərin dəbi olan "Renaissancecore" üslubuna müraciət edən tələbələrin interpretasiyasında Mikelancelo, Fra Anjelo, da Vinçinin, Jentileski və digər rəssamların bədii motivləri yeni formatlarda canlandırılıb.

Sonda tədbirin hazırlanmasında əməyi olan hər kəsə sertifikatlar təqdim olunub.

Şahanə MÜŞFİQ

525-ci qəzet.- 2022.- 2 iyun.- S.9.