Fikrət Əmirovun "Min bir gecə"si Bolqarıstanda səhnələşdirilib

Mayın 31-də Sofiya Opera və Balet Teatrında Azərbaycan Respublikasının Müstəqillik Günü və Azərbaycanla Bolqarıstan arasında diplomatik münasibətlərin qurulmasının 30 illiyi münasibətilə dahi bəstəkar Fikrət Əmirovun "Min bir gecə" baleti tamaşaya qoyulub.

Bu barədə AZƏRTAC-a bildirilib ki, Azərbaycanın Bolqarıstandakı səfirliyi və Beynəlxalq Türk Mədəniyyəti və İrsi Fondunun dəstəyi ilə keçirilən qala balet gecəsində Azərbaycanın xarici işlər naziri Ceyhun Bayramov və Bolqarıstanın xarici işlər naziri Teodora Gençovska, Beynəlxalq Türk Mədəniyyəti və İrsi Fondunun prezidenti Günay Əfəndiyeva, Bolqarıstan rəsmiləri, bu ölkədəki diplomatik korpusun nümayəndələri, çoxsaylı qonaqlar iştirak ediblər.

Gecənin açılışında çıxış edən nazir Ceyhun Bayramov müsəlman Şərqində ilk demokratik respublikanın 1918-ci ildə elan edilən Azərbaycan Xalq Cümhuriyyəti olduğunu, 1991-ci ildə ölkəmizin müstəqilliyini bərpa etdiyini və üç onillik ərzində böyük inkişaf yolu keçdiyini qeyd edib. O, Azərbaycanın multikulturalizm ənənələrinə hər zaman sadiq olduğunu və bu gün nümayiş etdirilən baletin də məhz Azərbaycan və Bolqarıstan sənətçilərinin birgə layihəsi kimi multikulturalizm nümunəsi olduğunu bildirib.

Nazir T.Gençovska Azərbaycanı Müstəqillik Günü və diplomatik münasibətlərin qurulmasının 30 illiyi münasibətilə təbrik edib və balet qala gecəsinin təşkilinin, eyni zamanda, mədəniyyət sahəsində ikitərəfli münasibətlərin inkişafına töhfə olduğunu bildirib.

Beynəlxalq Türk Mədəniyyəti və İrsi Fondunun prezidenti Günay Əfəndiyeva 100 illik yubileyini qeyd etdiyimiz Fikrət Əmirovun yalnız Azərbaycanın deyil, bütün türk dünyasının dahi bəstəkarı olduğunu deyib, balet qalasının həm də türk mədəniyyətinin təşviqi baxımından əhəmiyyətini vurğulayıb.

Dirijor Eyyub Quliyevin rəhbərliyi ilə Eldar Əliyevin xoreoqrafiyası əsasında səhnələşdirilən baletdə bolqar balet rəqqasları izləyicilərə unudulmaz anlar yaşadıblar.

525-ci qəzet.- 2022.- 2 iyun.- S.9.