Əsl insan unudularmı?

Başlıqdakı suala cavab düşünərkən ağlıma ilk gələn insanlardan biri dəyərli alim və görkəmli şəxsiyyət Babək Qurbanov olur və dərhal bu qənaətə gəlirəm: Heç zaman unudulmaz! Çünki belə unudulmazlardan olan Babək Qurbanov xalqımızın əsl övladı idi. Namuslu, doğru-dürüst, insanlığın parlaq nümayəndəsi Osmanoğlu Sarıvəlli yadigarı, əsl ziyalılığın timsalı idi Azərbaycanımız və Türkiyəmiz üçün. Estetika elminin mayakı, musiqişünaslıq elmimizin dayağı, təməli, özülü idi. Ömrünü sadəcə elmə həsr etməklə ülviləşmişdi, Türk dünyasına və Batı dünyasına xidmət etmək məramı idi və bunu uğurlu əməlləri ilə bacardı. Bu məramla yaşadı, bu amalın daşıyıcısı, öndəri oldu ömür boyu. Öz adının sərkərdəsi idi elm camiamızda. Xocaların xocası oldu həm Atatürk Universitetində, həm də Qaziantep Konservatoriyasında. Nə məmurlarımız unutdu, nə müəllimlərimiz, nə də ki Babək müəllimdən dərs almış keçmiş tələbələri. Yeri hiss olunur daima.

Səhhəti ilə bağlı sözləşməsi uzadılmadıqda həvəsdən düşmədi, yenə çalışdı, yazdı, yaratdı elmi məqalələrini, yayınlatdı, son 52-53-cü kitablarını bitirməyə çalışdı. Və ömrünün son kitab adlı final akordunu vurmaqla bitirə bildi. Belə ülvi məramla ömrünü başa vurdu.

Könül sındırmaqdan çox uzaq idi. Ona görə də hər bir həmsöhbətinə yalnız xoş sözlər, ümidləndirici, həvəsləndirici sözlər söyləməklə tərəf-müqabilinin qəlbində inam oyadır, ruhunu işıqlandırırdı. Hər bir tələbəsinin uğurunu görməkdən çox sevinərdi. Çünki qəlbi böyük, düşüncələri intəhasız, məfkurəsi geniş idi. Nə yerə, nə göyə sığan idi əsl insanımız - Babək Osmanoğlu Qurbanov. Xalq şairimiz Osman Sarıvəllinin övladı olmaq şərəfinin yükünü müdam çalışmasıyla sübut etdi. Əsilzadə idi təbiəti, əsillikdən yoğrulmuşdu mayası. Çünki Səyalı ana kimi bir ananın xeyir-duasını almışdı körpəlikdən. Başucalığı gətirdi öz ardıcıl çalışmasıyla, mübarək əməlləri ilə ana vətənimiz Azərbaycanımıza. Onu tanıyanlara, sevənlərə, hörmət bəsləyənlərə nümunə oldu. İnsanlıq nə olduğunu şəxsində öz xarakteri və təbiəti ilə elm dünyamızın nümayəndələrinə örnək hərəkətləri və rəftarı ilə göstərə bildi. Çünki əqidəsi saf, məsləki pak, məramı munis, xəyalları ülvi idi Babək Osmanoğlumuzun.

Babək Qurbanov və Ayhan Kılınç

Haqq dünyasına qovuşmadan öncə bilərdimi ki, Azərbaycan xalqı Qarabağ zəfərini qazanacaq? Ağlasığmaz bir xəstəlik - "Kovid" bu dünyamızı işğal edəcək? Əfsanələrdə olmayan hadisələr gerçək oldu. Birincisinə sevindik, Qarabağımız işğaldan azad olundu qəhrəman Baş Komandanımızın əmri ilə igid əsgərlərimizin, qazilərimizin mübarizliyi sayəsində. Neçə min şəhidimizin qanı-canı ilə xilas oldu Azərbaycanımız. Kaş bu qələbəni görəydi Babək müəllim. Çox arzu edirdi Qarabağımızın zəfərini, Azərbaycan və Türk dostluğunun dünyaya hayqıran çoşğusunu....

Bu il martın 27-dən 28-nə keçən gecədə yuxuma gəldi əzizimiz Babək müəllim. Sərsəm ayılıb xəyala daldım ki, bu gün Haqqın rəhmətinə qovuşduğu gündür. Nə etməliyəm? - deyə düşündüm, xəyala daldım. Nəhayət tapdığıma sevindim. Bu gün xor dərsindən viza imtahanı idi. Düşündüm ki, onsuz da bir aydır Türkiyəmizin "İstiqlal marşı"nın dirijorluğunun sirrlərini öyrətmişəm. Öncə tələbələri bir dəqiqəlik sayqı duruşuna qaldıraram və ardından mənim şefliyimlə birlikdə xor halında oxuyub imtahana başlayaram. Planım yerinə düşdü. Tələsik konservatoriyada keçmiş fotoqrafçımız Babək müəllimin etibarlı dostu Ayhan Kılıça fikrimi bəyan etdim.

Babək Qurbanov, Hakan Tatyüz və İlqar İmamverdiyev

Və bir videogörüntü çəkməsini xahiş etdim. 10:30-da imtahan üçün dərsə girdiyimdə məramımı tələbələrimə də bildirdim. Hər kəs gözləmədiyi bu təklifimi qeyd-şərtsiz qəbul etdi. Babək müəllimi anmaq - ruhunu şad etmək üçün əl işarətimlə hər bir tələbə eyni anda ayağa qalxdı. Bir dəqiqəlik sükunətdən sonra pianoda "Sol" və "Do" səslərini vurub məqama keçdim. Xor halında hamı birlikdə dirijorluq edə-edə oxudum və Ayhan bəy də kameraya aldı. Babək müəllimin anım gününü təqdim etdiyim bu görüntü ilə dəyərli vətən övladlarımıza çatdırıram.

Babək müəllimin anım günü tədbirləri Gaziantep konservatoriyasının müəllim və tələbələrinin birlikdə hazırladıqları daha iki konsertlə gerçəkləşməsi mənim üçün sürpriz oldu. 30 mart 2022-ci il tarixində keçmiş müdirimiz - Sənətşünaslıq namizədi Hakan Tatyüzün (Hakan Bəyin elmi rəhbəri Babək Qurbanov idi) Gaziantep Universiteti, Atatürk Kültür Mərkəzində təşkil etdiyi "Məzuniyyət törəni" adlı konsertin bir məqamında Babək müəllimin rəsminin orkestr və xor üzvlərinin arxasından yansıtılması səmimiyyətimlə etiraf etməliyəm ki məni çox həyəcanlandırdı.

Babək müəllimin 3-cü anım günü bu il mayın 13-də yenə Qaziantep Atatürk Kültür Mərkəzində oldu və bunu oxucularımızla paylaşmaq istərdim. Professor Əfqan Zəki Salehin tələbələri ilə birlikdə Fəxri Çepik bəyin yardımı və müdirimiz dos. dr. Zinnur Gərəyin təşkilatçılığı ilə düzənlədiyi "Hasat Zamanı" adlı konsert Babək Osmanoğluna vəfa borcunun daha bir rəmzi oldu. Bu konsertdə diqqətimi çəkən Babək Qurbanovun "Xatirə" və "Şəhidlər" adlı iki əsərinin skripka və fortepianoda səsləndirilməklə bərabər həm də rəsminin titrdə yansıdılması idi.

Oxucularımıza bir məsələni açıqlamaq istərdim ki, professor Əfqan Zəki Saleh 2016-cı ilin 19 dekabrında Babək Qurbanovun "Şəhidlər" adlı duyğusal ruhlu əsərini Qaziantep Universiteti "Mavera Kültür Mərkəzi"nin möhtəşəm səhnəsində Babək müəllimin bir tamaşaçı kimi iştirak etməsi zamanı səsləndirib. Bu uğurlu çalğıya heyran olduğunu söhbətimiz sırasında Babək müəllim etiraf etmişdi. Əfqan müəllimin bu diqqəti Babək Qurbanovun bəstəkarlıq - musiqişünaslıq sənətinə olan xüsusi hörmətin əlaməti idi ki, hətta əsərlərinin kitab halında yayınlanması prosesində notların redaktorluğunu da öz öhdəsinə götürmüşdü.

Daha sonra 14 mart 2021-ci il tarixində Tibçilər günündə "Şəhidlər" adlı əsərini bir daha səsləndirməsi Əfqan müəllimin qəlbində Babək Qurbanov adlı şəxsiyyətin-elm xadiminin mənəvi ruhunun yaşadılmasının isbatı idi.

9 iyun gələndə Babək müəllimin ad gününü Qaziantep Konservatoriyasında hər zaman ümumi katibimiz Aysel Bayrakdar - Akyılmaz başda olmaqla tort kəsib şam yandırmaqla keçirərdik. Təhsil üzrə müşavirimiz dosent Nəcibə xanım Nəsibova da Böyük Elçiliyimizdən təmsili olaraq üzərinə xoş sözlər yazılmış gül dəstəsi göndərərdi əzizimiz Babək Qurbanovun bu əlamətdar gününə.

Təəssüf ki o mübarək günlər bir daha geri dönməz. Geri dönsə də, Babək müəllim adlı ustadım bir daha geri gəlməz. Çünki Haqq dərgahında, uca məqamdadır.

Ruhun şad olsun Babək müəllim! Necə ki varam, yaşayacaqsan qəlbimdə, atam Cəmil Əkbər kimi. Məkanın cənnət olsun, insanlığın parlaq siması!

İlqar CƏMİLOĞLU İMAMVERDİYEV

Sənətşünaslıq elmləri doktoru, professor, Bakı Musiqi Akademiyasının və Qaziantep Universiteti Türk Musiqisi Dövlət Konservatoriyasının müəllimi

525-ci qəzet.- 2022.- 9 iyun.- S.15.