"Könlüm keçir Qarabağdan": qürurla hüznün vəhdəti

"ŞUŞA İLİ"NƏ HƏSR OLUNMUŞ RESPUBLİKA İNCƏSƏNƏT FESTİVAL-MÜSABİQƏSİNİN YEKUN TƏDBİRİNDƏ UNUDULMAZ ANLAR YAŞANDI

Məlum olduğu kimi, iyunun 1-də məktəblilər arasında "Şuşa İli"nə həsr olunmuş "Könlüm keçir Qarabağdan" adlı respublika incəsənət festival-müsabiqəsinin yekun konserti keçirildi.

Uşaqların Beynəlxalq Müdafiəsi Gününə təsadüf edən festival-müsabiqənin yekun konserti Şuşa şəhərinin işğaldan azad edilməsindən sonra orada keçirilən ilk respublika uşaq tədbiri oldu.

Tədbir Təhsil Nazirliyinin təşkilatçılığı, Mədəniyyət Nazirliyinin və Şuşa Dövlət Qoruğu İdarəsinin tərəfdaşlığı ilə Şuşa Real Məktəbinin qarşısında təşkil olunmuşdu. Tədbirdə Prezident Administrasiyasının Humanitar siyasət, diaspor, multikulturalizm və dini məsələlər şöbəsinin müdiri Fərəh Əliyeva, mədəniyyət nazirinin müavini Sevda Məmmədəliyeva və digər dövlət rəsmiləri, tanınmış mədəniyyət və incəsənət xadimləri, şəhid övladları, festival müsabiqənin qalibləri iştirak edirdilər.

Təhsil naziri Emin Əmrullayev tədbirin Şuşada təşkilinin qürurverici olduğunu qeyd edib. Şəhidlərimizin xatirəsini yad edən, qazilərimizə Allahdan şəfa diləyən təhsil naziri Müzəffər Ali Baş Komandan İlham Əliyevin müdrik siyasəti və Şanlı Ordumuzun qələbəsi sayəsində bu gün gələcəyimiz olan uşaqların azad Şuşada bayramı qeyd etməsini xüsusi vurğulayıb. Nazir çıxışının sonunda bütün uşaqları 1 İyun - Uşaqların Beynəlxalq Müdafiəsi Günü münasibətilə təbrik edib.

Ailə, Qadın və Uşaq Problemləri üzrə Dövlət Komitəsinin sədri Bahar Muradova əvvəlcə 1 İyun - Uşaqların Beynəlxalq Müdafiəsi Günü münasibətilə bütün uşaqları təbrik edib. Hər bir vətəndaş üçün dövlət və onun mənafeyinin öndə gəldiyini qeyd edən komitə sədri müsabiqənin gənclərimizin vətənpərvər ruhda yetişməsində oynadığı roldan danışıb.

Konsert proqramında 150-yə yaxın məktəbli çıxış edib, şagirdlərin ifasında vətənpərvərlik mövzusunda şeir və mahnılar səsləndirilib, ədəbi-bədii kompozisiyalar nümayiş olunub. Tədbirin sərgi hissəsində müsabiqə qaliblərinin rəsm və əl işlərinə baxış keçirilib.

Qeyd edək ki, "Şuşa İli"nə həsr olunmuş festival-müsabiqəyə respublikada fəaliyyət göstərən ümumtəhsil məktəbləri, lisey və gimnaziyaların (incəsənət yönümlü ümumtəhsil müəssisələri istisna olmaqla) istedadlı şagirdləri arasında iki yaş qrupunda (11-14 yaş və 15-17 yaş) 4 nominasiya - ifa, rəqs, dram sənəti, təsviri incəsənət və dekorativ tətbiqi-sənət üzrə keçirilən müsabiqəyə ümumilikdə 10 mindən çox istedadlı şagird qatılıb. Müsabiqənin təşkilində məqsəd uşaq və gəncləri Qarabağın Azərbaycan mədəniyyəti, tarixindəki yeri, işğal illəri və işğaldan sonrakı dövrü ilə tanış etmək, uşaqları milli-mənəvi dəyərlərimizə və adət-ənənələrimizə hörmət ruhunda tərbiyə etmək, onların bədii-estetik səviyyəsini yüksəltmək olub. Həmçinin, incəsənət və mədəniyyətin ayrı-ayrı növləri üzrə istedadları üzə çıxarmaq və yaradıcılıq qabiliyyətlərini inkişaf etdirmək, təhsilalanları vətənpərvərlik, torpağa, dövlət rəmzlərinə, tariximizə hörmət ruhunda tərbiyə etmək, məktəblilərin asudə vaxtlarını təmin etmək məqsədlər sırasındadır.

Bu mötəbər tədbirdə iştirak edən şəhid övladları arasında Şuşa fatehi, şəhid mayor Emin Süleymanovun yadigarları Bəhmən və Emilya Süleymanovlar da vardı. 15 yaşlı Bəhmən və 14 yaşlı Emilya ilk dəfə idi ki, atalarının şəhid olduğu torpağa-Şuşaya ayaq basırdılar. Bu, onlar üçün nə qədər qürurverici olsa da, atalarının yoxluğunun hüznü gözlərindən bir an da olsun çəkilməyib. Belə bir müqəddəs səfərdən dönən məktəblilərlə görüşüb Şuşa səfərinin, bu möhtəşəm tədbirin yaddaşlarındakı və duyğularındakı izindən söhbət açdıq. Bəhmən danışır:

"Şuşa mənim atamın şəhadətə ucaldığı yerdir. O, noyabrın 9-da, qələbəyə sadəcə saatlar qalmış Şuşa uğrunda gedən döyüşlər nəticəsində şəhid olub. Əlbəttə, bir övlad üçün atasını itirmək ən ağır duyğulardan biridir. Ancaq biz bu kədərlə, hüznlə bərabər, həm də hər zaman atamızla fəxr edib, qürur duymuşuq. Çünki bizim atamız məhz torpaqlarımız uğrunda, 30 illik Qarabağ həsrətimiz uğrunda canından keçib. O, hər zaman vətənini, millətini, Qarabağı düşünən bir zabit olub və bizə də hələ uşaq yaşlarımızdan bu sevgini, bu hissləri aşılayıb.

Şuşaya gedərkən də içimdə nə qədər ata həsrəti, onun yoxluğunun qəlbimdəki hüznü olsa da, həm də qürurluydum. Çünki bu gün əgər mən və mənim kimi yüzlərlə, minlərlə azərbaycanlı Şuşaya gedə bilirsə, orda əzəmətli himnimiz səslənir, şanlı bayrağımız dalğalanırsa, bütün bunlar atam mayor Emin Süleymanov və onun kimi üç minə yaxın şəhidimizin, minlərlə qazi və müharibə iştirakçılarımızın sayəsindədir. Mənim atam da məhz bu uğurda canından keçdi.

Şuşa haqqında çox eşitmişdim, oxumuşdum, şəkillərdə, videolarda görmüşdüm. Amma onun bu qədər möhtəşəm, bu qədər gözəl ola biləcəyini düşünməzdim. Şuşa, doğrudan da, həm havası, həm mənzərəsi, həm də coğrafi mövqeyiylə bənzərsiz şəhərdir.

Bu ecazkar şəhərə uşaqlığımızdan bəri bizə Şuşa haqqında danışan atamla getməyi daha çox istərdim, əlbəttə. Əminəm ki, atamla bu səfərimiz çox gözəl və unudulmaz olardı. Heyf ki, qismət olmadı.

Biz Şuşaya mayın 31-də getdik. Elə həmin gün axşam şəhəri gəzməyə çıxdıq. Xan qızı Natəvanın evi və bulağı, Bülbülün ev muzeyi, Vaqifin məqbərəsi, Şuşa qalası və sair kimi tarixi tikililərlə yanaşı, Şuşanın qədimi küçələri, bir zamanlar soydaşlarımızın yaşadığı, sonra isə düşmən tərəfindən dağıdılmış binalar, evlər, tikililər insanı sanki zamanda səyahətə səsləyir.

Biz orda bir musiqi məktəbi gördük, tamam dağılmışdı, uçuq-sökük divarları qalmışdı. İçində bir neçə piano da vardı. Ondan başa düşülürdü ki, bura nə vaxtsa musiqi məktəbi olub. Onu görəndə bir az da düşmənə nifrətim artdı. Onlar təkcə insana, ölkəyə deyil, daşa, torpağa, mədəniyyətə, musiqiyə də qənim kəsiliblər.

Şuşanın havasından da danışa bilərəm. Bu, sanki bir möcüzə idi. Cıdır düzünün tərtəmiz havasında insanın ciyərləri oksigenlə dolur. Mən hələ bu qədər təmiz hava ilə nəfəs almamışdım. Cıdır düzü çox gözəldir. Hər tərəfdən meşələrlə əhatələnmiş qayalıqlar sanki əzəmət simvoludur. Biləndə ki, bizim şəhidlərimiz, hərbçilərimiz məhz bu qayalardan dırmaşaraq min bir zəhmətlə Şuşanı əsirlikdən xilas ediblər qürurlanmamaq mümkün deyil.

Biz həm də gördük ki, Şuşanın az qala hər yerində təmir, yenidənquruculuq işləri gedir. Dağıdılmış binaların bərpası həyata keçirilir. Bəzi binaların üstündə şəhidlərimizin, Şuşa uğrunda döyüşmüş hərbçilərimizin adları vardı. Biz də şəhid övladları olaraq öz atalarımızın adını yazdıq həmin divarların üstünə. Bu gün atalarımız oraya gedə bilməsələr də, biz onların davamçıları olaraq onların varlıqlarını, adlarını Şuşaya apardıq".

Şəhid mayorumuzun qızı Emilya da Şuşadan kövrək və unudulmaz hisslərlə qayıdıb. O deyir: "Əgər biz əvvəllər atamızın yoxluğuna daha çox üzülür və heyfslənirdiksə, indi onun hansı amal uğrunda özünü fəda etdiyini görüb daha çox qürurlandıq, mayor Emin Süleymanovun övladları olduğumuz üçün fəxr elədik. Sanki indi daha çox anlayırıq ki, bizim atamız hədər yerə canından olmadı. Biz səbəbsiz yerə atasız qalmadıq. Bu sayədə bizim vətənimiz, torpağımız azad olundu".

Qəhrəman şəhidimizin yadigarları bu səfərdən özləriylə Şuşa torpağı da gətiriblər. Deyirlər ki, atalarının şəhid olduğu torpağı həm özlərində saxlayacaq, həm də onun məzarına aparacaqlar.

Bəhmənin bir arzusu da böyüyəndən sonra Şuşada ev sahibi olmaq, orada yaşamaqdır.

Fikrimcə, tək qəhrəman şəhidlərimiz, hərbçilərimiz deyil, həm də onların məğrur ailələri, atasız qalan övladlarıdır. O övladlar ki, bu gün atasızlıq olmaqlarına rəğmən, torpağın azadlığına, xalqın qələbəsinə qürurlana, sevinə bilirlər. O övladlar ki, atalarının yoxluğu onların içərisində mərhəmət, vətən sevgisi, torpaq məhəbbəti, xalq təəssübü kimi duyğuları oyadıb və onlar bu gün qəhrəman atalarının adlarına layiq şəkildə başıdik, alnıaçıq yaşayır, şəhidlərinin adını yaşadırlar.

Bütün şəhidlərimizə Allahdan rəhmət diləyir, yadigarlarına uzun və sağlam ömür arzu edirik!

Şahanə MÜŞFİQ

525-ci qəzet.- 2022.- 18 iyun.- S.24.