Müqəddəs niyyətlərimiz gerçəkləşəcək

Milli adət-ənənələr zaman-zaman yaranır, formalaşır, yaşadılır. Yaşadılan adətlər də, ənənələr də milli mentalitetin tərkib hissələrindəndir. Bu adətlər, ənənələr müəyyən səviyyəli qadağalara baxmayaraq, sovetlər birliyində də yaşadılardı. Azərbaycanın dövlət müstəqilliyi bərpa edildikdən sonra minillik tarixdə formalaşan adətlər daha böyük sevgilərlə yaşadılır.

Eşitmişəm ki, Birinci Qarabağ müharibəsində də ilaxır çərşənbə, Novruz adətləri, Qurban bayramı kimi yaşarı adətlər sevgilərlə qeyd olunurdu. Bunlar ruhun bayramları idi, xalqın tarixə diktəsi idi, tarixin xalqa hesabatı idi...

Ermənistan Azərbaycanın ərazilərini işğal etdikdən sonra Şuşanın, Laçının, Kəlbəcərin, Ağdamın, Füzulinin, Cəbrayılın, Qubadlının, Zəngilanın əhalisi didərgin düşdü, Azərbaycanın müxtəlif rayonlarında, qaçqın şəhərciklərində məskunlaşdı. Şəraitsizlik onlara müqəddəs bayramları bayram kimi qeyd etməyə çətinlik yaratsa da, mane ola bilmədi. İnsanlarımız bayramlarını qeyd edirdi.

1994-cü ilin Novruz tonqalları daha böyük inamla qalandı. Ümummilli liderimiz, Azərbaycan Respublikasının ovaxtkı Prezidenti Heydər Əliyevin əmri ilə Horadiz əməliyyatı başladı, əməliyyat qələbə ilə başa çatdı, 20 kənd işğaldan azad edildi. Horadiz əməliyyatından sonra hər ilin mart ayında ordumuzun şəxsi heyəti qarşı tərəfə, zaman anlamında sabahkı döyüşlərə ön xəttə çatdıqları Novruz tonqallarının işığından baxırdılar. Bu, döyüş ruhunun, qələbə ruhunun tərpənişi idi.

2016-cı ilin aprelində ordumuz düşmənin irimiqyaslı hücumunun qarşısını qətiyyətlə aldı, əks-hücumla düşməni geri çəkilməyə məcbur etdi. Aprelin 1-dən 5-nə kimi 2000 hektardan çox ərazi işğaldan azad edildi. Bu, əməliyyatın hərbi nəticəsi idi. Mənəvi-psixoloji nəticəsi isə daha yüksək oldu. Ordumuzun şəxsi heyəti inandı və əmin oldu ki, ordumuz döyüşməyə qadirdir. 2017-ci ilin Novruz bayramında qalanan tonqallar o qədər gur, o qədər işıqlı idi ki! Əmin idik ki, Ali Baş Komandanın döyüş əmri ilə torpaqlarımızı işğaldan azad edəcək, təkcə dağlar başında deyil, işğaldan azad edilmiş kəndlərdə də Qələbə tonqalları qalanacaq.

Ermənistan BMT Təhlükəsizlik Şurasının qətnamələrinə məhəl qoymurdu, mövcud status-kvonu saxlamağa çalışırdı. Eyni zamanda, işğal etdiyi ərazilərdən də, dövlət sərhədlərindən də Azərbaycan ərazilərinə hücumlar edirdi. Yeni ərazilər işğal etmək niyyəti ilə 2020-ci il sentyabrın 27-də Ermənistanın silahlı birləşmələri Azərbaycanın ərazilərinə irimiqyaslı hücum etdi. Ordu hissələrimiz bu hücumun qarşısını qətiyyətlə aldı və Azərbaycan Respublikasının Prezidenti, Ali Baş Komandan İlham Əliyevin döyüş əmri ilə əks-hücuma keçdi. Bu əmr Vətən müharibəsi kimi davam etdirildi. Ordumuz qısa müddətdə düşmənin yaratdığı, yenilədiyi, formalaşdırdığı müdafiə sədlərini darmadağın etdi. Bu sıradan "Ohanyan səddi" də keçildi. İlkin mövqe qələbələri qazanıldı.

Vətən müharibəsində Azərbaycan Respublikasının Prezidenti cənab İlham Əliyev xalqa müraciətində deyirdi: "Dünyada heç bir qüvvə bizi haqq yolundan döndərə bilməz. Dünyada heç bir ölkə bizim iradəmizə təsir edə bilməz. Biz haqq yolundayıq. Biz qalib gəlirik. Biz zəfər çalırıq və biz öz torpaqlarımızı geri alacağıq, ərazi bütövlüyümüzü bərpa edəcəyik".

Noyabrın 8-də Şuşa işğaldan azad edildi. 2021-ci il martın 20-də Azərbaycan Republikasının Prezidenti Cənab İlham Əliyev, Birinci xanım Mehriban Əliyeva və qızları Leyla Əliyeva Şuşada Cıdır düzündə bayram tonqalı alovlandırdılar. Ölkə başçısı xalqa müraciətində dedi: "Noyabrın 8-də Şuşanın azad olunması ilə bağlı müjdəni Azərbaycan xalqına verərkən demişdim ki, Şuşa, sən azadsan! Bu gün azad Şuşada biz öz milli bayramımızı - Novruz bayramını qeyd edirik. Şuşa 28 il əsarətdə idi. 28 il mənfur düşmən tərəfindən dağıdılırdı, məhv edilirdi. Şuşanın tarixi siması dağıntılara məruz qalırdı. Düşmən Şuşanı erməniləşdirmək istəyirdi. Şuşada Azərbaycan xalqının irsini silmək istəyirdi. Ancaq buna nail ola bilmədi. Bəli, Şuşa dağıntılara məruz qaldı, Şuşada tarixi abidələrimiz mənfur düşmən tərəfindən dağıdıldı. Ancaq Şuşa əyilmədi, sınmadı, öz ləyaqətini qorudu, Azərbaycanın milli ruhunu qorudu və bu gün Şuşada olarkən bir daha bunun canlı şahidi oluruq. Şuşa Azərbaycan xalqının ruhunu qoruya bildi və bizi gözləyirdi. Biz də gəlməli idik və gəlmişik. Ancaq gəlmək üçün güc toplamalı idik, gəlmək üçün hazırlıq işləri aparılmalı idi. Bütün istiqamətlər üzrə hazırlıq işləri aparılmalı idi və aparılırdı. Biz ölkəmizin inkişafını təmin etməli idik. Xalqımızın birliyini təmin etməli idik. Vətəndaş müharibəsindən çıxmış ölkə üçün, xalq üçün bu, o qədər də asan məsələ deyildi. Vətəndaş müharibəsindən sonra bu günə qədər ölkədə gedən proseslər xalqımızı vahid ideya uğrunda, vahid amal uğrunda, torpaqlarımızın azad edilməsi amalı uğrunda birləşdirdi. Biz bu milli birliyi, milli həmrəyliyi təmin edə bildik. Bu olmasa idi, bu Qələbə də olmayacaqdı..."

Vətən müharibəsində qazanılan Zəfərdən sonra ilk Novruz bayramında bu qüruru böyük könül xoşluğu ilə yaşadıq. Dünya ictimaiyyəti bir daha gördü ki, müzəffər Azərbaycan Ordusu torpaqlarını işğaldan azad etdi, onu qoruyur, xalqın min illərlə yaşatdığı adət-ənənələr bütün şəraitlərdə xalqın bu gününün də, sabahlarının da bayramıdır. Cıdır düzündə alovlanan tonqalın göylərə bülənd olan istisi qışdan yaza keçidin rəmzi sərhədini əvəzləyirdi. Zəfər də yazda qazanılmışdı. Bu gözəl analogiya ictimaiyyətə Azərbaycan Respublikasının Prezidenti cənab İlham Əliyevin Vətən müharibəsində dediyi bir fikri bir daha xatırlatdı: "Biz nəinki XXI əsrin müharibəsini nümayiş etdirmişik, biz dünyada heç vaxt olmayan Qələbəni qazanmışıq. Çətin relyef şəraitində düşmənin bir neçə istehkamının qarşısında biz peşəkarlıq, məharət, güc, hərbi elm qoyduq və düşməni torpaqlarımızdan qovduq".

Bu ilin Novruz tonqalları da bu amalla qalanacaq. Bütün tonqallar qalib Aqzərbaycan əsgərinin adına alovlanacaq. Builki tonqalların işığında səslənəcək dualar da Azərbaycan Ordusunun qüdrətinin dönməzliyini ifadə edəcək. Müqəddəslikdən bu dönməzliyin əbədiliyini arzulayacağıq. Bir də işğaldan azad edilmiş ərazilərimizdə quruculuq işlərinin ən qısa müddətdə başa çatacağını arzulayacağıq.

Novruz bayramı müqəddəs bayramdır. Min illərdir, bu bayramın cazibəsində milli mentalitetimizi qoruyuruq, yaşadırıq. Gələn ilin Ulu Novruzuna kimi xalqımızın bu niyyətinin, bu muradının gerçəkləşəcəyinə yerə-göyə inandığımız qədər inanırıq.

Novruz bayramı xoş niyyətlər bayramıdır. Xoş niyyətlərimizin bayramında əminliklə Məmməd Arazın misralarını xatırlayırıq:

Azərbaycan deyiləndə ayağa dur ki,

Hər daşından alov dilli ox ola bilər...

Azərbaycanın siyasi nüfuzunun, iqtisadi qüdrətinin artacağını arzulayırıq, bu ilin Novruz tonqalının dövrəsində də bu niyyətimizi dilə gətirəcəyik. Müqəddəs bayram müqəddəs niyyətimizin gerçəkləşəcəyinin zəmanəti olacaq...

Novruz bayramınız mübarək, Azərbaycanımızın vətəndaşları, Dünya azərbaycanlıları, Azərbaycanımızısevənlər!

Səbinə XASAYEVA

Milli Məclisin deputatı

525-ci qəzet.- 2022.- 18 mart.- S.8.