Vətən Müharibəsinin 22 oktyabr qəhrəmanları
Bu gün oktyabrın
22-si çox önəmli
hadisələrin ikinci
ildönümü, eyni
zamanda Azərbaycan Ordusunun bir sıra
qəhrəman hərbçilərinin
şəhid olduğu
gündür.
22 oktyabr 2020-ci il
Vətən müharibəmizin
26-cı günüdür. Şanlı qələbəmizə cəmi
18 gün qalıb.
"Dəmir yumruq"
əməliyyatının bu
günündə Azərbaycan
Ordusu Füzuli rayonunun Mollavəli, Yuxarı Rəfədinli, Aşağı Rəfədinli,
Cəbrayıl rayonunun
Sirik, Şıxlar, Məstalıbəyli, Dərzili,
Zəngilan rayonunun Kolluqışlaq, Malatkeşin,
Kənd Zəngilan, Genlik, Vəliqulubəyli, Qaradərə, Çöpədərə,
Tatar, Tiri, Əmirxanlı,
Qarqulu, Bartaz, Dəlləkli kəndlərini
və Ağbənd qəsəbəsini işğaldan
azad edib. Yenə də yüzlərlə ailənin vətən həsrəti dinib, 28 illik yurd ağrısı
sona yetib. Sandıqlardan 28 ildir ki, gözbəbəyi kimi qorunan paslı açarlar, qıfıllar
çıxarılıb, tozları
alınıb, ən yaxın zamanda aid olduğu qapıları açması üçün
hazırlanıb. Yenə əllər
Allahın dərgahına
açılıb "Ya
rəbbi, şükür"
duaları, bu qələbəni bizə
bəxş edən
Ali Baş Komandana və Azərbaycan Ordusuna salamatlıq arzuları ürəklərdən
qopub ünvanına tələsib.
Ancaq təəssüf
ki, bütün bu möhtəşəm qələbələr bu dəfə də itkisiz başa gəlməyib. Eyni gündə, eyni saatlarda başqa ailələrin ocağına
şəhid xəbərləri
od kimi
düşüb, qəlblərə
heç sönməyəcək
yanğı buraxıb.
Oktyabrın 22-də Azərbaycan
Ordusunun polkovniki Şükür Hədimov,
polkovnik-leytenant Ramiz Qasımov, kiçik gizirlər Xudayar Yusifzadə, Röyal Mədətov, əsgərlər
Nahid Teymurzadə, Tacir Muradlı və başqa igid döyüşçülərimiz
şəhidlik mərtəbəsinə
ucalıblar. Şəhadətlərinin
2-ci ilində bu yurd üçün, Azərbaycanın ərazi
bütövlüyü uğrunda
canını fəda etmiş bütün qəhrəmanlarımızı sonsuz ehtiram və minnətdarlıqla anırıq!
lll
Azərbaycanın Milli Qəhrəmanı,
Silahlı Qüvvələrinin
polkovniki, 2-ci Ordu Korpusunun Komandir müavini Şükür
Həmidov 2016-cı ilin
2-5 aprelində baş
verən Aprel döyüşlərində Cəbrayıl
rayonu istiqamətində
yerləşən "Lələtəpə"
strateji nöqtəsinin
alınması zamanı
xüsusilə fərqlənib,
buna görə də Azərbaycan Prezidenti İlham Əliyevin 20 aprel
2016-cı il tarixli Sərəncamına əsasən
Azərbaycanın Milli
Qəhrəmanı adına
layiq görülüb.
O, son 17 il ərzində sağlığında
bu ada layiq
görülən birinci
şəxs olmuşdu.
2016-cı
il mayın
10-da isə müdafiə
naziri Zakir Həsənovun əmrinə
əsasən Ş.Həmidova
vaxtından əvvəl
növbəti "polkovnik"
hərbi rütbəsi
verilib. Hərbi rütbə ona
mayın 10-da Lələtəpə
istiqamətində səngərdə
təqdim edilib.
O, 2018-ci il iyunun 26-da Azərbaycan Silahlı Qüvvələrinin 100 illiyi
münasibətilə təntənəli
hərbi parad zamanı Azərbaycan Ordusunun 2016-cı ilin aprelində Füzuli, Cəbrayıl və Tərtər rayonlarının
800 ha.-dan çox ərazisinin işğaldan
azad edilməsində xüsusi xidmətləri olan hərbi hissələrin və
2018-ci ilin mayında Naxçıvan MR ərazisində
10000 ha.-dan çox ərazinin işğaldan azad edilməsində fərqlənən Naxçıvan
Əlahiddə Ümumqoşun
Ordusunun hərbi hissələrin döyüş
bayraqlarının olduğu bayraq qrupunun rəhbəri olmuşdu.
2020-ci ilin sentyabrında
başlanan Vətən
müharibəsində 2-ci Ordu
Korpusunun Komandir müavini olan Şükür Həmidov,
cənub istiqamətində
aparılan döyüşləri
idarə edənlərdən
biri idi. Əvvəlcə o, Füzuli rayonu istiqamətində döyüşlərə
qatılmışdı. Cəbrayıl, Füzuli və Qubadlıda gedən döyüşlərdə
savaşıb, oktyabrın
22-də səhər radələrində
isə doğulduğu
və 18 yaşında
didərgin düşdüyü
Qubadlı rayonunun azadlığı uğrunda
gedən döyüşlərdə
şəhadətə yüksəlib.
Oktyabrın 22-də axşam saatlarında polkovnikin nəşi yaşadığı Sumqayıt
şəhərinə gətirilib. Oktyabrın
23-də II Fəxri xiyabanda
baş tutan vida mərasimində müdafiə naziri Zakir Həsənov, Azərbaycanın Milli Qəhrəmanı Mədət
Quliyev və Rövşən Əkbərov,
ictimaiyyət nümayəndələri
iştirak ediblər.
Şəhid Ş.Həmidovun şəxsi
əşyaları Milli
Azərbaycan Tarixi Muzeyinin Vətən müharibəsi fonduna şəhidin qohumu, muzeyin əməkdaşı
Zümrüd İsmayılova
vasitəsi ilə təhvil verilib.
lll
Azərbaycan Hərbi Hava Qüvvələrinin polkovnik-leytenantı,
USTA dərəcəli pilot, Vətən Müharibəsi
Qəhrəmanı Ramiz
Qasımov Vətən
müharibəsinin ilk saatlarında
"SPAYK" uzun mənzilli
raketlərilə silanlanan
"Mi-17" hücum vertolyotu
ilə cəbhənin
Tərtər-Madagiz-Talış istiqamətlərində Ermənistan
ordusunun strateji əhəmiyyətli hədəflərini
məhv edən birinci pilotlardan idi.
Hərbi
hədəflərin məhv
edilməsindən sonra
R.Qasımovun idarə
etdiyi "Mi-17" hücum
vertolyotu geri dönən zaman Tərtər rayonunun Azad Qaraqoyunlu istiqamətində
olan zaman Ermənistan Hərbi Hava Qüvvələrinin Hava Hücumundan Müdafiə Qoşunlarının
(HHM) bölmələri tərəfindən
vurulur. Ramiz Qasımov dərhal
bortda olan digər 2 nəfər heyət üzvünə vertolyotdan "atılma"
əmrini verir. Özü isə "Mi-17" hücum
vertolyotunun yaşayış
evlərinə düşməməsi
üçün boş
sahəyə tərəf
istiqamətləndirməyə başlayır. Nəticədə Ramiz Qasımov vertolyotla yaşayış
məntəqəsindən uzağa,
boş sahəyə istiqamətlənməyi bacarmışdı.
Özü son anda paraşütlə
vertolyotdan atılsa da, başından ağır zərbə almışdı. Koma vəziyyətində
25 gün qalandan sonra oktyabrın 22-də şəhid olub. II Şəhidlər xiyabanında dəfn olunub.
lll
Məlahətli səsiylə müharibənin
gülən üzü,
çağlayan nəğməsi
olan Dövlət
Sərhəd Xidmətinin
Sərhəd Qoşunlarının
kiçik giziri Xudayar Yusifzadə də məhz bu gün şəhadət
şərbətindən dadıb.
X.Yusifzadə 2016-2018-ci illərdə Dövlət
Təhlükəsizliyi Xidmətinin
"N" saylı hərbi
hissəsində müddətli
həqiqi hərbi xidmətdə olub. Hərbi xidmətini
başa vurduqdan sonra Dövlət Sərhəd Xidmətinin Sərhəd Qoşunlarının
sıralarında müddətdən
artıq həqiqi hərbi xidmət qulluqçusu olaraq xidmət edib. Kursdan keçdikdən sonra
"kiçik gizir"
hərbi rütbəsi
alıb.
2020-ci ilin Tovuz döyüşləri zamanı
general-mayor Polad Həşimovun
şəhid olmasından
sonra öz istəyi ilə Bərdə Rayon Hərbi Komissarlığına müraciət
edib.
Vətən müharibəsində əvvəlcə,
Füzuli rayonunda sərhəd məntəqəsində
xidmət edib. Daha sonra
isə müharibədə
döyüşərək xidmətinə davam edib. Murovdağın,
Füzulinin, Cəbrayılın
və Zəngilanın
azadlığı uğrunda
gedən döyüşlərdə
vuruşub. Xudayar Yusifzadə oktyabrın
22-də Zəngilan döyüşləri
zamanı rayonun Ağbənd qəsəbəsi
istiqamətində döyüş
tapşırığının yerinə yetirilməsi zamanı şəhid olub. Bərdə şəhərinin Şəhidlər xiyabanında
dəfn edilib.
lll
Azərbaycan Silahlı Qüvvələrinin
kiçik giziri Röyal Mədətov
2011-ci ildən etibarən
"gizir" hərbi
rütbəsində müddətdən
artıq həqiqi hərbi qulluqçu olaraq xidmət edirdi. 2016-cı ilin 2-5 aprelində baş verən Aprel döyüşlərində savaşıb
və yaralanıb.
O, Vətən müharibəsi
zamanı Cəbrayılın,
Hadrut qəsəbəsinin,
Füzulinin və Qubadlının azadlığı
uğrunda gedən döyüşlərdə savaşıb.
Röyal
Mədətov oktyabrın
22-də Qubadlı döyüşləri
zamanı şəhid
olub. Qazax rayonunun Hüseynbəyli
kəndində dəfn
edilib.
lll
Əsgər Nahid Teymurzadə Vətən müharibəsinə könüllü şəkildə qoşulan qəhrəman oğullarımızdan biri idi. O, Cəbrayıl və Kəlbəcər rayonları istiqamətində gedən döyüşlərdə şücaət göstərib, düşmən hücumunun qarşısını alarkən qəhrəmancasına həlak olub. İgid şəhidimiz oktyabrın 22-də Biləsuvar rayonu Günəşli kənd məzarlığında dəfn olunub.
lll
2-ci Ordu Korpusunun Komandir müavini Şükür Həmidovun şəxsi mühafizə heyətinin üzvü olan əsgər Tacir Muradlı da Vətən müharibəsində bir sıra ərazilərimizin alınmasında xüsusi şücaət göstərmiş cəsur igidlərimizdən biridir. O, 26 gün boyunca Cəbrayılın, Füzulinin və Qubadlının azadlığı uğrunda gedən döyüşlərdə savaşıb. Tacir Muradlı oktyabrın 22-də Qubadlı döyüşləri zamanı şəhid olub. Beyləqan rayonunda dəfn edilib.
lll
Adlarını çəkdiyimiz, çəkmədiyimiz bütün müharibə qəhrəmanlarımız təkcə bu gün deyil, hər gün, hər an xalqımızın ürəyində ən uca yerdədirlər. Onların bu vətən, bu millət üçün etdikləri fədakarlıq qarşısında bütün sözlər, bütün mükafatlar, bütün təltiflər sönük qalsa da, dövlətimiz onları diqqətdən kənarda qoymayıb, hər biri şəhadətlərindən sonra müxtəlif medal və ordenlərlə təltif ediliblər.
Şanlı qələbəmizi borclu olduğumuz, bu xalqın alnındakı 30 illik
"məğlub" damğasını silən, qürurunu özünə qaytaran
şücaətli oğullarımızla fəxr edir, özümüzə və gələcək
nəsillərə şəhidlərimizin ruhlarına layiq insan və vətəndaş
olmağı diləyirik. Allah rəhmət
eləsin!
Şahanə MÜŞFİQ
525-ci qəzet.- 2022.- 22 oktyabr.- S.16.