Qalx Süleyman, yüzə sarı

Süleyman Qasımov-60

Adam var ki, haqqında

danışmaq çox asandı,

Adam da var, dünyası

zəngindi, asimandı...

Bəli, barəsində söhbət açmaq istədiyim İNSAN, doğrudan da o qədər daxili zənginliyə, geniş iç dünyasına, dərin fəlsəfi düşüncəyə malik bir şəxsiyyətdir ki, onunla tanışlığımızın-dostluğumuzun tarixi 30 il civarında olmasına, onu yaxından tanımağıma, halına, xasiyyətinə yaxşı bələd olmağıma baxmayaraq, yenə də Onun haqqında yazmaq o qədər də asan gəlmir mənə...

Yazımın qəhrəmanı, qədim Azərbaycan torpağı olan Ulu Borçalının Faxralı obasında doğulub, digər kənd uşaqları kimi təsərrüfat işlərində, həyətyanı torpaq sahəsində, hətta kolxoz həyatında valideynlərinə yardımçı olub. Bununla yanaşı, təhsildə də yaşıdlarını üstələyib, nəhayət ki, böyüyüb ərsəyə gələrək, təhsilini davam etdirmək üçün doğma yurddan Bakıya üz tutub. O, D.Bünyadzadə adına Azərbaycan Xalq Təsərrüfatı İnstitutuna (indiki ADİU) müvəffəq qiymətlərlə daxil olub, elə müvəffəq qiymətlərlə də bu ali təhsil ocağını başa vuraraq mühasib ixtisasına yiyələnib.

Onun əmək kitabçasında bəzi yerdəyişmələr olsa da, orada bir fəaliyyət sahəsinin qeydləri var-Azərbaycan Neft və Qaz sənayesinin qeydləri.

O, əmək fəaliyyətinə ilk olaraq indiki "Neft daşları" Neft və Qazçıxarma İdarəsində mühasib vəzifəsində işə başlamış və arada əsgəri xidmətlə bağlı müəyyən fasilədən sonra yenə doğma kollektivə qovuşaraq, az bir zaman kəsiyində əmək kollektivinin təşəbbüsü ilə İdarənin baş mühasibi vəzifəsinə qədər yüksəlmişdir.

Onun - Süleyman Mehralı oğlu Qasımovun əmək fəaliyyəti - navatorluğu tezliklə neft-qaz sənayesi sistemində bir örnəyə çevrilmiş, Onun bir hami kimi gənc mütəxəssislərin üzərlərinə düşən işi mənimsəmələrində, karyera pillələrində yüksəlmələrindəki müstəsna rolu rəhbərliyin nəzərini cəlb etmişdir.

Elə buna görə də, ötən əsrin 90-cı illərinin əvvəllərində O "Xəzərdəniznetqaz" İstehsalat birliyinin mərkəzi aparatına irəli çəkərək əvvəlcə baş mühasibin müavini, bir az sonra isə baş mühasib vəzifəsinə təyin edilmişdir.

Bir ara "Xəzərdənizneftqaz" və "Azneft" İstesalat Birllikləri birləşərək "Azərineft" Baş İdarəsi yaradılanda da o, baş mühasib, sonradan "Azərineft" Bİ yenidən iki yerə - "Dənizdə Neft və Qazçıxarma" və "Quruda Neft və Qazçıxarma" İB-inə bölündükdə, o, "peşəkar dənizçi" olaraq, "Dənizdə Neft və Qazçıxarma" İB-nin baş mühasibi vəzifəsini seçmiş, 2004-cü ildə Dövlət Neft Şirkətinin İqtisadiyyat və Uçot İdarəsinin rəis müavini, sonradan isə həmin İdarənin rəisi vəzifəsinə təyin olunmuşdur.

Süleyman Qasımov harada və hansı vəzifələrdə çalışmasından asılı olmayaraq, işinə böyük sevgi ilə yanaşmış, üzərinə düşən vəzifə öhdəliklərini layiqincə yerinə yetirməyə nail olmuşdur.

Elə bunun nəticəsidir ki, ölkə Prezidentinin müvafiq sərəncamı ilə O, 2006-cı ildən Dövlət Neft Şirkətinin-SOCAR-ın vitse-prezidenti kimi məsul bir vəzifədə çalışır.

Süleyman Qasımov təbiətən mülayim, həlim bir insan olaraq fikrini müsahibinə çatımlı şəkildə - təmkinlə çatdırmaqla yanaşı, həm də çox ciddi xarakterə malik bir adamdır. O, istər öz üzərinə düşən vəzifə öhdəliklərinin, istərsə də tabeliyində olan əməkdaşlara həvalə elədiyi tapşırıqların vaxtında və keyfiyyətlə yerinə yetirilməsində heç bir güzəştə yol verməyən bir rəhbərdir.

Süleyman Qasımov həm də tanınmış elm adamıdır. O, iqtisad elmləri doktoru, professor, pedaqoji fəaliyyətlə məşğul olan bir müəllimdir. O, bir neçə dərslik kitabının müəllifi və həmmüəlliflərindən biri, çoxsaylı elmi monaqrafiyaların və elmi məqalələrin müəllifi, bir çox elmi layihələrin təşəbbüskarı və gənc doktorantların elmi məsləhətçisi olmaqla, ölkəmizin İqtidad elminə töhfələr verən məhsuldar bir alimdir.

Süleyman müəllimin "biz"i, həmişə "mən"inin üzərindədir. O, ümumi mənafeyi, şəxsi mənafeyindən və vəzifə öhdəlikərini şəxsi işindən üstün tutan, mənəviyyatca güclü, fikrini istənilən kürsüdən şəffaf şəkildə ifadə etməkdən çəkinməyən, prinsipiallığı ilə seçilən ziyalımızdır.

Süleyman Qasımovun Respublikanın neft və qaz sənayesinin inkişafındakı xidmətləri, Azərbaycan Respublikasının Prezidenti Möhtərəm İlham Əliyevin müvafiq Sərəncamları ilə "Tərəqqi medalı" və "Şöhrət Ordeni" ilə dəyərləndirilmişdir

O, sadə, alicənab, nəzakətli, gözü-könlü tox, qismətinə şükürlü olan, humanist düşüncəli və əməlli bir Allah adamıdır.

Süleyman Mehralı oğlu yoldaşlığa sadiq, dostluğa sədaqətli, qonşuluğa layiq, qohumcanlı, həm də nümunəvi ailə başçısıdır. Öz adını daşıyan, kövrək addımlarını yenicə atmağa başlayan oğlu Mehrəlinin oğlu, nəvəsi - balaca Süleyman, onun gərgin iş saatlarından sonra yorğunluğunu şirin təbəssümü ilə bir anda çıxarmağı bacaran yeganə ilahi varlıqdır desəm, yəqin ki, yanılmaram.

"Faxralı" elinin yeni nəslisən,

"Qasımlı" nəslinin yetirməsisən.

Ulu Mehrəlinin nəticəsisən -

Ata Mehrəlidən bala Süleyman,

Süleyman nəvəsi, bala Süleyman...

(F.M.)

Süleyman müəllim həm də söz adamıdır.

Borçalı adamı olasan, şeirə, sözə meyilli olmayasan, bu, inandırıcı olmaz hər halda.

Elə cəmi borçalılar kimi, Süleyman müəllimin də mayası poeziya ilə yoğrulub. O, şeirsevər, şeirə-sözə həssas, bir çox şeirləri sinədəftər bilən ruh adamıdır.

Mövzusundan asılı olmayaraq kitab, Süleyman müəllimçün ən böyük kapitaldır. O, mütaliəni çox sevən, elə buna görə də söz bazası zəngin olan gözəl aratordur.

Hazırda cavanlığının qocalığını, qocalığının isə cavanlığını yaşamaqda olan, 2021-ci ilin 26 dekabr tarixində 60 illik yubileyini qeyd edən, otuz illik dostum-qardaşım Süleyman Mehralı oğlu Qasımova çoxminli neftçilər ordusu adından və şəxsən öz adımdan bolluca və gözü-könlü dolusu firavan həyat, nəticə və kötüycə görmək, məsuliyyətli və şərəfli işində davamlı uğurlar, elmi və pedaqoji fəaliyyətində isə ardıcıl nəaliyyətlər arzu edirəm.

Bu da altımış: - gəldi, çatdı,

Kövrək duyğular oyatdı.

Ömür ki, var, qatbaqatdı-

var baharı, duman-qarı,

Qalx Süleyman, yüzə sarı.

Nə görmüsən: - qənimətin,

Kitablardır zər-zinətin.

Əyilməsin heç qamətin -

sevdiyinlə qoşa qarı,

Qalx Süleyman, yüzə sarı.

Gözündə nur qaralmasın,

Rəngin-ruhun saralmasın.

Ruzin heç vaxt azalmasın -

zəmində bol sünbül-darı,

Qalx Süleyman, yüzə sarı.

Meydanlının arzusu bol,

Sənə daşsız-kəsəksiz yol.

Hər yaşında bax belə ol -

ömür payı, Allah barı,

Qalx Süleyman, yüzə sarı.

Fəxrəddin Meydanlı

525-ci qəzet.- 2022.- 6 yanvar.- S.11.