Ənənəvi rus geyimləri Bakıda sərgilənəcək

Rusiya Etnoqrafiya Muzeyi (REM) 2022-ci ilin payızında Bakıda rusların dekorativ tətbiqi sənət nümunələrinə dair geniş miqyaslı sərgi təqdim edəcək.

525.az Azərtac-a istinadən xəbər verir ki, bu barədə qurumun direktoru Yuliya Kupina məlumat verib. Qeyd edib ki, Rusiya Federasiyasının mədəniyyət müəssisələrinin iştirakı ilə hazırlanan layihə Azərbaycanın müstəqilliyinin 30-cu ildönümünə həsr olunmuş tədbirlər çərçivəsində keçiriləcək. "Biz Azərbaycan Milli Xalça Muzeyi ilə dostuq. Muzey rus xalqının mədəniyyətinə məxsus dekorativ tətbiqi sənət nümunələrini təqdim etmək niyyətindədir. Onları daha çox qadın gözəlliyini əks etdirən ənənəvi geyimlər maraqlandırır", - deyə Yuliya Kupina söyləyib.

Bildirib ki, proqram çərçivəsində Rusiya qurumlarının Azərbaycana səfəri Rusiya Federasiyasının Mədəniyyət Nazirliyinin dəstəyilə təşkil olunacaq. REM direktorunun qeyd etdiyi kimi, muzey Natalya Şabelskayanın XX əsrin əvvəllərinə aid geniş kolleksiyasının mühüm hissəsini Bakıda nümayiş etdirəcək.

Qeyd edək ki, Natalia Şabelskaya Rusiyanın bütün əyalətlərindən köhnə rus geyimləri, qədim naxış işləmələri, krujeva parçaları, əyirici çarxlar, qurabiyə hazırlamaq üçün taxta qəliblər, oyuncaqlar, arxeologiya nümunələrinin unikal kolleksiyalarını toplayıb. Şabelskayanın yaratdığı obyektlərin bir çoxunun fotoşəkil toplusu təkcə rus geyim tarixinin öyrənilməsi üçün unikal mənbə deyil, həm də rus fotoqrafiya tarixində müstəqil bir fenomen hesab olunur.

525-ci qəzet.- 2022.- 6 yanvar.- S.9.