Qan içində boğulan

Güney Azərbaycanım!

Dərd içində doğulan

Güney Azərbaycanım!

Bəxtiyardı hər gülü,

Dili - təmiz türk dili,

Səttarxanın öz eli,

Güney Azərbaycanım!

Vətən bölünməz axı!

Canım Savalan dağı,

Yurdumun cənnət bağı

Güney Azərbaycanım!

Can gərəkdi, can verək,

Qan gərəkdi, qan verək,

Azad ol - qurban verək,

Güney Azərbaycanım!

Təbriz, Qəzvin, Həmədan,

Mərənd, Meşkin, Xorasan...

Bayrağına can qurban

Güney Azərbaycanım!

Arazı yara-yara

Gələcəm, desən hara,

Baş əymə zalımlara,

Güney Azərbaycanım!

Babamdı Seyid Cəfər

Məğlub olma bu səfər,

Səni gözləyir zəfər,

Güney Azərbaycanım!

lll

Qəlbim dərd-qəm gölündə

Yelkənsiz qayıq oldu.

Qaldı zülmün əlində,

Yaxşı ki, ayıq oldu.

Dərdlərim çiçək açdı,

Tanrıya ürək açdı,

Üstünü külək açdı,

Qəlbimə soyuq oldu.

Söz ömrü - söz yaşı var,

Hər eşqin öz yaşı var.

Səsində göz yaşı var,

Hər tərəf duyuq oldu.

Ürəyim səni səslər,

İçində ağrı bəslər,

Allah sevdiyi kəslər

Əzaba "layiq" oldu.

Dərdi yolda haqladım,

Qapıları bağladım.

İçin-için ağladım,

Ürəyim oyuq oldu.

lll

Tanrıya umud könlüm,

Cəzan mübarək olsun!

Üsyanı sükut könlüm,

Qəzan mübarək olsun!

Qardan-sazaqdan gələn,

Qeybdən-yasaqdan gələn,

Səsi uzaqdan gələn

Azan mübarək olsun!

Mənə bu toy-düyünü,

Bu sədanı, bu ünü,

Belə bir ömrü-günü,

Yazan mübarək olsun!

Mən sənin qulun-kölən,

Hər gün eşqindən ölən...

Ömrümə vaxtsız gələn

Xəzan mübarək olsun!

Yolda qoyma gözümü,

Yox qəlbimin dözümü.

Dərdlərindən özünü

Asan mübarək olsun!

Bilməmişəm qədrini...

Bir də topla səbrini.

Əcəl çatır, qəbrimi

Qazan mübarək olsun!

lll

Mən səni sevdiyim gün,

Hicran da məni sevdi.

Məndən sonra gələnlər,

İndi hamısı evdi.

Fikrim qalıb yanında,

Ərşə çəkilib yuxum.

Həsrət bitib canımda,

Dəli olmaqdı qorxum.

Zülüm yaraşan kimi

Mənə ölüm yaraşır.

Səndən uzağam deyə

Ruhuma qəm daraşır.

Sən mənim göz yaşımsan,

Bu yük kürəyimdədir.

Nə qədər mən sağamsa,

Yerin ürəyimdədir.

lll

Bu da sən, bu da axır,

Gəl görüşək, İlahi.

Həsrət yandırıb-yaxır,

Gəl görüşək, İlahi.

Yolumdakı daşa bax,

Qabımdakı aşa bax,

Gözümdəki yaşa bax,

Gəl görüşək, İlahi.

Asi bilmə heç məni,

Yalvarıram, seç məni,

Günahımdan keç mənim,

Gəl görüşək, İlahi.

Umud oldum çoxuna,

Həsrətəm gül qoxuna,

Heç olmasa yuxuma

Gəl... görüşək, İlahi.

Özüm ola bilmirəm,

Bir dad ala bilmirəm,

Burda qala bilmirəm,

Gəl görüşək, İlahi.

Yolda qoyma gözümü,

Vermə səbri-dözümü,

Yerə salma sözümü,

Gəl görüşək, İlahi.

Şəmsi VƏFADAR

525-ci qəzet.- 2023.- 27 aprel.- S.15.