"Vyetnamda Azərbaycanın dəstəyini unutmurlar"

SƏFİR ŞÖVQİ MEHDİZADƏ: "MƏSAFƏ NƏ QƏDƏR UZAQ OLSA DA, ÖLKƏLƏRİMİZ ARASINDA QƏLBƏN BİR O QƏDƏR YAXINLIQ VAR"

Azərbaycanın Vyetnam Sosialist Respublikasındakı fövqəladə və səlahiyyətli səfiri Şövqi Mehdizadənin "525-ci qəzet"ə müsahibəsi

- Cənab səfir, Azərbaycanla Vyetnam arasında hələ sovetlər dönəmində sıx dostluq münasibətləri olub. Bundan çıxış edərək, hazırda iki ölkənin əlaqələri necə inkişaf edir?

- Azərbaycan-Vyetnam münasibətləri özünəməxsusluğu, tarixi kökləri ilə fərqlənir. Münasibətlərimizin əsası iki xalqın liderləri tərəfindən qoyulub. 1959-cu ildə Vyetnam Prezidenti Ho Şi Min Azərbaycanda səfərdə olub. Azərbaycanın Ümummilli lideri Heydər Əliyev respublikamıza rəhbərlik etdiyi dövrdə, eləcə də keçmiş SSRİ hökumətində rəhbər vəzifədə çalışarkən Vyetnamla münasibətlərin güclənməsinə, dostluq əlaqələrinin möhkəmlənməsinə xüsusi töhfələr verib, ikitərəfli tarixi münasibətlərin əsasını qoyub. Bu il Ulu öndərin anadan olmasının 100-cü ildönümüdür. Bu önəmli tarix Vyetnamda da xüsusi təmtəraqla qeyd edilir. Vyetnam dövlətinin rəsmilərinin, səfirliyin əməkdaşlarının, Bakıdan gələn yüksək səviyyəli rəsmi nümayəndə heyətinin iştirakı ilə keçirilən tədbirlərdə Ulu öndər ən xoş xatirələrlə yad edildi. Eyni zamanda, arxiv materialları, videogörüntülər nümayiş etdirildi. AMEA-nın Tarix institutu tərəfindən arxiv sənədləri əsasında hazırlanan kitab da bir daha onu göstərdi ki, Heydər Əliyev Vyetnamla əlaqələrin gücləndirilməsinə xüsusi önəm və dəstək verib, tarixi bir missiya həyata keçirib. Doğrudan da arxiv videolarına baxanda görürük ki, keçmiş SSRİ-nin digər rəhbərlərindən fərqli olaraq, Heydər Əliyevin uzunmüddətli səfəri təkcə formal görüşlərdən ibarət olmayıb, Ulu öndər bölgələrə də səfərlər edib, yerli insanlarla söhbətlər aparıb, özünün şəxsi təşəbbüsü ilə Vunqtau şəhərinə səfər edib, orda işləyən azərbaycanlı mütəxəsisslərlə görüşüb. Bütün bunlar Ulu öndərin Vyetnamla əlaqələrə necə əhəmiyyət verdiyinin göstəricisi idi. Belə bir fundament əsasında bu gün münasibətlərimiz inkişaf edir. Prezident İlham Əliyev də Vyetnamla əlaqələrə xüsusi əhəmiyyət verir. 2014-cü ildə dövlət başçısının Vyetnama ilk səfəri siyasi münasibətlərimizi yüksək səviyyəyə qaldırdı. Təsadüfi deyil ki, bir il sonra Vyetnam Prezidenti Azərbaycana səfər etdi. Bu qarşılıqlı səfərlər bugünkü münasibətlərimizin siyasi səviyyəsini müəyyən edib.

Hazırda bir çox sahələr üzrə münasibətlərimiz inkişaf etməkdədir. Neft-qaz sahəsi, mədəniyyət, humanitar, iqtisadi, turizm, kulinariya və bir sıra digər sahələri qeyd etmək olar. Ötən il əvvəlki ilə nisbətən ticarət dövriyyəsi bir neçə dəfə artıb. Düzdür, bu, əsasən neft ixracının hesabına olub, amma bu da mühüm bir göstəricidir. Biz hazırda neft-qaz sahəsində olan əməkdaşlığın başqa sahələri, xüsusilə nəqliyyat, turizm, iqtisadiyyatın digər sektorlarını əhatə etməsinə çalışırıq. Yaxın zamanlarda bununla bağlı yeni inkişaflar olacaq.

- Vaxtilə Azərbaycanda təhsil alan vyetnamlılar da iki xalqın dostluq münasibətlərinə öz töhfələrini verirlər. Bu gün ölkədəki yeni nəsil Azərbaycan barədə nə dərəcədə məlumatlıdır?

- Düzgün qeyd etdiniz, zamanında təxminən 5 min vyetnamlı tələbə Azərbaycanda təhsil alıb. Bu, böyük rəqəmdir. Hazırda öz ölkələrində müxtəlif vəzifələrdə çalışan həmin şəxslər hər zaman bildirirlər ki, Azərbaycan ikinci vətənimizdir. Biz Vyetnamda Azərbaycanda təhsil almış insanlarla birgə Novruz bayramını qeyd edirik. Çalışırıq ki, gənclərlə daha çox işləyək, onları layihələrimizə cəlb edək. Məsələn, artıq Vyetnam hökuməti tərəfindən yaradılmış Azərbaycan Vyetnam Dostluğu Cəmiyyətinə gənclər də qoşulub. Gənclər həmin cəmiyyətdə Azərbaycanla dostluğun güclənməsinə yönəlmiş ictimai fəaliyyətlə məşğul olmaq istəyirlər. Təhsil əlbəttə ki, burda xüsusi rol oynayacaq. Artıq ADA Universitetində ilk vyetnamlı gənclər təhsil almağa başlayıblar. Məqsədimiz təhsil sahəsindəki təcrübəni daha da gücləndirməkdir. Bu, eyni zamanda ikitərəfli münasibətlərin möhkəmlənməsinə öz töhfəsini verəcək.

- Azərbaycanlılar Vyetnamda təhsil alırlar?

- Xeyr, hələ ki, Vyetnamda təhsil alan azərbaycanlılar yoxdur. Lakin biz bununla bağlı təkliflərimizi hazırlamışıq. Vyetnamın çox yüksək reytinqlərə malik ali təhsil ocaqları var. Təklif etmişik ki, gənclərimiz orda təhsil almağa başlasınlar. Əfsuslar olsun ki, bu gün Azərbaycan-Vyetnam dili mütəxəssisi yoxdur. Tərcümələr ya ingilis, ya rus dili üzərindən edilir. Bununla bağlı da təkliflər irəli sürmüşük. Universitetlər arasında əməkdaşlıq, qarşılıqlı olaraq Azərbaycan və Vyetnam mərkəzlərinin yaradılması istiqamətində təşəbbüslər var. Əlaqələrin inkişafında ədəbiyyat da böyük rol oynaya bilər. Keçən ay Vyetnam Yazıçılar İttifaqında görüşümüz oldu. Onlara Azərbaycan Yazıçılar Birliyi ilə əməkdaşlıq təklif olunanda, çox sevindilər. Bizim tariximizi, kökümüzü, inkişaf mərhələlərimizi əks etdirən ən dəyərli kitabların Vyetnam dilinə tərcüməsi razılaşdırlıb. Bununla bağlı Yazıçılar Birliyinin katibi Çingiz Abdullayevlə görüşümüz olub. Vyetnam ədəbiyyatının nümunələrinin də Azərbaycan dilinə tərcümə olunmasında maraq var. İlkin olaraq, bir neçə kitabın tərcüməsi təklif edilib. Onların arasında Xalq yazıçısı Anarın "Dədə-Qorqud" əsəri də var. Bu, Azərbaycanın etnogenizini göstərən bir əsərdir və vyetnamlılar özləri bu əsərə maraq göstərirlər. "Əli və Nino" artıq tərcümə olunub. Digər əsərlərin tərcüməsi də nəzərdə tutulub.

- Siz ticarət dövriyyəsində artımı vurğuladınız. Amma iki ölkənin ticari-iqtisadi, həmçinin investisiya sahəsində əlaqələri arzuolunan səviyyədə deyil. Bu istiqamətdə inkişafa nail olmaq üçün hansı planlar var

- Əlbəttə, əldə olunan bugünkü nailiyyətlərin üzərində dayanmaq olmaz. Bu proseslər davam etdirilməlidir. Prioritet sahələrdən biri kimi turizmi vurğulamaq istərdim. Bu günlərdə Bakıda "Vyetnam günü" keçirildi. Bu ökənin aparıcı turizm şirkətinin rəhbəri, Kulinariya Federasiyasının prezidenti Azərbaycanda səfərdə oldu. Vyetnamda Azərbaycan mətbəxinə, turizminə çox böyük maraq var. Bu il Vyetnamdan 5-6 turist qrupu Azərbaycana səfər edib. Bu qruplar əsasən vaxtilə Bakıda təhsil almış şəxslər, onların ailə üzvləri, yaxın qohumlarından ibarət olub. Azərbaycana səfər etmək istəyi güclüdür. Onlar təhsil aldıqları universitetlərə, qaldıqları yataqxanalara baxmaq istəyirlər. Səfərdən sonra isə bildirdilər ki, Bakı çox müasir, çox təmiz bir şəhərdir. Eyni zamanda Azərbaycanın mətbəxini çox sevirlər və onu dünyanın ən gözəl mətbəxlərindən biri hesab edirlər. Çox istəyirlər ki, bizim mətbəximiz Veytnamda təmsil olunsun. Ona görə biz kulinariya mərkəzləri arasında görüş təşkil etdik. Kulinariya günlərinin keçirilməsi gözlənilir. Çalışacağıq ki, iş adamlarını əməkdaşlığa həvəsləndirək, milli mətbəxlərimizin təqdim olunduğu restoranlar açılsın. Bizim dolma, plov, Azərbaycana məxus kabab növlərini, milli mətbəximizin digər təamlarını tanısınlar. Vyetnamlılar tədbirlərimiz zamanı mətbəximizlə tanış olublar və çox bəyəniblər. Turizm səfərləri intensivləşsə, bu, biznes sahəsində də əlaqələrin artmasına təsir göstərəcək. Bu gün Azərbaycanın bir sıra iri istehsalçıları Vyetnama mal ixrac etməkdə maraqlıdırlar. Onlara dəstəyimizi veririk. Ümid edirik ki, yaxın zamanda bu cür layihələr həyata keçiriləcəkdir. Və əlbəttə ki, birbaşa reyslərin açılmasına çalışırıq. Birbaşa reyslərin açılmasında hazırda əsas problem ondan ibarətdir ki, COVİD-dən sonra aviaşirkətlər hələ də pandemiyadan əvvəl olan öhdəliklərini bərpa edirlər. Bərpa prosesi getdikcə, yeni xətlər də açıla biləcək. Vyetnam tərəfi çalışır ki, bu proses tez başa çatsın. Tələbat böyükdür, təkcə Azərbaycandan yox, bütün Şərqi Avropa ölkələrində Vyetnamın nüfuzlu bir diasporası var. Onların tələbatı var, MDB ölkələrindən turist axını var. Onların hamısının tranzit olaraq Azərbaycandan keçməsi mümkün ola bilər. Bu istiqamətdə danışıqlar gedir və yaxın zamanda bununla bağlı da yenilik olacağına ümidvarıq.

- Viza rejiminin aradan qaldırılması gözlənilir?

- Viza rejimi mövcuddur, amma bu, daha çox formal xarakter daşıyır. 3-5 gün ərzində onlayn qaydada viza verilir. Vyetnamda bizim vətəndaşlar üçün viza rejiminin ləğvi gündəlikdədir. Əgər formaldırsa, 3-5 gün gözləməyin də mənası yoxdur. Həm də təcrübə göstərir ki, nə azərbaycanlılar Vyetnama səfər etdikdə hansısa xoşagəlməz hərəkətlərə yol verir, nə də onlar tərəfindən belə hallar qeydə alınıb. Vyetnam vətəndaşları, xüsusən gəncləri hazırda dünyanın bir çox ölkələrinə intensiv səfərlər edirlər, onlar əksinə, gəlirlər öyrənirlər, dostluq əlaqələri qururlar, hansısa birgə layihələr həyata keçirirlər. Ona görə biz təklif etmişik ki, həvəsləndirici addım kimi vizalar aradan qaldırılsın.

- Daha geniş əməkdaşlıq, inkişaf üçün diplomatik korpusun olması da vacibdir. Vyetnamın Azərbaycanda səfirlik açmaq planı var?

- Vyetnam səfiri bu il fevral ayında etimadnaməsini Azərbaycan Prezidentinə təqdim etdi. Səfirliyin iqamətgahı Moskvada yerləşir. Əlbəttə ki, Bakıda təmsilçilik olarsa, daha çox kommunikasiyalar yarana, əməkdaşlıq imkanları müzakirə oluna bilər. Ümid edirik ki, yaxın zamanlarda artıq Vyetnamın Bakıda səfirliyi olacaq. Bu, ikitərəfli münasibətlərin daha da güclənməsinə öz töhfəsini mütləq verəcəkdir.

- Neft-qaz sahəsi ilə bağlı qeyd etdiniz, ümumiyyətlə bu istiqamətdə əməkdaşlıq imkanlarını necə dəyərləndirirsiniz?

- Bir daha vurğulayım ki, bu sahədə əməkdaşlığın əsası xalqlarımızın liderləri tərəfindən qoyulub. Ulu öndər Heydər Əliyev Azərbaycana rəhbərlik etdiyi dövrdə onun tapşırığı ilə bir çox mütəxəssislərimiz yeni yaranmış Vyetnam sovet neft şirkətinin fəaliyyətini inkişaf etdiriblər. İlk olaraq bizim mütəxəssislər orda iştirak edib. Vyetnamın neft-qaz sahəsini inkişaf etdirən əsas şirkətin ilk rəhbəri də azərbaycanlı - Cəlal Məmmədov olub. Neft Akademiyasında təxminən min nəfər vyetnamlı mütəxəssis təhsil alıb, hansı ki, bu gün müxtəlif səviyyələrdə vacib vəzifələr tuturlar. Bu potensial ölkələrimizi daha da yaxınlaşdırıb. Bu sahədə olan əməkdaşlıq həm Azərbaycanın Vyetnama neft ixracında özünü göstərir, eləcə də birgə layihələrin müzakirə olunması hazırda gündəlikdədir. May ayında "Petrovietnam" şirkətinin vitse-prezidentinin rəhbərlik etdiyi nümayəndə heyəti Azərbaycanda səfərdə oldu və bir sıra yüksək səviyyəli görüşlər keçirildi, yeni layihələr müzakirə olundu. Ümid edirik ki, yaxın vaxtlarda o layihələr barədə eşidəcəyik.

- Hazırda Azərbaycandan hansı məhsullar Vyetnama ixrac olunur?

- Bəzi qida məhsullarını Vyetnam marketlərində görmək olur. Məsələn, şokolad, nar şirələri, çay. Eyni zamanda nar şərablarını da çox bəyənirlər. Narın meyvə kimi ixracını istəyirlər, çünki Vyetnamda nar yoxdur. Onların da elə meyvələri var ki, əminəm, insanlarımız bəyənəcək. Nəqliyyat-logistika əlaqələrini bir qədər təkmilləşdirsək, bu, mümkün ola bilər. Yükdaşımalarda ən azı bir ay vaxt gedir. Operativ logistika sistemləri olsa, dəniz məhsullarını, kənd təsərrüfatı məhsullarını ixrac etmək olar. Vyetnam dünyada aparıcı kofe, qara istiot ixracatçılarından biridir. Bu sahədə fəaliyyəti sistemləşdirməyə çalışırıq. Göründüyü kimi, əməkdaşlıq üçün böyük potensial var, gündəliyimiz zəngindir, əminik ki, tezliklə artıq nəticələr əldə olunacq.

- Cənab səfir, İkinci Qarabağ müharibəsi, Azərbaycanın öz ərazi bütövlüyünü bərpa etməsi, hazırda davam edən proseslər barədə vyetnamlılar nə dərəcədə məlumatlıdırlar? Nəzərə alsaq ki, Vyetnam xalqı da uzun müddətli və ağır bir müharibə (ABŞ-la) aparıb, Azərbaycanda baş verənlərə münasibətləri necədir?

- Azərbaycan ərazisi uzun müddət işğal atında idi və biz bu problemin həlli ilə məşğul idik. Vyetnam üçün müharibədən sonra ölkənin bərpası, ərazilərin minalardan təmizlənməsi əsas məsələ idi. Səfirliyimiz açıldıqdan sonra bu istiqamətdə intensiv iş aparmağa başladıq. Eyni zamanda, Vyetnam Qoşulmama Hərəkatının fəal üzvlərindən biridir, onun yaradılmasında bilavasitə iştirak edib, bu çərçivədə də məlumat mübadiləsi həyata keçirilir. Sadə insanlar da əlbəttə ki, baş verənlər barədə məlumatlıdırlar. Xüsusilə Bakıda təhsil almış şəxslər birmənalı şəkildə Azərbaycana dəstək veriblər, onların bəyanatları da oldu. Qoşulmama Hərəkatının üzvü kimi Vyetnam çalışır, balanslaşdırılmış mövqe saxlasın, amma BMT çərçivəsində 2020-ci ildə aparılan müzakirələr zamanı Azərbaycana uyğun olan mövqeyi dəstəklədi. Son dövrlər biz arxiv materialları əsasında yeni məlumatlar ortaya çıxaranda, vyetnamlılar bir daha görürlər ki, Azərbaycan səmimi dostdur və iki xalqı tarixi bağlar birləşdirir.

- Yeri gəlmişkən, azad olunmuş Azərbaycan əraziləri kütləvi şəkildə minalanıb. Vyetnamın bu sahədə təcrübəsi, əməkdaşlıq imkanları barədə soruşmaq istərdim.

- Müharibədən sonra yaranmış vəziyyət, azad olunmuş ərazilərdə aparılan bərpa-quruculuq işləri, minalardan təmizləmə ilə bağlı qarşı tərəfi məlumatlandırır, əməkdaşlıq imkanlarını müzakirə edirik. Bu yaxınlarda Azərbaycanda keçirilən beynəlxalq konfransda Vyetnamın Mina Təmizləmə Agentliyinin rəhbəri də iştirak etdi. Mina problemi bu günə kimi Vyetnamda da ciddi problem olaraq qalır. Müharibənin 1975-ci ildə bitməsinə baxmayaraq, mina problemi mövcuddur. Onlara beynəlxalq təşkilatlar kömək edirlər. Vyetnamın özünün bu sahədə təcrübəsi çox zəngindir və biz bu məsələdə sıx əməkdaşlıq etməyi düşünürük.

- Azad olunmuş ərazilərin qurulmasında Vyetnam şirkətlərinin iştirakı gözlənilir? Ümumiyyətlə, bu ölkənin şirkətləri həmin ərazilərdə hansı sahələrdə öz töhfələrini verə bilərlər?

- Bir çox sahələrdə Vyetnam şirkətlərinin yaxşı təcrübəsi var. İnşaat, qida, kənd təsərrüfatı, rabitə və sair. Bununla bağlı səfirlik tərəfindən təkliflər hazırlanıb və onlara baxılmaqdadır. Həmçinin Vyetnamın müvafiq bölgələri ilə azad olunmuş şəhərlərimizin qardaşlaşması, birbaşa əməkdaşlığın qurulması gündəlikdədir.

- Cənab səfir, qarşıda nə kimi rəsmi səfərlər, yeni layihələr gözlənilir?

- Oktyabr ayında yüksək səviyyəli tədbir planlaşdırırıq. Ulu öndər SSRİ-nin rəhbərlərindən biri, eyni zamanda Vyetnam üzrə SSRİ-nin komissiyasına rəhbərlik etdiyi dövrdə ən mühüm və geniş nümayəndə heyətinə başçılıq edərək 1983-cü ilin oktyabr ayında Vyetnama çox vacib bir səfər etmişdi. O səfərin nəticələrinə əsasən Vyetnamın inkişafı ilə bağlı qərarlar qəbul olundu. Vyetnamlılar həmin səfəri indiyədək xatırlayır. Bu mövzuda çəkilən film də oktyabr ayında təqdim olunacaq. Tədbirə Azərbaycandan yüksək səviyyədə nümayəndə heyəti gələcək. Gündəlikdə olan məsələlərdən biri də bu il ikitərəfli komissiyanın iclasının keçirilməsidir. Komissiyanın gündəliyində vacib məsələlər var. Yəni iqtisadi sahədə əməkdaşlığın gücləndirilməsinə, ticarət dövriyyəsinin artırılmasına böyük töhfə verə biləcək gündəliyə sahibik. Digər layihələrimizdən biri də musiqi sahəsi ilə bağlıdır. Məlum olduğu kimi, SSRİ hökuməti müharibə vaxtı Vyetnama humanitar sahədə dəstək verib və bu çərçivədə Qara Qarayev məşhur "Vyetnam suitası"nı yazıb. Həmin əsəri yenidən canlandırmağı planlaşdırırıq. Suita Vyetnamda izləyicilərə təqdim olunacaq. Həmçinin 60-cı illərdə Vyetnam kino məktəbinin yaradılmasına böyük töhfə vermiş Əjdər İbrahimovla bağlı layihəmiz var. O, Vyetnamda yaşadığı üç il ərzində bu ölkədə kinematoqrafiya məktəbinin yaranmasında mühüm rol oynayıb. Vyetnamda yarıazərbaycanlı-yarı vyetnamlı olan çox istedadlı gəncimizlə tanış olduq. O, uşaqlıqdan Vyetnamda yaşadığı üçün bu dildə mahnılar oxuyur. Onun ifasında bizim Milli Musiqi Akademiyası ilə birgə Azərbaycan musiqi əsərləri Vyetnam dilində təqdim olunacaq. Bu sahədə potensialımız çox böyükdür. Vyetnamda musiqi sahəsində çox nüfuzlu insanlar var ki, onlar vaxtilə Azərbaycanda təhsil alıblar və musiqimizi çox sevirlər. Keçmiş tələbələrimiz indiyə kimi Azərbaycan dilində mahnılar oxuyurlar. Bu sahədə onlara mütləq dəstək veriləcək və birgə layihələrə təşəbbüs göstərəcəyik. Vyetnamlılar çox sadə, əməksevər millətdir, Azərbaycana böyük rəğbətləri var. Oktyabr ayında Azərbaycanda hüquq təhsili almış vyetnamlı məzunların ölkəmizə səfəri olacaq. Hazırda Vyetnam bütün ərəb ölkələrində təmsil olunur, amma zamanında onların ərəbşünas mütəxəssislərinin yetişdirilməsində bizim şərqşünaslıq fakültəsi böyük töhfə verib. Ən nüfuzlu şərqşünas mütəxəssisləri Bakı Dövlət Universitetində təhsil alıblar. Bunu onlar unutmurlar, həmişə qeyd edirlər. Səfirliyin keçirdiyi tədbirlərdə ilk ondan başlayırlar ki, biz Azərbaycanın dəstəyini heç vaxt unutmayacağıq. Bu, elə bir zamanda verilmiş dəstək idi ki, bizim üçün onun qiyməti yox idi. Bu gün Vyetnamın 100 milyon əhalisi var, ərazisi Azərbaycandan təxminən dörd dəfə böyükdür, 700 milyard dollardan çox ticarət dövriyyəsi var. Yəni dünyanın bütün ölkələri ilə ticarət aparır. Amma yenə də o dəstəyi unutmur, yada salır və çalışır ki, Azərbaycanla ticari-iqtisadi sahədə əməkdaşlığı gücləndirsin. Biz də bütün səylərimizi ona yönəldəcəyik ki, şirkətlərimiz arasında münasibətlər qurulsun, ixrac mallarımıza maraq göstərilsin. Turizm üzrə konkret layihələrə başlayacağıq. Məsafə nə qədər uzaq olsa da, ölkələrimiz arasında qəlbən bir o qədər yaxınlıq var. Həmçinin tariximizdə, mədəniyyətdə, kulinariyada oxşarlıqlarımız var. Onların mətbəxləri də maraqlıdır, əsasən dəniz məhsulları, düyü, toyuq, mal əti çox populyardır. Bütün dünyada çox məşhur olan fobo şorbaları var ki, çox istəyirlər Azərbaycanda da bu yemək tanınsın. Eyni zamanda biz də, elə onlar da istəyirlər ki, mətbəximiz orda təmsil olunsun, yeməklərimizi çox sevirlər. Vunqtau şəhərində böyük bir küçə Bakı adını daşıyır. Bu, Vyetnamın çox məşhur şəhərlərindən biridir, neft sənayesinin vətənidir. Planımız var ki, Bakı küçəsi ilə bağlı orda tədbirlər keçirək.

Gələn il də bizim üçün mühüm ildir. Bu il Ulu öndərin 100 illiyini qeyd etdik. Heydər Əliyev Fondunun ucqar kəndlərin birində inşa etdiyi məktəbdə də şagirdlərin iştirakı ilə tədbir keçirdik. Gələn il isə ikitərəfli münasibətlərin əsasının qoyulmasının 65-ci ildönümü tamam olur. Bu, ikitərəfli münasibətlərdə mühüm bir tarixdir və bu tarix yüksək səviyyədə qeyd ediləcək.

Pərvanə SULTANOVA

pervane525@mail.ru

525-ci qəzet.- 2023.- 12 avqust.- S.6-7.