"Ayrılmaz yollar"ın təqdimatı keçirilib

DÖRD FƏSİLDƏN İBARƏT KİTABDA BARAT VÜSALIN ƏDƏBİ DÜŞÜNCƏLƏRİNİ ƏKS ETDİRƏN YAZILARI TOPLANIB

"Qazax" Xeyriyyə İctimai Birliyinin təşkilatçılığı ilə Atatürk Mərkəzində şair, publisist, Azərbaycan Yazıçılar Birliyinin Qazax Bölməsinin sədri Barat Vüsalın "Ayrılmaz yollar" kitabının təqdimatı olub. Kitabda müəllifin müxtəlif ədəbi nəsillərə aid məqalələri, açıq məktublar, bir sıra xatirələr, bir çox kitablara yazdığı ön sözlər toplanıb. "Boxça çiçəyi", "Bir ocağın övladıyıq", "Bir qom bənövşə" və "Bir şamın kölgəsində" adlı fəsillərdən ibarət kitabın rəssamı "Qazax" Xeyriyyə İctimai Birliyinin üzvü Qafar Sarıvəllidir. Kitab "Qazax" Xeyriyyə İctimai Birliyinin üzvü Xəyyam Nəsibovun maliyyə dəstəyi ilə işıq üzü görüb.

Təqdimat mərasimində "Qazax" Xeyriyyə İctimai Birliyinin üzvləri - Xalq şairi Nəriman Həsənzadə, millət vəkilləri Səməd Seyidov, Nizami Cəfərov, Azərbaycan Mətbuat Şurasının sədri Rəşad Məcid, Azərbaycan Yazıçılar Birliyinin katibi İlqar Fəhmi, professor Rüstəm Kamal və bir sıra başqa qonaqlar iştirak ediblər. Tədbiri giriş sözü ilə "Qazax" Xeyriyyə İctimai Birliyi İdarə heyətinin sədri, professor İlham Pirməmmədov açaraq, Barat Vüsal yaradıcılığının özünəməxsusluğu barədə danışıb: "Barat Vüsal Qazaxdan Azərbaycan ədəbiyyatına, Azərbaycan poeziyasına xidmət edən görkəmli şairlərdən biridir. Özünəməxsus dəsti-xətti, özünəməxsus yaradıcılığı olan Barat Vüsalın əsərlərində Vətən, qələbə, azadlıq, azərbaycançılıq, türkçülük, keçmişi daim öz yaddaşında yaşatmaq, gələcəyə böyük umid, inam kimi mövzu və ideyalar öz əksini tapır"

Xalq şairi Nəriman Həsənzadə çıxışında bu fikirləri önə çəkib: "Barat şair idi. Bu kitabı oxudum, gördüm Barat filosofdur, tənqidçidir, ədəbiyyatşünasdır, alimdir, ictimai xadimdir. Həm şair, həm alim Baratı təbrik edirəm. Bu gün biz alim Baratın görüşünə gəlmişik".

Akademik Nizami Cəfərov görkəmli klassiklərin ideyalarında ümumi azərbaycançılıq, türkçülük ruhunu axtarıb tapmağı B.Vüsalın xidməti olaraq dəyərləndirib: "Rayonda yaşasa da, o, respublika miqyasında, hətta Türk dünyası miqyasında görünən bir şairdir. Onun ədəbi əcdadları ayrılan yollardan danışırdısa, Barat Vüsal ayrılmaz yollardan danışır. "Ayrılmaz yollar" kitabı çox dəyərli bir əsərdir. Hətta şairliyi qədər də Barata nüfuz gətirən bir yaradıcılıqdır".

Millət vəkili Səməd Seyidov bildirib ki, B.Vüsal unikal insandır: "Onun yaradıcılıq fəlsəfəsində böyüklüklə sadəlik birləşib. Barat müəllim bir dost kimi, insan kimi, şair kimi hər kəs tərəfindən yüksək qiymətləndirilir".

Mətbuat Şurasının sədri Rəşad Məcid həm vətənpərvərlik, həm ədəbi mövzuda tədbirlərin təşkilinə, həm də insanlara göstərdikləri diqqətə görə "Qazax" Xeyriyyə İctimai Birliyi İdarə Heyətinin sədri İlham Pirməmmədova təşəkkürünü bildirdikdən sonra B.Vüsalın yaradıcılığı haqqında fikirlərini bölüşüb: "Barat Vüsal yaradıcılığı xüsusi dəyərə malikdir. O, bölgə şairi yox, ölkə şairidir. Torpağa bağlı insandır. Zəngin biliyə malik, dərin düşüncəli qələm adamıdır".

Yazıçılar Birliyinin katibi İlqar Fəhmi, professor Rüstəm Kamal, Milli Məclisin Mədəniyyət komitəsinin eksperti Əkbər Qoşalı, həmçinin Vurğun Vəkilov, Xəyyam Nəsibov, Nəzakət Məmmədli, Aqşin Ağkəmərli və digər iştirakçılar da B.Vüsal haqqında, onun yeni kitabı barədə yüksək fikirlər söyləyiblər.

Tədbirdə aşıqlar B.Vüsalın yaradıcılığından nümunələr səsləndiriblər, tanınmış söz adamlarından Qiymət Məhərrəmli və İbrahim İlyaslı ona həsr etdikləri şeirlərini oxuyublar. Sonda çıxış edən Barat Vüsal tədbir iştirakçılarına və çıxışçılara təşəkkürünü bildirib, yubiley tədbirində əməyi olan insanlara, xüsusilə İ.Pirməmmədova minnətdarlıq edib.

525-ci qəzet.- 2023.- 28 dekabr,№236.-S.13.