Addım-addım gerçəkləşən Böyük Qayıdış amalı

PREZİDENT İLHAM ƏLİYEVİN VƏ BİRİNCİ XANIM MEHRİBAN ƏLİYEVANIN AZAD EDİLMİŞ BÖLGƏLƏRƏ SƏFƏRLƏRİ QURUCULUQ PROSESİNİ DAHA DA SÜRƏTLƏNDİRİR

Azərbaycanın işğaldan azad edilmiş ərazilərinə Böyük Qayıdış amalı ilə həyata keçirilən işlər, bu istiqamətdə atılan addımlar uğurla davam edir. Prezident İlham Əliyev və birinci xanım Mehriban Əliyeva dekabrın 20-də Xocavənd və Xocalı rayonlarına səfər ediblər. Səfər çərçivəsində Prezident və birinci xanım Xocavənd rayonunun Qırmızı Bazar qəsəbəsində, Şıx Dursun kəndində "Çinar müqəddəs yer" abidə kompleksində və Xocalı rayonunun Şuşakənd kəndində olublar. Öncə kənddəki "Çinar müqəddəs yer" abidə kompleksinə baxış keçiriblər.

Qeyd edək ki, Qırmızı Bazar qəsəbə inzibati ərazisi dairəsinə daxil olan Şıx Dursun kəndi 1992-ci il oktyabrın 2-də Ermənistan silahlı qüvvələri tərəfindən işğal olunub. Kənd 2023-cü il sentyabrın 19-20-də Azərbaycan Ordusunun Qarabağda həyata keçirdiyi lokal xarakterli antiterror tədbirləri nəticəsində separatçılardan təmizlənib. Kənddə 2500 ilə qədər yaşı olduğu təxmin edilən çinar nəinki Azərbaycanın, dünyanın ən yaşlı ağaclarından biri sayılır. Ağacın hündürlüyü 54 metr, gövdəsinin diametri 27 metrdir. Ağacın yaxınlığında onu su ilə təmin edən Tenqri bulağı yerləşir.

Prezident İlham Əliyev və birinci xanım Mehriban Əliyeva rayonun qədim Şuşakənd kəndinin ərazisinə də baxış keçiriblər.

Şuşakənd kəndi 1992-ci ildə ermənilər tərəfindən işğal olunub. Kənd 2023-cü il sentyabrın 19-20-də Azərbaycan Ordusunun Qarabağda həyata keçirdiyi lokal xarakterli antiterror tədbirlərindən sonra separatçılardan təmizlənib. Qədim tarixə malik kənddə bəzi tədqiqatlara görə, eramızın əvvəllərində Şimali Qafqaz çöllərində yaşamış türkdilli tayfalar məskunlaşıb. Kəndin ərazisi turizm və kənd təsərrüfatı potensialına malikdir.

Elə həmin gün İlham Əliyev Xocalı rayonunun Dağdağan kəndində də olub. Prezident kəndin ərazisinə baxış keçirib. Qarabağ dağ silsiləsinin ətəyində yerləşən Dağdağan kəndi 1992-ci ildə Ermənistan silahlı qüvvələri tərəfindən işğal edilib. Bu il sentyabrın 19-20-də Azərbaycan Ordusunun Qarabağda keçirdiyi antiterror tədbirləri nəticəsində kənd separatçılardan təmizlənib.

Prezident İlham Əliyev dekabrın 22-də Xocalı rayonunun Naxçıvanlı kəndində olub.

Dağətəyi ərazidə yerləşən bu kənd 1992-ci ildə Ermənistan silahlı qüvvələri tərəfindən işğal edilib. Bu il sentyabrın 19-20-də Azərbaycan Ordusunun Qarabağda keçirdiyi antiterror tədbirləri nəticəsində Naxçıvanlı kəndi separatçılardan təmizlənib.

Həmçinin Prezident dekabrın 22-də Xocalı rayonunun Pircamal kəndində olub. Pircamal kəndi dağətəyi ərazidə yerləşir. Kəndin adı keçmişdə burada mövcud olmuş Pircamal piri ilə bağlıdır. Tarixi mənbələrə görə, bu yaşayış məntəqəsini qədim Beyləqandan köçüb gəlmiş ailələr salıblar.

Kənd 1992-ci ildə Ermənistan silahlı qüvvələri tərəfindən işğal edilib. Bu il sentyabrın 19-20-də Azərbaycan Ordusunun Qarabağda keçirdiyi antiterror tədbirləri nəticəsində Pircamal kəndi separatçılardan təmizlənib.

İlham Əliyev dekabrın 22-də həmçinin Xocalı rayonunun Xanabad kəndində də olub. Dağətəyi ərazidə yerləşən Xanabad kəndi 1992-ci ildə Ermənistan silahlı qüvvələri tərəfindən işğal edilib. Bu il sentyabrın 19-20-də Azərbaycan Ordusunun Qarabağda keçirdiyi antiterror tədbirləri nəticəsində kənd separatçılardan təmizlənib.

Xanabad kəndi qədim yaşayış məskənlərindən biri kimi tanınır. 1990-cı ildə kənddə kooperativ zavodun tikintisi zamanı inşaatçılar tərəfindən qədim qəbir aşkar edilib. Həmin qəbirə baxış keçirilərkən insan cəsədindən əlavə, qədim döyüş və məişət əşyaları aşkarlanıb. Müvafiq təhlillərdən sonra bu əşyaların eramızdan əvvəl XII-XI əsrlərə aid olduğu müəyyən edilib.

Prezident dekabrın 22-də Xocalı rayonunun Pirlər kəndində də olub. Dağətəyi ərazidə yerləşən Pirlər kəndi 1993-cü ildə Ermənistan silahlı qüvvələri tərəfindən işğal edilib. Pirlər kəndi Azərbaycan Ordusunun cari il sentyabrın 19-20-də Qarabağda keçirdiyi antiterror tədbirləri nəticəsində separatçılardan təmizlənib. Bu yaşayış məntəqəsi kənd təsərrüfatı və turizm sahələrində böyük potensiala malikdir.

Milli Məclisin Aqrar siyasət komitəsinin sədri Tahir Rzayev bildirir ki, Azərbaycan torpaqlarını düşməndən azad etmək, xalqın rifahını yüksəltmək üçün əməli tədbirlər görmək, bütün qüvvələri ölkənin sosial-iqtisadi qüdrətinin yüksəldilməsinə yönəltmək, ölkəni beynəlxalq aləmdə tanıtmaq və söz sahibi etmək prezident seçildiyi ilk gündən cənab İlham Əliyevin həyat və fəaliyyət amalına çevrlib. Prezident fəaliyyəti dövründə bu vəzifələri şərəflə yerinə yetirməkdədir. İlham Əliyev tarixi Qələbədən sonra işğaldan azad edilən ərazilərin tez bir zamanda bərpa edilməsini qarşıya məqsəd qoyub və bu gün həmin ərazilərdə görülən möhtəşəm işlər - müasir yolların çəkilməsi, körpülərin salınması, tunellərin qazılması, beynəlxalq əhəmiyyətli təyyarə meydanlarının istifadəyə verilməsi, elektrik stansiyalarının quraşdırılması, yeni yaşayış, məktəb, səhiyyə binalarının tikilməsi, uşaq bağçalarının istifadəyə verilməsi, əhalinin doğma ata-baba torpaqlarına köçürülməsi ali məqsədlərin ardıcıl həyata keçirilməsinin ifadəsidir.

T.Rzayevin dediyinə görə, "işğaldan azad olunan əraziləri cənnətə çevirəcəyik" devizi bu gün hər bir azərbaycanlının ürəyindəndir və ölkə rəhbərinin xoşməramlı çağırışları xalqımız tərəfindən yüksək dəyərləndirilir. İnsanlarımız qələbələrimizlə qürur duyduqları kimi həyata keçirilən quruculuq, abadlıq, məskunlaşma işləri ilə də fəxr edirlər. Çünki ərazilərin bərpası, həmin torpaqların yararlı hala salınıb əkin dövriyyəsinə daxil edilməsi, dağıdılmış, viran edilən şəhər və kəndlərimizin canlandırılması iqtisadi inkişafımızın əsasıdır, dövlətimizin daha da qüdrətlənməsi deməkdir.

Millət vəkili deyib ki, Prezidentin işğaldan azad olunan ərazilərə tez-tez səfər etməsi, yeni tapşırıqlar verməsi və işlərin gedişini daim nəzarətdə saxlaması dövlətə, torpağa, xalqa məhəbbətin, verilən vədə sədaqətin nümunəsi olmaqla bərabər, vətənin ucaldılması, xalqın bir mübariz yaradıcı, sülhsevər kimi tanıdılmasıdır. Azərbaycan xalqı cəbhədə qazandığı qələbələri bu gün tikinti meydançalarında təkrarlayır və dünyaya sübut edir ki, təcavüz, qan tökmək, ev yıxmaq hünər deyil. Alilik, insanlıq, bacarıq, hünər, sülhü qorumaq, torpağı əkib-becərmək, insanlara həyat verməkdir. Bu ali dəyərlər Azərbaycan xalqına, dövlətimizin rəhbərinə xasdır. İnsanlığa, haqq-ədalətə arxalanmaq dövlətimizi ucaldır və bundan sonra da ucaldacaq.

Millət vəkili Elman Məmmədov deyir ki, işğaldan azad edilən ərazilərin dirçəlişi, bərpası və yenidən qurulması, Böyük Qayıdış proqramı üzrə tədbirlərin sürətlə həyata keçirilməsi, indi isə Xocalının da bərpasına və azərbaycanlı əhalinin ora geri dönüş imkanının yaranması böyük ruh yüksəkliyi doğurur: "Xocalı sakinləri Xocalıda yenidənqurma işlərinin yekunlaşmasını səbirsizliklə gözləyirik: "Azad olunan ərazilərin yenidən qurulduğu kimi artıq Xocavənddə, Xocalıda, Xankəndində və Ağdərədə bu proseslər həyata keçiriləcək. Şərait yarandıqda isə dövlət başçısının rəhbərliyi ilə öz doğma yurd-yuvamıza qayıdacağıq. Düşünürəm ki, bu qayıdış gec olmayacaq. Çünki Xocalı və Xankəndində yaşayış üçün kifayət qədər evlər var. Digər tərəfdən Azərbaycan Ordusu və polisi də Xocalı, Xankəndi, Xocavənd və Ağdərədədirlər. Yəni qayıdış üçün şərait yaradılmağa başlayıb".

Milli Məclisin deputatı Aydın Hüseynovun fikrincə, Prezident İlham Əliyevin işğaldan azad edilən ərazilərə səfərləri mütəmadi xarakter daşımaqla orada quruculuq, yenidənqurma işlərinin sürətlə aparılacağının təsdiqidir. Ölkə rəhbəri və birinci xanımın Xocavənd və Xocalı rayonlarına səfəri zamanı da yaşayış məntəqələrinin hazırkı durumu və mühüm obyektlərin inşasının gedişatı ilə yerində tanış olmaq məqsədi daşıyıb. İşğaldan azad edilən digər ərazilərimizdə olduğu kimi, bu rayonlarda da bərpa-quruculuq işlərinin miqyası genişlənməkdədir. Prezident Böyük Qayıdış proqramının uğurlu icrasından bəhs edərkən görülən işlərin sistemli xarakter almasından danışıb və qarşıya qoyulan bütün planların zamanında və yüksək səviyyədə həyata keçiriləcəyinə əmin olduğunu bildirib.

Millət vəkili vurğulayıb ki, vətəndaşlarımız Qarabağın və Şərqi Zəngəzurun yenidən qurulmasından böyük qürur hissi keçirir: "Prezidentin siyasi iradəsi, verdiyi vədlərlə əməllərinin vəhdəti belə deməyə əsas verir ki, çox keçməyəcək, işğaldan azad edilmiş torpaqlara həyat qayıdacaq, bu ərazilər yenidən çiçəklənəcək, bura təkcə ölkənin deyil, regionun ən inkişaf etmiş bölgələrindən birinə çevriləcək".

Sevinc QARAYEVA

525-ci qəzet .-2023.- 26 dekabr, №(234).- S.14.