Xoylu körpəyə

Siz tərəfə baxmaz oldu,

Gözü kor olsun dünyanın!

Yandım ası-kifir düşdüm,

Allah, məni qınayanın..!

Axşamları oynayardın

Yorğan-döşəyin üstündə,

Anan təzə yer açacaq

Qardan döşəyin üstündə.

Evlər dağılıb, tanınmır,

Uşaqlar məhlə axtarır.

Ac qarnına qurban, - gözün

Səhərdən təhnə axtarır.

Bəxtinə şairlik düşən

Belə şeir yazmaz, balam,

Üşüyən körpə əllərin

Hovxurarsan qızmaz, balam.

Sizin də dövlətiniz var,

Qayğı, keşiyiniz hanı?!

Bu sualdan ölər adam:

- Ana, pişiyimiz hanı?!

Bir gələn yoxdu, qapının

Zəngini yenə gəzirsən.

Öləndən kürrüy edirsən,

Hələ də nənə gəzirsən.

Atana de, pəncərəni

Çıxartsın uçqunun altdan.

Bir gün görərsən, doğmalar

Gəldilər, düşdülər atdan!

11.02.2023

İlham QƏHRƏMAN

525-ci qəzet.- 2023.- 16 fevral.- S.15.