Nələr çəkdi başın, türküm, Türkiyəm!

Önündən sürüşüb axdı torpaqlar,

Bir göz qırpımında uçdu yuvalar,

Qum tək səpələndi uca divarlar.

Əlləri əlindən qopan həyatlar

Ağrısıyla vidalaşdı "can" deyə.

Nələr gördü gözün, türküm,Türkiyəm!

Dön həyata, yaşa, yaşat, Türkiyəm!

Ayaqlar altında oynadı torpaq,

Ağac budağından qırıldı yarpaq,

Yer oynadı, silkələndi hər yataq.

Ana qucağından, ana canından

Ayrılıb, "enkaz"da yuxuya enən

Mələklərə aman, məsum körpələr...

Nələr gördü gözün, türküm... Türkiyəm!

Dön həyata, yaşa, yaşat, Türkiyəm!

Qaraymış o gecə, qaraymış o qar...

Fələkdən gəlirmiş bu tərs oyunlar.

Çarəsiz atalar, nalan analar,

Amansız saatlar, bitməyən anlar,

Yuxuda haqladı fəlakət, heyhat!

Bəlkə, gecə qiyaməti yaşadın,

Nələr gördü gözün, türküm,Türkiyəm!

Dön həyata, yaşa, yaşat, Türkiyəm!

Mərhəmətlə dolu könülləriylə,

"Enkaz"ın altından çıxdın, bəbəyim,

Aç gözünü, oyan, həyat səninlə"-

Söyləyən şəfqətli xilaskarlara

Dikilib gör neçə ümidli gözlər.

Ürək parçalanır sönən canlara,

Nə təsəlli yetir, nə şirin sözlər.

Nələr gördü gözün, türküm, Türkiyəm!

Dön həyata, yaşa, yaşat, Türkiyəm!

Lətifə TALİB

525-ci qəzet.- 2023.- 16 fevral.- S.15.