"Düşüncələrimdən doğulan ideyalar əsərlərə çevrilir"

MÜSAHİBİMİZ GƏNC RƏSSAM, RƏNGKAR SAYALI MƏMMƏDOVADIR

Rəssamlıq dərin və intellektual sənətdir, ciddi təxəyyül, istedad, əmək, səbr və mütaliə tələb edir. Həm də insanın mənəvi aləmindəki daxili duyğularını cəmiyyətlə bölüşməyin ən maraqlı yoludur. Bu sənət bir çoxları üçün sadəcə, pul qazanmaq vasitəsi olsa da, əsl peşəkarların sevgi və həvəslə gördüyü işdir. Müsahibimiz, gənc olmasına rəğmən, rənglərin dili ilə danışan, ömrünü-gününü rənglərə bağlayan rəssam, rəngkar Sayalı Məmmədovadır. S.Məmmədova 1995-ci ildə Bakı şəhərində anadan olub. Kiçik yaşlarından bu sənətə dərin maraq göstərən və həyatını rənglərə bağlayan həmsöhbətimizlə müsahibəni təqdim edirik.

- Öncə tanışlıqdan başlayaq: Sayalı Məmmədova kimdir?

- 1995-ci ildə Bakıda anadan olmuşam. 2014-cü ildə Əzim Əzimzadə adına Rəssamlıq kollecinin rəngkarlıq fakültəsini, 2018-ci ildə Azərbaycan Dövlət Rəssamlıq Akademiyasının eksperimental rəngkarlıq fakültəsinin bakalavr pilləsini, 2021-ci ildə isə həmin fakültənin magistratura pilləsini bitirmişəm. Rəngkarlıq üzrə görkəmli rəssamlardan və art-terapiya üzrə psixoloqlardan fərdi dərslər və ustad dərsləri almışam. Azərbaycan Rəssamlar İttifaqının gənclər bölməsinin üzvüyəm. Rəngkarlıq və qrafika ilə məşğulam.

- Özünüzü rəssamlardan kimə daha yaxın hiss edirsiz?

- Yaratdığım əsərlərin əksəriyyəti surrealizm və magik realizm cərəyanına aiddir. Buna görə də mənə yaxın olan rəssam düşünürəm ki, Rene Maqritdir. Ən sevdiklərimdən biri isə İeronim Bosxdur.

- Sizi digər rəssamlardan fərqləndirən nədir?

- Mənim əsərlərimdə çox vaxt öz həyatlarını yaşayan, xeyirxahlıqla parlayan kiçik ağ adamlara rast gəlmək olar. Obrazlar və simvollar vasitəsilə həyat, arzular, ölüm, sevgi, iman, qadağalar, azadlıq haqqında düşüncələri çatdırmağa çalışıram. İlham mənbəyim isə eşitdiyim və oxuduğum sözlərdir. Onlar ideyalarımdan doğulan kiçik toxumlara, sonra isə əsərlərə çevrilirlər. Müxtəlif hekayələr, açıqlamalar, müraciətlər çox zaman əsərlərimdə semantik kompozisiyaların yaranmasına xidmət edir. Məncə, bu sadaladıqlarım məni başqalarından fərqləndirir.

- Necə düşünürsünüz, üzləşdiyi hansısa sosial problem rəssamı sənətdən ayrı sala bilərmi?

- Bu sual üzərində çox danışmaq olar, çünki cavab hər bir yaradıcı insan üçün fərqli ola bilər. Çox şey əslində problemin nə dərəcə qlobal olmasından asılıdır. Düşünürəm ki, əksər rəssamların üzləşdiyi sosial problemlər, onların ruhi sağlamlığına, motivasiyasına, material ehtiyaclarına təsir edə bilər. Belə məqamlarda rəssamın enerjisi, vaxtı və bütün fikirləri problemlə məşğul olmağa fokuslanır və sənəti üçün lazım olan yaradıcılığını, mənəvi gücünü toplamaqda çətinlik çəkir. Digər tərəfdən isə elə rəssamlar da var ki, sosial problemlər onları sənətə daha çox bağlayır. Onlar bu kimi mövzulara tez-tez toxunurlar və bu problem adlandırdığımız məqamlar onların ilham mənbəyinə çevrilir və yeni əsərlər yaratmağa kömək olur.

- Çəkdiyiniz əsərləri satırsınız?

- Kommersiya məqsədi ilə yaradılan tabloların satışı asan olur. Ancaq digər semantik mövzularda olan əsərləri hər kəsə satmıram. Onları heç zaman satmaq üçün yaratmıram. Çünki hər biri mənim üçün çox dəyərlidir və onlara dəyər verən insanlarda olması mənim üçün çox önəmlidir.

- İncəsənət adamları ədəbiyyata da yaxın olur. Sizin mütaliə ilə aranız necədir?

- Daha öncə dediyim kimi, sözlər mənim yaradıcılığımda böyük rol oynayır, mütaliə - motivasiyam və ilham mənbəyimdir. Mütaliə etməyi çox sevirəm, şeirlər və poemalar mənə daha çox yaxındır. Ancaq məsələ kitab oxumaqdan gedirsə, vaxtımı səmərəli keçirmək üçün və eyni anda bir neçə işlə məşğul ola bilməyim üçün daha çox audio kitablara üstünlük verirəm

- Gələcək üçün hansı planlarınız var?

- Gələcək üçün planlarım heç zaman bitmir. Hazırda fərdi sərgimə hazırlaşıram və balaca rəssamlar üçün tədris kitabı hazırlamağı planlaşdırıram.

Havar ŞƏFİYEVA

525-ci qəzet.- 2023.- 10 iyun.- S.20.