Mingəçevir Dövlət Universiteti: inkişafa aparan addımlar

Şərq və Qərbin qovşağında yerləşən Azərbaycan öz tarixi inkişafı boyunca hər zaman qabaqcıl elm və təhsil ölkələrindən biri kimi tanınıb. Hələ orta çağdan istər humanitar, istərsə də dəqiq elmlər sahəsində ciddi uğurlara imza atan ölkəmiz Şərqdə müasir təhsilin də təməlini qoyan ilk dövlətlər sırasında olub. Təməli Azərbaycan Dövlət Universiteti (hazırda Bakı Dövlət Universiteti) kimi qoyulan ali təhsil ocağı Sovetlər İttifaqı dövründə də, SSRİ çərçivəsində ən qabaqcıl ali təhsil müəssisələri sırasında idi. Sovet dövründə 1969-cu ildən 1982-ci ilədək Azərbaycana rəhbərlik etmiş Ümummilli lider Heydər Əliyev respublikamızda təhsilin inkişafı naminə çox mühüm qərarlar qəbul edib və vacib tədbirlər həyata keçirib. Müstəqil Azərbaycanın Prezidenti olaraq fəaliyyət göstərdiyi müddətdə də Ümummilli liderimiz dövlətin müxtəlif sahələrində olduğu kimi, təhsil sisteminin də inkişafına xüsusi qayğı ilə yanaşmış, Azərbaycan təhsilinin müasir dünya standartları səviyyəsində inkişafına nail olmuşdu. Xüsusən ali təhsil ocaqlarının dünya təhsil sisteminə inteqrasiyası səbəbi ilə Azərbaycandan bir çox gəncləri Amerika, Avropa, Türkiyə və digər bir çox inkişaf etmiş ölkələrə təhsil almaq üçün istiqamətləndirmiş, bununla da Azərbaycanda müxtəlif sahələrində müasir kadrların yetişməsi üçün şərait yaratmışdı. Bu ənənənin uğurlu davamçısı olaraq Prezident İlham Əliyev də bu gün Azərbaycanda müasir dünya standartları üzrə təhsil alan gənc kadrların yetişməsi üçün böyük əhəmiyyətə malik addımlar atır.

2022-ci ildə Beynəlxalq Universitetlər Assosiasiyasının (IAU) İdarə Heyətinin üzvü seçilmiş Şahin Bayramovun başçılıq etdiyi Mingəçevir Dövlət Universiteti (MDU) ölkəmizdə təhsilin inkişafına dəyərli töhfələr verir. Qabaqcıl universitetlərin təcrübəsindən və potensialından faydalanmaq məqsədi ilə hazırda Mingəçevir Dövlət Universiteti BDU, UNEC, ADNSU, ADPU və digərləri ilə əməkdaşlıq əlaqələri qurub. Habelə Türkiyənin Gazi, Yıldız Teknik, Hacı Bayram Vəli və digər universitetləri, eləcə də Almaniyanın Siegen, Litvanın Mikolas Romeris, Ukraynanın Kiyev Milli İqtisadiyyat və Kiyev Milli Texnologiya və Dizayn, Abay adına Qazax Milli Pedaqoji Universiteti və digər təhsil qurumları ilə səmərəli münasibətlər yaradıb. Bu universitetlərlə tələbə və müəllim mübadiləsi, "Erasmus+" və "Horizon 2020" proqramlarında iştirak, birgə elmi tədqiqatlar aparılması, ortaq elmi konfranslar və yay məktəbləri keçirilməsi istiqamətində çalışmaq başlıca məqsədlərdəndir.

Mingəçevir Dövlət Universitetinin digər təhsil ocaqları ilə əməkdaşlıq üsullarından biri də sözügedən ali təhsil ocağında keçirilən elmi tədbirlər, o cümlədən, seminar, konfrans və simpoziumların təşkili ilə bağlıdır. Bu il fevral ayının 28-də Mingəçevir Dövlət Universitetinin akt zalında Yeni Azərbaycan Partiyası Mingəçevir şəhər təşkilatı ilə birgə təşkil edilmiş,"Heydər Əliyev İli" çərçivəsində həyata keçirilən "Ümummilli lider: tarix yaradan Heydər Əliyev nümunəsi" mövzusunda I Elmi-praktik Konfrans da bu qəbildəndir.

Universitetdə beynəlxalq tədbir və konfransların keçirilməsinə də xüsusi diqqət göstərilir. Bu baxımdan "Davamlı inkişaf strategiyası: qlobal trendlər, milli təcrübələr və yeni hədəflər", "Yeni dövrdə təhsil və tədqiqat fəaliyyəti: reallıqlar və çağırışlar" mövzulu beynəlxalq konfranslar xüsusi qeyd edilməyə layiqdir. Bu il fevralın sonlarında təşkil edilmiş Hoca Əhməd Yəsəvi VII Beynəlxalq Elmi tədqiqatlar Konfransı da uğurla keçirilib.

Universitetin başlıca strateji hədəfi qloballaşan dünyada Mingəçevir Dövlət Universitetinin digər inkişaf etmiş dünya universitetləri ilə birgə addımlaya bilmək potensialına nail olmaqdır.

Bu gün 300-dən çox əməkdaşı olan MDU-da 195 nəfərlik professor-müəllim heyəti çalışır. Bundan əlavə, hazırda MDU-da Türkiyənin Qazi Universitetindən 1 dosent fəaliyyət göstərir.

Mingəçevir Dövlət Universitetinin daha da inkişaf etdirilməsi və müasir tələblərə cavab verən dünya universitetləri ilə yanaşı addımlaması məqsədi ilə artıq bu təhsil ocağının yeni standartlara cavab verən kampusunun tikintisinə start verilib. İnanırıq ki, atılan addımlar MDU-nun daha da inkişaf etməsinə, ölkə və dünya təhsil mühitində özünəməxsus mövqeyini bir qədər də möhkəmləndirməsinə aparıb çıxaracaq.

Fərəh CABBARQIZI-CƏLİL

Filologiya elmləri doktoru, professor

525-ci qəzet.- 2023.- 16 mart.- S.7.