“Azad oldun, Qarabağ” silsiləsindən

Bilirdik, darıxırdın...

Səni işğal etdilər,

aldılar əlimizdən,

bizsiz qaldın, Qarabağımız...

Bilirdik, darıxırdın

bizdən ötrü,

ayaq izlərimizdən ötrü

daş küçələrin, dağların, dərələrin,

meşələrin, yaylaqların

darıxırdı,

əl izlərimizdən ötrü

otların, çiçəklərin,

xarıbülbülün...

Topxana meşəsindən

Cıdır düzünə çəkilən

asma körpüdən

asa bilmədilər ümidlərimizi...

Yenə bizim oldun,

yenə ayaq izlərimiz

qalacaq sinəndə,

ümidimiz igid oğullara,

Ali Baş Komandana idi,

onlar xilas etdi səni,

azad oldun, Qarabağ!

Suqovuşan yüksəkliyi

Suqovuşan yüksəkliyi,

Səni də aldı igidlər.

Qovuşmuşuq artıq sənə,

Qələbə çaldı igidlər.

Yüksəkliklər alındıqca

İgid oğullar yüksəldi.

Qələbəni bayram edən

Xalq sənə salama gəldi.

Daha ağlamayacağıq,

Dərdimiz qaldı dünəndə.

Gözümüzdə yaşa dönən

Sular qovuşacaq səndə.

"Xudayar təsnifi"

Gülümsər çöhrəylə, şirin səs ilə

"Vətən nəğməsi"ni oxudu, getdi.

İgidlik göstərdi o, həvəs ilə,

Nəğmədən bir çələng toxudu, getdi.

Getdi qorxmayaraq düşmən üstünə,

Getdi Vətənini geri almağa.

Xalqı çıxsın deyə günəşli günə

Getdi Vətən üçün şəhid olmağa.

Nə qədər çıraqlar yanarkən söndü,

Aldılar düşməndən əsir diyarı.

"Xudayar təsnifi" tarixə döndü,

Yaşatdı o igid, mərd Xudayarı.

Dəmir Yumruq

Neçə ildə nələr, nələr çəkmədin?

Gözün aydın olsun sənin, ey Vətən!

Heç kimsəyə gözlərini dikmədin,

Azərbaycan, mübarəkdir qələbən!

Birləşdilər bu xalq ilə bu ordu,

Dəmir Yumruq dedi qəti sözünü.

Ər oğullar xilas etdi bu yurdu,

Qoymadı heç düşmən açsın gözünü.

O dərd, yara qaldı daha keçmişdə,

Millət, ordu - indi hamı bir eldir.

Yumruq kimi bir olduq bu döyüşdə,

Birləşib bir olmaq necə gözəldir!

Torpaq unudularmı?...

Əsirlikdən xilas oldu torpaqlarımız

danışardılar dilləri olsaydı,

bizim üçün necə darıxdıqlarını

deyərdilər,

gördükləri haqsızlıqlardan

söz açardılar.

Yenə bizə dönməyin

sevincini bölüşərdilər...

Onları unutmadığımızı

deyərdik biz də

torpaq unudularmı,

Vətən yaddan çıxarmı?

O günlər də geridə qaldı,

yenə o yerlər bizə doğma oldu...

Xuraman Hüseyn

525- ci qəzet.- 2023- cü il.- 3 noyabr.- № 200.- S. 15.