Böyük Zəfərin zirvəsi - Bayrağımız Xankəndidə ucaldıldı

15 oktyabr 2023-cü il - Azərbaycanın tarixində ən önəmli, qürurlu günlərdən biri, tariximizin şərəf səhifəsidir. Məhz bu tarixdə hər bir azərbaycanlının 30 ildən artıq həsrətlə gözlədiyi, sonadək baş verəcəyinə inandığı o möhtəşəm hadisə gerçəkləşdi - Azərbaycanın suverenliyi rəsmən bərpa olundu.

Prezident, Ali Baş Komandan İlham Əliyev üçrəngli bayrağımızı qədim və tarixi torpaqlarımızda - Xankəndidə, Xocalıda, Xocavənddə, Ağdərədə, Əsgəran qəsəbəsində ucaltdı. Bununla da, hələ də qələbəmizə, Azərbaycanın ərazi bütövlüyünü, suverenliyini tam bərpa etməsinə dair bəzilərinin şübhəli yanaşmalarına tam olaraq son qoyuldu.

Prezident İlham Əliyev oktyabrın 15-də ilk olaraq Tərtər rayonuna səfər edib və Suqovuşan qəsəbəsində bir sıra yeni tikililərin açılışında iştirak edib, görülən işlərlə tanış olub. Ölkə rəhbəri həmin gün Sərsəng su anbarının ərazisində dövlət bayrağını ucaldıb. Mühüm strateji əhəmiyyətə malik Sərsəng su anbarı Ulu öndər Heydər Əliyevin təşəbbüsü ilə tikilib. 1976-cı ildə Ümummilli lider su anbarının açılışında şəxsən iştirak edib. Sərsəng su anbarı Azərbaycanın ən bolsulu çaylarından olan Tərtərçayın üzərində yerləşir. Ümumi həcmi 560 milyon kubmetr olan su anbarı Qarabağ iqtisadi rayonunun ən iri su hövzəsidir. Sərsəng su anbarı vasitəsilə Bərdə, Tərtər, Ağdam, Ağcabədi, Yevlax və Goranboy rayonlarında, ümumilikdə 96 min hektardan çox ərazi suvarılır. Su anbarının bəndində ümumi gücü 50 meqavat olan su elektrik stansiyası tikilib.

Azərbaycan Prezidenti Əsgəran qalasında da olub. Qeyd edək ki, XVIII əsrdə Qarabağ xanı Pənahəli xanın göstərişi ilə inşa olunan Əsgəran qalası Azərbaycan memarlığının parlaq nümunələrindəndir. Xocalı şəhəri 1992-ci ildə Ermənistan silahlı qüvvələri tərəfindən işğal olunduqdan sonra qala dağıntılara məruz qalıb.

Prezident oktyabrın 15-də Xocavənd şəhərində, Ağdərə şəhərində, Xocalıda dövlət bayrağını ucaldıb. Qeyd edək ki, bu il sentyabrın 19-20-də Azərbaycan Ordusunun Qarabağda həyata keçirdiyi lokal xarakterli antiterror tədbirləri ilə bu ərazilərimiz separatçılardan azad edilib. Xocalı hər bir azərbaycanlının qəlbində ağır yaradır. Ermənilərin burada törətdiyi dəhşətli soyqırımı illər, əsrlər keçsə belə, unudulmayacaq. Bu gün orada bayrağımızın dalğalanması bu yaramıza bir məlhəm oldu.

Prezident İlham Əliyev həmin gün Xankəndi şəhərinin Kərkicahan qəsəbəsində və Şuşanın Malıbəyli kəndində olub. Kərkicahan və Malıbəyli də lokal antiterror tədbirlərindən sonra separatçılardan təmizlənib.

Nəhayət, oktyabrın 15-də Ali Baş Komandan Xankəndi şəhərində oldu və bayrağımızı ucaltdı. 15 oktyabr tarixi həm də İlham Əliyevin Azərbaycan Prezidenti seçilməsinin 20-ci ildönümüdür. İlham Əliyev dövlət başçısı seçilməsinin 20-ci ilində Azərbaycanın bütövlüyünü təmin etdi, tarixi torpaqlarımızda üçrəngli bayrağımızı ucaltdı. Əlbəttə ki, biz yaxın tariximizin şahidləri olaraq əldə edilmiş möhtəşəm qələbələrin hansı çətinliklər bahasına qazanıldığını bilirik. Üstəgəl, dünya birliyi tərəfindən 30 ildən artıq üzləşdiyimiz və indi də davam edən ikili standartlar, haqlı olaraq haqsız duruma salınmağımız, Azərbaycana yanaşmada ədalət hissini itirmələri, bir milyona yaxın qaçqın, məcburi köçkün probleminə göz yummaları, əvəzində erməni separatizminə dəstək vermələri və s. Amma bütün bunlar Azərbaycan dövlətini öz haqq işindən çəkindirmədi. Ötən müddət ərzində Azərbaycan sözün əsl mənasında bütün cəbhələrdə döyüşdü. Həm diplomatik müstəvidə öz haqq işimizi çatdırmaq üçün mübarizə apardı, münaqişənin sülh yolu ilə həlli üçün əlindən gələni etdi, həm də ordumuzu gücləndirdik. Amma beynəlxalq birliyin, ATƏT-in keçmiş Minsk qrupu kimi strukturların sadəcə vaxt uzatdıqlarını, sülhlə manipulyasiya etdiklərini, üzdə belə olduqlarını gördük. Məqsədləri münaqişəni dondurmaq, yaxud Azərbaycan ərazisində ikinci erməni dövləti yaratmaq idi.

Prezident İlham Əliyev Xankəndindəki çıxışında bu mövzuya toxunaraq deyib: "Azərbaycan xalqı yaxşı bilir və əminəm dünya ictimaiyyəti də yaxşı bilir ki, biz Ermənistan-Azərbaycan Dağlıq Qarabağ münaqişəsini sülh yolu ilə həll etmək istəyirdik. On yeddi il ərzində mən şəxsən mənasız və nəticəsiz danışıqlarda dəfələrlə iştirak etmişəm. Nə üçün? Çünki hesab edirdim ki, bu məsələ sülh yolu ilə həll olunmalıdır. Ancaq getdikcə ümidlər azalırdı. Ermənistanın işğalçı siyasətini bir daha təhlil edərək tam əminliklə bu gün deyə bilərəm ki, onlar bir qarış torpaq belə bizə qaytarmaq fikrində deyildilər. Əfsuslar olsun ki, bu məsələ ilə məşğul olmuş vasitəçilər faktiki olaraq münaqişəni dondurmaq istəyirdilər, münaqişəni əbədi etmək istəyirdilər. İstəyirdilər ki, bu yara heç vaxt sağalmasın. Azərbaycan xalqı və dövləti bu vəziyyətlə heç vaxt barışa bilməzdi. Mən dəfələrlə deyirdim ki, biz heç vaxt bu vəziyyətlə barışmayacağıq, heç vaxt imkan verməyəcəyik ki, bizim torpağımızda ikinci erməni dövləti yaradılsın".

Azərbaycan 2020-ci ildə 44 günlük Vətən müharibəsi ilə öz ərazilərini işğaldan azad etdi. Bir günlük antiterror tədbirləri ilə suverenliyini tam bərpa etdi. Prezident İlham Əliyev özü də söylədiyi kimi, xalqa verdiyi bütün vədlərini yerinə yetirir.

Sitat: "Düz 20 il bundan əvvəl Azərbaycan xalqı mənə böyük etimad göstərərək prezident seçkilərində Prezident vəzifəsinə seçmişdir. O vaxt doğma xalqıma müraciət edərək söz vermişdim ki, Azərbaycan xalqının və Azərbaycan dövlətinin milli maraqlarını müdafiə edəcəyəm, Azərbaycanın ərazi bütövlüyünü qoruyacağam. Konstitusiyaya və "Qurani-Kərim"ə əl basaraq and içmişdim. Şadam ki, son 20 il ərzində verdiyim bütün vədlər, qarşıma qoyduğum bütün vəzifələr icra edildi. Bu gün bütün Azərbaycan xalqı ürəkdən sevinir, bütün Azərbaycan xalqı "Allaha şükür" deyir. Bu günü biz 30 ildən çox gözləmişdik. Ancaq hər birimiz, əminəm və inanırdıq ki, bu gün gələcək".

Dövlət başçısı əlavə edib ki, iyirmi il bundan əvvəl Prezident kimi öz vəzifə borcumu yerinə yetirməyə başlayanda qarşıma bir nömrəli vəzifə qoymuşdum ki, Azərbaycan bayrağı o vaxt işğal altında olan bütün ərazilərdə, bütün torpaqlarda, bütün şəhər və kəndlərdə qaldırılsın: "Hər gün, hər saat biz bu müqəddəs məqsədə doğru gedirdik. Hər gün biz bu müqəddəs anı yaxınlaşdırırdıq və dəfələrlə deyirdim ki, hər birimiz, hərə öz yerində öz işi ilə bu günü yaxınlaşdırmalıdır"

Yaxın tariximizdə şahidlik etdiyimiz mühüm tarixi hadisələr Prezident İlham Əliyevin "Nəyi, necə, nə vaxt etmək lazımdır, onu mən bilirəm", fikrinin təsdiqidir: "Xatırlayıram, o vaxt bəziləri sual verirdi: Nə üçün, nə üçün biz o vaxt - noyabrın 10-da müharibəni dayandırmağa razılıq verdik. Bu gün bax, burada durarkən bir daha bildirmək istəyirəm ki, biz hər şeyi vaxtında etməliyik və etmişik. Azərbaycan xalqının böyük əksəriyyəti o vaxt da - noyabrın 10-da və ondan sonrakı dövrdə çox yaxşı başa düşürdü ki, biz istədiyimizə nail olacağıq. İstədiyimiz isə bax, burada dalğalanan Azərbaycan Bayrağıdır... Bu gün vaxtilə - hələ işğal dövründə dediyim sözlər və xalq tərəfindən təkrarlanan sözlər mənim üçün ən böyük mükafatdır. Mən o vaxt demişdim ki, nəyi, necə, nə vaxt etmək lazımdır, onu mən bilirəm. İkinci Qarabağ müharibəsi dayananda da Azərbaycan xalqı bilirdi ki, mən bunu bilirəm. O gündən üç il keçməmiş biz bu gün buradayıq, Xankəndidəyik, Xankəndinin mərkəzindəyik, Azərbaycan Gerbi, Azərbaycan Bayrağı altında. Bu, böyük xoşbəxtlikdir və tarixi hadisədir. İndi bu tarix haqqında danışmaq mənim üçün bəlkə o qədər də düzgün deyil. Çünki bu tarixi biz yaşamışıq, bu tarixi biz yaratmışıq. Azərbaycan xalqı elə bir Qələbə qazanıb ki, həm dillər əzbəri olub, həm də bu Qələbə əbədi bizimlə olacaq. Bu Qələbə bizim tariximizdə əbədi olacaq. Bizdən sonra gələn nəsillər bu Qələbə ilə əbədi və haqlı olaraq fəxr edəcəklər".

Bu gün azərbaycanlılara qarşı amansız cinayətlər törətmiş, günahsız insanlara ağır işgəncələr vermiş, ərazilərimizdə vəhşiliklər törətmiş canilərin bəziləri saxlanılaraq Bakıya gətiriliblər. Onlar törətdikləri ağır cinayətlərə, soyqırımlara, qətliamlara görə layiq olduqları cəzanı alacaqlar.

Prezident Xankəndidən etdiyi çıxışında bu məqama toxunaraq deyib: "Onlar Bakıya gəlmək istəyirdilər, onlar bizi hədələyirdilər, deyirdilər ki, onların tankları Bakı küçələrində olacaq, haqlı çıxdılar. Onların tankları Hərbi Qənimətlər Parkındadır. Onlar deyirdilər ki, Bakıya gəlib çay içəcəklər. Burada da haqlıdırlar. İndi çay içirlər, istintaq təcridxanasında. Özünü "prezident" adlandırmış üç təlxək bax, burada oturub bizə meydan oxuyurdu, bizi hədələyirdi, bizi təhqir edirdi. Biz isə təmkinlə hər şeyə yanaşdığımız kimi, bu məsələyə də təmkinlə və səbrlə yanaşırdıq. Çünki bilirdik ki, biz buraya gələcəyik. Mən bunu bilirdim. Mən düz 20 il bundan əvvəl - 2003-cü il oktyabrın 15-də Azərbaycan xalqına və özümə o sözü vermişdim. Bəli, biz 20 il gözlədik, daha doğrusu, 17 il. Üç il bundan əvvəl Şuşada bizim bayrağımız qaldırıldı. Ancaq biz istədiyimizə nail olduq, Azərbaycan xalqının onilliklər ərzində olan arzularını çin etdik. Azərbaycan xalqının ləyaqətini bərpa etdik. Biz torpaqlarımızı geri qaytarmışıq, ərazi bütövlüyümüzü bərpa etmişik, eyni zamanda, öz ləyaqətimizi bərpa etmişik. Bax, burada oturmuş özünü "prezident" adlandıran 3 təlxək bu gün öz layiqli cəzasını gözləyir. Bu binaların birində oturmuş, özünü "baş nazir" adlandıran bir adam görəsən, bu gündəmi bizi hədələməyə cürət edəcək? Onun da çayı bu gün istintaq təcridxanasında verilir. Burada özünü "xarici işlər naziri" adlandırmış bir separatçı o vaxt belə kinayə ilə deyirdi ki, Azərbaycan bayrağını Xankəndidə qaldırmaq istəyirsə, səfirlik açsın bizim ölkəmizdə. İndi onun da çayı orada, təcridxanada verilir. Bizim bayrağımız isə bax, oradadır. Bu, dərs olmalıdır onlara. Əfsuslar olsun ki, mənim 20 il bundan əvvəl dediyim və ondan sonra dəfələrlə təkrar etdiyim sözlər onlara çatmadı. Onlar hesab edirdilər ki, bu, sadəcə olaraq, sözdür. Xeyr, mən nəyi demişəmsə, onu da etmişəm, bunu hər kəs bilir, o cümlədən, Ermənistanda da bunu bilirlər və bunu unutmasınlar. Vətən müharibəsini unutmasınlar! Antiterror tədbirlərini unutmasınlar! Əgər yenə də Ermənistanda hansısa qüvvə revanş haqqında düşünürsə, bax, bu kadrlara yaxşı baxsın".

Dövlət başçısının vurğuladığı kimi, Azərbaycan xalqı bu Qələbəni öz qanı, canı bahasına əldə edib. Bayrağımız bütün ərazilərmizdə əbədi dalğalanacaq. Və biz öz torpaqlarımızda əbədi yaşayacağıq.

Pərvanə SULTANOVA

pervane525@mail.ru

525-ci qəzet.- 2023.- 17 oktyabr.- S.5.