"Azərbaycan Prezidenti öz adını dünyanın hərb tarixinə birdəfəlik həkk etdi"

Pərvanə SULTANOVA

pervane525@mail.ru

Son 20 il ərzində Azərbaycan Prezidenti İlham Əliyevin rəhbərliyi ilə ölkəmizin hərtərəfli inkişafı istiqamətində kompleks addımlar atılıb. Hər şeydən öncə beynəlxalq münasibətlər sistemində Azərbaycanın rolu və yeri əhəmiyyətli dərəcədə möhkəmləndirilib.

Son 20 ildə Prezident İlham Əliyevin rəhbərliyi ilə Azərbaycan hərtərəfli inkişaf edib, regional liderə, dünyada nüfuz sahibinə çevrilib. Ölkəmizin, xüsusilə öz ərazi bütövlüyün və suverenliyini bərpa etməsi onu daha da gücləndirib. Prezident İlham Əliyev 20 ildə xalqa verdiyi bütün vədləri yerinə yetirdi, ən başlıcası bu gün Azərbaycanın Dövlət Bayrağı onun bütün ərazisində dalğalanır ki, bunu da hər bir azərbaycanlı illərdir ki, gözləyirdi.

Milli Məclisin deputatı Elman Nəsirov "525"ə bildirib ki, 2003-cü il oktyabrın 15-də Azərbaycan Respublikasında Prezident seçkiləri keçirildi və bu seçkilərin nəticəsində cənab İlham Əliyev ölkə Prezidenti seçildi: "İlham Əliyev seçkiöncəsi təbliğat kampaniyasında söyləyirdi ki, xalq etimad göstərəcəyi təqdirdə, Ulu öndər Heydər Əliyevin siyasətini davam etdirəcəyəm. Həqiqətən də 20 il öncə xalqımız məhz Heydər Əliyev siyasətinin davamına səs verdi və növbəti beş il üçün öz taleyini İlham Əliyevlə bağladı. Prezident seçildikdən sonra cənab İlham Əliyevin bütün fəaliyyəti ilk növbədə Azərbaycan xalqının, dövlətimizin qarşısında dayanan strateji əhəmiyyətli vəzifələrin icrası ilə bağlı idi. Həmin vəzifələrin sırasında heç şübhəsiz ki, ölkəmizin ərazi bütövlüyünün təmin edilməsi bir nömrəli hədəf idi. 2003-cü ildən başlayaraq həmin hədəfə çatılması yolunda cənab İlham Əliyev gecə-gündüz yorulmadan, usanmadan misilsiz bir fəaliyyət göstərdi. 2003-cü ildə ilk növbədə iqtisadiyyatın inkişaf etdirilməsi, şaxələndirilməsi, enerjidən asılılığın azaldılması, sahibkarlığın inkişafı kimi məsələlər prioritetlər sırasında idi. Qaçqınların problemlərinin həlli, onların yerləşdirilməsi, çadırların ləğvi məsələləri də əsas hədəflərdən idi. Ulu öndər Heydər Əliyevin "İqtisadiyyatı güclü olan dövlət hər şeyə qadirdir" fikri cənab İlham Əliyevin iqtisadi fəaliyyətinin əsas fəlsəfəsini təşkil edirdi. Güclü iqtisadiyyat həm də güclü ordu deməkdir. 2003-cü ildə Azərbaycanın hərbi büdcəsi 163 milyon dollar təşkil edirdisə, artıq 2008-ci ildə, yəni 5 il müddətində hərbi büdcəmiz 1 milyard 800 milyon dollara çatdı. Eyni zamanda ordumuzda hərbi vətənpərvərlik ruhunun gücləndirilməsi, yüksəldilməsi istiqamətində çox ciddi işlər görüldü. Xüsusilə son 20 il ərzində 20-dən artıq hərbi zavod tikildi, 1200 adda hərbi təyinatlı məhsullarımız istehsal edildi. Nəticədə Azərbaycan Ordusu dünyanın ən güclü 50 ordusu sırasında yer aldı. Bu 20 il ərzində elə bir gənclik formalaşdı ki, onlar Qarabağı heç görməmişdilər, Qarabağda doğulmamışdılar. Ancaq Vətən sevgisi çox böyük idi və bu da məhz düzgün gənclər siyasətinin məntiqi nəticəsi idi".

Deputat əlavə edib ki, Azərbaycanda son 20 il ərzində səfərbər olmuş cəmiyyət, vətəndaş həmrəyliyi daha da möhkəmləndi, xalq-hakimiyyət birliyi daha güclü, daha monolit oldu. Cənab Prezident də məhz Azərbaycan xalqının milli maraqlarından irəli gələn müstəqil siyasət həyata keçirdi və təsadüfi deyildir ki, bunun nəticəsində həm 2008-ci, həm 2013-cü, həm də 2018-ci illərdə keçirilmiş prezident seçkilərində yenə də İlham Əliyev xalqımızın mütləq əksəriyyətinin etimadını qazanaraq dövlət başçısı seçildi. E.Nəsirov əlavə edib ki, hakimiyyətinin 8-ci ilində, 2011-ci ildə Azərbaycan dünyanın ən böyük beynəlxalq universal təşkilatı olan BMT-nin Təhlükəsizlik Şurasında qeyri-daimi üzv seçildi. 155 dövlətin səsini qazanmaqla tarixi nailiyyətə imza atdı: "Azərbaycan elə həmin ildə Qoşulmama Hərəkatına üzv seçildi. Bu Hərəkatın 18-ci Zirvə görüşündə Azərbaycan 2019-2022-ci illərdə Qoşulmama Hərəkatına sədrlik etmək etmək funksiyasını üzərinə götürdü və bu sədrlik çox mürəkkəb bir dövrə təsadüf etdi, pandemiya ilə mübarizə şəraitində keçdi. BMT TŞ-nın daimi üzvləri deyil, baxmayaraq ki, onlar beynəlxalq sülhün və təhlükəsizliyin təminatçısı kimi çıxış edirlər, məhz Azərbaycan dövləti onun Prezidenti Qoşulmama Hərəkatı adından pandemiyaya qarşı bütün beynəlxalq səylərin birləşdirilməsi istiqamətində mühüm addım atdı. BMT Baş Məclisinin xüsusi sessiyasının keçirilməsinə nail oldu. Həm də pandemyaya qarşı mübarizədə vaksinlərin ədalətli bərabər bölgüsü mövzusu mühüm əhəmiyyətli bir məsələyə çevrilmişdir. Bəzi ölkələr, məsələn, Kanada əhalisinin sayından 3-5 dəfə çox vaksinlər alır, lakin kasıb dövlətlərin buna imkanı olmurdu. Cənab Prezident vaksin millətçiliyi siyasətinə qarşı öz etiraz səsini ucaltdı və BMT Baş Məclisində bu istiqamətdə mühüm sənədin qəbul edilməsinə nail oldu. Həm də Qoşulmama Hərəkatının nüfuzu gücləndi. Hərəkatın Gənclər platforması formalaşdı, üzv dövlətlərin qanunverici orqanlarının fəaliyyətinin əlaqələndirilməsi, koordinasiyası istiqamətində mühüm işlər görüldü və bu təşkilatın beynəlxalq aləmdə nüfuzu, imici həm bərpa edildi, həm də güclənmiş oldu ki, bu da Azərbaycanın Qoşulmama Hərəkatına verdiyi töhfənin nəticəsi idi. Cənab Prezidentin fəaliyyəti yüksək qiymətləndirildi ki, Azərbaycanın daha bir il müddətinə - 2023-cü il ərzində də bu təşkilata sədrlik etməsi qərara alındı. 2024-cü ilin yanvar ayının 15-20-də də Uqandanın Kampala şəhərində keçiriləcək Qoşulmama Hərəkatının 19-cu Zirvə görüşündə sədrlik Azərbaycandan Uqandaya keçəcək. Eyni zamanda Azərbaycanın təşkilat çərçivəsində fəaliyyəti yüksək qiymətləndirilərək ölkəmizin "sədrlik troykasına" qəbul edilməsi haqqında razılaşma əldə edilib. Bu o deməkdir ki, Azərbaycan yenə də Qoşulmama Hərəkatında söz sahiblərindən biri kimi fəaliyyət göstərəcək".

E.Nəsirov deyib ki, təkcə diplomatik cəbhədə deyil, eyni zamanda strateji vəzifənin - torpaqlarımızın düşməndən azad olunması vəzifəsinin icrası istiqamətində də cənab Prezident tarixi addımlara imza atdı. Onun formalaşdırdığı yenilməz ordu 2020-ci ilin sentyabr-noyabr aylarında davam edən İkinci Qarabağ müharibəsində tarix yazdı, torpaqlarımız işğaldan azad olundu. Noyabrın 8-də Şuşa şəhəri azadlığına qovuşdu. Beləliklə, noyabrın 10-da Ermənistan kapitulyasiya aktına imza atmağa məcbur oldu və bu, müharibənin qalibi Azərbaycanın Ali Baş Komandanı, onun formalaşdırdığı yenilməz ordu və xalqımız idi. Deputat bildirib ki, Prezident-xalq-ordu ifadələri sinonimləşmiş ifadələr kimi səslənir və tarixi zəfərimizin simvollarına çevrilmişdir: "Bundan sonra isə cənab Prezidentin formalaşdırdığı şanlı ordumuz 2023-cü ilin 19-20 sentyabr tarixlərində heç bir sutka çəkməyən müddətdə ərazilərimiz üzərində tam və qəti şəkildə suverenliyimizi təmin etdi. Xocalı, Xocavənd, Ağdarə rayonlarında, Əsgəran qəsəbəsində, nəhayət Qarabağın baş şəhəri Xankəndi separatçılardan təmizləndi, bu ərazilərimiz üzərində suverenliyimiz tam təmin edildi. Azərbaycan Prezidenti cənab İlham Əliyev oktyabrın 15-də hakimiyyətə gəlişinin 20-ci ilində Xankəndi şəhərinin mərkəzində dövlət bayrağımızı ucaltdı. Bu hadisənin simvolik mənası var idi. Azərbaycan Prezidenti qeyd etdiyimiz kimi, düz 20 il əvvəl 15 oktyabrda Prezident seçkilərkən söyləmişdi ki, əsas məqsədi torpaqlarımızı işğaldan azad etməkdir. Ulu öndər Heydər Əliyevin ən böyük arzusu məhz bu idi. Heç kim Heydər Əliyev qədər inanmırdı ki, bütün torpaqlarımız işğaldan azad olunacaq. Ulu öndər bir-bir işğal altındakı torpaqlarımızın adını çəkirdi və qeyd edirdi ki, o gün mütləq gələcək torpaqlarımız işğaldan azad olunacaq. O gün gəldi və cənab İlham Əliyev doğrudan da xoşbəxt Prezidentdir ki, o, Ulu öndərin vəsiyyətini yerinə yetirdi və Azərbaycanın vaxtilə işğal altında olan bütün torpaqlarında bayrağımız yüksəlib. Bu tarixi zəfəri ilə Azərbaycan Prezidenti öz adını dünyanın hərb tarixinə birdəfəlik həkk etdi. 100 illər keçəcək, yeni nəsillər olacaq və onlar bu dövrü bir şərəf tariximiz kimi yad edəcəklər. Hər bir azərbaycanlı necə Ulu öndər Heydər Əliyevə qəlbində heykəl qoyub, eləcə də İlham Əliyevə də hər bir azərbaycanlı qəlbində heykəl qoyacaq. Çünki o, tarix yazan və tarixə yazılan şəxsiyyət, liderdir".

525-ci qəzet 2023.- 27 oktyabr, №195.- S.4.