Akademik Zərifə Əliyevanın 100 illiyi ilə bağlı elmi konfransın tezisləri çap olunub

AMEA-nın akademik Ziya Bünyadov adına Şərqşünaslıq İnstitutunda görkəmli oftalmoloq-alim, Əməkdar elm xadimi, professor, tibb elmləri doktoru, akademik Zərifə Əliyevanın anadan olmasının 100 illik yubileyinə həsr edilmiş "Dəyişən dünyada qadın: Şərq və Qərb baxışı" mövzusunda beynəlxalq elmi konfransın tezisləri çapdan çıxıb.

Nəşrdə Şərqşünaslıq İnstitutunun keçirdiyi konfransda səslənən 154 məruzənin tezisi dərc olunub. Bu sırada İraq, Misir, Mərakeş, Malayziya, Ukrayna və Rusiyadan 11 alimin məruzəsinin tezisi də var. Burada həm akademik Zərifə Əliyevaya həsr olunmuş, həm də cəmiyyətdə, elmdə, təhsildə, mədəniyyətdə qadının yerinə, roluna, qadın problemlərinə dair məruzələrin tezisləri yer alıb. Nəşrə AMEA-nın vitse-prezidenti vəzifəsini icra edən, Şərqşünaslıq İnstitutunun baş direktoru, akademik Gövhər Baxşəliyevanın "Görkəmli alim-oftalmoloq akademik Zərifə xanım Əliyevanın 100 illiyinə ithafən", ukraynalı alimlər Oleq Kupçik və Nataliya Zubun "Sona Axundova-Bağırbəyova və Zərifə Əliyeva: oftalmologiyanın korifeyləri", eləcə də Məryəm Seyidbəylinin "Tibb elmində Azərbaycan qadınları", Çinarə Səfərovanın "Gözəllik, sədaqət rəmzi olan böyük alim - Zərifə Əliyeva" mövzularında tezisləri də daxildir.

ŞAHANƏ

525-ci qəzet.- 2023.- 23 sentyabr.- S.15.