"Arif Məlikov: tarix və müasirlik" kitabı təqdim olunub

Bu günlərdə Azərbaycan Musiqi Mədəniyyəti Dövlət Muzeyinin filialı olan Qara Qarayevin Ev-Muzeyində 18 sentyabr Milli Musiqi Gününə həsr olunmuş tədbirlər çərçivəsində "Arif Məlikov: tarix və müasirlik" kitabının təqdimatı keçirilib. Üzeyir Hacıbəyli adına Bakı Musiqi Akademiyasının Orta ixtisas musiqi məktəb-studiyasının elmi-metodiki işlər üzrə direktor müavini, sənətşünaslıq üzrə fəlsəfə doktoru Aytən Baxşiyeva-İbrahimovanın müəllifi olduğu kitabın baş redaktoru professor Fərhad Bədəlbəyli, elmi redaktoru professor Zemfira Qafarovadır.

Kitabda bəstəkarın kamera-instrumental, kamera-vokal əsərlərin kompleksli təhlili və obrazlı-emosional icmalı verilir. Burada fortepiano prelüdləri, pyesləri, "Ötəri anlar" silsiləsi, "Təzadlar" fortepiano pyesi, iki royal üçün skerso, solo violin üçün sonata, violin və fortepiano üçün skerso, Nazim Hikmətin sözlərinə bəstələnmiş üç romans silsiləsi, Almas İldırımın sözlərinə yazılmış "Azəbaycan" balladası nəzərdən keçirilir.

Xalq artisti, Dövlət mükafatları laureatı, professor, akademik Arif Məlikovun 90 illik yubileyi ərəfəsində keçirilən bu təqdimat musiqi həyatımızda əlamətdar hadisəyə çevrilib. Tədbirdə tanınmış elm, mədəniyyət və incəsənət xadimləri çıxış ediblər.

Azərbaycan Musiqi Mədəniyyəti Dövlət Muzeyinin direktoru, sənətşünaslıq üzrə elmlər doktoru, Əməkdar mədəniyyət işçisi Alla Bayramova, direktor müavini Təranə Zeynalova, Qara Qarayevin Ev-Muzeyinin müdiri Züleyxa Qarayeva-Bağırova iştirakçıları salamlayaraq tədbirin anlam və önəmi barədə qısa məlumat veriblər. Kitabın müəllifi Aytən İbrahimova çıxış edərək Arif Məlikovun yaradıcılığının müxtəlif istiqamətlərindən - bəstəkarlıq, pedaqoji, ictimai fəaliyyətindən, Azərbaycan musiqi mədəniyyətinin inkişafındakı rolundan danışmaqla yanaşı, onunla birgə çalışdığı zamanın xoş, əziz xatirələrini dinləyicilərlə bölüşüb. O cümlədən, tədbirdə "Arif Məlikov: tarix və müasirlik" kitabının elmi redaktoru professor Zemfira Qafarova, professor Zümrüd Dadaşzadə, sənətşünaslıq üzrə fəlsəfə doktoru Minaxanım Babayeva, pianoçu-bəstəkar Nuranə Zeynalova, "Şərq-Qərb" nəşriyyatının direktoru Sevil İsmayılova çıxış ediblər.

Bədii hissədə Əməkdar artist Nərgiz Kərimova (vokal), Svetlana Əhmədova (fortepiano), Q.Qarayev adına Mərkəzi İncəsənət Məktəbinin müəllimi, Respublika və Beynəlxalq müsabiqələr laureatı Mətanət Nurullayeva (fortepiano), Respublika və Beynəlxalq müsabiqələr laureatı Humay Hacızadə (violin), Tomris Hüseynova (fortepiano), Bakı Musiqi Akademiyasının Orta ixtisas musiqi məktəb-studiyasının müəllimi, pianoçu-bəstəkar Nuranə Zeynalova, Azərbaycan Dövlət Simfonik Orkestrinin solisti Nərgiz Əliyeva (fleyta), Bakı Musiqi Akademiyasının müəllimi Zərif Kərimova (fortepiano) Arif Məlikovun əsərlərini səsləndiriblər. Tədbirdə "Məhəbbət əfsanəsi" baletindən, "Əbədiyyət" simfoniyasından videoyazılar, Ümummili lider Heydər Əliyevin Arif Məlikova "İstiqlal" ordeni təqdim etməsi ilə bağlı kadrlar nümayiş olunub.

Tutu HÜSEYNOVA

Musiqişünas

525-ci qəzet.- 2023.- 26 sentyabr.- S.11.