Ağlama

Hey yürüdüm bu yollarda

Ömrü qoydum yarı yolda

Görən gənclik qaldı harda?

Daha sellərtək çağlama,

Ağlama, ürək, ağlama.

Olan oldu, keçən keçdi.

Ürək dərdlərdən su içdi.

Taleyimi çətin seçdi.

Qalan günə bel bağlama,

Ağlama, ürək, ağlama.

Ayrılıq var, ölüm varmış,

Görünür, bu dünya darmış,

Nə biləydim son olarmış?

Ümidlərə kin saxlama,

Ağlama, ürək, ağlama.

Bu tale ilə barışsam,

Dost tanışdan ayrı düşsəm,

Bir gün torpağa qarışsam,

Yaxını, yadı dağlama,

Ağlama, ürək, ağlama...

Ərənlərdənəm

Demə, gəldi getdi ömrün yarısı,

Yoluma sədd çəkdi həsrət barısı,

Əzizdir torpağın gənci, qarısı,

Uğrunda can qoyub ölənlərdənəm.

Bağlarda bülbültək ötənlərim var,

Dağlarda, daşlarda itənlərim var,

Torpaqda şəhidtək bitənlərim var,

Vətəni qoruyan ərənlərdənəm.

Dünyanın malına uyanlar hanı?

Çoxu zəbt elədi, tutdu dünyanı.

Göstər mənə görüm o Süleymanı,

Sonu yerlə-yeksan olanlardanam.

Minarə İSGƏNDƏR

525-ci qəzet.- 2023.- 6 yanvar.- S.15.