Zəfərin mübarək, vətən!

Allah bütün şəhidlərimizə rəhmət eləsin!

Xoş günlərdən soraq verir,

Axşamın-səhərin, Vətən!

Düşmənlərə göz dağıdır

Hər təzə Zəfərin, Vətən!

İgid-ərən oğulların

Tapdayıb bəndi-bərəni,

Bir həmləylə sevindirdi

Xocalını, Əsgəranı,

Xocavəndi, Ağdərəni...

"Dəmir Yumruq"dan güc aldı

Qatlanmaz qanadın-qolun!

Qırdın paslı qıfılını

Xankəndiyə gedən yolun!

Qarşında tab gətirmədi

Zülmə sipər olan "barı".

Diz çöküb, aman dilədi

Səndən harsın dığaları...

Başın sağolsun... yenə də

Haqq yolunda cəngə çıxıb,

Candan keçənlərin də var!

Qanlı şəhid köynəyiylə

Ulu Tanrı Dərgahına

Vaxtsız köçənlərin də var...

Qalibiyyət simvoludur

Üç rəngli bayrağın sənin!

Bütövləşən sərhədlərin

Sabahkı növrağın sənin!..

Türkün-türkə can borcu var,

Nə yalqızsan, nə tək, Vətən!

Hünərindən soraq verən

Zəfərin Mübarək, Vətən!

21.09.2023

Hələ sevənlərim varmış, heç demə...

Məni qınamasın bəxti yeyinlər,

Öz alın yazımdan qaça bilmədim.

Qarşımda sədd imiş gizli düyünlər,

Cəhd etdim... heç birin aça bilmədim.

Yuxudan oyandım qızaranda dan,

Atlı qarışqatək yükümü dartdım.

Özgə kölgəsində daldalanmadan

Sözlə damla-damla çoxalıb artdım.

Qoymadım başımı rahat balınca,Ehtiyac üstümə yağdı qar kimi.

Öz nakam eşqimin baxdım dalınca,

Süddən yanıq qalmış uşaqlar kimi...

Bir ömür yaşadım sevincli-qəmli,

Nə boynumu bükdüm, nə qamətimi.

Hərdən görünsəm də, kipriyi nəmli,

Yersiz "xərcləmədim" dəyanətimi.

Bir himə bəndəm ki, kükrəyib daşam,

Məni bənzətməyin ağıldan kəmə.

Elə bilirdim ki, unudulmuşam,

Hələ sevənlərim varmış, heç demə...

14.08.2023

Gəlmişəm

Bir qalam kösövəm-odam,

Bükülmüş qolam-qanadam.

Çoxlarına hələ yadam,

Bir az uzaqdan gəlmişəm.

Tapdansam da torpaq kimi,

Dözdüm hər dərdə dağ kimi...

Yaşıl üzlü yarpaq kimi

Kökdən-budaqdan gəlmişəm.

Kürün avazı-səsiyəm,

Xan Arazın bəstəsiyəm.

"Qarabağ şikəstəsi"yəm,

Dildən-dodaqdan gəlmişəm.

Bələd olsam da "arxına",

Qarışmamışam axına.

Əslim bəllidir çoxuna,

Halal torpaqdan gəlmişəm.

Alnım açıqdır, üzüm ağ,

Nə astaram, nə də yamaq...

Söz mülkünə min il qabaq,

Ya da lap çoxdan gəlmişəm.

Köhnə komayam, yuvayam,

Nə cəngəm, nə də davayam.

Bir udum suyam, havayam

Saflaşıb Haqdan gəlmişəm.

22.08.2023

Sənə nə...

Niyə yanıb yaxılırsan

Axı, çəkiləndə adım?

Nə etmişəm ki, bükülə

Qarğışınla qol-qanadım?

Anladığın tərzdə deyil

Gördüyün tərsim-avandım.

Söz demərəm boş-boşuna,

Hərdən kiminsə xoşuna

Gəldim, gəlmədim - sənə nə?

Söz mülkündə misra-misra

Nur saçan ocağam, odam.

Bir halal əkinçi kimi

Yalançı kəslərə yadam.

Üzü saxta təbəssümlü,

İçi kinlə dolu adam.

Tapmazsan zülmət küncümü,

Dost-tanışla sevincimi

Böldüm, bölmədim-sənə nə?!

Utanmağa yoxsa üzün,

De, sənə necə inanım?

Qoymaram heç vaxt tapdana

Mənliyim, şərəfim-şanım.

Yüz dəfə süzgəcdən keçir,

Tərtəmizdi, safdı qanım.

Hər sifətin mənə ayan,

Kimdi kölgəmi daşlayan

Bildim, bilmədim - sənə nə?

Hərdən yaxamdan asılıb

Keçmə soluma-sağıma.

İşin düşməsə çıxmazsan

Yəqin heç vaxt sorağıma.

Qoy, dinməz gedim yolumla,

Dolaşma əl-ayağıma.

Əcələ nə qanun-qayda,

Nə vaxtsa yasda, ya toyda

Öldüm, ölmədim - sənə nə?!

26.08.2023

Kaş, mənim qarşıma heç çıxmayaydın...

Uzun illərdən sonra təzədən qarşıma çıxan bir xanıma

Dönük bəxtə əl açmağım əbəsdi,

Uğursuz bir sevgi boğulmuş səsdi...

Səni görən kimi ürəyim əsdi,