Əziz qardaşım Rəşad Məcid!

"Şuşa dəftəri" adlı şeir silsiləni hədsiz maraqla oxudum. Möhtəşəmdir, hətta, "10 sentyabr"dan da möhtəşəm. Axı, bu, poeziyadır! Bəri başdan təbrik edirəm. Əvvəlki yazılarında olduğu kimi, başqalarının sezmədiyi, bir növ, böyründən xəbərsiz ötdüyü lövhələri, olmuşları, detalları tutmağın, poetik yaddaşa çevirməyin ürəyimcə oldu. Bu yazıların bir ədəbi səyyah, ədəbi bələdçi olmaq imtiyazı var. Sanki şair oxucunun əlindən tutub Şuşanı, külli-Qarabağı qarış-qarış gəzdirir, şairlə birgə oxucu da Cıdır düzündə köhlən təki havalanır, "Güllü bağ"da ətir saçır, şehə batır, "Turşsu"yun, "İsa bulağı"nın büllur, soyuq suyunun dadına, tamına baxır, Mirhacib ağanın qurduğu yaylaq çadırında yağışa düşür, yenə Cıdır düzündə üzünü dan yerinə tutub təndirdən təzə çıxan Günəşdən bir loxma qoparır, bu qədim qala şəhəri erməni işğalından azad edən şəhidlərin ruhu qarşısında sükuta dalır, böyük Zəfərimizin müəllifi, sayalı ayaqlarını əmin-arxayınlıqla dağ çayının suyunda yuyan Alı Baş Komandanın varlığıyla fəxr eləyir!

Bu şeirlər qıraqdan baxanlara hədsiz xoşbəxt görünən, başına bəxtəvərlik oxunan bir şairin qəlbinin dərinliklərindəki qədim kədərdən, heç zaman silinməyən nisgildən söz açır; körpəlikdən valideylərin iş ünvanlarına uyğun olaraq və yaxud təhsil pillələriylə bağlı Laçında, Ağdamda, Ağcabədidə, Bakıda ömrün gənclik çağlarını yaşayan şair, əslində, didərgin imiş; nə yazıq ki, şeirlər bunu da deyir, Rəşad müəllim!

"Şuşa dəftəri"nin poetik yaddaşı həm tarixidir, həm çağdaşdır, həm də ruhani. Qısaca yazdım, aldığım təəssürat daha dərindir. Bu şeirlər çoxsaylı oxucu üçün ürəyin başında, sol cibdə gəzdirilməyə layiq QARABAĞ HİMNLƏRİDİR!

Rəşad müəllim, sənin bu şeirlərini oxuyanda, bilmirəm nədənsə, Bişkek səfərimizi xatırladım. Atabeytdə böyük dünya yazarı Çingiz Aytmatovun məzarını ziyarətə getmişdik. Əvvəl yanaşı durmuşduq. Dönüb gördüm, ziyarətçilərdən aralanıb Atabeytin ən hündür yerinə qalxıb tək dayanmısan. Yaxınlaşanda baxdım, ağlayırsan. Mən də kövrəldim. Sənin ağlamağına kövrəldim. Amma sən nəyə görə ağlayırdın, bilmədim və soruşmadım..

Bir daha təbriklər! Var ol, yaşa, yarat!

Qardaşın Vaqif Bəhmənli.

525-ci qəzet .- 2024.-17 avqust (№147).- S.16.