Xaricdə təhsilin üstünlükləri: Dövlət Proqramı unikal imkanlar vəd edir

Bu günlərdə "Gənclərin xarici ölkələrin nüfuzlu ali təhsil müəssisələrində təhsil almalarına dair 2022-2028-ci illər üçün Dövlət Proqramı"na 2024-2025-ci tədris ili üzrə həyata keçirilən sənəd qəbuluna dair növbəti siyahı açıqlandı. Məlumdur ki, "Dövlət Proqramı"ndan məqsəd gənclərə xarici ölkələrin nüfuzlu ali təhsil müəssisələrində təhsilalma imkanları yaratmaqla, onların Azərbaycan Respublikasının gələcək inkişafını təmin edəcək və qlobal çağırışlara cavab verəcək müasir texnologiyaları çevik mənimsəyən, praktiki bilik və bacarıqlara yiyələnən, müasir və gələcək əmək bazarının tələblərinə cavab verən rəqabətqabiliyyətli, yüksəkixtisaslı peşəkar kadrlar kimi hazırlanmasını təmin etməkdir. Yeni açıqlanan siyahıya əsasən, daha 205 namizəd proqram iştirakçısı adını qazanıb.

Beləliklə, növbəti tədris ilində Dövlət Proqramı çərçivəsində bakalavriat səviyyəsi üzrə 125, magistratura səviyyəsi üzrə 375 nəfər olmaqla ümumilikdə 500 namizəd xaricdə təhsil alacaq.

Təqaüd qazanan 500 gəncin 135-i universitetlər üzrə dünya reytinq cədvəllərində ilk onluqda olan ali təhsil müəssisələrində təhsil alacaq. Cari ildə təqaüd hüququ əldə etmiş namizədlərdən 15 nəfəri "Columbia University", 7-si "Harvard University", 7-si "University of Cambridge", 6-sı "Yale University", 5-i "University of California, Berkeley", 4-ü "National University of Singapore", 3-ü "University of Oxford", 3-ü "ETH Zurich", 3-ü "University of Chicago" və digər nüfuzlu universitetlərdə təhsil alacaq.

Elm və Təhsil Nazirliyi ilə bağlanılacaq müqavilənin müvafiq şərtinə əsasən, proqram iştirakçısı təhsili bitdikdən sonra 2 ay ərzində ölkəyə qayıtmalı və 5 il müddətinə burada əmək fəaliyyəti ilə məşğul olmalıdır.

Qeyd edək ki, Dövlət Proqramı çərçivəsində həyata keçirilmiş müsahibə mərhələsindən müsbət nəticə qazanan, lakin müsabiqə mərhələsindən keçməyən namizədlərə aid ehtiyat siyahısı mövcuddur. 2024-2025-ci tədris ili üzrə proqram iştirakçısı adını qazanmış namizədlərdən bu və ya digər səbəbdən imtina edənlər olarsa, Seçim Qaydalarının 4.20-ci bəndi rəhbər tutulmaqla həmin siyahıya istinadən növbəti iştirakçılar seçiləcəklər.

Xatırladaq ki, Prezident İlham Əliyev "Gənclərin xarici ölkələrin nüfuzlu ali təhsil müəssisələrində təhsil almalarına dair 2022-2026-cı illər üçün Dövlət Proqramı"nın təsdiq edilməsi haqqında" Azərbaycan Respublikası Prezidentinin 2022-ci il 28 fevral tarixli 3163 nömrəli Sərəncamında dəyişiklik edilməsi barədə Sərəncam imzalayıb. Sərəncama əsasən sözügedən proqramın müddəti uzadılıb, təhsil alacaq tələbələrin sayı 400-dən 500-dək artırılıb.

Azərbaycanlı gənc Murad Qurbanov magistr təhsili üçün dünya üzrə reytinqdə ən yaxşılar sırasındakı 8 universitetdən qəbul alıb. Onun seçimi dünyanın TOP 10 universitetindən biri olan University of California, Berkeley-də Beynəlxalq hüquq ixtisası (LLM in international law) üzrə olub. O, "Gənclərin xarici ölkələrin nüfuzlu ali təhsil müəssisələrində təhsil almalarına dair 2022-2026-cı illər üçün Dövlət Proqramı" çərçivəsində təhsil alacaq.

M.Qurbanov orta məktəbdə də əlaçı şagird olub, 648 bal yığaraq ADA Universitetinin hüquq fakültəsinə qəbul olub. Bakalavr təhsilini ortalama 3.84 GPA ilə başa vuraraq universiteti fərqlənmə diplomu ilə bitirib: "Mən hər bir uğurun təməlinin başlanğıcdan irəli gəldiyinə inanan biriyəm. Məktəb dövründə müəllimlərimin göstərdiyi qayğı və diqqətin mənim indiki uğurumda böyük rolu olub. Potensiallı gənclərin potensialının hələ şagirdlik dövründə ortaya çıxarılmasında onların payının çox olduğunu düşünürəm".

O, bakalavr təhsilini hüquq sahəsində alıb, magistr təhsilini də bu istiqamətdə davam etdirəcək: "Hüquq ixtisası mənim üçün hər zaman əvəzolunmaz sahə olub. İstər sosial-iqtisadi, istərsə də siyasi inkişafın hüquq sisteminin inkişafı ilə əlaqədar olduğunu düşünürəm. Məhz bu səbəbdən daim peşəkar hüquqşünas kimi yetişməyə çalışmışam. Hüquq fakültəsini seçməyimdə bir neçə faktor rol oynadı. Ən önəmli faktorlardan biri isə ADA Universitetinin hüquq fakültəsi heyəti və beynəlxalq təcrübəni tətbiq edən yenilikçi hüquq təhsili verməsi idi. Məhz bu seçim bu gün mənim dünyanın top 10 universitetindən biri olan "Berkeley"ə qəbul olmağımda mühüm rol oynayıb".

M.Qurbanov qeyd edib ki, təhsil aldığı müddət ərzində Almaniyanın Martin Lüter Universitetində bir semestrlik "Erasmus+" təqaüdü vasitəsilə hüquq təhsili alıb. Akademik göstəricilərimlə yanaşı, kurrikulumdan kənar fəaliyyətlərdə də aktiv məşğul olub: "Belə ki, Helga-Pedersen beynəlxalq məhkəmə simulyasında iştirak etmiş, bir sıra qurumlarda hüquq təcrübəçisi olmuşam. Bundan başqa, Avropa Hüquq Tələbələri Assosiasiyası (ELSA) tərəfindən təşkil olunan insan hüquqlarına dair Helga Pedersen məhkəmə simulyasıyasının Azərbaycan və ADA universiteti üzrə təmsilçi iştirakçılarından biri kimi seçilmişəm. Türkiyənin Ankara şəhərində keçirilən beynəlxalq yarışında iştirak etmişəm. Yarış 2 mərhələdən ibarət idi. Hüquqi memorandumun yazılması və şifahi çıxışların həyata keçirilməsi formasında keçirilmişdi. Müxtəlif dövrlərdə məhkəmə, prokurorluq, vergi və digər aidiyyəti qurumların hüquq şöbələrində təcrübəçi olmuşam".

M.Qurbanovun dediyinə görə, qəbul balı ilk növbədə hər bir kəsin istədiyi ixtisasa yiyələnməsinə imkan verən əsas vasitədir. Lakin bundan əlavə düşünürəm ki, yüksək akademik göstəricilər tələbənin mükəmməliyyətçi xarakterindən xəbər verir: "Yəni bu kimi tələbələr daim hər şeyin ən yaxşısına sahib olmağa çalışırlar. Mən də özümü bu kateqoriya insanlardan biri kimi hesab edirəm. Uğurun əsas açarını da məhz bu xüsusiyyətdə görürəm".

O vurğulayıb ki, magistr dərəcəsi üzrə alacağı hüquq təhsilinin (LL.M.) müddəti 1 ildir: "Yəni dövlət proqramı çərçivəsində mənə təklif edilən ümumi təqaüdün miqdarı təqribən 110 min ABŞ dolları məbləğindədir. Dövlət təqaüdü illik 79 min dollar həcmində təhsil haqqımı qarşılayır. Bundan əlavə, aylıq 1800 dollar məbləğində təqaüd təklif edir. Çəkilən nəqliyyat, viza xərcləri, sığorta haqları da dövlət proqramı çərçivəsində qarşılanır".

Gələcək planlarından söz açan M.Qurbanov deyib ki, hüquq sahəsi üzrə fəaliyyətini davam etdirəcək: "Dövlət Proqramının iştirakçısı olaraq öhdəliyim var ki, magistr təhsilimi başa vurduqdan sonra 2 ay ərzində ölkəyə qayıdım və 5 il ərzində burada əmək fəaliyyəti ilə məşğul olum. Lakin bunu özüm üçün bir məhdudiyyət olaraq görmürəm, əksinə, bu, mənim Berkeley hüquq məktəbində əldə edəcəyim bilik və bacarıqlarımın Azərbaycan hüquq sisteminə töhfə vermək üçün istifadə edilməsi hədəfimlə tam olaraq üst-üstə düşür. Hesab edirəm ki, mənim kimi digər prestijli xarici univeristetlərə də qəbul olan tələbələrin ilkin hədəfi məhz bundan ibarət olmalıdır".

"Gənclərin xarici ölkələrin nüfuzlu ali təhsil müəssisələrində təhsil almalarına dair 2022-2028-ci illər üçün Dövlət Proqramı" çərçivəsində Böyük Britaniyanın Vorvik Universitetində magistratura təhsili alacaq Günel Qasımlı qeyd edib ki, hazırda Azərbaycanda fəaliyyətin bütün sahələrində rəqəmsallaşma sürətlə tətbiq edilir: "Qeyri-neft sektorunun əhəmiyyətini anlayaraq istərdim ki, Azərbaycanda yeni startaplar yaransın, bu startaplara xaricdən və yerli şirkətlərdən böyük investisiyalar cəlb edək və ölkəmizdə fərqli maliyyələşdirmə mənbələri yaradaq. Xaricdə təhsilimi bitirdikdən sonra Azərbaycanda çoxsaylı vençur kapital fondlarının yaradılmasını istərdim. Bu istiqamətdə ekspert olmaq istəyirəm. Məqsədim ölkəmizdə həyata keçirilən inkişaf strategiyasında yaxından iştirak etməkdir".

G.Qasımlı həm orta məktəbi, həm də universiteti fərqlənmə ilə bitirib: "Bakıdakı 147 nömrəli Texniki-Humanitar Liseyi fərqlənmə ilə bitirmişəm. 2018-ci ildə 609 balla UNEC-ə dövlət sifarişi əsasında qəbul olmuşam. Maliyyə və mühasibat uçotu fakültəsində mühasibat uçotu və audit ixtisası üzrə təhsil almışam. Təhsil müddətində universitet tərəfindən təqaüdlə təmin olunmuşam. Universiteti də fərqlənmə diplomu ilə bitirmişəm. Bu 4 ildə fərqli sahələrdə - banklar və şirkətlərdə hüquq, audit üzrə təcrübə proqramlarında iştirak etmişəm. Həmçinin startaplar və investisiyalar üzrə məhsulların yaradılması ilə bağlı işlərdə çalışmışam. Hazırda SABAH.HUB İnnovasiya Mərkəzində çalışıram, eləcə də regionun ən böyük investisiya tədbiri "Baku ID"nin təşkilati işlərində yer almışam".

Xaricdə təhsilə dair Dövlət Proqramının bütün iştirakçılarını təbrik edir, onlara yeni uğurlar arzulayırıq!

Sevinc QARAYEVA

525-ci qəzet.-2024.- 27 avqust (№153).-S.14.