Mədəniyyətin ekoloji maarifləndirmədə rolu

COP29-un VƏTƏNDAŞ CƏMİYYƏTİ ÜÇÜN DƏRSLƏRİNƏ DAİR MÜLAHİZƏLƏR

Azərbaycanın COP29 kimi tarixə düşən beynəlxalq miqyaslı tədbirə ev sahibliyi etdiyi günlərdən bizi bir həftədən bir qədər çox vaxt ayırır. Amma bu böyük tədbirdən qalan xatirələr, onun Azərbaycan cəmiyyətinə təsiri hələ uzun müddət müzakirə predmeti olacaq.

Mədəniyyət sahəsində fəaliyyət göstərən qeyri-hökumət təşkilatının rəhbəri kimi COP29-un həm "Yaşıl zona"sında, həm də "Mavi zona"sında təşkil olunan tədbirlərə qatılmaq, çıxış etmək, müzakirələr zamanı rəy bildirmək, doğrudan da, maraqlı və qürurverici idi. Bu dinamik məkanlarda gedən müzakirələr, həmfikirlərlə, habelə müxtəlif ölkələri təmsil edən təşkilat rəhbərləri ilə əlaqə qurmaq, mədəniyyətin dili ilə gənc nəslin ekoloji biliklərinin artırılmasına xidmət edən layihələrimiz ətrafında fikir mübadiləsi aparmaq sözün əsl mənasında beynəlxalq əməkdaşlıq təcrübəsi idi.

COP29 iqlim dəyişikliklərindən narahatlıq keçirən insanları dünyanın hər yerindən Bakıya toplamışdı. İnsanlar bu tədbirdə müxtəlif dillərdə danışsalar da, əsas ünsiyyət mövzusu ana təbiətin qorunması idi.

Bu qlobal problemin həllində isə yalnız dövlət orqanlarının fəaliyyətinə arxalanmaq kifayət etmir. Vətəndaş cəmiyyəti fəallarının, bəşəriyyətin sabahına biganə olmayan hər kəsin bu işə öz töhfəsini verməsi indi daha vacibdir. Bu baxımdan dünyanın müxtəlif ölkələrindən paytaxtımıza təşrif buyuran qeyri-hökumət təşkilatlarının nümayəndələri ilə ünsiyyət, iqlim dəyişikliyi ətrafında müzakirə və diskussiyalar, şübhəsiz, fəaliyyətimizə öz təsirini göstərəcək.

Görüş və müzakirələr zamanı mədəniyyət sahəsində fəaliyyət göstərən qeyri-hökumət təşkilatlarının iqlim dəyişikliyinə, bu problemin aradan qaldırılmasına orijinal baxışını görməmək mümkünsüz idi. Vətəndaş cəmiyyətinin nümayəndələri rənglərin, musiqinin dili ilə ətraf mühitin qorunması üçün nələr edə biləcəklərindən danışırdılar. Çünki iqlim dəyişikliyinə qarşı mübarizədə yalnız texniki tədbirlər kifayət eləmir, həm də dəyərlərin və baxışların kökündən dəyişməsi zərurətini ortaya çıxarır ki, bu işdə də mədəniyyət və incəsənətin rolu əvəzedilməzdir.

Bu baxımdan Azərbaycan vətəndaş cəmiyyətini təmsil edən təşkilatların COP29-da xüsusi fəallıq göstərməsi təsadüfi deyildi. Azərbaycan Milli QHT Forumunun "Yaşıl zona"da yerləşən pavilyonu, sözün əsl mənasında, maraqlı görüş və tədbirlər məkanına çevrilmişdi. Burada ekoloji fəaliyyətin mədəni irslə əlaqələndirilməsi üzrə innovativ yanaşmalar nümayiş olundu, incəsənət sərgiləri, müxtəlif maarifləndirici təşəbbüslər təqdim edildi. Pavilyon nəinki beynəlxalq tərəfdaşların Azərbaycan təşəbbüsləri ilə tanışlıq nöqtəsi, həm də vətəndaş cəmiyyəti fəallarının diskussiya meydanına çevrildi.

Bu məkanda bizim təşkilatın Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə ingilis dilində alt yazılarla istehsal etdiyi "Malayziyadan görünən Şuşa" sənədli filmi də təqdim olundu. Əsrarəngiz gözəlliyi və ekoloji baxımdan təmiz təbiəti ilə seçilən Şuşamız haqqında film tədbir iştirakçılarında böyük maraq oyatdı.

"Yaşıl zona"dakı canlı ünsiyyətdən "Mavi zona"dakı maraqlı fikir mübadilələrinə qədər COP29 mədəniyyət liderlərinin qlobal iqlim dialoqundakı əhəmiyyətli rolunu bir daha təsdiqlədi.

Dünya əhəmiyyətli COP29-a milli-mədəni dəyərlərimizə uyğun ev sahibliyi edən bir ölkənin vətəndaşı kimi əmin olduq ki, aldığımız dərslər və əməkdaşlıq əlaqələri iqlim dəyişikliyinə qarşı mübarizə sahəsində, daha yaşıl və davamlı bir dünya uğrunda gələcək fəaliyyətimizin düzgün istiqamətləndirilməsinə imkan yaradacaqdır.

Şəhla NAĞIYEVA

"Sönməz Məşəl" Mədəni Əlaqələr İctimai Birliyinin sədri

525-ci qəzet $g 2024.- 5 dekabr (№223).- S.9.