Öz qanı ilə tarix yazmaq

Yağı düşmənə qarşı 44 günlük haqq savaşımız başlananda qəlbi Vətən, torpaq sevdalı minlərlə igidimiz ölümün gözünə dik baxa-baxa özünü odun-alovun içinə atdı. Və öz qanları bahasına qəhrəmanlıq salnaməsi yazaraq xalqımıza şanlı qələbə yaşatdılar. Vətən səmasının əbədi günəşinə çevrilən o qəhrəman oğullardan biri də 1988-ci il oktyabrın 5-də Cəlilabad rayonunun Göytəpə şəhərində anadan olan Azərbaycan Ordusunun baş giziri şəhid Elmir Məmmədovdur. Adı dillərdə qəhrəmanlıq dastanına dönən Cəlilabadin igid oğlu ölümündən sonra dövlətimiz tərəfindən "Vətən uğrunda", "Cəsur döyüşçü", Cəbrayılın və Füzulinin azadlığına görə medalları ilə təltif olunub.

Vətənpərvərlik ruhunda tərbiyə alan, Azərbaycanın hər qarşını canından əziz tutan Elmir Məmmədov Qarabağın işğalını öz vicdanına sığışdıra bilmirdi. Elə ordu sıralarına qatılmaqda da amalı Vətən torpaqlarını işğaldan azad etmək idi. Hərbi xidmətini cəbhə bölgəsində çəkmişdi. Nümunəvi xidməti ilə seçilirdi. Həqiqi hərbi xidmətini başa vurandan sonra yenidən bu geyimi daşımağa qərar verir. Çünki cənnətməkan yurd yerimiz Qarabağ hələ yağı tapdağında idi. Elmir gizir təhsili alıb Vətənin keşiyində durur.

Baş gizir Elmir Məmmədov 2016-cı ilin Aprel döyüşlərində düşmənə qarşı şərəflə döyüşür, böyük şücaət göstərir. İgid döyüşçü ölümə meydan oxuya-oxuya Lələtəpəyə üçrəngli bayrağımızı sancanlardan olur. Bu möhtəşəm qələbədən sonra deyirmiş ki: "Vətən bizim namusumuz, şərəfimizdir. O torpaqların yağı ayaqları altında qalması bizə yaraşmaz".

2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və ölkəmizin ərazi bütövlüyünün bərpa olunması üçün başlanan Vətən müharibəsi zamanı baş gizir Elmir Məmmədov Cəbrayılın və Füzulinin azadlığı uğrunda gedən haqq savaşımızda ilk gündən düşmənin kabusuna çevrilir, ona qan uydurur, neçə-neçə canlı qüvvəsini, hərbi texnikasını məhv edir. Füzulidə gedən ağır ölüm-dirim savaşında şəhidlik zirvəsinə ucalır, onun qəhrəmanlığı, yüksək döyüş məharəti isə hərbçi dostlarına nümunə olur...

Şərəfli ölümü ilə Vətəninə, millətinə başucalığı gətirən, müqəddəs şəhidlik zirvəsindən gələcəyə boylanan Elmir Məmmədovun həyat yolu həmişə gələcək nəsillərə örnək olacaq.

Zəfər ORUCOĞLU

525-ci qəzet .- 2024.- 13 dekabr(№229).-S.14.