"Azərbaycan gəncliyi həyatın bütün sahələrində qaynar fəaliyyəti ilə seçilir"

Azərbaycan qanunvericiliyinə əsasən, gənc dedikdə 15-29 yaş aralığında olan insan nəzərdə tutulur. Bu gün ölkə vətəndaşlarının 2,3 milyon nəfəri gənclərdən ibarətdir. Gənclərin 52,8 faizi şəhər yerlərində, 47,2 faizi kəndlərdə yaşayır. Gənc əhalinin 47,9 faizini qadınlar təşkil edir.

Azərbaycan əhalisinin mühüm bir hissəsini təşkil edən gənclərin hər keçən gün cəmiyyətdə çəkisi və rolu artır. İndiki dövrdə gənclərin dinamikliyi daha çox diqqət çəkir. Xüsusən də müasir informasiya-kommunikasiya texnologiyalarının timsalında bu, özünü daha qabarıq göstərir. Belə bir dövrdə Azərbaycanda da gənclərin necə tərbiyə olunması qarşıda duran mühüm vəzifələrdən biridir. Xüsusilə müstəqil Azərbaycan üçün bu, məlum səbəblər üzündən vacib əhəmiyyət kəsb edir. Digər tərəfdən, gənclər aparıcı qüvvə olaraq gələcəkdə dövlətin yükünü öz üzərində daşımalı olacaq. Gənclərin milli mənlik şüurunun və vətənpərvərlik hisslərinin yüksək səviyyədə inkişaf etdirilməsi ölkənin və dövlətin qarşısında duran prioritet məsələdir.

Millət vəkili Ceyhun Məmmədovun sözlərinə görə, Azərbaycanda bu gün gənc nəslin vətənpərvərlik ruhunda yetişdirilməsi üçün dövlət tərəfindən müxtəlif addımlar atılır. Bunun nəticəsi olaraq da Vətən müharibəsi zamanı gənclərimizin necə torpaqlarımızın müdafiəsinə qalxdığının şahidi olduq: "Prezident İlham Əliyevin də dediyi kimi, onun hakimiyyəti illərində Vətənini, dövlətini sevən gənclər yetişib və bu gün onlar torpaqlarımızın müdafiəsində iştirak edirlər. Ümumiyyətlə, Ulu öndər Heydər Əliyevin dövründən başlayaraq, bizim gənclərimizin bu vətənpərvər, milli ruhda mənlikdə böyüdülməsi üçün dövlət ardıcıl addımlar atdı. Ümumiyyətlə, bu gün gənclərin tərbiyəsi, onların vətənpərvərlik ruhunda, milli ruhda dövlətə bağlı, sədaqətli yetişdirilməsi üçün davamlı olaraq işlər həyata keçirilir. Yəni bu günün gəncləri gələcəyin idarəçiləridir, gələcəyin ayrı-ayrı strukturlarında işləyən şəxslərdir. Yaşlı nəsil getdikdən sonra yeni nəsil gələcək və bu yeni nəslin də milli ruhda yetişdirilməsi çox vacibdir. Dövlətimiz də məhz bu istiqamətdə addımlar atır. Dövlət tərəfindən gənclərə evlər verilib, gənc alimlərə xüsusi diqqət və qayğı göstərilir, gənc kadrlara vəzifə verilir. Son illər bu sahədə bir çox uğurların, yeniliklərin şahidi oluruq: gənc, savadlı kadrlar dövlətin quruculuğunda, idarəçiliyində aktiv iştirak edirlər. Əlbəttə, bu gün gənclərimizin üzərində çox böyük, məsuliyyətli vəzifələr var. Onlar dövlətin yaratdığı şəraitdən düzgün, məqsədyönlü istifadə etməli, gələcəklərini fikirləşməli, eləcə də dövlətimizin inkişafına öz töhfələrini verməlidirlər. Bu gün Azərbaycan gəncliyinə çox böyük inam və ümid var. Düşünürük ki, inşallah, gənclərimiz gələcəkdə dövlətimizin müstəqilliyinin möhkəmlənməsi, qələbəmizin əbədiləşdirilməsi üçün böyük səylə çalışacaqlar".

Millət vəkili Fatma Yıldırım bildirib ki, Azərbaycanda uğurlu dövlət gənclər siyasəti həyata keçirilir. 1993-cü ildə Ümummilli lider Heydər Əliyevin hakimiyyətə qayıdışı gənc nəslə diqqəti dövlət siyasətinin əsas istiqamətlərindən birinə çevirdi. Azərbaycanı gənclər ölkəsi, gəncləri isə Azərbaycanın gələcəyi adlandıran Ulu öndər böyüməkdə olan gənc nəsilə qayğını hər zaman önə çəkirdi. Hüquqi və dünyəvi dövlət quruculuğu prosesində, çoxşaxəli islahatların reallaşdırıldığı bir vaxtda gənclik enerjisinə ehtiyac duyulduğunu düzgün qiymətləndirən Heydər Əliyev müxtəlif illərdə gənclər siyasətinin ayrı-ayrı istiqamətləri üzrə müvafiq sənədlər imzalayıb.

Fatma Yıldırım bildirib ki, ayrı-ayrı dövlət orqanlarının gənclərlə iş sahəsindəki fəaliyyətini əlaqələndirmək məqsədi ilə Ulu öndər Heydər Əliyevin 1994-cü il 26 iyul tarixli Fərmanı ilə Gənclər və İdman Nazirliyi yaradılıb: "Bu nazirlik gənclərlə iş sahəsində vahid dövlət siyasətinin reallaşdırılmasını təmin etdi. Bütövlükdə, əsası Ümummilli lider Heydər Əliyev tərəfindən qoyulmuş dövlət gənclər siyasəti Azərbaycan gəncliyinin inkişafında dərin izlər buraxıb. Ulu öndərin 1997-ci il fevralın 2-də imzaladığı Fərmana əsasən, fevralın 2-si Azərbaycan Gəncləri Günü elan edilib. Həmin vaxtdan etibarən 2 fevral MDB məkanında və Şərqi Avropa ölkələri arasında ilk dəfə olaraq Azərbaycanda təntənəli şəkildə qeyd edilməyə başlanıb. Hər il gənclərimiz bu günü böyük coşğu ilə qeyd edirlər".

Millət vəkilinin dediyinə görə, müasir, müstəqil Azərbaycanın intensiv inkişafını təmin edən fundamental faktorlardan birini də cəmiyyətin ən dinamik təbəqəsi qismində çıxış edən gənclərin potensialından səmərəli istifadə təşkil edir: "Gənclər siyasəti ölkədə həyata keçirilən inkişaf siyasətinin mühüm tərkib hissəsidir. Azərbaycan gəncliyi ictimai həyatın bütün sahələrində qaynar fəaliyyəti ilə seçilir və siyasi, iqtisadi, humanitar, sosial tədbirlərin həyata keçirilməsində mühüm rol oynayır. Gənclərin fəaliyyəti üçün dövlətin yaratdığı geniş imkanlar nəticəsində bu təbəqə cəmiyyətin aparıcı qüvvəsinə çevrilmişdir və gəncliyimiz ölkəmizin gələcəyi uğrunda inamlı addımlar atmaqdadır".

Fatma Yıldırım qeyd edib ki, bu gün Azərbaycanda yüksək intellektual səviyyəyə, vətənpərvərlik hissinə, milli düşüncəyə malik gənclik formalaşıb: "Prezident İlham Əliyevin gənclərin potensialının gerçəkləşməsinə, onların vətənpərvər, savadlı kadr kimi yetişməsinə, gənc ailələrin sosial təminatına yönələn tədbirləri dövlətin uzaqgörən siyasətinin göstəricisi kimi qiymətləndirilməlidir. Gənclər siyasəti gənc nəslin ictimai-siyasi həyatdakı rolunun artmasına, ölkənin aparıcı qüvvəsinə çevrilməsinə, bütövlükdə, kreativ gəncliyin formalaşmasına şərait yaradıb. Dövlətin gənclərə dəstək və diqqət göstərməsinin nəticəsində Azərbaycan gəncliyində özünə, öz gücünə, istedadına inam hissi artıb. Xüsusilə, gənclərimizin yüksək vətənpərvərlik ruhu vurğulanmalıdır. Rəşadətli Azərbaycan Ordusunun sıralarındakı Vətən uğrunda mətanətlə vuruşan qəhrəman gənclərimiz öz adlarını xalqımızın ən yeni tarixinə qızıl hərflərlə yazdılar. Məhz onların rəşadəti sayəsində əldə olunan bu şanlı Zəfər ölkəmizin ərazi bütövlüyünü bərpa etdi, xalqımız otuz illik həsrətdən sonra tarixi torpaqlarımıza qovuşdu. Azərbaycan Prezidenti, Müzəffər Ali Baş Komandan İlham Əliyev bununla bağlı demişdir: "Bu gün Azərbaycan gəncləri cəmiyyətimizin fəal hissəsidir. Biz haqlı olaraq gənclərimizlə fəxr edə bilərik. Bizim gənclərimiz torpaq uğrunda, Vətən uğrunda vuruşurlar. Bizim şəhidlərimizin böyük əksəriyyəti gənclərimiz olubdur. Bizim gənclərimiz hərbi qələbələrimizi şərtləndiriblər". Gənclərimiz Vətən uğrunda döyüşlərlə yanaşı, arxa cəbhədə də yüksək fəallıq göstərib, ölkəmizlə bağlı həqiqətlərin, işğalçı Ermənistanın əzəli torpaqlarımızda törətdikləri vandallıq aktlarının beynəlxalq ictimaiyyətin diqqətinə çatdırılmasında fəal iştirak ediblər".

Millət vəkili, professor Hicran Hüseynova deyib ki, hər bir xalqın inkişafında sağlam, vətənpərvər gənclik mühüm rol oynayır. Gənclər ölkəmizin bu günü, gələcəyi, həm də sabaha olan ümididir. 44 günlük Vətən müharibəsində biz bir daha gördük ki, Azərbaycanın böyük və güclü gələcəyi var. Çünki sağlam, cəsur, qəhrəman bir nəslin yetişdiyini gördük. Onların hamısı Prezident, Ali Baş Komandan İlham Əliyevin ətrafında bir yumruq kimi birləşdilər. Bizim gənclərimiz torpaq uğrunda, Vətən uğrunda vuruşdular, 30 illik Vətən həsrətinə öz canları, qanları hesabına son qoydular: "Gənclərimiz təkcə döyüş meydanında deyil, bütün sahələrdə mübarizə aparırdılar, virtual məkanda, ölkəmizin haqq mübarizəsini işıqlandırırdılar. Dünyanın müxtəlif ölkələrində yaşayan gənclərimiz Azərbaycan həqiqətlərini təbliğ edir, erməni terroru haqqında məlumatlar yayır, tədbirlər, yürüşlər keçirirdilər. Yüksək təşkilatlanma var idi. Bütün bunlar bir daha göstərdi ki, ötən illər ərzində çox güclü gənclik formalaşıb. Biz gənclərimizlə fəxr edirik. Dövlətimizin inkişafı intellektual səviyyəli gənc kadrların yetişib avanqard qüvvəyə çevrilməsindən çox asılıdır. Azərbaycanda gənclərin elm, idman, mədəniyyət və digər sahələrdə irəliləməsi, uğurlar qazanması üçün hər cür şərait yaradılıb. Mütəmadi olaraq təkmilləşdirilən gənclər siyasəti yeni nəslin ictimai-siyasi həyatdakı rolunun artmasına, ölkənin aparıcı qüvvəsinə çevrilməsinə, bütövlükdə, kreativ gəncliyin formalaşmasına şərait yaradıb. Bu gün Azərbaycanda yüksək intellektual səviyyəyə, vətənpərvərlik hissinə, milli düşüncəyə malik gənclər formalaşır. Azərbaycan gəncləri gündən-günə ölkənin ictimai-siyasi həyatında daha böyük rol oynayırlar".

Sevinc QARAYEVA

525-ci qəzet .- 2024.- 24 dekabr(№236).-S.15.