DAİM SƏMADA QALMAĞA MƏHKUM
TƏYYARƏ
O çağlarda ki "Ölülər" ilk dəfə
səhnəyə gəlmişdi, artıq operanın səkkiz
yaşı vardı və Üzeyir bəyin "Leyli və Məcnun"u,
ardınca yaratdığı "Şeyx Sənan"ı,
"Rüstəm və Söhrab"ı, "Şah Abbas və
Xurşudbanu"su xalq arasında elə rəğbət
qazanmışdı ki, bu şöhrətə şirniklənərək
həvəsə düşənlər
çoxalmışdı, bənzər təzə operalar
quraşdırıb səhnəyə gətirmək bir
növ azara çevrilmişdi. Bu xəstə gedişatı
izləyən Hacı İbrahim Qasımov 1916-cı ilin 7
mayında "Bəsirət"də belə yazırdı
ki, bir çox "müəlliflər" operanın rəvacda
olduğunu görüb "Xırdavat alan", "Mehr və
Mah", bilməm dəxi nə alan kimi şeylər düzəldib
gözəl səhnəni büsbütün bir balaqan
halına gətirdilər.
Hacı İbrahim bunu yazır və ardınca da
rişxənd edirdi ki, "Ölülər"in ilk
tamaşasından sonra əli xırda-para təfərrüatları
tənqid etməyə qalxanlar yaxşı olardı ki, opera
işimizdəki bu mərəzdən, operetta sahəsindəki
böyük bəladan yazsınlar: "Opera və
operettaçılarımız başa düşməlidir ki,
cib mənfəətinə milləti fəda etmək
böyük cinayətdir. Burasını onlar
anlamalıdırlar ki, bu bədbəxt millətin zurna səsini
eşitməyə ehyiyacı yoxdur.
...Müsəlman səhnəsinə "Molla Nəsrəddin"in
müdir-i möhtərəmi Cəlil Məmmədquluzadə
cənabları tərəfindən yazılmış olan
"Ölülər" kimi pyeslər lazımdır. Həm
bu cür pyeslər bu cahil, bu avam, bu bədbəxt milləti
ayıldar, huşyar edər, həm də bəzi
şarlatanların nə olduğunu açıqcasına
meydana qoyar.
...Ey kaş müsəlman səhnəsində ələddavam
(davamlı olaraq - R.H.) "Ölülər" kimi ibrətli
pyeslər oynanaydı.
Molla Nəsrəddinin "Ölülər"i
ölü fikirləri dirildəcək qədər mahiranə
bir üslubda yazılmışdır. İştə ona
görə də yaşasın Molla Nəsrəddinimiz!"
1916-cı ilin 29 aprelində "Ölülər"
oynanırdı, tamaşaçılar
hayıl-mayıllıqla baxırdı və çəkiliş-filan
yoxdu ki, onların həmin anlarda hansı hiss-həyəcanları
yaşadığını gələcək
üçün hifz edə. Amma nə yaxşı ki,
tamaşa gedən həmin saatlardakı ovqatı elə sanki
kinolentə alınıbmış kimi dəqiqliklə bizə
yetirən və özümüzü elə o günün
içərisindəymiş kimi təsəvvür etməyə
körpü olan inanımlı xatirələr qalır.
1916-cı ilin 17 mayında "Ölülər"in
ilk tamaşasından azacıq sonra "Açıq
söz" qəzetində Şəfiqə Əfəndizadənin
təəssüratı dərc edilir. O da tamaşaya ilk
baxanlardandı və həmin gün baş verən bir hadisə
onu riqqətə gətirmişdi. Yazırdı ki, qadınlar
üçün qapalı lojalardan birində tamaşa
başlayandan az sonra hönkürtü səsi gəldi, getdikcə
də o ağlamaq səsi şiddətlənirdi,
görünür, yanında oturanlardan kimlərsə o
qadını sakitləşdirmək istəyirdilər, lakin
mümkün olmurdu, onu sakitləşdirmək istədikcə
əksinə, daha artıq hönkürtü ilə
ağlayırdı.
Və Şəfiqə Əfəndizadə fasilədə
gedib yaxınlaşır həmin qadına. Maraq ona güc gəlmişdi,
istəmişdi öyrənsin ki, bu qadını camaat içərisində
belə için-için ağlamağa vadar edən hansı
ağrı, hansı çəkilməz dərddir
Az sonra toxtayan qadın ona taleyini
danışıbmış ki, bu əsər göstərilməyə
başlanınca Nazlının taleyində öz gerçək
qismətini görüb, hüznlü ömrü vərəq-vərəq
gözü önündən keçib. Deyibmiş ki, dörd
yaşında olanda onu bir nəfərə adaxlı etmiş,
səkkiz yaşına çatanda elçilər
qapılarına düşmüşdülər. Atası
hamısına "yox" cavabı versə də ki, hələ
uşaqdır, bir neçə qoçu buna məhəl
qoymamış, hədələməyə
başlamışdılar, xəbər göndərmişdilər
ki, verməsəniz, qızı zorla
qaçıracağıq.
Ancaq hər halda doqquz yaşına çatanda onu
varlı bir hacının oğluna ərə veriblərmiş,
bütün bədbəxtlikləri də, öz deməsincə,
o gündən başlanıbmış. Əsla tanımadığı
bu yad insanla bir neçə il birgə yaşasa da, ürəyində
ona qarşı heç bir istək yaranmır və günlərin
birində əri vəfat edir. Düşünür ki,
Allahın işidir, qapımı açır, azadlığa
çıxaram. Lakin sən demə, daha böyük müsibətlər
hələ bundan sonra gələcəkmiş. Mərhumun
arvadı və üç uşağı da olan
qardaşı yapışır bu zavallı qadından ki, səni
də alacağam, rəva görə bilmərəm ki,
qardaşımın arvadı başqasına getsin. Əslində
isə başabəla qaynını bu izdivaca
tamahsılandıran qardaşından qalan müəyyən
mal-dövlətmiş ki, onu qamarlamağa
çalışırmış. Dul xanım nə qədər
yalvar-yaxar etsə, müqavimət göstərməyə
çalışsa da, nəticə vermir.
Və həmin qadın indi illər sonra,
"Ölülər"in pərdələri
arasındakı fasilədə yana-yana Şəfiqə Əfəndizadəyə
nağıl edirmiş ki, məni aldı, artıq birinci
arvadından altı, məndən də iki uşağı
var, bütün həyatım da tar-mar oldu: "Bu zülmlər
mənim başıma gəldikdən sonra bunların
hamısını iki saatda gözümün qabağında
göstərdikləri üçün daha özümü
saxlaya bilmədim. Mənim ixtiyarım öz əlimdə
olsaydı, bu teatr yazanı tapıb onun barmaqlarından öpərdim.
Elə biləsən bizim ailələrin arasında
ömür keçirmiş və başımıza gələnləri
təsvir eləmişdir".
"Ölülər" səhnəyə ilk dəfə
1916-cı ilin 29 aprelində çıxdı və mayın
1-dən etibarən həm rus, həm ana dilli qəzetlərdə
ilk məqalələr, siftə təəssüratlar dərc
edilmişdi.
...1916-cı il mayın 1-də "Açıq
söz"də Seyid Hüseynin "Ölülər"in
ilk tamaşası ilə bağlı böyük məqaləsi
dərc edilsə də, bununla ürəyi
soyumamışdı, deyiləsi sözü hələ
çox idi və qəzetin növbəti nömrələrində
də "Ölülər" haqqında düşüncələrini
bölüşməkdə davam etmişdi. Ancaq o günlərdə
"Açıq söz"lə yanaşı, "Yeni
iqbal"da da, "Bəsirət"də də
"Ölülər"lə bağlı məqalələr
dərc edilmişdi və sıra günü-gündən
sıxlaşırdı və həmin ilin may-iyun aylarında
Bakı mətbuatında "Ölülər"lə
bağlı yazıları toplayıb birləşdirsən,
elə ayrıca kitab olar. Belə qaynar marağın əsas səbəbi
"Ölülər"in özü idi, onun
oyatdığı misli olmayan vəcd idi ki, həmin vaxtadək
teatr həyatımızda partlayışa bənzər bu
cür coşquya təsadüf edilməmişdi. Həmin dövrdə
qələmə alınmış və həyəcanla
daşan təəssüratlardan ibarət məqalələrin
hər birinin özünə görə bir ayrı dəyəri
var, amma bütün başqaları arasında Seyid Hüseyndən
qalan yazıların əhəmiyyəti və cəlbediciliyi
ondan ibarətdir ki, özünün aqil təhlillərindən
savayı elə tamaşa günü reportyorluq da etmişdi,
inadkar müxbir kimi hər dəfə pərdə enincə
tamaşanı seyr edən məşhurlara
yaxınlaşmış, onların rəyini soruşaraq
kağıza köçürmüşdü. Nəzərə
alsaq ki, elə mayın 2-sindəcə bunların
hamısı "Açıq söz"də dərc
edilmişdi və həmin müsahibə verənlərdən
də heç biri hansısa sözlərinin təhrif edilməsində
etiraz bildirməmişdilər, deməli, Seyid Hüseyn
söylənmişləri elə təqribən stenoqrafik dəqiqliklə
əks etdiribmiş.
Necə də nəcib iş görüb, bir daha Seyid
Hüseynə rəhmətlər olsun! Həmin rəyi
soruşulanların heç biri sadə adam deyildi və
onların qısa söyləyişlərində sərrast,
müdrik, ədalətli qiymətləndirmələr
vardı. Sonra bu tamaşa haqda heç biri ayrıca məqalə
yazmayıb, ancaq Seyid Hüseynə dedikləri elə
onların hər birinin "Ölülər" haqda
bütöv məqaləsi qənaətini yarada bilir. Sultan Məcid
Qənizadə o çağlar Bakı quberniyası və
Dağıstan vilayəti xalq məktəblərinin müfəttişi
vəzifəsində çalışırdı, ədəbi-mədəni
aləmdə yüksək nüfuz sahibi olanlardandı, belə
demişdi: "Şeyx Nəsrullahın "Ölülər"i
diriltməsi yalansa da, "Ölülər"in ölü
fikirləri diriltməsinə şübhə edilə bilməz".
Böyük Hüseyn Cavid baxışını
özünə xas tərzdə yığcam və şairanə
ifadə etmişdi: "Ölülər"də sənətkaranə
bir dirilik, mahiranə bir incəlik var. "Ölülər"
sənətcə nə isə, mənaca da odur.
"Ölülər"in hər təbəssümündə
acı bir fəryad qopar".
Hüseyn Cavid arif adam idi. Bu sözləri tamaşa
heç sona çatmamış söyləyirdi və
anlayırdı ki, yaxın günlərdə qəzetlərdə
bunca parlaq sənət hadisəsinə biganə qala bilməyən
yazılar dərc edəcək, mümkündür ki, hətta
nələrisə bəyənməyib, yaxud qısqanaraq, qibtə
edərək tənqidə başlayanlar da tapılacaq, ona
görə də o qəbil adamlara bəri başdan cavab
verirdi: "Ölülər" qüsursuz deyildir. Fəqət
bu qüsur gözəl bir rəsmin ətrafında gözə
çarpan ləkələr qədər təbii görünə
bilər".
Tamaşadan sonra Mirzə Cəlilin əlini hərarətlə
ilk sıxanlardan birincisi Nəriman Nərimanov olmuşdu.
"Ölülər"i "artıq dərəcədə
məharətlə yazılmış, məzmunu eynən həyatımızdan
götürülmüş, ideyası inqilablı" əsər
adlandırır və inanırdı ki, bu dram
"paslanmış beyinləri pasdan təmizləyib
ölmüş ruhlara can verəcəkdir". Əlbəttə,
mümkün deyildi ki, Azərbaycanın mədəni-mənəvi
həyatında baş verən bunca möhtəşəm bir
hadisə günündə Üzeyir Hacıbəyli tamaşa
salonunda olmasın - orada idi, baxmışdı, riqqətə
gəlmişdi və Seyid Hüseynin də əvvəlinci
yaxınlaşdıqlarından biri elə o olmuşdu və
demişdi ki, "Molla Nəsrəddin" kimi,
"Ölülər" də baltanı dibindən vuran bir əsərdir.
Azərbaycan səhnəsinin həyatında belə
müstəsna hadisə baş verərkən heç
olardımı Nəcəf bəy Vəzirov
tamaşaçılar arasında olmaya və Seyid Hüseyn də
belə tarixi gündə belə tarixi bir hadisə haqda ondan
mövqe öyrənməyə? Soruşmuşdu və Nəcəf
bəy belə demişdi: "Bu əsərdə olduğu
kimi cahil şeyxlərin təəssüb və
şarlatanlığı heç bir zaman
qamçılanmamış və qamçılana bilməzdi
də. "Ölülər" dramı həyatdan
alınmış, iqtidarla yazılmış, tam təsir bəxş
edən bir əsərdir".
Və Seyid Hüseyn bir neçə gün sonra
yazacağı daha geniş məqaləsindən öncə
elə burada da, rəyini aldığı görkəmli
simaların fikirlərinin ardınca elə onlar tərzdə
qısaca öz düşüncəsini də ifadə edirdi
ki, bilirəm, bir çox möhtərəm ağalar Mirzə
Cəlil cənablarının "Ölülər"ini
Qoqolun "Revizor"u ilə müqayisə edəcəklər,
mən isə bundan da irəli getmək istəyirəm, zira
"Revizor"da Kefli İskəndər kimi bir qüvvə
yoxdur. Seyid Hüseyn çəkicə, miqyasca
"Ölülər"i daha üstün dünya səviyyəsinə
qaldırırdı: "Mən deyirəm ki, bir əsr bundan əvvəl
Fransa əhval-i ictimaiyyəsində "Səfillər" nə
isə, Viktor Hüqonun ac və səfil arvad-uşaqları,
küçələrdə yaşayan sahibsiz gülxanbəyləri
cəmiyyət-i bəşəriyyə və Fransa əfkarına
nasıl təsir bağışlamışsa, bizdə də
"Ölülər" ...həyat-i nisvanimizdə həman
təsiri bağışlayacaq, ruhlarımız üzərinə
qüvvətli bir təsir olmaqla yazıq, fağır,
çoluq-çocuq əlində qalan səhnəmizdə
rusların "Revizor"u qədər ölməz bir
mövqe tutacaqdır".
Elə ilk görsənişlərindən sonra
"Ölülər"in Azərbaycan hüdudlarına
sığmayacağı ehtimalında olanlar haqlı idilər.
"Ölülər" qanadlarını geniş
açdı, çətinlikləri adlaya-adlaya irəlilədi
və çatdığı yerlərdə də heç
vaxt birmənalı qarşılanmadısa, həmişə əleyhdarları
oldusa da, hər dəfə ona verilən ali qiymətlərə
həqiqətən layiq olduğunu sübuta yetirdi.
1925-ci ilin yanvarında "Molla Nəsrəddin"
idarəsi nəşriyyatı "Üçüncü
İnternasional" mətbəəsində "Ölülər"i
ilk dəfə ərəb əlifbasında 3 min tirajla
ayrıca kitabça kimi buraxmışdı, o çağlar
"Kommunist" qəzetinin redaktoru olan Həbib Cəbiyev
(yeri gəlmişkən, Qulam Məmmədli təsdiqləyirdi
ki, həmin nəşrin təşkilçisi də elə Həbib
Cəbiyev olmuşdu) sanballı bir önsöz
yazmışdı və həmin müqəddimədə
1921-ci ildə şahidi olduğu bir əhvalatı yada
salırdı ki, Şuralar İttifaqı ilə dostluq
müqaviləsi bağlamaq üçün Yusif Kamal başda
olmaqla Türkiyə nümayəndə heyəti Moskvaya gedərkən
inqilabdan sonra Böyük Dövlət Teatrında
"Ölülər"ə ilk dəfə oynanarkən
baxmış, "əsərin ümumtürklük
ölçüsündə nə qədər orijinal və
klassik olduğundan son dərəcə məmnun"
qalmışdılar.
"Ölülər"də Mirzə Cəlilin
qüdrəti onda idi ki, bu əsərdəki bir nəfərin
dilindən səslənən hər fikir minlərlə
ağızdan çıxmış kimi qavranılır, bir və
bir neçə ailə ətrafında, bir kənddə cərəyan
edənlər ucu-bucağı görünməyən iri
coğrafiyada baş verən kimi qəbul edilirdi. Kefli İskəndərin
ilk və əvəzsiz ifaçılarından olmuş
Mirzağa Əliyev xatırlayırdı ki, bu surəti
yaradarkən Cəlil Məmmədquluzadənin
naxçıvanlı bir vəkili əsas
götürdüyünü eşidibmiş. O səbəbdən
də 1916-cı ilin əvvəllərində, Tiflisdə
Müsəlman Dram Cəmiyyətinin binasında Mirzə Cəlil
aktyorlarla söhbət əsnasında əsərin Bakıda
oynanacağını xəbər verəndə və
Mirzağa da ona İskəndər surətinin
tapşırıldığını biləndə, çox
illər sonra etiraf etdiyi kimi, oradan birbaşa mənzilinə gələrək
yığışır, həmin vəkili tapmaq niyyəti ilə
Naxçıvana yola düşür. Ancaq Varşava
Universitetinin Hüquq fakültəsini bitirmiş, vəkillik
edən Paşa ağa Sultanovla görüşmək ona nəsib
olmur, çünki yerli həvəskar artistlərdən
öyrənir ki, o vəkil artıq vəfat edib. Lakin gəlməsinə
gəlmişdi, ona görə də Paşa ağanı şəxsən
tanıyanlardan onun davranışları, rəftarı,
özünəməxsus xüsusiyyətləri haqda məlumatlar
toplayır. Artıq Bakıda, tamaşaya hazırlıq
günlərində rol üzərində necə ciddi işləməsinin
göstəricisi olan bu səfəri, Naxçıvanda
görüb-eşitdikləri barədə Mirzə Cəlilə
fəxrlə söz açanda Mirzağa Əliyevi pərtlik
gözləyirdi. Çünki onun bu hərəkətindən
narazı qaldığını, ümumiləşdirilmiş
bir surətə belə fərdi yanaşmanı xeyli bəsit
saydığını Mirzə Cəlil gizlətmədən
dərhal onun üzünə deyir: "Mirzə Cəlil vəkilin
dalınca Naxçıvana getdiyimdən xəbərdar deyildi.
Mən bu əhvalatı açıb ona söyləyəndə
dedi ki, dostum, Naxçıvana getməyinə sözüm
yoxdur, bu, sənin xüsusi yaradıcılıq işindir.
Ancaq Kefli İskəndər rolunu oynamaq üçün
müəyyən bir adamı təqlid etmək səhvdir.
Çünki mən çox elə vəkilləri
müşahidə etmiş, onları ümumiləşdirmiş,
öz Kefli İskəndərimi yaratmışam".
"Ölülər" nə qədər ümumiləşdirən
olsa da, hər halda onun doğulmasının təkan nöqtəsi
Mirzə Cəlilin daha yaxından və dərindən bələd
olduğu Naxçıvandan gəlirdi, təbii ki, həmin
mühitin daha bariz duyulduğu əsər ilk dəfə
Naxçıvanda nümayiş etdiriləndə özlərini
tanıyanlar az olmamışdı. Əbəs deyil ki, 1918-ci
ilin martında Naxçıvandakı "Rüşdiyyə"
məktəbinin nəzdindəki "İmdad" adlı həvəskar
dram dərnəyi üzvlərinin "Ölülər"i,
şəhadətlərə görə, misilsiz məharət
və uğurla oynamasından sonra əks qüvvələr
gecə vaxtı hücum edərək tamaşa göstərilmiş
binanı xarabazara çevirmiş, məktub da qoyub
getmişdilər ki, hələlik binanı
dağıtdıq, amma bu əsəri bir də ortaya
çıxarmış olsanız, özünüzü də
öldürəcəyik.
1921-ci ilin 1 may axşamında "Ölülər"
Təbrizdə tamaşaya qoyulandan az sonra xurafat əhli şəhər
mədrəsəsinin 400 tələbəsini dəyənəklərlə
silahlandıraraq Mirzə Cəlil və yoldaşlarının
üstünə qısqırtmışdısa, bu da əsərin
nişan aldıqlarını yandırıb-yaxaraq
cızdaqlarını çıxara bilməsinə əlavə
sübutdur.
"Ölülər" bu təhər qeyzləndirməyi,
hövsələdən çıxarmağı
bacarmışdısa, demək, məqsədinə
çatmışdı, demək, quşu gözündən
vurmağa müvəffəq olmuşdu.
Zamandan adil hakim yoxdur, olmayacaq da. Vaxtın məhkəməsindən
isə "Ölülər" bugünəcən
üzüağ çıxdığı kimi, gələcəkdə
də həmişə qalib qalacaq. Ancaq Mirzə Cəlilin bir
para başqa əsərləriylə bərabər
"Ölülər"ə qarşı da əli dəyənəklilərin,
beli revolverlilərin, hökmü itilərin linç məhkəməsi
qurmaq cəhdləri az olmadığı kimi, sovet dönəmində
zəmanənin bolşevik qırımına uyğun olaraq əsl
məhkəmələr də qurulmuşdu. Belə mühakimələrin
xoşməramlılarından biri haqqında 1923-cü ilin
fevralında "Maarif və mədəniyyət" xəbər
verirdi. Darülmüəllimat binasında, indiki
Əlyazmaları İnstitutunda qurulmuş həmin məhkəmədə
iddiaçılar Cəfər Cabbarlı və Əbdül
Əbdülzadə, müdafiəçilər Hüseyn Sadiq,
Əhməd Cavad, Hənəfi Zeynallı olmuşdu. Sonralar Azərbaycan
Yazıçılar Birliyinin ilk sədrlərindən
olmuş Seyfulla Şamilov həmin məhkəməni gözləriylə
görübmüş. İclas salonunda Abbasmirzə Şərifzadəni,
Rza Darablını, Mirzağa Əliyevi, Əliskəndər Cəfərovu
gördüyünü də xatırlayır, yada
salırdı ki, arxa cərgələrdən birində adəti
üzrə əlini üzünə söykəyib əyləşmişdi,
ondan sonrakı sırada da Mirzə Cəlil oturmuşdu.
O məhkəməyə toplaşanlar hamısı
Mirzə Cəlilin xeyirxahları, dostları, xətrini əziz
tutanlar idi, təbii ki, o gün çıxarılan hökm
müəllifə haqq qazandıran idi. Lakin illər sonra Mirzə
Cəlilə qarşı prokuror ədalı, ittihamedici,
qaralayıcı məqalələr də yazılacaq,
hökmlər də çıxarılacaq ki, indi həmin
qatmaqarışıq əyyamların müstəvisində
onları bir də mütaliə edərkən bunu da
düşünürsən ki, Ustadın həyatı bir
neçə il də davam etsəydi, o, 1937-yədək
yaşasaydı, sovetin cəza maşını onu, heç
şübhəsiz ki, "troyka" deyilən əzazil
üç nəfərlik ölüm məhkəməsinin
amansız hökmünə də məruz qoyardı. O halda
adı da, yazdıqları da, "Molla Nəsrəddin" də
illərlə yeddi qat qıfıl altında qalar, "xalq
düşməni" imzalı miras insanlarımızdan 20 ilə
yaxın müddətdə uzaq tutular, olsun ki, həmin məhkəmədən
qabaq da yaradıcılığının bir para nümunələri,
əlyazmaları, fotoları, məktublaşmaları
qayıdışsız məhv edilərdi. Görün şərəflilərimiz
hansı qəddar dövrlərdən keçiblər ki, indi
onların hətta erkən ölümünə də haqq
qazandırırıq.
Tarixin kinayəsi ilə o cür irinlə dolu
yazılardan biri elə Moskvada "Literaturnaya qazeta" və
"Novıy mir" jurnalında 1937-ci ildə, Mirzə Cəlilin
"Ölülər"in də daxil edildiyi
"Seçilmiş əsərləri"nin həmin il
SSRİ paytaxtında nəşri dolayısınca dərc
edilib. L.Klimoviç soyadlı müəllif bu pyesi "xalqa
zidd əsər", Cəlil Məmmədquluzadəni isə
"burjua millətçisi" adlandırır.
Mirzə Cəlil həyatda olsaydı, həmin ifadələrin
hər biri onun adına yamaq edilərək bəxtini qara
yazacaq, ömrünü şikəst edəcəkdi.
Ölüb canını qurtarmışdı...
Mirzə Cəlil yazdıqlarının insanlara
olduğu kimi, səhvsiz, müdaxilələrsiz, dilinə,
üslubuna toxunulmadan, bircə kəlməsini belə dəyişmədən
çatmasını umurmuş.
Unudulmaz Qulam müəllim bunları da
unutmamışdı ki, 1925-ci ildə "Ölülər"
ilk dəfə nəşr ediləndə o, mürəttibmiş,
mətni səhifə-səhifə yığdıqca oxunub təshih
edilməsi üçün Məmmədəli Sidqiyə
verirmiş, Mirzə Cəlil özü də hər dəfə
mətbəəyə gələndə işin gedişiylə
maraqlanar, ayrı-ayrı vərəqləri götürüb
oxuyarmış. Deyir, o vaxt mətbuatımızda "iştə",
"əvət", "gəliyoruz", "gediyoruz" kimi
sözlər dəb düşübmüş: "Mirzə Cəlil
hər dəfə mətbəəyə gələndə, ya
da mən redaksiyaya gedəndə dönə-dönə
tapşırardı ki, məbada-məbada "Ölülər"də
"gəliyoruz, gediyoruz"lara yol verilsin. Bax gör necə
yazmışam, elə də yığ.
O vaxt mən onun sözlərinə qulaq asar və
dediklərinə əməl etməyə
çalışardım. Lakin indi həman kitabı nəzərdən
keçirəndə görürəm ki, Mirzə Cəlilin
nigarançılığı yersiz deyilmiş. Kitabın
orfoqrafiyasına kim isə əl qatmışdır".
Alnına böyüklük yazılmışlara onların
yanında hər baxımdan yüz qat cılız və aciz
olanlar yekəliklərini nümayiş etdirməkçün
bəzən əllərinə düşmüş müvəqqəti
səlahiyyətlərdən də yararlanaraq ağıl
öyrətməyə, düzəliş verməyə,
öz qandıqlarına uyğun olaraq daha düzgün hesab
etdikləri yolla getməyə də yönəltməkçün
əlləşiblər. Ancaq o qəbil UCAları yolundan
döndərməyə, çevirib başqa cür etməyə,
təshihə məruz qoymağa hətta çox zaman qəzavü
qədər, tale belə nail ola bilməmişsə, mənəviyyat
tümüklərinin də cəhdlərinin boşa
çıxacağı labüd idi.
O ölməzlər, elə həmin qafilədən
olan Mirzə Cəlil də əmin idi ki, sabaha doğru
çatan sözünü onsuz da hər kəs öz
gözüycə, öz ürəyiycə, öz
ağlıyca oxuyub duyacaq, anlayacaq, günəş
işığında bərq vuran qiymətli daş-qaş
kimi onun yazdıqları da vaxta və insana uyğun olaraq hər
yeni nəslə və təzə insana bir başqa cilvədə
gülümsəyəcək.
Hələ sıradan olan insanlar qalsın bir tərəfə.
Söz ki "Ölülər"dən gedir, elə bu mətləbi
də o tərəfə çevirək. Uzaq olmayan
dövrün - 1960-1970-1980-ci illərin azərbaycanlıları
"Ölülər"də Məlik Dadaşovun Şeyx Nəsrullahı
necə ustalıqla ifa etməsinə heyran idilər və
"bundan daha yaxşısı olmaz" deyirdilər. O
tamaşalar qalıb dünənlərdə, amma 1992-ci ildə
Tofiq Tağızadə "Ölülər"i "O
dünyadan salam" adlı bədii film kimi
ekranlaşdırıb və Məlik Dadaşovun fövqəladə
məharəti kadrlarda aydınca görünməkdədir, həmişə
də görünəcək. Teatr tamaşası isə hər
dəfə yenidir, təəssüratları yaddaşlara
çökdürərək elə o axşam da uçub
gedir.
Mirzə Cəlil mətnini Məlik Dadaşov o sayaq
oxumuş, o təhər dərk etmiş, o cür duymuşdu və
buna özünün misilsiz canlandırma istedadını da əlavə
edərək hər kəsi inandıran parlaq surət
yaradırdı.
Görkəmli aktyor və rejissor Rza Təhmasib Məlik
Dadaşovun da Şeyx Nəsrullahını
görmüşdü, İsmayıl Hidayətzadəninkini də,
başqa bir neçə tanınmış aktyorumuzunkunu da,
Əliqulu Qəmküsarınkını da.
Danışıqsız üstünlüyü Qəmküsara
verirdi. Bütün başqa səbəblərdən
savayı, bunu həm də onunla izah edirdi ki, Qəmküsar
islamı, onun ehkamlarını mükəmməl bilirdi,
yuxarı ruhani təbəqəsinin həyatına, hərəkətlərinə,
düşüncələrinə içəridən bələd
idi, ərəbcəni də yaxşı bilirdi və tələffüzündən
tutmuş nitqindəki şeyxanə amirliyə, oyunundakı
valehedici təbiiliyədək çox amillər onu fərqləndirir,
əvəzsiz, təkrarsız edirdi.
Şəkk yox ki, gələcəkdə
"Ölülər" mətninin vaxta və şəraitə
münasib elə oxunuş, yozum və təqdimatları ola bilər
ki, indiyəcən olmuşlardan da gözəl alınsın.
Mirzə Cəlil mətninin daxili nəhayətsizliyi və
çox cür oxuna bilənliyi belə imkanı hər yeni
oxusundan heç vaxt əsirgəməyəcək.
Əziz Ustad, cəfakeş Mirzə Cəlil! Siz
yalnız yaşadığınız həyatda yox, Haqqın
dərgahına qovuşandan sonra da nələr görməmisiniz,
başınızdan hansı qovğalar keçməyib?!
Artıq XXI əsrdə müasir
yazıçılarımız arasından Mirzə Cəlili ədəbi
oğurluqda suçlandırmaq istəyənlər də
tapıldı və ləkələmək üçün də
onun şah əsərindən - "Ölülər"indən
yapışdılar. İddia etdilər ki, bəs
"Ölülər" heç də orijinal əsər
deyil, Cəlil Məmmədquluzadə guya belçikalı
dramaturq Moris Meterlinkin "Müqəddəs Antoninin
möcüzəsi" adlı pyesindən süjeti, dramaturji
xətti, keçidləri mənimsəyərək sadəcə
adları dəyişib. Bunca abırsız-həyasız
ittiham! Həqiqətən, elə bir əsər var, XX
yüzilin əvvəllərində, doğrudan da, rus dilinə
tərcümə edilib, onu 1906-cı ildə Meyerxold Rusiyada səhnələşdirib
və "Tovarişestvo russkoy dramı" sənət
birliyi onu hətta Tiflisdə də göstərib, bu tamaşa
haqda həmin çağlarda "Tiflisskiy teleqraf" qəzeti
xəbər də dərc edib. O vaxtlarmış ki, Mirzə Cəlil
və "Molla Nəsrəddin" ilk addımlarını
atırmış, ardıcıl sıxıntılar, təqiblər,
təhdidlərlə qarşı-qarşıyaymış, hətta
küçəyə də ehtiyatla
çıxırmış. Vaxtı harada idi ki, rus dilində
Tiflisdə yolüstü bir dəfə göstərilən və
heç də məşhur olmayan bir əsərin
tamaşasına da gedə?! O biri yandan da, hətta Mirzə Cəlil
o əcnəbi dramaturqun əsərindən təsadüfən
xəbərdar olmuş olsaydı belə, o pyeslə
"Ölülər" arasındakı bağlantı ən
yaxşı halda məşhur el lətifəsindəki
"Sevgilim dağın başında inək
sağırdı, əgər o məni sevmirsə, bəs inək
mənə niyə baxırdı?" hekayətindəki məntiq
qədərdir.
Yaraşarmı ki, günümüzün vicdanı
olan bir azərbaycanlısı sensasiya, ucuz şöhrət
naminə hansısa faktların təsadüfi, uzaqdan-uzağa
bənzərliyini əsas götürərək bədxahca nələrisə
bir-biri ilə zorla uyğunlaşdırmağa
çalışsın, milli varlığımızın
sütunlarından olan bir uca ada böhtan atmaq kimi ağır
yükün altına girsin?!
Əvvələn, belçikalı
yazıçının əsərində həqiqətən
bir ruhaninin adam diriltmək cəhdindən söhbət gedirsə
də (arasaq, söz yox, dünya ədəbiyyatında
ölmüşə həyat verməklə bağlı
başqa süjetlərə də rast gəlməyimiz
mümkündür), Mirzə Cəlildə süjet xətti də,
obrazlar şəbəkəsi də, qaldırılan məsələlər
də büsbütün başqadır və Cəlil Məmmədquluzadənin
əsərindəki ictimai-siyasi siqlətin yanında o pyes
xeyli sönük təsir bağışlayır. Meterlinkin
ikipərdəli pyesində belə bir əhvalatdan bəhs
edilir ki, Qortenziya adlı yaşı səksənə
çatan bir qadın vəfat edir, varislik sevdalı qohum-əqrəba
mərhumənin mənzilinə yığışır, bu
ara mərasimə gəlib çatan Müqəddəs Antoni
qadını dirildəcəyini söyləyir və
toplaşmış qohumlar xanım Qortenziyanın
xortlayacağı təqdirdə göz dikdikləri mirasın
əldən çıxacağından təşvişə
düşərək Müqəddəs Antoninin üstünə
tökülüşür, onu "ağlıkəm,
içki aludəsi, avara" deyə qovurlar. Ancaq Antoni qiyafəsini
dəyişib gəlir, doğrudan da, qadını dirildir, amma
axirətlə bağlı sirləri açıb
danışa bilməməsi üçün onu lal edir. Nəticədə
isə hər halda Antoni deyən olmur. Mirası əldən
qaçırmamaqçün vurnuxanlar polis
çağırıb ölüdirildəni həbs etdirirlər,
Qortenziya da təzədən ölür, işlər
düşür mirasdan pay qoparmaq istəyənlərin
arzuladığı məcraya.
Biçarə Mirzə Cəlili parlaq "Ölülər"inə
görə diriliyində yetərincə incitmişdilər,
indi də hansısa nakəslər bu və buna oxşar
sancmalarla məzarında rahat yatmasına macal vermirlər.
1916-cı ilin 29 aprel günündə
"Ölülər"in ilk dirilişinin - birinci dəfə
göstərilməsinin ən xoş anlarını əks
etdirən, o axşamı olduğu kimi canlandıran bir şəkil
var. Foto-şəkil deyil, ancaq elə bir foto qədər
inandırıcıdır. 1970-ci ildə fırçaya
alınmış o tablonu seyr etdikcə görürəm ki, həmin
axşam barədə mən nə bilirəmsə, rəssam
Böyükağa Mirzəzadə də onların
hamısından agahmış. Yəqin ki, ən əvvəl
həmin axşamla bağlı bütün xatirələri
oxuyub. Əks təqdirdə heç cür belə gerçəkçi
lövhə yarada bilməzdi. Tamaşa bitib və xoşbəxt
Mirzə Cəlil təbrikləri qəbul edir. Onu məhəbbətlə
əhatələyənlər odövrkü Azərbaycan mədəni-mənəvi
həyatının zirvələridir: Nəriman Nərimanov, Nəcəf
bəy Vəzirov, Əbdürrəhim bəy Haqverdiyev, Sultan Məcid
Qənizadə, Hüseyn Ərəblinski, Əliqulu Nəcəfov,
Hüseyn Cavid, Seyid Hüseyn, Üzeyir Hacıbəyli...
Seyid Hüseynin "Ölülər"in ilk dəfə
oynandığı 1916-cı ilin 29 aprel axşamı haqda
yazısı bu cümlə ilə başlayırdı:
"Cümə günü Tağıyev teatrı bir ədəbiyyat
bayramı keçirdi".
Bu tablo o ədəbiyyat bayramının tarixlə ləbələb
anlarına əbədiyyət bağışlayandır.
1931-ci ildə Mirzə Cəlilin 63 yaşı
vardı. Barmaq hesabı ilə bundan dörd il qabaq 59
yaşındaydı. Belə yaşı bir çoxları hələ
ikinci cavanlıq sayır. Hər halda heç kəs bu sinni qocalıq
hesab etmir. Amma Mirzə Cəlil məsləkdaşı
Əzim Əzimzadəyə Xalq rəssamı adı alması
münasibətilə 1927-ci ilin mayında göndərdiyi təbrik
məktubunu belə imzalayırdı: "Sənin qoca
yoldaşın, "Molla Nəsrəddin" məcmuəsinin
həmişəki müdiri və baş mühərriri Cəlil
Məmmədquluzadə".
Bu, Mirzə Cəlildir. Hər zaman olduğu kimi, yenə
bu sözündə də haqlıdır. Həmişəki
Mirzə Cəlil elə hər yaşında qoca olmuşdu.
Qoca, aqil, dərin.
1931-ci ilin son dekabr günlərinə aidsə
başqa xəbər var - Azərbaycan Dəmir Yolu İdarəsi
Cəlil Məmmədquluzadəyə Bakı-Sabunçu
qatarında pulsuz hərəkət etmək üçün
xüsusi bilet verib. O qatarda o biletdən istifadə etmək
Mirzə Cəlilə nəsib olmayıb. Lap az ötəcək,
başlanan növbəti ilin ilk yanvar günlərində Mirzə
Cəlil həyatını itirəcək. Amma ondan yadigar qalan
sənədlərin arasında həmin bilet də var. Qatarlar
yenə, keçmişlərdə olduğu kimi, Bakıdan
Sabunçuya, Sabunçudan Bakıya hərəkət edir. Təbii,
o yadigar bilet daha həmin qatarlarda işə yaramaz. Ancaq o
qatarda haqq ödəmədən hərəkət etməyə
icazə verən o bilet də indi başqa düşüncələr
oyadır: Mirzə Cəlil bu xalqın və yurdun ən uzaq gələcəklərinə
də istənilən anda səfər etmək haqqını
özü qazanıb. Bu haqqı ona xalqa bəslədiyi sonsuz
məhəbbət, bu xalqın xoşbəxt olması naminə
ömrü boyu apardığı mübarizələr, millətinə
və yurduna yadigar qoyub getdiyi solmaz miras
bağışlayıb.
...1932-ci ilin 5-6 yanvarında Bakı qəzetləri
qara çərçivəli vida yazıları ilə
çıxır. Mətbuat xəbər verirdi ki, yanvarın
4-də görkəmli Azərbaycan ədibi Cəlil Məmmədquluzadə
vəfat edib.
Yeni başlanmış ilin ilk günlərində Mirzə
Cəlil yataqda idi. Ancaq yanvarın 2-də də, yanvarın
3-də də yataqdan qalxmışdı, küçəyə
çıxmışdı, bir qədər gəzib-dolaşaraq
qayıtmışdı.
Evə sığmırdı, sanki
çıxmışdı ki, Bakı küçələri
ilə son dəfə addımlasın, əziz şəhərlə
vidalaşsın.
Ancaq Mirzə Cəlil Azərbaycan ədəbiyyatı
tarixində və Azərbaycan insanının mənəviyyatında
elə bir yol açıb ki, bitəcəyi olmayan o
KÜÇƏ ilə həmişə addımlayacaq.
Və bizlər - Cəlil Məmmədquluzadənin nəvə-nəticələri
də onun açdığı və onun adı ilə
bağlı küçədən nə qədər
çox keçsək, içəridən o qədər zənginləşəcəyik,
sabahlar qoynunda daha inamlı olacağıq.
...1923-cü ildə sanki Şura hökumətinin Mirzə
Cəlilin də, "Molla Nəsrəddin"in də
üzünə bütün qapıları
açdığı çağlarda qəzetlərdə bir
başqa xəbər də dərc edilməkdə idi ki,
"Molla Nəsrəddin"in şərəfinə
buraxılması nəzərdə tutulan təyyarə
üçün vəsait toplanmasına başlanılıb.
1923-cü ilin 28 avqustunda "Kommunist" qəzetində
Ruhulla Axundov "Məsud" təxəllüsü ilə
imzaladığı "Molla Nəsrəddin" aeroplanı"
adlı məqaləsində çağırırdı:
"Var qüvvəmlə bütün qələm
arxadaşlarımı, firqə məsləkdaşlarımı
və ümum əmələ-kəndli yoldaşları dəvət
edirəm ki, Azərbaycan zəhmətkeşlərinin mədəniyyəti
uğrunda can çəkişmiş mübarizlərin
adını əbədi surətdə qeyd etmək
üçün "Molla Nəsrəddin" aeroplanına
ianə toplamağa başlasınlar".
Mirzə Cəlil o təyyarə ilə bağlı
ayrıca bir məqalə də yazaraq "Molla Nəsrəddin"in
1923-cü il 14 iyul sayında dərc etmişdi: "Gündəlik
poçt ilə jurnalımızı kəndlərə
göndərəndə bu gün Bakıdan sübh tezdən
çıxanda sabahı günü ancaq Qazaxa, Qaryaginə və
Gəncəyə çatır, belə olanda "Molla Nəsrəddin"
jurnalının Bakıdan mahallara gedib çatmağı 24
saat çəkir.
...İndi dəxi gündəlik qəzetlər kəndlilərin
iştahasını söndürə bilməz və lazım
gəlir ki, kəndlərə qəzet karvanı bir dəfə
səhər daxil ola, bir dəfə günorta daxil ola, bir dəfə
də axşam daxil ola. Məlumdur ki, bunun öhdəsindən
bircə aeroplan gələr ki, jurnalımızı
götürsün göyə və Azərbaycan kəndlərinə
yarpaq kimi səpələsin və kəndlilər də
bir-birini basa-basa qapış-qapış edib oxusunlar.
İş ki belə oldu, biz bununla elan edirik ki,
"Molla Nəsrəddin" adında bir aeroplan bina etmək
qəsdinə gəlmişik və ümidvarıq ki, tez vaxtda
camaat tərəfindən idarəmizə o qədər
qızıl pul daxil ola ki, biz də bir aeroplan ala bilək".
Ayrı-ayrı insanlar da, müəssisələr də
"Molla Nəsrəddin" aeroplanı üçün
açılmış hesaba vəsaitlər keçirirdilər.
1924-cü ilin 10 dekabrında "Kommunist" qəzeti xəbər
verirdi ki, əməkçi xalqdan toplanmış ianələr
hesabına istehsal edilən "Molla Nəsrəddin" adlı
təyyarə bu günlərdə Bakıya gətiriləcəkdir.
Gətirilmişdi də, Bakı səmasında o təyyarə
dövrələr vurmuşdu da. Sorağı mətbuat qoruyub
saxlayıb. 1925-ci il iyulun 21-də "Kommunist" qəzeti
yazırdı ki, ayın 20-də "Molla Nəsrəddin"
adına təyyarə Bakıya gətirilmiş, Hava
Donanması və Kimya Dostları Cəmiyyəti sədri
Çingiz İldırım yoldaş və Hərbi
İnqilab Şurası üzvü Əliheydər Qarayev
formulyar təslim edib musiqi sədaları altında Binəqazı,
Suraxanı və Bülbülə işçiləri
nümayəndələri "Molla Nəsrəddin" təyyarəsinə
minib şəhərin üzərində on dəqiqə
uçmuşdur...
O vaxt istehsal olunmuş "Molla Nəsrəddin" təyyarəsi
ömrünü yaşayıb, qalıb tarixin dünənində.
Amma Cəlil Məmmədquluzadə də, onun
yaratdığı "Molla Nəsrəddin" də, Mirzə
Cəlilin silahdaşı olmuş mollanəsrəddinçilər
də həmişə uçuşda olan bir təyyarədir.
Xalqın sevgisindən güc alan bu təyyarə həmişə
fəzalarda qalacaq, daim gələcəyin ənginliklərinə
doğru uçacaq!
5 iyul 2024
Rafael HÜSEYNOV
Akademik
525-ci qəzet .- 2024.- 20 iyul,№(127).-S.16-17.