Söz
azadlığı və jurnalist ləyaqəti
Ölkəmizdə hələ də diffamasiya barədə
hüquqi akt olmadığından, uydurma vasitələrlə
adamları biabır etmək, şəxsiyyətin ləyaqətini
alçaltmaq metodu sayılan böhtan bilavasitə cinayət əməli
hesab olunur və onun müəllifi qanunla cəzalandırılır.
Ona münasibətdən asılı olmayaraq qanunun sərtliyi
öz varlığını yaddan çıxarmağa qoymur,
onun ruhuna və hərfinə qeyd-şərtsiz riayət etmək
zərurəti yaranır. Qədim yunan filosoflarından biri
iddia edirdi ki, qanun bizə korluq bəxş edir. Korluq deyəndə,
yəqin, onu nəzərdə tuturdu ki, qanun hadisələrə
qiymət verdikdə, bizim görmə, baxış
bucağımızı daraldır, onlara yalnız
özünün tətbiq etdiyi kiçik prizmadan
yanaşmağı tələb edir.
Jurnalist şərə, qüsurlara, anaxronizmə, cəmiyyətin
məsamələrinə nüfuz edən bəlalara qarşı
biganə qalmamalıdır. Lakin onun bu mövqeyi şəxsi ədavət,
kin, qəzəb müstəvisinə keçməməlidir.
Bu barədə jurnalist üçün lakonik deviz
böyük tarixçi Tatsitin sözlərində öz əksini
tapmışdır: "Sine ira et studio" - "Qəzəbsiz
və qərəzsiz". Yəni qabaqcadan hasil olan
yanlış qənaətə əsaslanmamaq, əvvəlcədən
səhv istiqamətlənmiş rəyə uymamaq. Lakin bu o demək
deyildir ki, həmin müddəa qələm əhlini ətalətə,
eybəcərliklərə qarşı biganəliyə,
ümumən, laqeydliyə səsləyir, "mənim komam kənardadır"
prinsipi ilə yaşamağı təlqin edir. İti söz,
qüsurları qamçılayan məqalə cəmiyyəti
mürgüləməyə qoymur, adamları qüsurlara
qarşı həssas olmağa, dözümsüzlüyə
çağırır. Sokrat deyirdi ki, mozalan sancması ilə
atları qaçmağa məcbur etməklə, onları
kökəlməyə, tənbəlləşməyə
qoymur. O, afinalıları da belə harınlaşmaqdan
uzaqlaşdırmaq üçün sözlə onların
sancdırılmasını məqsədəuyğun hesab
edirdi. Jurnalistlər də məhz belə nəcib məqsədlərə
xidmət edən əsgərlər hesab edilməlidir. Axı
qüsurların tənqidi onların böyüməsinin,
metastaz verməsinin və daha ağır fəsadlara yol
açmasının qarşısını alır, bu
baxımdan ictimai sözün, qələm məhsulunun olduqca
faydalı bir fəaliyyət növünə çevrilməsindən
xəbər verir, ən azı mənəvi saflaşma
prosesində onun fəal iştirakını danılmaz edir.
Jurnalist, qələm əhli öz yaradıcı fəaliyyətindən
ilham almalıdır, onun məhsuluna narazı qalan seqmentin necə
qiymət verməsindən asılı olmayaraq, bütün
enerjisini bu işə həsr etməlidir. O, qələmindən
çıxan məhsulla uzun müddət sönməyən
şamı yandırmağı ilə fərqlənməlidir.
Amerikan yazıçısı Cek Londonun dediyi,
darıxdırıcı planet olmaqdansa, parlaq meteor olmaq
yaxşıdır, insan heç də sadə
mövcudluğu ilə razılaşmamalı,
yaşamalıdır, sözlərini, daim axtarışda olan
jurnalistlərə aid etmək istərdim. Jurnalist qələminin
yetişdirdiyi bəhrə ilə, uçanda işıq
saçan meteor təəssüratı yaratmalıdır, bu,
onun həyatını, çox arzusunda olduğu kimi, daha
maraqlı edə bilər. Buna sadəcə olaraq can atmaq,
çalışmaq lazımdır.
Nöqsanların tənqidi, həm də onlardan vəcdə
gəlmək, neqativ halların daim mövcud olmasını
arzulamaq eybəcərliyi deyildir. Jurnalisti heç vaxt vampir
keyfiyyətləri cəzb etməməlidir, cəmiyyətin bədəni
üçün zəlinin olması isə vacibdir,
çünki o, pis qanı, qanın tərkibini zibilləyənləri
sorub, təmizləməklə, orqanizmin sağalmasına
kömək edir. Vampir, qaniçən, qansoran isə lap qədimdən
indiyədək mənfur əməlin təcəssümü
kimi nəzərdə tutulur.
Jurnalist öz istəyindən asılı
olub-olmayaraq, yazılarında həm də öz şəxsiyyətini,
fərdi düşüncələrini, daxili aləmini əks
etdirir. Yazıda, məqalədə nəzərə
çarpan kin, nifrət çox hallarda zəiflikdən,
gücsüzlükdən, natamamlıqdan xəbər verir.
Müəllif hücum edəndə özünü cəngavər
qiyafəsində gördüyü halda, iddialarını,
ittihamlarını müdafiə etmək anı gələndə
bu zahiri igidlikdən əsər-əlamət qalmır. Ona
görə də bir çox hallarda irəli sürülən
fikirlərin, ideyaların bütövlüyünə,
davamlılığına, sarsılmazlığına
şübhələr yaranmağa başlayır. Xətaya yol
verildikdən sonra, suda boğulan adam kimi çabalamaq, əsassız
olaraq kömək, aman diləmək fayda vermir. Böyük
natiq Siseron Milonun məhkəməsində vəkil kimi
iştirak edərkən, buradakı məşhur nitqində
müdafiə etdiyi şəxsin özünü necə ləyaqətlə
apardığını, güzəşt barədə
xahişi dilə gətirməkdən uzaq olduğunu
vurğulayaraq, məhz belə mərdanə
davranışına görə ona mərhəmətlə yanaşmasını
israr edir və belə bir müqayisəni yada salırdı
ki, döyüşdə uduzan qladiator nəzərləri,
yalvarışı ilə adamlardan aman dilədikdə, bir
qayda olaraq tamaşaçılar ona rəhm etmək istəmir
və barmağının aşağı yönəlmiş
işarəsi ilə ölümünə razı
olduqlarını bildirdikləri halda, məğlubiyyətdən
sonrakı ölüm ərəfəsində belə, öz ləyaqətini
qoruyub saxlayan, mərhəmət ummayan qladiatorun sağ
qalması hökmünü verirlər. İnsanın sifətini,
bəzən həyatını da heç də
yalvarış, aman diləmək deyil, ləyaqət, mərdlik
müdafiə edir. Səhvin etirafının özü də
ləyaqətə şübhə yaratmır.
Ölkənin müxalifət mətbuatının diqqətindən
düşməyən və təqdir olunmalı ən aktual
mövzulardan biri korrupsiya və ona qarşı mübarizə
məsələsidir. Korrupsiya, rüşvətxorluq dəhşətli
bəladır və onların zərərsizləşdirilməsi,
bu hidranın çox saydakı başlarının kəsilməsinə
cəhd edilməsi sahəsində hər bir kəsin və ya
institutun xidməti, töhfəsi ümumi rəğbət
mükafatını almalıdır. Hər bir
korrupsiyalaşmış məmurun ifşasına xalqın,
dövlətin mənafeyi baxımından yanaşılmalı,
onların haqqında rəy formalaşdırılanda kastalar məsələsi
ortaya atılmamalıdır, ona qələm vasitəsilə
Qay Yuli Sezarın tətbiq etdiyi qalxanlardan qurulan
"tısbağa" müdafiə çanağı
düzəldilməməlidir. Dəlillər bu zirehi bir andaca
deşib, sıradan çıxara bilir. Korrupsiyaya görə
cəzalandırılanları "quzu" libasına geyindirmək,
ümumən bu yaramaz ünsürlərə qarşı
mübarizənin effektini azaltmağa xidmət edir. Axı
şəri cəzalandırmaq vacib olduğu kimi, yalnız
xeyiri mükafatlandırmaq lazımdır. Bu məsələdə
buraxılan səhv sağlam cəmiyyətə xələl gətirir.
Şərə qarşı hər bir hücum, həm də
xeyiri müdafiə etmək vəzifəsini yerinə yetirir.
Yaxşı məlumdur ki, rüşvətxorluq cəmiyyət
üçün şər nümunəsidir, bəladır.
Rüşvətxor məmurun "xidmətində" olmaq, cəzalandırılanda
onu müxtəlif yollarla müdafiə etməyə girişmək,
həmin bəla üçün şərait yaratmaqdan
başqa bir şey deyildir. Həbs olunmuş məmurların
mühakiməsi, onların qanunsuz yolla əldə edilmiş
iri mülkiyyətə, ağlasığmayan var-dövlətə
sahib olduqlarını, çox sayda evlərə, bahalı avtomobillərə
malik olduqlarını aşkara çıxarır. Onlardan
heç biri böyük imkanları müqabilində heç
vaxt cüzi bir xeyriyyəçiliklə də məşğul
olmur, imkansız hansısa ağır xəstənin müalicəsinə
maddi yardım göstərmir, yoxsul ailələrə, xəstə
uşaqların valideynlərinə və qocalara kömək əli
uzatmır. Nadir bir misal odur ki, Türliyədə yaşayan azərbayacanlı
varlı iş adamı ağır xəstəliyə
tutulmuş öz yerlisi olan müğəninin böyük
müalicə xərclərini öz üzərinə
götürmüşdü. İfşa olunmuş rüşvətxor
məmurların isə kiməsə maddi yardım göstərməsi
faktı məhkəmə proseslərində üzə
çıxmamışdır. Dünyada isə başqa
nümunələrə rast gəlmək mümkündür.
İndiki dövrün ən böyük mafiya təşkilatı
olan Yaponiyadakı Yakudza, ölkə 2011-ci ildə ağır
sunami zərbəsinə məruz qalmaqla, görünməmiş
dağıntılarla üzləşdikdə, öz büdcəsindən
zərər çəkmiş ailələlərə maddi
kömək şəklində və uçmuş
binaların bərpasına böyük məbləğdə
vəsait ayırdı. Yaponlar bir qayda olaraq, itirilmiş
pulları, hətta onlar iri məbləğdə olanda da polis
idarəsi vasitəsilə hökmən yiyəsinə
qaytarmağa çalışır, hətta ehtiyacı olanlar
da, təsadüfən meydana gələn belə asan qazanc
qazanmaq variantını rədd edirlər. Rüşvətxor
isə, hətta o, xırda bir məbləğdə ziyana
düşəndə, şübhələndiklərinin
hamısını dar ağacına çəkməyə
hazır olur. Xeyriyyəçilik filantropiya, insana məhəbbət
nümunəsidir, varlı amerikan iş adamları öz qanuni
gəlirlərindən imkansız vətəndaşlara maddi
kömək üçün xeyli miqdarda pul xərcləyirlər,
başçılıq etdikləri şirkətlər vasitəsi
ilə xeyriyyəçilik tədbirlərində fəal
iştirak edirlər. Rüşvətxorlar isə xalqın
qanını sorduqlarından, onlar qanunsuz əldə etdikləri
vəsait hesabına xeyriyyəçilikdə
iştirak etsələr belə, əslində o, təqdir
deyil, məhkum edilməlidir, saxta, haram xarakter
daşıdığından, onu hətta heç də müsbət hal kimi qiymətləndirmək
olmaz. Vaxtilə ağır bəla olan vəba, taun kimi
pandemiyaların, traxoma, vərəm epidemiyalarının
kökü kəsildiyi kimi, getdikcə iqtisadi uğurlara imza
atan ölkəmizdə, həm də mübarizə tədbirlərinin
güclənməsi hesabına korrupsiya da iyrənc bir xəstəlik
kimi yoxa çıxacaq, ona qarşı mübarizə də zəfərlə
nəticələnəcəkdir.
Korrupsiyaya nifrət edən
qələm əhli başqalarını atəşə
tutmaqla yanaşı, öz ləyaqətinin ləkələnməməsi
qayğısına da qalmalıdır. Jurnalistin, əldə
olunmuş haram vəsaitdən şantaj yolu ilə pay umması
faktları, az da olsa mövcuddursa, bu, biabırçı hal
hesab olunmalıdır. Belə hadisə təkcə dələduzluq,
qanunsuz yolla pul qoparmaq cəhdi olmayıb, həm də
"ovladığı" rüşvətxora, jurnalistin
özünün sirdaş, həmkar olmasıdır. Tarixdə
ilk dəfə türklər atın yəhərinə iki
üzəngi qoymağı icad etdilər, bu, atı sürətlə
çapanda ayaqları üzəngiyə möhkəm söykəyib,
düşməni məhv etmək üçün, ona hədəf kimi sərrast ox atmağa imkan
verirdi. Türk süvarisinə bu ixtira böyük
üstünlük verirdi, bundan əvvəl isə çinlilər
bir üzəngidən istifadəni tətbiq etmişdilər.
Jurnalist də döyüş səhnəsindəki oxatan
süvariyə bənzəyir, çünki köçəri
xalqlar, yürüşə çıxan ordu kimi o da
rahatlıq bilmir, onun da atəşinin hədəfə dəyməsi
üçün qərəzsizlik və təmənnasızlıq
adlanan dayaq nöqtəsinə ehtiyacı vardır. Əks
halda, jurnalistin özünü müdafiəsi çətinləşəcək,
ifşa obyektindən rüşvət şəklində pul
alması, özünə sipər hesab etdiyi söz
azadlığı adlanan qalanın divarlarının bu vaxt
uçması baş verəcəkdir.
Qəzet oxucuya ona məlum olan və olmayan hadisələr,
xalqlar, insanlar barədə məlumatlar təqdim etməklə,
onun biliyi ilə yanaşı, bütünlükdə
dünyagörüşünü də zənginləşdirir.
Xarici aləmlə oxucu arasında əlaqə yaradan
körpü rolunu oynayır, burada oxucu kütləsinin
zövqü, onu yaxşılaşdırmaq ehtiyacı da nəzərə
alınmaqla, əsas götürülməlidir. Onun səhifələrinin
əksər yerini, əlbəttə ki, yeni xəbərlər,
məlumatlar, ölkədə və dünyada baş verən
mühüm hadisələr tutmalıdır. Mətbuat təbliğat
ruporu olmaqdan uzaqlaşıb, daha çox informasiya
daşıyıcısı olmalıdır. Təsadüfi
deyil ki, "qəzet" sözü də XVI əsrdə
Venetsiyada çap olunan məlumatları almaq üçün
verilən "gazzetta" adlı xırda pulun adından
götürülmüşdür. Bu məlumatların təzə
olmasını isə fransız dilindəki "journal"
(jurnal) sözü daha yaxşı ifadə edir, həmin
anlayışın kökü "gün" mənasını
verir və ifadə isə "gündəlik"
sözünə bənzər tələffüz olunur. Fars
dilində də qəzet "ruznamə" adlanır, bu da
"günün xəbəri" mənasını verir.
İngilis dilindəki "newspaper" kəlməsi isə hərfi
mənada "yenilik, xəbər kağızı" mənasını
verir, başqa sözlə, "qəzet" deməkdir.
Oxucunu hər gün yeniləşən, təzələnən
məlumat daha çox cəlb edir, iki-üç gündən
sonra qəzetdə gedən məlumat istehlaka yaramayan məhsula
çevrilir, bir qayda olaraq, tarixi tədqiq edənlərdən
başqa heç kəsi köhnə qəzetlərdəki məlumatlar
maraqlandırmır.
Gündəlik məlumatın prioritetliyi qəzetin
mövzu rəngarəngliyinə xələl gətirməməlidir.
Burada mövzuların çeşidinə sərt bölgü
qoymaq da təşəbbüsü buxovlamaq effekti verir. Məlumatlar
seçimində toxunulmaz hədlərin mövcudluğu da
fayda vermir. Viktoriya epoxası İngiltərəsinin puritan əxlaqı
qaydalarını təqlid etmək də
ağılsızlıq olardı. İngilislər o vaxtlar bunu
əsas götürərək qadınlar və kişilər
üçün kitabları çeşidləyib, ayrıca
düzdülər ki, onları oxumaqda səhvə yol verilməsin,
çünki guya bu, əxlaqa ciddi ziyan vura bilər. Digər
tərəfdən vay o günə ki, çap məhsullarında
tənqid qadağaya məruz qala, tərif isə bezdirci mantra
səviyyəsinə qaldırıla. Ölkəmiz təkamül
qaydasında demokratik islahatlara uğradıqca, yəqin ki, belə
təhlükə birdəfəlik yoxa çıxacaqdır.
(Ardı var)
Telman ORUCOV
525-ci qəzet .- 2024.- 24 iyul, №(129).- S.14.